خەمی ڕۆژانە، نیسان ٢٠١٢

AbasShiwan-عەباس شوان

دووشەممە ٢٠١٢.٤.٣٠ کرێکارانی هەرێم دەکرێن بەقوربانی کێ؟ 

 لە ڕاگەیاندنەکاندا جاروبار ناڕەزایەتی لەم جۆرە دەبینرێت: داوا ده‌كرێت كرێكاره‌ بیانیه‌كان ده‌ربكرێن‌ و له‌جێیاندا كرێكارانی‌ ناوخۆ دابمه‌زرێن و دابنرێن.. لەمەیش خراپتر لە نێو خودی کرێکاراندا باس بکرێت و بیستراوەتەوە تەنانەت گەیشتۆتە شەڕ و پێکدادان! بەڵام کەسان و ئۆرگاکانی نزیکی کرێکاران بە جۆرێکی گونجاوتر بۆ کێشە دەچن و پێیان وایە دەبێت کاری کرێکاران بە بیانی و ناوخۆییەوە ڕێکبخرێت کە جۆرێک لە هاوسەنگی دروست بکات.
     کەسان و تەوژمی دی کە ڕادیکالانە بۆ هەمان کێشە دەچن، عەیبیان ئەوەیە ئەنتەرناسیۆناڵستانە لە مەسەلەکە دەڕوانن، هێندە بە تۆخی و بەرچاوتەنگی دەڕوانن، هیچ حسابێک بۆ کرێکارانی خۆوڵاتی ناکەن و ناهێڵنەوە، داوایان لێدەکەن واز لە کێشە تایبەتییەکانی خۆیان بهێنێت، گوایە کرێکاران چینێکی جیهانیین جیاوازیان نییە و دەبێت هاوپشتی یەکتر بن و بە فیتی چینی سەرمایەداران نەخەڵەتێن و بچن بە گژ یەکتردا.
     لەنێوان ئەو دیدانەدا ئایا هەڵوێستی دروست چییە؟ کرێکارانی هەرێمی کوردستان دەستبەرداری داخوازیی کارکردن بن؟ برسی و بێکار بن و فڵان تێر و کاردار بێت، کاتێکیش داوی هەقی خۆی بکات، وێرای ئەوەی بەرەوڕووی خاوەن کومپانیان و خاوەنکارا ن دەبنەوە، گرووپە سیاسییە ڕادیکاڵەکان لە ژێر بیانووی جۆراوجۆردا لە هەوڵی پەشیمان کردنەوەیاندان؟؟
     هۆی چییە کرێکارانی هەرێم داخوازی وا لە دژی هاوچینەکانیان بەرز دەکەنەوە؟ لەبەر ئەوەی ئاستی تەوەقوعیان بەرزە، بۆیە ڕازی نابن بە مەرجەکانی کارکردنی زۆرێک لە کومپانیا و خاوەنکاران، هەر بۆیە ئەوان زیاتر کار بە کرێکاری بیانی دەدەن و دەکەن.
     ئایا ئەو پۆلەتیکایە گونجاو تر نییە کە داوای هاوسەنگی لەنێوان هەردوو بەرەی ناکۆکی چینک دەکات، بێ ئەوەی لایەک لەسەر لاکەی تر بێت بە بەڵا؟
     چی وای لە کرێکارانی هەرێمی کوردستان کردووە خوازیاری دەرکردنی هاوچینە بێگانەکانیان بن؟ دیارە گەیشۆتە تینیان و لە خۆرایی نییە، بڵێی ئەوە داخوازی چینی سەرمایەداران بێت؟ بێگومان نەخێر. کەچی کەسانێک بە بیانووی ئەنتەرناسیۆنالیستتیەوە دێن و لەبەرانبەر ئەو داخوازیە کرێکارییە  ڕادەوەستنەوە و پێیان دەڵێن دەم هەڵمەهێننەوە ئەوە زیان بە هاوپشتی کرێکاران دەگەیەنێت!
     ئایا کار و بەرخوردی لەم جۆرە لە خزمەتی کام چیندایە؟ ئایا ڕێگری وا خەساندنی کرێکاران ناگەیەنێت؟ لە جیاتی هاندانیان بۆ ناڕەزایەتی و بەدەستهێنانی داخوازییەکانیان.
     ئەگەر بەرگری کردن لە کرێکارانی هەرێمی کوردستان بە جۆرێک لە جۆرەکان بچێتە خانەی کۆنەپەرستیەوە، بێگومان بەگری کردن لە کرێکارانی جیهان کۆنەپەرستانەترە.. بانێکەو دوو هەوا!!
     سەرئەنجام ئایا ڕەوا و لۆجیکێکی دروستە ژمارەیەک خەڵک بەحساب خاوەن ئایدۆلۆجی مۆدێرن و چینایەتی دژی کرێکارانی هەرێمەکەی خۆیان ببنەوە؟
--------------------
هەمان وتار لە ماڵپەڕی سبەی دا

دووشەممە ٢٠١٢.٤.٣٠ عەیبە بەراورد!!

 لە چەرخی ١٨دا، لە فەیلەسوف و ڕۆشنگەری بەناوبانگی ئەڵمانی ئیمانوئێل کانت (١٧٢٤-١٨٠٤) یان پرسیوە:
- : ئایا ئێمە لە چەرخی ڕۆشنگەریداین؟
- : نا نەخێر، بەڵام لە سەردەمی چوون بەرەو ڕۆشنگەریداین..
     هەرچەندە عەیبە ئێمەی کوردی بەتایبەتی هەرێمی کوردستان خۆمان بە ئەڵەمانەکان بشوبهێنین، ئەم پرسیار و وەڵامە لە خۆمان بکەین عەیبترە، یان چی؟

سێشەمە ٢٠١٢.٤.٢٤ سەردانێکی شاز!!!

 دەبوایە نەوشیروان مستەفا نەچووایەتە ئەو شوێنە (پیرمام) کە نا فەرمی و نا حکومییە. ئۆپۆزسیۆن وەک چۆن لە هەوڵی ئەوەدایە سەقەتییەکان بهێنێتەوە سەر سکەی خۆی، نموونەیەکی جوانتر و مۆدێرنتر پیشان بدەن، لەمەشدا دەبوایە لە هەولێر کە سەنتەری هەرێمەکەیە، شوێنی فەرمی و سەرۆکایەتی هەریمی لەوێیە لەگەڵ مەسعود بارزانی وەک خاوەن پلەیەکی حکومی کۆبوایەتەوە.    
     گوایە شوێنێکی فەرمی لەو شارەدا بۆ ئەو پلە حکومییە نییە، ببێت یان نەبێت مەسەلەیەکی دییە، ئۆپۆزسیۆن دەبێت زۆر لەوە وردتر و مودریک تر بێت، دەبێت لە نیتاقی ماڵی فڵان بەرپرس و فیسار تێپەڕێت، هەمیشە شوێنە گشتی و فەرمییەکان لە بەرچاو بگیرێت، لە ژێر هەر بیانوویەکدا نابێت پرینسیبە ئەساسییەکانی کۆمەڵاگا و حکومەتێکی مەدەنی فەرامۆش بکات. خۆ دەکرا ئەو کۆبوونەوەکە لە ئەنجوومەنی وەزیران بوایە و ئەوێیان دیاری بکردایە بۆ دانیشتن.
تێکستی هەواڵەکە لە ماڵپەڕی سبەی دا

سێشەممە ٢٠١٢.٤.٢٤ دوژمن لە بەردەم دەرگاکانەوە

 فلیمێکی جەنگییە، بەرهەمی ساڵی ٢٠٠١ ، باس لە جەنگی چارەنووسسازی شاری ستالینگرات دەکات. فلیمەکە لەسەر هەوڵ و تێکۆشانی سەربازێکی قەناس دەوەستێت، کە دەبێتە هۆی بەرزکردنەوەی ورەی ڕووخاوی لەشکری ڕووسی، ئەو سەربازە دەکەوێتە ململانێی توند لەگەڵ قەناسێکی ئەڵەمانی کە ناردوویانە بۆ کوشتنی و سەرئەنجام ڕووسەکە بەسەر ئەڵمانییەکەدا سەردەکەوێت و لەناوی دەبات ئەمە هاوکات دەبێت لەگەڵ تێکشکاندنی هێرشی نازییەکان و کۆتایی هێنانی جەنگی جیهانی دووهەم.
جوانترین دایلۆگی فلیمەکە لەسەر زای یەکیک لە پاڵەوانەکانەوەیە، دەڵیت:
     مرۆڤ هەر مرۆڤە و مرۆڤی نوێ نییە، سەرەرای هەوڵی زۆر بۆ بنیاتنانی کۆمەڵگایەکی یەکسان کە مرۆڤەکان حەسوودی بەیەکتر نەبەن، بەڵام سەدەها هۆی تر دروست دەبێت بۆ حەسوودی بردن بەیەکتر..
     بە پێی کۆتایی فلیمەکە بێت تفەنگە دووربیندارەکەی پاڵەوانی فلیمەکە تا ئێستا لە مۆزەخانە پارێزراوە.
پێناچێت بەرهەمهێنەرانی فلیمەکە زۆر ڕاستگۆ بن، چوونکە سەربازی ناوبراو وتوویەتی؛ ئەوە درۆیە کە ئەڵەمانەکان کەسێکی قەناسیان ناردبێت بۆ کوشتنی.



یەکشەممە ٢٠١٢.٤.٢٢ قەیرانی  نێوان بارزانی و مالکی

 وابزانم ئەو زمانە تووندەی ئۆردوگان لەبەرانبەر مالکیدا بەکاریهێنا، بەرئەنجامی بینینی هەردوو سیاسەتمەداری وەک تارق هاشمی و مەسعود بارزانی بوو، نەک بەتەنها مەسعود بارزانی، نابێت ئەوەیش فەرامۆش بکرێت کە ئاساییە حکومەتی ئۆردۆگان وەک لایەنی ئایینی پشتیوانی لە سوونەکان بکات ئیتر چ کورد چ عەرەب بێت. ئەو دوو هێزە گەورەیەی ناوچەکە مەبەست ئێران و تورکیا لەشەڕی ژێربەژێردان بۆ کۆنترۆڵ و هەژموونی زیاتر. پاڵ پێوەنانی زیاتری مالکییە بۆ باوەشی ئێران.
لەم جۆرە هەڵویست و قسانە لە دنیای سیاسەتدا زۆر واردە قابیل بە بەگدانان هەیە و تاهەتایی نیین.
     ئەو دەربڕینەی مەسعود بارزانیش لە بارەی فشارخستنە سەر (پێ کە کە) کەمێک بەگرێ و گۆڵ و ناڕۆشنە، لەکاتێکدا هەر ئەو چاوی بە سیاسییە کوردەکانی کوردستانی باکور کەوتووە کە نزیکن بە (پێ کە کە)ەوە! ئەم بێنەو بەرەیە پێدەچێت ڕاگەیاندن دروستی کردبێت، یاری بە خەڵک بکەن.
     سەردانێکی هەر کاربەدەستێکی کوردی هەرێم بۆ تورکیا کرابێت، لەم جۆرە قسەوباسا و کاردانەوانەی بەدوای خۆیدا هێناوە.

یەکشەممە ٢٠١٢.٤.٢٢ ئەم یادە هی کام پارچەی کوردستانە!؟

 ئەمڕۆ یەکشەممە ١١٤ ساڵ تێپەڕ دەبێت بەسەر دەرچوونی یەكەمین رۆژنامەی نۆبەرە (كوردستان) كە لە ڕۆژی ١٨٩٨.٤.٢٢ لە ئاوارەییدا جووتە برا (میقداد بەدرخان و عەبدولڕەحمان بەدرخان) لە چاپخانەی (دار الهلال) لە قاهیرە بە یارمەتی نووسەری ناوداری عەرەب (جۆرجی زێدان) هاتە چاپكردن.
     پێم وایە کوردستانی باشوور دەبێت بەدوای ئەوەدا بگەڕێت و زیاتر خۆی گردوکۆ بکاتەوە و دەرچوونی یەکەم ژمارە و یەکەم ڕۆژنامەی کوردی کە لەلای خۆی لەسەر ئەرز و ئاوی خۆی چاپ و بڵاوکراوەتەوە، بەفەرمی بکاتە ڕۆژی ڕۆژنامەگەری کوردی لە هەرێمی کوردستان. ئەم پان کوردستانییەتە دارێکی زڕەوە هیچ بەرێک ناگرێت؟
     مەبەست بە پلەی یەکەم بۆ ئەوەیە ئەرک و مەهامی هەر پارچەیەک جیا بکرێتەوە و کەمێک هەوڵ بدرێت لەو فەوزایە دوور بکەوینەوە. لەو سەرلێشێواوی و هەرجومەرجی دروست بووە دوور بکەوینەوە، ئێمە دەبێت ئەو ئازایەتییەمان هەبێت کە میللەتێکین لە چەند پارچەدا و پشتمان بەیەکەوەیە و هەریەکەمان تایبەتمەندی خۆی هەیە، هیچ بیانوویەک ناتوانێت ئەو جیاوازییەمان باشاڕێتەوە..
ئەگەر ئەوان وەک بەڕێزت دەیڵێت کوردایەتییان بە دیاری هێنابێت بۆ سلەیمانی، ئەوا ئێستا هاوکێشەکە زۆر گۆڕاوە، ناکرێت ئەسیری ئەو سەردەمەبین.
     دانانی ئەم مێژووە بۆ ڕۆژنامەگەری کورد هەموو پارچەکان سەقەتە و قابیلی قبووڵ نییە. کوردستانی باشوور دەبێت مێژووی خۆی بەجیا بنووسێتەوە و گەوهەرەکانی خۆی بخاتە ڕوو.

هەینی٢٠١٢.٤.٢٠.بڕوابوون بە خوا لە کزیدایە!!

 بە پێی بەدواداچوون و لێکۆلینەوەی زانکۆیەکی شیکاگۆ لە ٣٠ وڵات کە زووربەیان سەر بە ئایینی کریستیانیین ئەنجامدراوە، بڕوابوون بە خوا کەم بۆتەوە.
     بەهێزی ئیمانداری لە گەڵێکەوە بۆ یەکێکی تر دەگۆڕێت، بۆ نموونە یابان ئاینێکی تریان هەیە کەچی ئیمانیان لەق و کەمە. لەتەمەنەکانیش دەگۆڕێت ئیمانداران لە ناو بەتەمەنەکاندا زیاترە. لەسەدا ٩١ خەڵکی فلیپین بڕوایان بەخوا هەیە. لە ئەمەریکایش بەرزە، بەڵام لە وڵاتێکی وەک ڕووسیا و ئیسرائیل و سلۆفاکیا ئیمانداری و بڕوابوون بەخوا لە گەشە و زیاد بووندان.
هۆکانی بڕوا نەبوون بە خوا و دوورکەوتنەوە لە ئایین بۆ چی دەگەڕێنیتەوە؟
     ئایا لێکۆڵینەوە و بەدواداچوونی وا نابێتە هۆی ئەوەی کەسە ڕادیکالەکانی ئاینەکانی تر بە چاوێکی کەمتر بڕواننە ئایینی ئەو ٣٠ وڵاتە؟

چوارشەممە ٢٠١٢.٤.١٨ لایکەکان بکێشنەوە

 وەک لەم کورتە ڕاپۆرتەدا دیارە بەرپرسانی باڵای هەردوو پارتی فەرمانڕەوای هەرێمی کوردستان لە فەیسبووک گرێبەستیان لەگەڵ کومپانیای فەیسبووکدا کردووە.
     پێم وایە ئەو کارە زیاتر ریکلام کردن لە نیتاقی کوردیدا بێت چوونکە ئاشکرایە، ئەوانە ڕوو بەدەرەوە لاپەڕەیان بەزمانەکانی تر دانەناوە، تا دەروازەیەک بێت بۆ نمایشکردنی لایەنێکی سیاسەتی کوردی لە هەرێمدا، بۆیە زۆر سوودیان بۆ مەسەلە گشتییەکان نییە، هەوڵێکیشە بۆ پیاهەڵدان و خۆ میکیاجکردن و... ئەوانە بێ بەهان هاوڵاتیانی هەرێم بەردەوام بەشێوەی جیاو و جۆراجۆر ئاگایان لە دیدوبۆچوون و هەڵسووکەوتیانە، بۆیە وەک ئەرکێک بۆ داماڵینی ئەوانە وا باشترە لایکەکان سەحب بکرێتەوە.
     لەلایەکی ترەوە بۆ ساغکردنەوەی ئەو بڕە پارەیەی کە دەدرێت بە فەیسبووک، لێکۆڵینەوە بکرێت لە کام حسابەوە پارە دەچێتە سەر حسابی کومپانیای ناوبراو؟ ئەگەر لەوەشدا فێڵ و فێڵ نەکرابێت؟ دەکرێت بە ئاسانی فەیسبووک بخرێتە ژێر فشارەوە، حسابە جۆراوجۆرەکانیان لەم وڵات و لەو وڵات ئاشکار دەبێت. بێگومان ئەوکات قسەی تر دەبێت ..
سەرچاوە ماڵپەڕی ڕۆژنامەی هاوڵاتی

دووشەممە ٢٠١٢.٤.١٦ ئۆجەلان ئەمەیشی وتووە!

 لە دوای سەرهەڵدانی ناڕەزایەتییەکان لە سوریا، کوردانی کوردستانی ڕۆژئاوا بە گەرمی لە هەموو بوارەکاندا تێکەڵ بەو بزووتنەوەەیە بوون ڕوو بەدەرەوە و ڕوو بەناوخۆ دایلۆگ لەسەر هەڵوێستە نێگەتیف و پۆزەتیفەکانی لایەنە سیاسییە دەرگیرەکانی گۆرەپانی سیاسی کوردستانی ڕۆژئاوا دروست بووە، هەموو لەهەوڵی ئەوەدان خاڵە ناشیرینەکانی یەکتر بخەنە ڕوو. لەم وتارە کە بەزمانی عەرەبییە، نهێنییەک ئاشکرا بووە، تکایە بفەرموون بۆ تێکستەکە وەک خۆی کۆپیم کردووە:

     بل أن أوجلان ... ذهب إلى أبعد من ذلك، حينما صرح( بجرأة نادرة) في مقابلته الأشهر مع الصحفي نبيل ملحم بأنه لاوجود للكرد بمعنى شعب في سورية، وإنما مجرد مهاجرين إلتجأوا إليها هربا من إضطهاد السلطات التركية لهم في مراحل تاريخية سابقة، مؤكدا أن حزبه يعمل مع السلطات السورية من أجل إعادتهم من حيث أتوا أي إلى تركيا..
سەرچاوە ماڵپەڕی عەرەبیزمان ئیلاف
     ئەمەیش تێکستی فارسییەکەی لە ڕێزدار ئەحمەد تیشکەوە وەرگیراوە:
بخشی از کردهای سوریه در اصل مهاجرانی از کردستان ترکیه هستند و تلاش ما هم برگردان آنها به زداگاه و سرزمینشان است"
"عبدالله اوجالان رهبر پ ک ک، یک سال قبل از بازداشت"
سەرچاوە: ماڵپەڕی بی بی سی بەشی فارسی

یەکشەممە ٢٠١٢.٤.١٥ خۆکوشتنی قایمقامی‌ سلێمانی‌ 

 ئەم ڕووداوە لێدانەوەی زۆر هەڵدەگرێت بەوەی کە با دوو کەسی وا لەسەر گەندەڵی بگیرێت و تیابچێت ئیتر بەهەر ڕێگایەک بێت، ئەو خەڵکە بە لێپرسراوانیشەوە، تا غەشکردن بە هەموو جۆرەکانییە ئەوە چارەنووس و حەیاچوونەی بەدواوەیە بپرنگێنەوە و ڕابوەستێنن.
     دەزانی ئەو هەرێمە چی بەسەرهاتووە. ئەم جۆرە ڕووداوانە زۆر لە خەڵک دەترسێنێت. لەلایەکێشەوە نموونەی ئازایەتی وەک مناڵەکەی خوێندنگە نموونەییەکە کە مامۆستا ئەمەریکییەکەی کوشت  دەگەیەنێت کە دەستیان چۆتە خۆیان...

پێنجشەممە ٢٠١٢.٤.١٢ بەراوردێکی ئەدەبی

 گەر دیقەت بدەینە ئەم دوو کورتە تێکستەی ئەو شاعیرە عەرەبە کە لە بەرژەوەندی کوردی کوردستانی باشوور وتوویەتی، هەست بە جیاوازییەک دەکرێت، جا قسە لەوەیە ئەوە دوو تێکستە جیایە و پاشوپێش و گۆڕانی تێدا کراوە، نازانرێت کامیان وەک تێکستە ئۆرژیناڵەکەیەتی ئەمەیش خەتا لەو کەسەوەیە کە خستوویەتییە ڕوو یان لە وەرگێڕەکانییەوەیە، ئەوەیش بەهەر مەبەستێک کرابێت جۆرێک لە چەواشەکارییە. تکایە کێ بە تێکستە عەرەبییەکەی دەزانێت؟
     - : کورده‌کان هه‌رکه‌ فێری عه‌ره‌بی ده‌بن له‌ ئیسلام هه‌ڵده‌گه‌رێنه‌وه‌ و ده‌بنه‌ عه‌لمانی، چونکه‌ ئیدی ده‌زانن قورئان چیتێدا نوسراوه‌ . " ئه‌دۆنیس "
     - : کورد هه‌رگیز ناتوانێت قورعان خه‌تم بکات، چونکه‌ که‌ده‌گاته‌ سه‌ر سوره‌تی (ئه‌نفال) ده‌وه‌ستێت. " ئه‌دۆنیس "

پێنجشەممە ٢٠١٢.٤.١٢ ڕۆژی کەر!!

 عومەر کلۆڵ: خۆم کاندید بۆ ئەنجوومەنی پارێزگاری سلەیمانی، بەجووتە ئەیسەلمێنم چەند کەرم..لەبەر ناڕێکی بەشەر بووم بە کەر..ئیسلامییەکان پێم دەڵێن کەرپەرست.. دەچم بۆ عەمرە چوونکە هەموو عەبدی خواین بە کەریشەوە..
لە ماڵيەڕی خەندانەوە وەرگیراوە.
     سۆران عومەری کۆمەڵی ئیسلامی لە لاپەڕەی فەیسبووکەکەیدا، لەبارەی پەیکەری کەرەکەی زیرەک میرەوە وا دەنووسێت، کە جۆرێکە لە هەڕەشە بۆ سەر ئەو کارە هونەرییە:
     كه‌ر-ه‌كه‌ی سلێمانی ئاقڵێكی ده‌وێ لایدات
كه‌ر-ێك هه‌را ده‌نێته‌وه‌ له‌سلێمانی .......
پێتان وایه‌ ئه‌مه‌ كارێكی ئاقڵانه‌یه‌ په‌یكه‌ری كه‌ر-ێك دروست بكه‌یت و چاكه‌ت و بۆینباخی له‌به‌ر بكه‌یت و سه‌ر شه‌قامی چه‌ندین قه‌زاو ناحیه‌ هێشتا پڕبێت له‌ كه‌ر-ی به‌ره‌ڵاو بێ خزمه‌ت؟
من هه‌ست ده‌كه‌م ئه‌و په‌یكه‌ره‌ سه‌لامه‌ت ده‌رناچێت! ڕۆژێك ئاقڵێك لایده‌بات!

     ئایا شایەنی ئەوەیە مەکتەب سیاسییەکانی پارەکانی کوردستانی باشوور بە گەورە و بچووک، چەپ و ڕاستیانەوە بە خانی کەران بشوبهێرێت؟

چوارشەممە ٢٠١٢.٤.١١ ژنان تەنها کەیبانوی ماڵن!!؟

 بە پێی دواهەمین ڕاپرسی دامەزراوەی گالوپی ئەمەریکی، کە بۆ ساڵی ٢٠١١ کردوویەتی و ئەنجامی داوە و دیدی (٧٦٧٠) کەسیان وەرگرتووە، ژنانی عەرەب پێشکەوتنیان بە خۆوە بینیوە، بەڵام هێشتا کەمایەتین و لە پەراوێزدان.
لە ٢٢ دەوڵەتی عەرەبی یەک لەسەر سێی ژنان کاردارن، بەتایبەتی ئەوانەی تەمەنیان لە ٢٣-٢٩ دان، بە بەراوردی پیاوان لە ١٠ هەشتیان کاردارن، ئەمەیش جیاوازییەکی مەترسیدار و گەورەیە لە نێوان توانای ژن و پیاوانی ئەو وڵاتانە.
تەنانەت لە بواری خوێندن و فێرکردندا قڵشتی نێوان هەردوو ڕەگەزەکە زۆر بەرز، ڕێژەی ژنانی خوێندەوار و خاوەن بەڵگەنامە ١٦% پیاوان ٢٢%.
بانکی نێودەوڵەتی پێی وایە ڕێژەی ژنانی کارداری وڵاتانی ڕۆژهەڵاتی ناوەڕاست و باکوری ئەفەریقا لە جیهاندا نزمترین ئاستە.
-----------
هەمان هەواڵ لە ماڵپەڕی سبەی دا

پێنجشەممە ٢٠١٢.٤.٥ کارتی سووتاوی کورد لە دژی عەرەبی شیعە

 کوردانی دەرەوەی هەرێم فەتوای کوشتینا لەلایەن عەرەبە شیعییەکان دەرکراوە. ئەم فەتوایە وەک فەتوای کوشتن گەنجە ئیمۆکانی لێهاتووە، کە قەسابخانەیەکیان بۆ دانان و دەنگی ناڕەزایەتی لەبەرانبەر ئەو وەحشییەتەدا بەرزبووە، هەر ئەو کەلەپووتە تیرۆریستانە وتیان ئێمە نیین. جا هەمان سیاسەت و هەمان کردەوە لەبەرانبەر کورددا بکەن.
     سیناریۆکە گەیشتۆتە مەهزەلە، بەوەی گروپێکی تری عەرەب بە پێچەوانەوە و گوایە لە ڕەدی ئەو گرووپەی کە هەڕەشەیان کردووە، بەرگری لە کورد دەکەن.
     ئەم هەڕەشە و بەرگرییانە پەیامی ئاشکرایە، هاوکات شەڕی دەروونییە و سەرەتای یەکلایکردنەوەی هەر جۆر لە موخاڵەفەتێک قابیلی قبووڵ نییە. بەڵام کورد بە دەسەڵات و ئۆپۆزسیۆنەوە تۆ بڵێی بەو ماڵە ناوخۆییە وێرانەیەوە، کە سەرچاوەکەی یەکێتی+پارتین، پاروویەکی چەور بێت و هێندە بێتوانابێت بچێتە ژێر باری ئەو فشار و ختوکانەوە؟ ئایا کورد کارتی فشاری سووتاوە؟
-----------
سەرچاوەی هەواڵ ماڵپەڕی سبەی

پێنجشەممە ٢٠١٢.٤.٥ ململانێی ئیسلامی و سکۆلار

 هەموو شتێک بێجگە لە ئیسلامییەکان (كل شيء إلا الإسلاميين) ئەمە تەوژمێکی سکۆلاری توونسی عەرەبی لە کیشوەری ئەفەریقا بەرزیان کردۆتەوە.لەو وڵاتە تەوژمی سۆکلار بەهێزە، بڕوا ناکرێت بەئاسانی ئیسلامییەکان بۆیان بچێتە سەر.
     بەشداری پارتە ئیسلامییەکان لەدەسەڵاتدا دروستترە، چوونکە لە هەرێمی کوردستان نانتوانن زۆرینە بەدەست بهێنن تا دەسەڵات بگرنە دەست. سیاسەتی دروست ئەوەیە دەبێت لەگەڵ ئەوانەدا شانە هەڵبگیرێت و دەستوپەنجەیان لەگەڵدا نەرم بکرێت، چوونکە کۆتایی نایەت. جا دروشمی وا بۆ ژیانی سیاسی وڵاتێکی وەک هەرێمی کوردستان دەگونجێت؟ 

دووشەممە ٢٠١٣.٤.٩ کورد هەژموونی سفر هیچ بەدەستەوە!!!

 لە جەژنی هەستانەوەی (Jesusعیسا پێغەمبەری کریستیانەکان، زۆر ڕاپۆرتم بینی بەو بۆنەیەوە، بەلامەوە سەیرە، ئەو ئایینە و پەیرەوانی زووربەیان بە زمانی عەرەبی بۆ کەناڵەکوردییەکان قسان دەکەن؟! یان لە هەرێمی کوردستانن بە کوردی ناپەیڤن!!
     گریمان ئەوە قەیناکات ئەی بۆ بە زمانی خۆیان ناپەیڤن؟ تۆ بڵێی کلتووری کوردی تەنانەت لەناوخۆی هەرێمی کوردستان ئەوەندە لاواز بێت خەڵکانی نا کوردی ناو ماڵی خۆی ئامادە نەبێت قسەی پێبکەن و کاریگەری دانەنابێت لەسەریان؟! سەرم لەو دۆخەی ناوخۆی هەرێم گێژ دەخوات؟

یەکشەممە ٢٠١٣.٤.٨ چ کاتێک ئایین مانای دەبێت؟

 ئایا ئایین مانا دەدات بە بوون و ژیان؟ لە کاتێکدا وا دەردەچێت کە ئایدۆلۆجی و ڕێبازەکانی تری دنیایی گەر دەربڕینەکە دروست بێت تووشی شکست بووبێتن و وەڵامدەرەوە نەبن. کەواتە بەهێزبوونی ئایین گەڕانەوەیە بۆ دەسەڵاتێک کە لەسەرەوە حوکم دەکات، بەم شێوەیەیش دەوڵەت و حکومەت لە کاروان و ڕێبازی خۆی دەردەچێت و لادەدات کە لە بناغەدا بۆ خزمەتی هەموو کۆمەڵگا دروست بووە و داهاتووە، دادەرەری حکومەت لەوەدایە بە تەنها لە خزمەتی ئایین و ڕێبازێکی دیاریکراودا نەبێت.
     دەورونەخشی ئایین لە کۆمەڵگاکاندا ئەوەی مارکس دەیڵێن سفرکردنەوەیە و کەمێک یەک لایەنەیە و تووندە، ئایین هەمیشە لایەنگری دەسەڵات نەبووە، وەک زۆر دیاردەی تری ناو کۆمەڵگاکان گۆڕانی بەسەرداهاتووە.

یەکشەممە ٢٠١٣.٤.٨ ڕەخنەی نالۆجیکی!

 زانا ڕەئوف یەکێک لە هەڵسووڕاوانی ناسراوی بزووتنەوەی گۆڕان لە لاپەڕەی فەیسبووکەکەیدا، دەپرسێت: چ دەوڵەتێک هەیە لە جیهاندا بە قەد عێراق و هەرێمی کوردستان پشووی ڕەسمی هەبێت ؟

کۆمێنتم بۆ ئەو دەربڕینە:

     پێم وایە ئەو پرسیارە زۆر لە شوێنی خۆی و لۆجیکی نییە، دەزانن بۆ، گەر سەیری موازیکی کۆمەڵگای کوردستانی باشوور بکەیت، دەبینی وێڕای بۆنە نیشتمانییەکان، چەند ئاین و ئاینزا بوونی هەیە، ئۆتۆماتیک دەبێت هەق بدرێت بەهەموو، کەواتە بەبەراورد بە وڵاتێکی ئەورووپی، کوردستانی باشوور پشوو و بۆنەی زۆرترە.
     فینلاند بێجگە لە شەممە و یەکشەممان ١٣ ڕۆژی فەرمی هەیە بۆ پشووە ئاینی و نائاینییەکان. لەبەر ئەوە دیاریدەیەکی زۆر نامۆ نییە، گرنگ ئەوەیە بۆنەکان ڕێکبخرێت، ئیتر زۆر و کەم بێت.
پاشکۆ:

     ئەو دیاردەیە ( فینلاند وڵاتی مناسەبە دینیەکان) وێڕای ئەوەی کلتوورییە و بەتەنها فینلاند ناگرێتەوە، هی جیهانی کریستیانەکانە. هاوکات ئەمە ئەوە دەگەیەنێت کۆمەڵگا دیموکراسییەکان دژی ئایین نیین و نەبوون وەک تەوژمە سەلەفی و ئایینییە توندڕەوەکانی ئیسلام هەوڵ ئەدەن وا لە خەڵک بگەیەنن کە عیلمەنیەت ئەنتی ئایین و پشتیوانی لە بێئایین و فجق و فجوور دەکات.
     ئەگەر بڕیار بێت دیموکراسی و دادپەروەری بۆ هەموان بێت ئەوا ئیماندارانیش مافیانە مەراسیمەکانیان بکەن و پشوویان هەبێت. ئەگەر هی ئەوان لاببرێت دەبێت یەکی ئایاریش لاببرێت کە هی کۆمۆنیستە عیلمانییەکانە.

هەینی ٢٠١٢.٤.٦ گۆنتەر گراس، کەوتە داوەوە!

 گونتەر گراس ١٩٢٧، لەم ڕۆژانەدا پەخشانە شیعرێکی بڵاوکردۆتەوە، جەنجالێکی دروست کردووە، وەک سەرۆکوەزیرانی ئیسرائیلی بنیامین ناتانیاهۆ ١٩٤٩، لێی هاتۆتە وەڵام بەم شێوەیە کە دەریدەخات کە گونتەر گراس چی وتووە:
ئەوە ئێرانە ئینکاری جینۆسایدی جوولەکەکان دەکات.
ئەوە ئێرانە هەڕەشەی نەمان و نەهێشت لە ئیسرائیل دەکات.
ئەوە ئێرانە هەڕەشەی تێکدانی ئاشتی و ئایشی جیهانی دەکات.
ئەوە ئێرانە پشتیوانی لە ڕێکخراوە تیرۆرستیەکان دەکات.
ئەوە ئێرانە ژنان رەجم دەکات.
ئەوە ئێرانە هاوڕەگەزبازان لەسێدارە دەدات.
ئەوە ئێرانە ئۆپۆزسیۆن و ملیۆنەها لە خەڵکەکەی سەرکوت دەکات.

     شایەنی وەبیهێنانەوەیە نووسەر بەناوبانگی ئەڵەمانی لەو تێکستەیدا کە بەناونیشانی (ئەوەی پێویستە بووترێت) ٣٨٤ وشەیە، نووسیوویەتی:
دەوڵەتی ئیسرائیل یەکەم هەڕەشەی گەورەیە بۆ سەر ئاسایشی جیهانی.

     بەپێی قسەی زووربەی ڕۆژنامە ئەڵەمانییەکان ئەمڕۆ، ئەوەی گراس کردوویەتی، جێی پەسەندە کە ئاماژەی بە بوونی چەکی ئەتۆمی ئیسرائیلی داوە، بەڵام وەک ئێران نەیوتووە و ئامادە نییە لەدژی فڵان و فیسار دراوسێی بەکاری بهێنێت.
     گراس خۆی دزیوەتەوە و لە گێلێتی داوە لە مەسەلەی ئەسڵی ئیسرائیل و فەلەستیینیەکان. ئەمەیش بەدژایەتی داپۆشراو دەژمێررێت، ئیسرائیل و ئەڵەمانیای پێناشیرین کردووە.
پاشکۆ:
     ئەم هەواڵە بەهۆی نادیقەتی بەڕێوەبەرانی ماڵپەڕەکە هەڵە کەوتبووە تێکستکەوە، بووە مایەی رەخنەی خوێنەران، بۆیە ئەم ڕوونکردنەوەیەم نووسی:
     تکایە یەک تۆز ئەرکت بکێشایە و کۆمێنتی لای خوارەوەی منت بخوێندایەتەوە، ئەو کات بۆت دەردەکەوت کە جیاوازییەک هەیە لە نێوان تێکستی هەواڵەکەی سەرەوە و کۆمێنتەکەم لە خوارەوە. من باسم لە پەخشانە شیعرەکەی گراس نەکردووە، تەنها ناویم هێناوە. زیاتر رەدەکەی ناتانیاهۆم بۆ گراس داناوە و بەلاوە گرنگ بووە. بەڵام جێی داخە هەواڵسازی ماڵپەڕی سبەی دەستییان تێخستووە، زیادوکەمیان کردووە، یەکسەر بە دوو ڕێگا لە سەقەتکردنەکە ئاگادارم کردنەوە کە چاکی بکەن تەنها ناونیشانەکەیم بەلاوە گونجاو بوو. نەیان گۆڕێ بۆیە ناچار بووم وەک تێکستی هەواڵەکە وەک کۆمێنت بنێرم، باش بوو دایانبەزاند. من داوای لێبوردن لە خوێنەران دەکەم هەڵەکە لە منەوە نییە.
----------
هەمان تێکست لە ماڵپەڕی سبەی دا

دووشەممە ٢٠١٢.٤.٢ کۆمۆنیستی نا ڕاستگۆ!!

 (ئەو شتانەی ئەو ئۆپۆزیسیۆنە قەومی و ئیسلامییە داوای دەکەن، .... لەبنەرەتدا ئەوان خوازیاری پۆستی کرداری و بەشداری بەکردەوەن لە حکومەت و دەسەڵاتدا، لەگەڵ دروشمی ریاکارانە و فریودەرانە. هاتنەدی ئەم خەونەشیان پەیوەندی بە هاوسەنگی هیزەکانی سەر گۆرەپانی کوردستانەوە هەیە.عەبدوڵا مەحمود  ئەندامێکی قەدیمی پارتی کۆمۆنیستی کرێکاری کوردستانی باشوورە

کۆمێنتم بۆ ئەو پەرەگرافە:
     تۆ خۆت لە ناخەوە بڕوات بەو وەڵامەی خۆت هەیە؟ ئەوە نییە باسی کەس ناکەم تەنها بزووتنەوەی گۆڕان نەبێت بەسەرمەقولات خۆیان کردووە بە حکومەتەکانی بەرهەم و نێچیر.. ئاخر خوات بێت هێجگار واش نا، تۆی کۆمۆنیستی قەدیمی دەبێت لەهەموو کەس ڕاستگۆ تر بیت و لایەنی کەم چی لە ئەرزی واقعدا ڕوو دەدات بیگوێزیتەوە و باسی بکەیت!!!!


خەمی ڕۆژانە، ئازار ٢٠١٢


AbasShiwan-عەباس شوان

هەینی ٢٠١٢.٣.٣١ باڵوێزخانەی عێراقی لە فینلاند کێشە بۆ خەڵک دەخولقێنێت؟؟
 ماڵپەڕی بالوێزخانەی عێراقی فیدراڵی لە فینلاند، لە بابەتێکیدا کە مێژووی ڕۆژی ٢٠١٢.٣.٢٠ پێوەیە، چەند ڕێنمایی دەرکردووە بۆ ئەو عێراقیانەی دەیانەوێت گەشت بکەن بۆ ناوخۆی وڵات. ئەمەیش گوایە لە دڵسۆزییەوەیە، بەڵام ڕەوەندی عێراقی بەتایبەتی کوردەکان، ئەمەیان بە جۆرێک لە ڕێگری دانا، بۆیە لە ڕێگای تایبەت و حیزبی بەتایبەت حیزبە فەرمانڕەواکانی هەرێمی کوردستان پەیوەندییان بە باڵوێزخانەوە کردووە، هەڕەشەی خۆپیشاندانیان کردووە.
     باڵوێزخانە ترسی ئەوەیان لێنشتبوو کە ئەوانە کێن و کێ نیین؟ کە زانیبوویان هەموو ڕەوەندی کوردییە بۆیە ڕۆژی ٢٨ ی ئازار بەنافەرمی و شەفەهی لە ڕێگای تەلەفوونەوە وەڵامیان داوەتەوە، کە ئەو بڕیار و ڕێنماییانە لەبەرچاو ناگرن و پاشگەزبوونەوتەوە.    بەڵام تا ئامادەکردنی ئەم بابەتە باڵوێزخانە لە ماڵپەڕەکەیدا نەک ئەو بابەتەی لا نەبردووە بەڵکوو ڕوونکردنەوەی نەداوە لەسەر چۆنییەتی پاشگەزبوونەوەکە.

     ئەم بڕیاڕە کام لە هاوڵاتیانی کورد و عەرەب و تورکمان دەگرێتەوە؟
زیاتر ئەوانە دەگرێتەوە، کە هاوڵاتی فینلاندی نیین و ڕەگەزنامەیان نییە، مۆڵەتی مانەوەیان هەیە، کە بەشێکی زۆری خەڵک پێکدەهێنن. ئەم ئیجرائاتە جۆرێک ڕێگری و ڕۆتینیاتیان بۆ دەخولقێنێت، بەشێکی زۆریان بەهۆی هەلومەرجی تایبەتەوە دوو ناو زیاتریان هەیە. سەلماندن و ساغکردنەوەی زەحمەت دەبێت.

     هۆی هەنگاوێکی وا لەلایەن باڵوێزخانەوە بۆ چی دەگەڕێتەوە؟
ئایا دەوێت ڕێگا لەو خەڵکانە بگرن کە وەک عێراقی خۆیان ناونوس کردووە، بەڵام یا ئەوەتا کوردی پارچەکانی ترە و لەلایەن دەوڵەتانی دروسێی عێراقەوە بە ئۆپۆسیۆن دەناسرێن و جێی مەترسین. یان ڕێگا گرتن و ناسینەوەی ئەو کەسانەیە کە موخالفی حکومەتی ئێستای عێراقن و سەر بە گرووپە تووندڕەوەکانن کە کاری تەقینەوە دەکەن. پێش دەچێت بۆ ئەو کریز و قەیڕانە سیاسییەی نێوان کورد و شیعە و سوونە ماوەیەکە لەناوخۆی وڵاتەکەدا لە نێوان هێزە دەسەڵاتدارەکانی عێراقدا هەیە و دروست بووە. باڵوێزخانە دەبێتە تەرەفێک بەو شێوەیە هەق لە لایەنێک و دوو لایەن دەکاتەوە.
     هاوتا ڕێی تێدەچێت مەسەلەیەکی ئابووری بێت، لەمەشدا باڵوێزخانە تێوەگلابێت، لەگەڵ کومپانیاکانی فرۆکەوانییەکان و منافەسەی نێوانیان، چوونکە بەشێکی زۆری ڕەوەندی کوردی لە ڕێگای کومپانیا کوردی و عێراقییەکانی ناو سوویدەوە گەشتەکانیان دەکەن، دیارە لە وەرزی هاویندا زۆرتر دەبێت، دەیانەوێت ڕەوەندی کوردی لە وڵاتەکەی خۆیانەوە نەڕۆنەوە، بازاڕیان دانەبەزێت و بەرەوڕووی کۆنکۆرس نەبنەوە، چوونکە زوو زوو ئەو کومپانیا لاکۆڵانانەی سووید کۆنکۆرس دەکەن و پارەی خەڵک دەخۆن و عەزێت دەخەنە بەر گەشتیارانیان.

     گەر لە دیدی بەشێک لە کوردەکانەوە بڕوانرێت کە تئیوری پیلانگێڕی دەوڵەتانی دراوسێ کۆنترۆڵی کردووە، ئەمە لەوانەیە لە ژێر فشاری کومپانیای تورکیش ئێرلایندا کرابێت، چوونکە ئۆپۆزسیۆنی کوردی ئەو وڵاتە لە هەرێمی کوردستان نیشتەجێن.
هەرچۆن بێت ڕەوەندی کوردی و عێراقی کەوتوونەتە نێوان بەرداشەکانەوە، زەحمەتی زیاتریان بۆ دەخولقێنرێت، بەڵام هەواڵەکان وا دەڵێن کەوتوونەتە خۆیان و لە ڕێگای جۆراوجۆرەوە بە دوای وردەکاری ئەو مەسەلەیە کەوتوون ، دەیانەوێت بەڵگە و دیکۆمێنت بدۆزنەوە و بسەلمێنن کە چ هۆکارێک لەپشت هەنگاوێکی واوەیە.
     شایەنی وەبیرهێنانەوەیە گەشتکردن بۆ هەرێمی کوردستان هەمیشە پڕ گرێ و گۆڵ بووە، وەک بیستراوە ڕێگری ناخۆش نەخوازراو بۆ گەشتیاران لە وڵاتە دراوسێکان و کومپانیاکانەوە و تەنانەت ناوخۆی وڵاتیش دروست کراوە و دەکرێت.
-----------
بۆ بەرچاوڕۆشنی زیاتر تکایە بڕواننە ئەم بەستەرانەی خوارەوە:
- : ئەو ڕێنمایی و مەرجانەی باڵوێزخانەی عێراقی بە زمانی عەرەبی:
http://www.mofamission.gov.iq/fin/ab/articledisplay.aspx?gid=1&id=6061
- : فینلەندا؛ رەوەندی کوردی نیگەرانن لە بڕیارێکی باڵوێزخانەی عێراق
http://kurdish.sbeiy.com/Detail.aspx?id=5462&LinkID=4
-: فینلەندا؛ رەوەندی کوردی بڕیارێکی باڵیۆزخانەی عێراق پوچەڵدەکاتەوە
http://kurdish.sbeiy.com/Detail.aspx?id=5567&LinkID=4


چوارشەممە ٢٠١٢.٣.٢٨ دەستوورێکی بێئایین
 پەرلەمانتارانی هەرێمی کوردستان بەتایبەتی بزووتنەوەی گۆڕان، تەجرووبەیەی وڵاتی توونس قابیلی بەتەحەفوزەوە لەبەرچاو گرتنە، وەک چارەسەرێکی مامناوەندی و ناچاری، ئەگینا نابێت بەهیچ جۆرێک لە نووسینەوەی دەستووردا ئایین بەباش یان خراپ دەور ببینێت و بوونی هەبێت.
     حەرەکەی نەهزەی ئیسلامی لە تونسی، ١٩٧٢ دامەزراوە، ئێستا حکومەتی ئیتلافی سەرۆکایەتی دەکات. لەسەربەندی دانانی دەستوورێکی نوێن بۆ وڵاتەکە. ڕاشد ئەلغەنوشی لەدایکبووی ١٩٤١ سەرۆکی ئەو بزووتنەوەیە، حەدێکی بۆ ئەو کێشەیە دانا کە ماوەیەکە دایلۆگێکی گەرمی لە نێوان موخالف و ڕازی بەدوای خۆیدا هێناوە. بەوەی کە ئایا ئایینی ئیسلام سەرچاوەی بنەڕەتی یاسادانان بێت یان نەبێت، لە نووسینەوەی ئەو دەستوورەدا. تەنها ئەوە بەسە کە بووتریت تونسی دەوڵەتێکی ئیسلامییە.

هاوکێشەکان ناجێگیرەکان
هەروەک لە ڕاگەیاندنیشدا ئاماژەی پێکراوە، دەورەیەکی نۆی لە ژیانی سیاسی و هاوکێشە سیاسییەکان دەست پێدەکات، ئەوە ئیسلامییەکان لە پەرلەماندا خەریکن خۆیان جیا دەکەنەوە، و پشتیوانی لە مەلا کرێکار دەکەن! ئەم ڕووداوەیش شەق کردنی ئۆپۆزسیۆنی عیلمانی و لیبرالی وەک بزووتنەوەی گۆڕان لەگەڵ ئەو دوو پارتە ئیسلامییە.. بەڕاستی بزووتنەوەی گۆڕان لەم یارییەی تا ئێستا لەگەڵ ئەو گروپە کردوویەتی گرەو بووە لەسەر ئەسپی تۆیو . ئەوانە پیاوی ئەو ئەرکە قورسە نیین کە وەک ئۆپۆزسیۆنێکی شێلگیر بناسرێن.
لەسەر بێ کەسایەتیبوونی کورد
خەریکە هاوکێشەکە دەگۆڕێت، ڕاپەڕینی ١٩٩١ سەرەتای ڕێنیساسێکی گەورە بوو، گۆڕینەکەیش پرۆسەیەکی دوورودرێژە لەوانەیە فریای ئەنجامە ڕۆشنەکانی نەکەوین.

چوارشەممە ٢٠١٢.٣.٢٨ بەهاری هزری یان سیاسی؟
 ئەوەی لە وڵاتانی عەرەبی ئاسیا و ئەفەریقا دەگوزەرێت، لە چەندیان گۆڕانکاری ڕوویدا، ئەنجامی زۆریان پەشیمانی و دڵساری لەدوایە و بەدوای خۆیدا هێناوە، بەهۆی ئەوەی گروپێکی دیکتاتۆر گۆڕاوە بۆ دانەیەکی تر کە پۆشاکی ئایینی لەبەردایە. ئەمە وای کردووە بیر لەوە بکرێتەوە بەڕاست وەک بزووتنەوەکە ناونراوە بە بەهاری عەرەبی ناولێنانێکی دروستە؟ ئەکرێت بووترێت گۆڕانێکە و بەهارێکی سیاسییە، نەک شتێکی تر.. زۆرن ئەوانەی هیوایان بەوە بەستووە کە ئەم گۆڕانانە، سەرەتا و دەروازەیەکە بۆ جەنگێکی هزری وا نەک ئەو وڵاتانە ڕۆشن دەکاتەوە بەڵکوو تیشکیش بۆ چواردەوری دەداتەوە.

دووشەممە ٢٠١٢.٣.٢٦ وشەی کوردستان لەسەر زاری سوڵتانی عوسمانی
 لە هەڵقەی ڕۆژی دووشەممە ٢٠١٢.٣.٢٦ ، دەهەمین خەلیفە و سوڵتانی عوسمانی سلیمان قانوونی (١٤٩٤ - ١٥٦٦) لە دیمەنێکیدا نامە دەینێرێت یەکێک لە حاکمەکانی ئەو کاتی ئەورووپا لە باسی خۆی و ئیمپراتۆرەکەیدا ناوی شوێنی جۆراوجۆر، لەو  دوای شاری دیاربەکر ئینجا ناوی کوردستان دەهێنێت کە هەر هەمووی لە ژێر دەستی ئەودان.. ئیتر نازانرێت لەو کاتەدا کوردستان مەبەستی کوێ بووە و کوێ نەبووە؟ ئەوە ئەرکی مێژوونووسانە لەو خاڵە بکۆڵنەوە.
بەهۆی ئەم سریالەوە دەردەکەوێت ئەو تورکانە بەتاڵ و حەتاڵ بوون، سەروبنی بیر و شارستانییەتیان  وەک عەرەبەکانی کەنداو هیچی هی خۆیان نییە و نەبووە کەلەپووت بوون، هەر هەمووی هی گەلان و میللەتانی تری ژێر چەپۆکەیان، بەتایبەتی ئەورووپیەکانە!! بێ ئەوەی گەلانی تری موسڵمان لەکولەکەی تەڕیشدا ناویان بێت، بیگومان ئەوانیش دەوری کاریگەریان لە دروستکردنی ئەو عەقلە و ئەو نعمەتەدا هەبووەو گێڕاوە.
ماوەیەکە کەناڵی تەلەفیزیۆنی وڵاتێکی کەنداوی عەرەب بە ناوی دوبەیەوە، سریالی مێژوویی تورکی دۆبلاجکراو بە زمانی عەرەبی بەناونیشانی چەرخی مەزن یان حەریمی سوڵتان پەخش دەکات.

شەممە ٢٠١٢.٣.٢٤ هەڵوێست لەسەر پارتە شمولییەکان
 هەموو هەوڵم خستۆتە گەر بۆ دژایەتی کردندی هەژموونی پارتی و یەکێتی، ئاواش دژی هەموو ئەو دید و ئایدۆلۆجییە شموڵیانەم، کەواتە ناتەبام لەگەڵ پێ کە کە و پارتەکانی تەوژمی ئیسلامی سیاسی و کۆمۆنیستەکان و...
     لەلایەکی ترەوە نموونەی ئەم جۆرە پارتانە (پارتی چارەسەری دیموکراتی کوردستان) عەقلییەتی شیوعی یان کۆمۆنیستە ڕادیکالەکانیان هەیە ئەما بە شێوە ناسیۆنالیستەکەی، بە عەقلییەتی شمولی هەر کورد کوردیانە بێ ئەوەی جیاوازی و تایبەتمەندێتی هەر پارچەیەک لەبەرچاو بگیرن! جیاوازییەکەی ئەم پارتە لەوەدایە کە عەبدوڵا ئۆجەلانیان لە خۆیان کردووە بە فەیلەسووف و شتی قەبەی تر!
     لە ئەسڵیشدا مەبەست لە دروستکردنی ئەم جۆرە پارتانە بۆ کوردستانەکانی تر، دەڵاڵی و ڕایکردنی کاری خۆیانە! ئیتر ژمارەیەک لە ئەندامانی ئەم پارتانە لە دڵسافی یان گێلێتییەوە، چەندیشیان بۆ بزنس و خۆ ژیاندن هاوکات خۆدەرخستن و .. پەیوەستبوون پێیانەوە.
     ناسیۆنالیزمی کورد لە باشوور لەوە دەرچووە کە قبووڵی هەژموونی ناسیۆنالیزمی پارچەکانی تر بەتایبەتی کوردەکانی کوردستانی باکوور بکات.

شەممە ٢٠١٢.٣.٢٤ مەلا مستەفا مرۆڤکوژترین ئەفسەری جاسووی بینیوە!
 لەم چاوپێکەوتنەی کەناڵی تەلەفیزیۆنی ڕووسیایی ئەمڕۆ کە بەزمانی عەرەبی پەخش و بڵاوکردنەوە بۆ ڕژهەڵاتی ناوەڕاست دەکات، کۆنە ڕۆژنامەنووسێکی فەرەنسی بەناوی ئێريک ڕۆوڵێاو Eric Rouleau لەدایکبووی ١٩٢٦ کە بۆ ڕۆژنامەی (Le Monde ١٩٤٤) فەرەنسی کاری کردووە. لەسەر پەیوەندییەکانی مەلا مستەفا بارزانی و پەیوەندی بە حکومەتی ئەوسای سۆڤێتییەوە دەیدوێنن. ئەوانەی دەیڵێت بەلای خەڵکی کوردەوە زۆر گرنگ نییە و زانراوە.
     ئەوەی جێی سەرنجە ئەفسەرێکی پلەداری سەر بە دەزگای جاسووسی کەی جی پی ڕووسیای سۆڤێتی بە ناوی Pavel Sudoplatov بافيل سودوبلاتوف (١٩٠٧-١٩٩٦) چاوپێکەوتنی لەگەڵ مەلا مستەفادا کردووە. ئەم ئەفسەرە ئەو کەسە بووە کە نەخشەی تیرۆری یەکێک لە ڕابەرانی ناسراوی شۆڕشی سۆڤێتی سەردەمی لینین، لیۆن ترۆتسکی ( ١٨٧٩ – ١٩٤٠) لە مەکسیک داناوە.
لەبەشێکی کۆمیدی چاوپێکەوتنەکەدا کابرای ڕۆژنامەنووسی لێی تێک دەچێت لەسەر سنوور چاوی بە پێشمەرگەیەکی کورد کەوتووە کە پێشوازی لێکردووە و تا ڕێبەدێی بکات بۆ ناو شوێنە شاخاوییەکانی کوردستانی باشوور دەڵێت: چاوم بە کوێتییەک کەوت، ڕۆژنامەنووسەکە بۆی ڕاست دەکاتەوە دەڵێت مەبەست ئەوەیە چاوت بە کوردیەک کەوت دەڵێ بەڵێ، هاهاهاهاهاها.

     هەر لەم پەیوەندەدا کەمالی سەید قادر بەزمانی عەرەبی لەنوسینێکیدا کە بە ٣ بەش بڵاوبۆتەوە، بەتایبەتی لەبەشی دووهەمیدا وەک ڕۆژنامەنووسی ناوبراوی فەرەنسی باس لەو پەیوەندییە جاسووسییەی مەلا مستەفا دەکات.

تکایە بڕوانە بەستەرەدایە:
 http://www.ahewar.org/debat/show.art.asp?aid=75338

پێنجشەممە ٢٠١٢.٣.٢٢ دەمەبۆڵەی نێوان مالکی و بارزانی بەرەو کوێ؟
 پێم وایە شیعە بە دەرس وەرگرتن لە ڕابردوو، دەورەی خۆقیم کردنی خومەینی، لەدژی نەیارانی بەکاردەهێنێت، دەیەوێت هەمان کایە دووبارە بکاتەوە، جا قسە لەوەیە دەتوانن ئەوە بکەن و هەموولایەنەکان دەرکەنە دەرەوە و خۆیان بەتاک حوکم بکەن؟
     ئەوەندەی تێگەیشتم لەنێوان دیدی ئەو سێ کەسایەتییەی هەرێمی کوردستان، وتارەکە لایەنگری لە دیدی مام جەلال و نەوشیروان مستەفای پێوە دیارە. ئیتر وەک نووسەرێکی فەرهەنگ کراوە، هەڵوێستی وا لەشوێنی خۆیدایە.
     لەبارەی ئەوەی ئەمەی ئەو کەسایەتیانە لە بۆنەی نەورۆزداا پەیام دەدەن، جێی پەسەندی و چاولێکردنێکی سەرکردە ڕۆژئاواییەکان کە لە سەری ساڵانی زاینیدا پەیام دەدەن. بەڵام وەک ئەمان نا کە هەر یەکەیان لە ئاوازێک دەخوێنن، ئەوان زیاتر بەرەسی کاروکردەوەی ساڵەکە و پرۆژەی ئایندەیان دەخەنە ڕوو، بۆ خەڵک باس دەکەن.
     نەوشیروان مستەفا، بەشێکی گرنگی بۆ بەتاڵکردنەوەی ئەو دەنگۆیە بوو کە لەلایەن پارتییەوە بڵاوکرایەوە، کە گوایە دەوڵەتی سەربەخۆی کوردی ڕادەگەیەنێت، ئێوە ئەو پیاوە نیین کە کارێکی وا گەورە ئەنجام بدەن و لێبوەشێتەوە.
مەسعود بارزانی، وەک کاری هەمیشەیی کە دەرەقەتی کێشە ناوخۆییەکان نایەن و قورس دەبن، ترسی دەرەکی قوت دەکەنەوە، بەوەیش دەیەوێت  کات درێژ بکاتەوە هاوکات ڕووی خەڵکی بەلای مەسەلەی تردا وەربگێڕێت!
----------
بەدواداچوونێکە بۆ وتارێکی بەڵین ساڵح بە ناونیشانی: یه‌ک نه‌ورۆز و سێ په‌یام

پێنجشەممە ٢٠١٢.٣.٢٢  شەڕەدەنووکی دیکتاتۆرەکانی عێراق و هەرێمی کوردستان
 ئەم دایلۆگەی نێوان لایەنێکی کوردی فەرمانڕەوا و لایەنێکی شیعەی فەرمانڕەوا لەسەر کەسایەتییەکی سوونە کە تاوانبارە بە مادەی ٤ ی تیرۆر، سوودی بۆ خەڵک و ئۆپۆزسیۆن هەیە ئەوەی ژێر بەڕە دەخەنە ڕوو هێندەی کە خۆیان فەزح و ناشیرین دەکەن:
بارزانی: عێراق بەرەو دروستبونی دیکتاتۆرییەت دەچێت.
     حسێن ئەسەدی، پەرلەمانتاری لیستی‌ ده‌وڵه‌تی یاسا: لە هەرێمی کوردستانیش دیکتاتۆرییەتی راستەقینە بونی هەیە... ئەگەر جۆرێک لە دیکتاتۆریەت لە عێراقدا هەبێت، ئەوا هەموان بەشدارن، چوونکە حکومەتی عێراق لەسەر بنەمای شەراکەت دروست بووە... ئەمە قسەی ئێمە نییە، ئۆپۆزسیۆنی کوردی بەردەوام باسی دەکەن، کە هەردو حیزبی فەرمانڕەوا دەستیان بەسەر سەرجەم کایەکانی هەرێمدا گرتوە.
     ئەمجارە لە نێوان لایەنێکی کوردی و شیعیدایە، مانای وایە شەڕەکە لەگەڵ بێگانەدایە، مەترسی ئەوەی لێدەکرێت کە سۆزی خەڵکی کورد بەلای بنەمەڵەی دەسەڵاتداری بارزانی زیاتر بکات.

--------------
سەرچاوەی هەواڵ ماڵپەڕی سبەی

دووشەممە ٢٠١٢.٣.١٩ لەعنەتی ٣١ی ئابی ١٩٩٦ بەسەوزی
 یاسین مه‌جید سه‌ر به‌ لیستی‌ ده‌وڵه‌تی‌ یاسای نوری مالکی، لەبەرانبەر داڵدەدانی تارق هاشمی کە تاوانبارە بە مادەی ٤ی تیرۆر، وەک سەردەمی کۆنی یەکێتی نیشتمانی ئاوا بە مەسعود بارزانی دەڵێت:
ئه‌و ئه‌خلاقه‌ كوردییه‌ نه‌بوو كه‌ رێگه‌ی‌ پێدایت له‌ساڵی‌ ١٩٩٦ سوپا و هه‌واڵگری‌ عێراق ببه‌یته‌ هه‌ولێر.
     ئەم وەڵامە وای لە سەرۆکایەتی هەرێمی کوردستان زۆنی پارتی کردووە وەڵام بداتەوە، گوایە قبوڵی ناکەن! بیکەن یان نەیکەن چییە؟ خیانەتی کردووە عەیب نییە؟؟ بەلام لەلایەن خەڵکی ترەوە باسکردنی بە عەیبە دەزانن!! حیزبەکەی بارزانی پارتەکانی هەرێمی کوردستانیان، بێجگە لە بزووتنەوەی گۆڕان بە شێوەی جۆراوجۆر لەسەر ئەو خیانەتە بێدەنگ کردوون گوایە کای کۆن بە با باش نییە.        
     بەڵام ئەوە بۆ بێگانەکان دەبێتە خەیاڵێکی خاوە، چوونکە لە هەر تەنگەشەیەکدا ئیتر لەگەڵ ئەوانی ناوخۆ یان دەرەوە ئەو دەهۆڵەیان بۆ لێدەدرێتەوە و برینی بنەماڵە و حیزبەکەی بارزانی سەد بارە دەکولێنرێتەوە.
سەرچاوەی هەواڵ ماڵپەڕی هاوڵاتی

دووشەممە ٢٠١٢.٣.١٩ ئەو بەتاڵانبردنەی خۆمان نازانیین چۆنە!
 دزی و فزی و خواردنی ماڵی میللەت کە هەموو نامەردێکی گەورە و بچووک لە کاربەدەستانی هەرێمی کوردستان پێی دەوێرێت، درەنگ یان زوو ئاشکرا دەبێت.. کاربەدەستانی ئەفغانی خۆیان پیسترین خەڵکانی سەرزەوین، کەچی سڕی مافیا دەسەڵاتدارەکانی کورد ئاشکرا دەکەن. دەفەرموو ببینن هاهاها:
.    .. جێگری سەرۆک کۆماری ئەفغانستان پێش چەند مانگێک هاتبوە بەغدا، بە نوری مالیکی وتبو سوپاسی کورد دەکەین، ئیشەڵا ئەم زستانەیش کێشەی سوتەمەنیمان نابێت، مالیکی وتبوی یاعنی چی، جێگری سەرۆکی ئەفغانستان وتبوی، نەوتەکەمان زۆر بە هەرزان بۆ دەنێرن.
سەرچاوەی هەواڵ ماڵپەڕی سبەی

یەکشەممە ٢٠١٢.٣.١٨ چاوەڕوانی زیاتر لە بزووتنەوەی گۆڕان دەکرێت
 ئەم دەربڕینەی سەرۆکی فراکسیۆنی کوردستانی خاتووسۆزان شەهاب کە دەڵێت: .. تێبینی سەرەکی من... ئەوەیە، کە دەبێت دەستور عەلمانی بکرێت و دین و دەوڵەت لەیەکتر جیابکرێتەوە...زیاتر زەمکردنە بەسەر ئۆپۆزسیۆنی لیبرالی و سکۆلاری موتەمەسیل بە بزووتەنەوەی گۆڕاندا. کە ماوەیەکە تاکتییکییەن هاوپەیمانی سیاسی دوو پارتە ئیسلامی سیاسیی (یەکگرتوو+کۆمەڵ)ە.     
     هاوکات دەکرێت بەجۆرێکی تر لێکبدرێتەوە بەوەی  پەیامێکیش بێت بۆ پارتەکەی مەسعود بارزانی کە یەکێتی نیشتمانی کوردستان پشتیوانی لە ئۆپۆزسیۆن دەکات. دەلیلی ناڕازیبوونە لەو دەستوورەی کە لەسەردەمێکدا بە هاوکاری خۆیان تێیانپەراند و چاککردنەوەی هەڵەیەک وەختی خۆی کردوویانە.     بەڵام جیاکردنەوەی ئایین لە دەوڵەت یەکێکە لە خاڵەکان، کە ئۆپۆزسیۆن پێدادەگرێت لەسەر گۆڕینی دەکات، نابێت ئەوەیش فەرامۆش بکرێت کە گۆڕینی دەستووری هەرێم بەتایبەتی لەم خاڵەدا ناگونجێت ناتەبا بێت لەگەڵ دەستووریعێراقی فیدراڵی کە ئایینی جیا نەکردۆتەوە.     
     سەرهەڵدانی مەسەلەی چاکسازی لە پرۆژەی دەستووریهەرێمی کوردستان خەڵکانی ناڕازی هان دەدات تا بڵێن ئایا کامیان پێویسترە جیاکردنەوەی حیزب لە حکومەت یان جیا کردنەوەی ئاین لە دەوڵەت؟ 
     بزووتنەوەی گۆڕان خۆی یەکلایی کردۆتەوە، بەهەوڵی تێکۆشانی ئەو وایلێ هاتووە کە فشار دروست ببێت تەنانەت لەسەر باڵێکی گەورەی دەسەڵات، بێنە سەر خەت و موخالەفەت بنوێنێت. بزووتنەوەی گۆڕان لە چەند ئاستدا خەریکە، بەئاسانی تەسلیم نابێت بەتایبەتی بۆ پارتە ئیسلامییەکان، بەپێچەوانەوە بۆتە هۆی زیندووبوونەوەیان و جەرائەت پێبەخشینیان.
     بەڵام هاوکێشەکان بەردەوام لە گۆڕاندان، گەربزووتنەوەی گۆڕان لە هەموو ئاستەکاندا وریا نەبێت، ئیسلامییەکان دەگەی خۆیانی لێدەوەشێنن، چوونکە باگراوەندی کۆی ئەو تەوژمانە، باشترین دەلیلە، بۆیە هیچ گرێنتییەک نییە بۆ ڕاستگۆی هەتا سەرییان. نابێت ئەوە بشارێتەوە کە لێرە و لەوێ بەتایبەتی لەناو جەماوەر و لایەنگرانی بەشێک لەو پارتانە کەوتوونەتە تەقەکردن لە بزووتنەوەی گۆڕان بەبیانووی جۆراوجۆر!!     
     هاوکات لە خاڵی هاوپەیمانێتی لەگەڵ پارتە ئیسلامییەکان، ترس و گومان لەسەر بزووتنەوەی گۆڕان دروست بووە. بەخاتری دژایەتی کردنی دەسەڵاتی پارتی+یەکێتی، پشت بکاتە بنەماکانی کۆمەڵگای سکولار و فەرامۆشی بکات.
پاشکۆ:

     گوایە بزووتنەوەی گۆڕان ناتوانێت مەسەلەی جیایی ئایین لە دەوڵەت بە جدی وەبگرێت. نا هاوکێشەکان بەردەوام لە گۆڕاندایە.. ئەگەر بە هەڵەدا نەچووبم یەکەم کەسم کە بە ئاشکرا لە ماڵپەڕی خودی بزووتنەوەی گۆڕان وەک گۆڕانخوازێک زەنگی وریابوونەوە و بەئاگاهێنانەوەم لێداوە، لە مەترسی هاوپەیمانە تەکتییکییەکانی ئاگادارم داوە.
     هەمیشە پارتە ئیسلامییەکان جێی گومانن، کە دەیانەوێت هەژموونی ئیسلامی ئێرانی و تورکی بسەپێنن، بەڵام ناسیۆنالیزم گەر بە هەڵەدا نەچووبم لە کوردستانی باشوور لەوە بەهێزترە کە ڕابماڵرێت لەلایەن ئەوانەوە، بەهاوکاری خەڵک و ئۆپۆزسیۆنی عیلمانی عاملی فشارن بۆ خۆ چاککردن و شەڕی بەدیلی حوکم کردنە. 
     ئەگەر یەکێکی وەک یەکگرتوو کەمێک پێداگری دەکات، خۆی بە مەزڵوم دەزانێت بەجۆرێکیش لەجۆرەکان بەهۆی ئەنجامەکانی بەهاری عەرەبییەوەیە بوغرا بوون، وا دەزانن دۆخی هەرێمی کوردستان دەقاودەق لەوانە دەچێت.
     فشارە دەرەکییەکان بەردەوام دەبن بەشێوەی جۆراوجۆر، باشووریش ناچارە دەستوپەنجە لەگەڵ دۆخەکان و پێشهاتەکاندا نەرم بکات، چوونکە نایەوێت ئەو دۆخەی کە هەیە لەدەست بچێت. بۆیە گەورەترین تەنازوول بۆ دەوڵەتانی وەک ئێران و تورکیا دەکات. نەیکات چی دەکات؟ 
---------
تێکستی هەواڵەکە
لێرەدایە
هەمان وتار لە ماڵپەڕی
سبەی؛دا
هەینی  ٢٠١٢.٣.٩ گۆڕینی سەرۆکی پارتەکان گەر بە یاسا و ڕێسا نەبێت هیچ تامێکی نییە
 ئەوەی سەلاحەدین بەهادین دەیکات و بەتەمایە واز لە سەرۆکایەتی حیزبەکەی بهێنێت، وەک مەبدەئـ هەنگاوێکی پۆزەتیفانەیە. بەڵام تیشک زیاد لە پێویست ئەو هەنگاوە قەبە بکرێت و پیشانبدرێت، لە نێت پاکی دەردەچێت، شک و گومان پەیدا دەبێت، یەکگرتوو دەیەوێت و بەتەمای دروستکردنی گەڵەگایەکی تری وەک مام جەلال و مەسعود بارزانییە!
     هەموو دەزانیین لە ئاستی حیزبە بێ نفوز و لاکوتەکاندا کارێکی نوێ نییە. ئیتر ئەم زەمە بێتامە چییە لەلایەن ڕاگەیاند و لایەنگرانی ئەو پارتەوە دەکرێت و بە خەڵک دەفرۆشرێت.
     یەکگرتوو خۆشی بکوژێت هەر وەک هێزە بچووک و بێ نفوزە کە کۆیلەی عەقلییەتێکی دۆگمای ئیسلامی دەمێنێتەوە، واباشترە بوغرا نەبێت بەوەی دوای ڕووداوەکانی دەڤەری بادینان وابزانێت جەماوەری فرە تر بووە و سۆزی خەڵکی بەدەستهێناوە، هاوکات بییەوێت بەپشت بەستن بە بزووتنەوەی گۆڕان کە غیرەتی داوەتە بەر و بۆتە ئۆپۆزسیۆن و زمانی کەمێک گەرم بووە، و دڵیش بە پایزی چەند وڵاتی عەرەبی و تورکیا خۆش نەکات و نەبەستێت. شێر بە گوێ بگرێت هەر ڕێویە لەڕەکەی جارانە.

چوارشەممە ٢٠١٢.٣.٧ کێ دەڵێت سلەیمانی پەراوێز خراوە؟!
 بۆ لێدانی شکۆمەندی شاری سلەیمانی کە ناحەزی زۆری بۆ پەیدابووە، بە غەرەز شاروشارۆچکەکانی کوردستانیان قووتکردۆتەوە، گوایە ڕاپەڕین لەوانەوە دەستی پێکردووە. بێگومان ئەوە بەڵگەنەویستە و ئینکاری ناکرێت، بەڵام لێرەدا قسەکردنە لە ئەنجامی ڕووداوەکە.
     دەکرێت بەجۆرێکی تر بڕوانیینە هەنگاوە یەک لەدوای یەکەکانی ڕاپەڕین، لە مێژووی کوردستانی باشووردا هەرگیز شار و شارۆچکەکان نەبوونەتە یەکلاکەرەوەی ناڕەزایەتییەکان و زۆر ڕووداو بینراوە کە لەو شوێنانە خولقاوە، ئەنجامەکانیشی بینراوە کە شکست و ئارامبوونەوە زیاتر هیچی تر نەبووە، گۆڕانکاری ڕێشەییان دروست نەکردووە..
     بەڵام کە سلەیمانی وەک شارێکی گەورە لەو کات و سەردەمەدا ڕاپەڕی چارەنووسی ڕاپەڕینی یەکلایی کردەوە، ورەی خستەبەر شارە گەورەکانی تر و یەک بەدوای یەکدا ئەوانیش هەڵستان و ڕابوون.
     هۆی ئەوەی کە لەو سەردەمە شاری سلەیمانی ڕاپەڕینی یەکلاکەرەوە ئەنجاامدا بە حوکمی سەنتەربوونی وەک شارێکی گەورە بوو، هەڵومەجی ئەو کاتی عێراق و ناوچەکە کە پێی دەنایە قۆناغێکی هەستیارەوە، یارمەتیدەر بوو سەرکەوتنی زیاتری بۆ مسۆگەر کرد. ئیتر کە بینرا سەنتەرێکی گەورەی وا ڕابووە و ڕزگارکراوە، ترس و بیم و  دڵەڕاوکێی نەهێشت و جورئەتی دایە بەر شارە گەورەکانی تری وەک هەولێر و دهۆک و دواتر کەرکووک.. 
     
مەبەست شاروشارۆچکەکان نییە، هێندەی قوتکردنەوەی ئەو ناوانەیە کە غەرەزێک لە پشتەوەی ئەو کارەوەیە، بۆ کەم بایەخکردنی سەنتەرێکی گەورەی وەک شاری سلەیمانی بە تایبەتی لەو خاڵەدا.. ئەگینا بەڵگە نەویستە سەرەتا لە شارۆچکەیەوەکەوە دەستی پیێکرد ئینجا سلەیمانی بەڵام کە سلەیمانی قسەی کرد، کارەکە یەکلایی بوەوە، بە حوکمی مەوقعییەتی بەهێزی، ئەوانی تر دەبێت لاسایی بکەنەوە، مێژووی شارەکە شاهیدە، ناتوانرێت بۆی دابتاشرێت و ناشکرێت هیچ شوێنێک پەراوێز بخرێت و لە بایەخیان کەم بکرێێەوە، بەڵام واباشترە شتەکان وەک خۆیان ببینرێت و لە جێی خۆیان دابنرێت.
     لایەنێکی تری مەسەلەکە بۆ خودی خەڵکی سلەیمانی دەگەڕێتەوە، سەنتەری سلەیمانی (هەرچەندە لە ئێستادا سەنتەری بڕیارەکان لە کوردستانی باشوور ئاڵوگۆڕیان بەسەردا هاتووە) وەک شارێکی گەورە بۆتە دێیەکی گەورە، بەهۆی هەلومەرجی سیاسی داسەپاو، سکۆلاریزمی شار بە ئیعترافی خەڵکانێکی زۆر لە مێژەوە پاشەکشەی پێکراوە، لە خاڵی ڕاپەڕینیشدا بەهەمان شێوە. کەسانی ڕادیکاڵی شارەکە لەبەر هەر هۆیەک بێت، قسەیان نەکردووە. کەواتە دەوروبەر تەحەکم دەکەن و هەژمونی خۆیان دەسەپێنن. پرسیار ئەوەیە ئایا بۆ ئەمەودوا کەسە ڕادیکالەکانی سەنتەری سلەیمانی بێدەنگ دەبن؟ 
     گەر وردتر بڕوانینە ئاسیا و ئەفەریقا و ڕووداوە هاوشێوەکانی وەک ڕاپەڕینی ٧ی ٣ ی ١٩٩١ ی سلەیمانی، سەنتەری شارە گەورەکان و بەتایبەتی پایتەختی وڵاتەکان کۆتاییان هێناوە بە ڕاپەڕین و ناڕەزایەتییەکان، بوونەتە خاڵی وەرچەرخان و چارەنووس ساز و دەسەڵاتی ئەو حکومەتانە ئیتر دیکتاتۆری یان هەرچییەکی تر بوو بێت، دیاری کردوە.
     دیارە هەلومەرجی سەردەم و قۆناغەکان جیاوازە، ئەگەر لە نوێترین ڕووداوی کوردستانی باشوور بڕوانرێت کە بە خۆپیشاندانەکانی ١٧ی شوباتی ٢٠١١ ناسراوە وەک نموونە بهێنینەوە، دەبینین دوای دوو مانگ لە ناڕەزایەتی لەبەر ئەوەی نەتوانرا بگوێزرێتەوە سەنتەری هەرێمەکە کە هەولێرە، چارەنووسی حکومەتی هەرێم تووشی لەتمە نەبوو و گۆڕانکاری ئەوتۆ ڕووی نەدا. 
     کەواتە ئەوە سەنتەرەکانە وەک ٢١ ساڵ لەمەوبەر ڕوویدا چارەنووسی کوردستانی باشوور و وڵاتانی دی دەگۆڕێت و یەکلادەکاتەوە، بەئاراستەیەکی تردا بردووە و دەبات.
     بۆیە جێی خۆیەتی لەم یادەدا دەنگ بۆ گەڕانەوەی مافی ڕەوای شاری سلەیمانی بەرزبکرێتەوە، تا لەوە زیاتر پەراوێز نەخرێت.. چوونکە مۆری سلەیمانی نەبوایە هیچ بەهیچ نەدەکرا.
--------------
هەمان بابەت لە ماڵپەڕی سبەی؛دا

دووشەممە ٢٠١٢.٣.٥ نازانم مام جەلال بۆ لە مەلامستەفا جیابووە؟!!
 جەلال تالەبانی لە دوا چاوپێکەوتنی لەگەڵ ڕۆژنامەی هاوڵاتی دەڵێت:... یه‌كێتی‌‌ و گۆڕان له‌ رووی‌ مه‌وزوعییه‌وه‌ زۆر لێكنزیكن‌ و هیچ ناكۆكییه‌ك نییه‌ له‌نێوانماندا، زۆر شتمان موشته‌ره‌كه‌، چل ساڵ خه‌باتی‌ یه‌كێتی‌ زۆرێك له‌و براده‌رانه‌مان له‌گه‌ڵ بووه‌، له‌ چاك‌ و خراپ موشته‌ره‌كین، شه‌هیدمان موشته‌ره‌كه‌، ده‌ستكه‌وته‌كان‌ و شكسته‌كانمان موشته‌ره‌كه‌، شه‌ڕه‌كانمان‌ و سه‌ركه‌وتنه‌كانمان موشته‌ره‌کە.. 
     مام جەلال، لەباری مێژووییەوە ئەو قسانەی بۆ ژمارەیەکی دیاریکراوی و دەستەبژێری ناو بزووتنەوەی گۆڕان لەوانەیە ڕاست و دروست بێت..
     بەڵام خۆ ئەو بزووتنەوەیە کە خاوەن جەماوەرێکی بەرینی ملیۆنییە، هەزارەها خەڵکانی نا یەکێتی لەگەڵدایە و پێوەی پەیوەست بووە لەبەر خاتری مێژووی ئەو چەند نەفەرەی کە کۆن یەکێتی بوون نییە و نەبووە، کە جێی داخە بەشێک لە ناشیریینەیەکانی ئەو قۆناغەیان بەردەکەوێت.
     لە ئێستادا ئەوانەی کە یەکێتی نەبوون زۆرترن لەوانەی یەکێتی بوون، لە هەموو بارێکەوە ئەو مێژووە هاوبەشە بە هی خۆیان و بزووتنەوەکەیان نازانن.
     گۆرانخواز و نەوەی نوێ چی لە مێژووی بەخوێن نووسراوی سەردەمێکی تووند و گەرم بکەن؟ ئەگەر دانە دانەی هەڵسووڕاوانی ناو ئەم بزووتنەوەیە شانازی بەو خەباتە هاوبەشەوە دەکەن ئەوە دەچێتە خانەی مەسائیلی تایبەتی خۆیانەوە، ناکرێت بەگشتی بکرێت وەک مام جەلال دەیەوەێت چەواشەکاری بکات.
     بۆ مام جەلال ناچێت بەتەواوەتی تەسلیم بە بنەماڵەی بارزانی ببێت باشترە خۆ ماوەیەکی زۆر لە یەک حیزبدا بوون و خەباتی هاوبەشیان هەیە. بۆ پرسیار لە خۆی ناکات لە سەرەتای شەستەکاندا لە پارتی و مەلامستەفا جیا بووە؟ بۆ خۆی وای کرد؟ ئەو مێژووەی بیرچۆتەوە، ئێستا مەسەلەیەکی وا دەوروژێنێت لەگەڵ بزووتنەوەی گۆران.. ئەمە ئاسنی ساردکوتاندنە...
------------
تەواوی بەشی یەکەمی چاوپێکەوتنی ناوبراو لە ماڵپەڕی رۆژنامەی هاوڵاتیدا، لێرەدایە.

یەکشەممە ٢٠١٢.٣.٤ خۆنمایشکردنی ئیسلامییەکان بە بیانووی قورئان سووتاندنەوە!!
 رۆژی هەینی ٢٠١٢.٣.٢ ژمارەیەک خەڵکی کوردی دانیشتووی فینلاند کۆبوونەوەیەکی ناڕەزایەتییان لەبەردەم باڵوێزخانەی نەرویجدا ساز کرد. مەبەست لێی یان بە بیانوی ئەوەی لە ماڵپەڕی یوتوب یەکدوو کوردی هەرێمی کوردستان کتێبی پیرۆزکراوی موسڵمانانیان سووتاندووە.
     ژمارەیەک لەو بەشدارانەی کە لە کۆبوونەوەکەدا بوون هەرگیز نەبینراون لە کۆبوونەوە و ناڕەزایەتییە جۆراوجۆرەکانی دیکەی کوردانی دانیشتووی فینلاند، ئەمە جێی پرسیارە؟
     لەلایەکی ترەوە ئەو دروشمانەی کە لە کۆبوونەوەکەدا دەوترێتەوە، مرۆڤ دەترسێنێت چوونکە بۆنی تووندوتیژی لێ دێت؟! ڕێک بە پێچەوانەی ئەوە مەبدەئەوە دەکەوێتەوە کە پێی وایە هەموو لایەنەکان ڕێز لە بیروڕا و عەقیدەی ئاسمانی و نائاسمانی یەکتر بگرن.
بۆ زۆر کەس پرسیارە ئەمە دەستێکی (!!!!) تێدا بێت؟ گریمان وا نییە، بەڵام ئایا ئەم نمایشە، گوایە لە ماڵپەڕێکدا یەکدوو کەسی کورد کتێبی ناوبراویان سووناندووە، ئەوە دەهێنێت؟ ئەمە بەدوای ڕوودانی سووتاندنی کتێبی ناوبراو دێت کە بە پێی هەواڵەکان سەربازانی ئەمەریکی لە ئەفغانستان ئەنجامیانداوە و ناڕەزایەتی جۆراوجۆری لێکەوتەوە.
     سووتاندنی چەند ئایەتێک لە کتێبی ناوبراو، ئەوەمان بیر دەهێنێتەوە کە لایەنگرانی پارتە ئیسلامییەکان لە زۆر سەردەمانێکدا چییان دەکرد بە ژنانی سفور، چییان دەکرد بە خەڵکانی سۆکلار و مەدەنی؟ چەندەها تیڕۆریان ئەنجامداوە کە لە دەسەڵاتیشدا نەبوون! ئەو سەردەمە بەسەرچوو ئەوان تووندڕەو بن و خەڵکی تر نا، ئەو ئاوە ئەوان ڕشتویانە ئێستا خەڵکی تر پێی تێدەخەن، بەڕەوڕووی خۆیان دەبێتەوە کە کارێکی تووندی وا بە پێغەمبەرەکەیان و کتێبەکەیان دەکرێت کەچی باعەیان لێ هەدەستێت.
پرسیار ئەوەیە باشترین ڕێگا بۆ ئارامی کۆمەڵگا بەلای ئیسلامییەکان و تەنانەت خەڵکی موسڵمانی ئاسایی چییە؟

پاشکۆ:
دۆخەکە لەوە دەرچووە کە بەتەنها تەوژمێکی سیاسی سەر بە بیروڕای کۆمۆنیستی دژی بیروڕای ئیسلامی بێت.
     لەم ڕووداوەدا ئەگەر مەبەستی تری شەخسی لەپشتەوە نەبێت کە زۆر جار بینراوە لە کەمپەکانی چاوەڕوانی قبوڵی پەناهەندەکان، بەدەستی ئەنقەست خەڵکانێک هەبوون کاری هاوشێوەی وایان ئەنجام داوە وو نیشانیان پێکاوە.
     هەر لە پەراوێزی ئەم ڕووداوەدا بە ناڕاستەخۆ باس لەوە کراوە و دەستی تاوان بۆ بزووتنەوەی گۆڕان درێژ کراوە، گوایە ئەنجامدەرانی کارەکە سەر بەو کیانە سیاسییەن.
     ئەو دیدە زۆر جوان و لەجێی خۆیەتی کۆمۆنیستەکان بەو شێوەیە بیربکەنەوە کە بیروباوەڕی کۆمۆنیستی تەنها ئەنتی ئایین نییە، لە مێژوەوە ئەو بیروڕایە لەلای ڕوناکبیران باس کراوە و دایلۆگی لەسەرکراوە، کە بیروباوەڕێکە دژی ناعەدالەتییە، بێگومان ئایینەکان بە حوکمی کۆنییان پرن لە کەموکووڕی، کە ناگونجێن لەگەڵ ئەم سەردەمەدا.
     یەکێک لەو چەند کەسانەی ئەو کتێبەیان سووتاندووە نزیکە بە بزووتنەوەی گۆڕان، بۆیە ئیسلامییەکان گڕیان گرتوو بوو، گۆڕان هێزێک نییە حسابی بۆ نەکرێت تەنانەت هاوپەیمانە سیاسی و تاکتییکییەکانی ئێستای کە پێکەوە کاری هاوبەشی سیاسی دەکەن.
     ئێ خۆ منیش نزیکم بە بزووتنەوەی گۆڕان، بەڵام دانووم لەگەڵ ئاییندا ناکوڵێت. بزووتنەوەی گۆڕان بەلایەنی کەمەوە ملیۆن زیاتر لایەنگری هەیە، خەڵکانێکی زۆر خوێنەوار و خاوەن بڕوانامەی بەرزی لەگەڵدایە، ئاساییە خەڵکانی ئەنتی ئایینی زۆریشی تێدا بێت.
ئەبێت ئەوەیش جیا بکرێتەوە بزووتنەوەی گۆڕان وەک کیانێکی سیاسی جیایە لەگەڵ دیدی تاک تاکی لایەنگرانی، ئەو لەوانەیە نەتوانێت لەگەڵ تووندڕەوی فڵان لایەنگری بێتەوە.

-----------
پارچە ڤیدیۆیەکی خۆپیشاندانەکەی هێلسنکی، لێرەدا دەبینن.

هەینی ٢٠١٢.٣.٢ خوا لەلای منداڵان
 پرسیاری مناڵێکی سویدی ٨ ساڵانە:
- : خوایە گیان تۆ هەیت؟ هەیە بڕوای بە بوونت نییە، ئەگەر هەیت واباشترە کارێکی بەپەلەی وا بکەیت، بیسەلمێنت کە هەیت.
مناڵێکی شەش ساڵی دیکەی سویدی:
- : خوا گیان، بەدەستی ئەنقەست بەو شێوەیە زەرافەت خولقاندووە، یان ئەوە هەڵەیەک بووە، ڕوویداوە؟
     ئەمە وەک ئەو دەربڕینە لای خۆمان (هەرێمی کوردستان) وایە کە مرۆڤێک دەبینی هەڵسووکەوتی ناسروشتییە دەنگی پیاوانەیە یان ژنانە دەجووڵێتەوە، بۆیە دەڵێن ئەوە خوا لێی تێکچووە، دەبوایە پیاو بوایە نەک ژن! یان بە پێچەوانەوە...
     هەر لەو بازنەیەدا لەسەردەمی بزووتنەوەی چەکداری مەلا مستەفادا، جارێک پێشمەرگەیەک لە یەکێک لەبەرەکاندا فرۆکە دەکەوێتە دوای، و ڕاوی دەنێت. برادەریکی ئاگای لێی دەبێت پێی دەڵی: هاورکە خوا هاورکە خوا.. ئەویش دەڵێ کورە خوای چی؟ بەری خوای لێگرتووم!
----------
     بیستم کە ئازاد بەرزنجی نامیلکە یان کتێبێکی لەو قسەوباسانەی منداڵانی جیهان لە هەرێمی کوردستان وەرگێڕاوە و بەچاپگەیاندووە، بەڵام ئەم دوو دانەیە فەهمی کاکەیی کردوونی بە عەرەبی و بەستەری ماڵپەڕە سوویدییەکەیشی لەگەڵدا دانابوو.

هەینی ٢٠١٢.٣.٢ لە پەراوێزی کوشتنی مامۆستا ئەمەریکییەدا
 ڕوودانی تەقە و کوشتوبڕی ناو خوێندنگەی میدیای نموونەیی (٢٠١٢.٣.١) کاردانەوەی جۆراوجۆری لەلایەن خەڵک و میدیاکانەوە لێکەوتەوە، خاڵێکیان زیاد لە پێویست دووبارە دەکرێتەوە، گوایە ئەو مامۆستا ئەمەریکییەی کە مێردمنداڵێکی خوێندکاری خۆی کوشتوویەتی دەبێتە هۆی سومعەی دەبەزین و ناشیرین کردنی هەرێمی کوردستان لەلای دەرەوە. گوایە نموونەی وەک ئەوانە هاتوون بۆ خزمەتی کورد کەچی دەیانکوژن. کاری وا دەبێتە هۆی سڵەمینەوەی خەڵکانی بێگانەی تر کە نەیەنە هەرێمەکەوە.
     بە بەرگری کردن نەبێت لە هەرکارێکی تووندوتیژی، بۆ هەموو ئەو بیانوانە و زۆری تر با ورد تر بڕاونینە دۆخی هەرێم کە بە سەردەمی ئاوەدانکردنەوە دادەنرێت، لای زۆر وا ڕۆیشتووە کە دۆلاری تیا دەبارێت، کەواتە ئەو شوێنە دەبێتە ڕووگە و شوێنی کار بۆ زۆر کەس بەمەبەستی کاردۆزینەوە، بۆ پەیداکردنی پارە و پول، کۆکردنەوەی سەرمایە، بەتایبەتی خەڵکانێکی زۆر گەر بێهونەر و بێ پیشەش بن کە هاتنە وڵاتەکەوە، خۆیان بە گەورە و پسپۆڕیش دانەنێن، هاوکات لە عەقلییەتی بێگانەپەرستییەوە خەڵکەکەی خۆمان لە خۆڕا گەورەیان دەکەن و سیفەتی پاڵەوان و لەخۆبردوویان دەدەنە پاڵ و زیاد لە پێویست گرنگیان پێدەدەن، موچەی زۆریان بۆ دەبڕنەوە.
     کەواتە ئەو ڕووداوە و زۆری تر ڕوو دەدەن و ڕوویانداوە، بەداخەوە وەک ئەم مامۆستایە تیشکی نەخراوەتە سەر!! دەچێتە خانەی شەهیدانی ڕێگای ژیان و کاروکاسبییەوە. قابیل بە فەرامۆشکردنە و ناشێت تئیوری بۆ دابتاشرێت...
--------------
تکایە بڕوانە ئەم بەستەرەی ماڵپەڕی گۆڤاری لڤین


خەمی ڕۆژانە، شوبات ٢٠١٢

AbasShiwan-عەباس شوان




سێشەممە ٢٠١٢.٢.٢٨ سیخوڕی کورد لەسەر کورد!
 هەرێمی کوردستان بە ناوەند و لانەی جاسووسان دادەنرێت! لەهەر سەردەمەدا سیخوڕی بەجۆرێک بووە، دەکرێت بووترێت سیخور خەریکە چاومان دەربهێنن.. سیخوری حیزبی دەسەڵاتدار و گەورە حیزبی کوردی پارچەکانی تر و عەرەبەکانی عێراق و دەوڵەتانی دەروجیران لە پێستێکی جوان خۆیان داپۆشیوە.
     لە ناو ئەوانەدا هی زۆر سووک و چرووکیان تێدایە کە لەسەر کڕینی ڕۆژنامەیەک ڕاپۆرت دەنووسێت، هی واشیان تێدایە قورسە و بەدوای وردەکارییەوەیە، جاری وا هەیە لە یەک کاتدا چاوی چوار جاسووس لەسەرتە، ئیتر هەیانە سوود لە نوێترین تەکەنەلۆجیا وەردەگرێت هەشە سادە و تەقلیدییە، خراپ ترینیان بۆ دەوڵەت و حیزبە دیکتاتۆرییەکان چوونکە قابیل بەوەیە کەسی ئۆپۆزسیۆن مەرج نییە یان ئەو موخالیفە لە پێناو باشترکردنی ژیانی خەڵک کار بکات،، گیان لەدەستدانی تێدایە و لێدەکەوێتەوە. 

     ئەم ڤارۆسە لە دەرەوەیش ژمارەیەک لە کوردەکان هەر چەندە کەمتر ئیحتیاج و موحتاجن بەڵام بە شێوەی جۆراوجۆر لەسەر یەکتری دەیکەن و بوونی هەیە، ئەمە وێڕای سیخوری هێز و نەیارەکانی تر..

یەکشەممە ٢٠١٢.٢.٢٦ ئیسلامە عەرەبەکان عەقڵیان لە کێریاندایە!!

 مچەی عەبدئەلجەلیل ١٩٥٢ سەرۆکی ئەنجومەنی ئینقالی لیبیا، کەلەپووتێکی عەرەبی ئیسلامییە، لە جیاتی ئەوەی پەیمان بە خەڵکی بدات کە مووچە و کاڕ بۆ بێکاران و خانوو و دواڕۆژیکی ئارام بۆ خەڵکی دابین دەکات، مژدەی ئەوەیان پێدەدات کە یاسای فرە ژنی ئازاد دەکات و ئەو مافە پێشێلکراوەیان بۆ دەگەڕێنێتەوە!!! پێدەچێت پیاوی عەرەبی ئیسلامی عەقڵیان (حاشا لەڕووتان) لە کێریاندا بێت!!؟؟ چەند پیس و ڕاسیستن!!!
شەممە ٢٠١٢.٢.٢٥ هیچ بیانوویەک ناخوات تا خۆ بدزرێتەوە
 گەڕانەوە بۆ مێژوو بە شێوەیەک لە شێوەکانی بە فاشییەت دادەنرێت؟ لە کاتێکدا ئەوە بەڕاست دەگەڕێت وەک ئەوەی ئێستا دەبینرێت حیزبە ئیسلامییەکان سواری شەپۆلی ناڕەزایەتییەکانی باکووری ئەفەریقا و ڕۆژهەڵاتی ناوەڕواست بوون، بەقازانجییان کەوتەوە و لە چەند وڵات بە دەنگدان هاتوونەت و حوکمی دیکتاتۆرییان گۆڕی بۆ دیکتاتۆرییەکی تر..
     لە کۆنەوە دەگوورێت خۆ هەر بە هەڵبژاردن و دیموکراتی بوو کە هێتلەر هاتە سەر دەسەڵات، بۆیە لەو کاتەوە دەنگی ناڕەزایەتی لەبەرانبەر ئەو سەقەتییەی سیستەمی دیموکراتی سەریهەڵداوە.
     ئەی باشە چی کراوە بۆ بەرگرتن پێی و پڕ کردنەوەی ئەو کەلەبەرە؟ جا چۆن دەبێت لەبەرخاتری ئەوەی هێزە کۆنسەرڤاتیڤەکان دێنە سەر دەسەڵات دەستبەرداری گۆڕانکاری بین، پۆلەتیکایەکی حەکیمانە نییە و نابێت.. کەواتە بەڵی بۆ گۆڕین و گۆڕانکاری و بەشداریکردن تێیدا بەوپەڕی حەماسەوە...


هەینی ٢٠١٢.٢.٢٤ دایلۆگ لەسەر کوشتن و بەکرێگیراوی بۆ حیزبە گەورەکان
 چۆن دەزانیت من حەقدم بەرانبەر ئەو حیزبە هەیە؟ دیارە بەڕێزتان لێتان تێکچووە هەر کەسێک موخالیف بە حیزبەکەی بارزانی مامجەلال ئۆجەلان حاقید بێت. خۆت باش دەزانی موخالیفبوونم بەرانبەر بەو جۆرە حیزبانە بڕوانەبوونمە بە تاکحیزبی و دیکتاتۆرییەتی سەرکردە ئیتر ئەوە حیزبە لە ئۆپۆزسیۆن یان حکومەتدا بێت جیاوازی نییە.
     بەڵام مادام وای لێهات من پێم باشە مرۆڤ بوو بە پیاو و مووچەخۆر و دەڵاڵی فڵان پارت باشترە لە واقیعی کوردستانی باشوور ڕانەکات بچێت خۆی لەلای یەکێکیان قەید بکات.
     بە جۆرێکی تر ئەگەر سیاسەتیش دەکات ئەوا ئۆپۆزسیۆنی پەرلەمانی و ناپەرلەمانی و ... هەیە با بفەرموێت.. نەچێتە لای ئەو حیزبانەی پارچەکانی تر کە لەوانەیە ڕۆژێک لە ڕۆژان بە تۆمەتی جاسووسی کردن بکوژرێن! یان لە ژێر دروشمی نەتەوەیی درۆزنانە هەڵیان بفریوێنن و بە دەستی سەربازی دەوڵەتە دراوسێکان بەکوشتیان بدەن!
     مانای چی خەڵک ئیتر هەر چییەکەی کردبێت وەک سەگ بتۆپێنرێت!! لەگەڵ هزری کراوە نایەتەوە.
     ناکرێت لەبەر ئەوەی فلان بەجاسووسی دەزانێت موستەهەقی تۆپین بێت، فەرهەنگێکی نامرڤانەیە، ئیتر هەر کەسێک خۆی بە شۆڕشگیر و ئۆپۆزسیۆن و دەسەڵات بزانێت، بیکات، دەبێت دژی بوەستینەوە.
     نازانم ئەبێت هونەر لەوەدا چی بێت دوژمنی وەهمی لە خۆرا بۆ خۆمان دروست بکەین. بە دیدی کوردێکی کوردستانی باکوور یان ڕۆژهەڵات و ڕۆژئاوا بڕوانیین، هەڵەی گەورە دەکەین.
     مەبدەئی کوشتن جێی پەسەند نییە، سەیری کەسێکی خۆ بە نارازیزان و تەشبیه نەبێت مامجەلال بکە، لەوانەیە هەزار ڕەخنەی لێبگریت بەڵام ئەو ئامادە نییە واژووی لەسێدارەدنی خەڵک بکات سوور دەزانێت تیرۆریستە، کەچی لافگەزافی زۆر لێدەدرێت  نابن بە مامجەلال و ناترسن بە ئاشکرا داوای کوشتنی خەڵک دەکەن، ئەمە تەناقوزە ئەمە بن لادنییە و لەگەڵ فەرهەنگی مۆدێرنی مرۆڤدۆستانەدا نایەتەوە.
     بەدەر لەلایەنە مێژوویەکەی مامجەلال بەوەی دەستی سوورە، بەڵام ئەو هەڵوێستەی گەر بۆ چاوبەستیش بێت یەکێکە لە هەڵوێستە گونجاو و پۆزەتیفەکانی..
     خۆدانە دەست ئەو حیزبە (پ ک ک)، ئەگەر گریمان بۆ موچەخۆریش نەبێت ئەوا بە بەگری لێکردنیان و بە بەلاش بوونە بۆقی، خۆ فەقیر نیین وەک پارتی و یەکێتی دەوڵەمەندن.
     مرۆڤ کەس پەرست (عەبدوڵا ئۆجەلان) بێت، بچێت مامجەلال و مەسعود بارزانی بپەرستێت باشترە (دیارە خراپترین هەڵبژاردنە) ئەگیان ئۆپۆزسیۆنی جۆراوجۆر هەیە ئەوە عەرز و ئەوە گەز هەزار ساڵ بکەیت بێگانەپەرستی دوایی دەهێنی نوشستی، چوونکە ئەو حیزبە وەک مقاش باشووری و ڕۆژهەڵاتییەکانیان گەرەکە و هیچی تر..

پێنجشەممە ٢٠١٢.٢.٢٣ سوتانی قورئان و بێکاری حکومەتی هەرێم!
 ئەم لەسەرکردنەوەیەی سەرۆکایەتی هەرێم لەسەر سوتانی کتێبی موسڵمانان قورئان کە لە ئەفغانستان ڕوویداوەە.. جێی پێکەنین و گریانە. لەمەوە دەردەکەوێت و دەسەلمێت ئەمە حکومەتی هەرێمی ئیسلامی کوردستانە!!!! نەک شتێکی تر.
     قسە لەوەیە پێم باشە حکومەتی هەرێم وەک زۆر لە حکومەتی تری دنیا، ڕۆژانە بەهۆی وتەبێژەکەیەوە لەسەر مەسەلە گەرم و نەرمەکانی قسە و دیدی خۆی بدات. بەڵام کە جار جاڕ لەسەر ڕووداوێکی وا دێتە وەڵام، بەردی بەرد ئاسا دێنێتە قسە!!
     ئاخر زۆر مەسەلەی ئانی لە ناوخۆ و دەوروبەر ڕوودەدات هیچ ناڵێت، بۆ لەمەدا هاتۆتە وەڵام پێکەنینەکە و گریانەکە بۆ ئەوەیە.
     حکومەت دەبێت وەک ئەو پیرە دانایە وا بێت کە دادوەرێکی بێلایەن و ئاگرکوژێنەرەوەیە. نەک ئاگر خۆشکەر، چوونکە کۆمەڵگا پڕە لە ئایین و بیروڕای و مەبدەئی جۆراوجۆری مرۆڤانە و ... دژ بەیەک، ئەو دەبێت هاوسەنگی لە نێوانیاندا بپارێزێت.
     هەموو هەواڵەکان وا دەڵێن کە کۆمەڵگای کوردستانی باشوور لە ژێر کاریگەری دەوڵەتانی ناوچەکە و هێزە سیاسییە ئیسلامییەکان تا بێت هزری ئیسلامی تیا بڵاوتر دەبێتەوە، خەریکە وا لێدێت جێییەک نەمێنێتەوە بۆ ئەوانی تر کە جۆری زۆرە. ئەگینا ئایینی ئیسلام وەک هەر شتێکی تری ناو کۆمەڵگا بەرهەمەندە لەلایەنی ناشیرین و توند هاوکات لایەنی جوان، بەداخەوە هەتا ئێستا هەر خەریکی بەهێز کردنی لایەنە تووند و ناشیرینەکەی ئایینی ئیسلام بوون!!!
     بەڵام بۆ یەکگرتووی ئیسلامی بارەگاکانی پڕ لە قورئان کردووە؟ لە کاتێکدا شوێنی ئەسڵی ئەو کتێبە مزگەوتەکانە؟ کە شوینی عیبادەت و خواپەرستییە!؟ بۆیە ئەو بیانووە کە لە بارەگاکانی یەکگرتووی ئیسلامیدا و لە ڕووداوەکانی دەڤەری بادینان شارۆچکەی زاخۆ قورئان سووتێنراوە نا تەندروستە لە کێشەیەکی سیاسی وادا بێتە ئاراوە. مەسەلەی ئەسڵی بارەگای لایەنیکی سیاسی بەدەستی غەوغاکانی حیزبێکی فەرمانڕەوا دەسووتێنرێت.
-------------
تێکستی هەواڵەکە لە ماڵپەڕی کەناڵی تەلەفیزیۆنی ئێن ئاڕ تی دا

سێشەممە ٢٠١٢.٢.٢١ چەتەوڵەکانی ئیسلام!
 کاتێک لەشکری ئیسلام هاتن، ئێمه‌ زه‌وی خۆمان هه‌بوو، ئه‌وان تەنها خۆیان و شمشێر و قورئانێک بوون،.. فێریان کردین چۆن به‌چاوی به‌ستراو دوعا بکه‌ین، کاتێکیش چاومان کرده‌وه‌ ئه‌وان زه‌ویان هه‌بوو و کۆمەڵێک پیاوی خۆیان(مەلا و شێخ و سەید و..) لەگەڵ مزگەوتێکدا بۆ بەجێهێشتبووین. ئیتر لەو کاتەوە بێکەسایەتیمان زیتر تر بوو...
     کاتێک لەشکری ئیسلام هاتن هیچم نەووت، کە دراوسێکەیان برد، قسەم نەکرد، لایەکی گەرەکیان ڕووخاند بێدەنگ بووم، ئیتر کە هاتن و خۆشمیان برد، کەس نەبوو لەسەرم هەڵبداتێ!
---------
وەرگیراوە بە کەمێک دەستکارییەوە

دووشەممە ٢٠١٢.٢.٢٠ شارستانی تووند و نەرم!
 بە پێچەوانەی تیوری ڕێژەییەوە، شارستانییەکان ئەو کاتە جێی پەسەندی مرۆڤەکانە کە بەرگری لە بەها مرۆییەکان (بەندەکانی مافی مرۆڤ) بکات، هاوکات دژی سەرکوتکردن، پلە دوویی ژنان و جیاوازی نەتەوەیی و ڕەگەزی و ئایینی بێت.
     ئایا هەر ئەم هۆیە نییە کە بە لێشاو خەڵکی وڵاتە ڕۆژهەڵاتییەکان بەتایبەتی ئیسلامییەکانی وا لێکردووە، کۆچ بۆ ئەورووپا و ئەمەریکا بکەن؟

هەینی ٢٠١٢.٢.١٧ بزووتنەوەی گۆڕان مەرگپەرست نییە

 دەرکردنی ئەو بەیاننامەیەی دوێنێ پێنجشەممە ١٦ شوباتی ٢٠١٢ کە لەلایەن ئۆپۆزسیۆنەوە بڵاوکرایەوە لە هەست بەبەرپرسیارێتییەوە دەرکراوە، ئیتر بەرپرسیارێتی جۆری زۆرە، بۆ ئەوەی دوژمن ئەگەر هەبێت پێی خۆش نەبێت و دەستی تێ نەخات. یان لەوەی کە هەر توندوتیژییەک بخولقێت کوژراو و برینداربوونی بە تەئکید لێدەکەوێتەوە، ڕژانی خوێنی هاوڵاتیان هەوانتە نییە، لە زۆر شت گرنگ تر و پیرۆزترە، ئەگەر ئەمە بە ڕسوایی بۆ ئۆپۆزسیۆن بێت قبووڵە، چوونکە ئەم هەڵوێستە بووە مایەی ناڕەزایەتی بەشێک لە لایەنگرانی ئۆپۆزسیۆن.
     بەڵام ئەگەر لە بەیاننامەکە بڕوانرێت بە جۆرێک لە سازش و پاکانە بۆ دەسەڵات لێکدەدرێتەوە و بە قازانجی هەردوو پارتە فەرمانڕەواکە دادەنرێت.
     لە ئێستادا پارتە فەرمانڕەواکان ئەو بەیاننامەیە بە فێڵ و تەکتیک دەزانن و لێکدەدەنەوە، پێیان وایە بۆ ڕای گشتیی جۆرێکە لە چاوبەست، لە ژێرەوە بۆ کاری تووندوتیژی لە هەوڵدان، هاندەری ئەم دۆخە گەرمەن، لەو بێبڕواییەوە هەر بۆیە زووربەی شارە گەورەکان بەتایبەتی سەری مارەکە سلەیمانی بە سەرباز و هێزی چەکداری تر داپۆشرا!!!
     بەدەر لەوانە ئایا ئۆپۆزسیۆن بەتایبەتی بزووتنەوەی گۆڕان نەیاندەتوانی خۆ بپارێزێت لە دەرکردنی ئەو بەیاننامەیە و بێدەنگەی هەڵبژارادایە؟



پێنجشەممە ٢٠١٢.٢.١٦ باشووری کوردستان یان کوردستانی باشوور؟
 با لۆجیکیانە بیر بکەینەوە، خۆشمان بوێت و ترش چەند کوردستان هەن، کوردستانی باشوور و ڕۆژهەڵات و ... ئەو دەربڕینە وەک ئەلتەرناتیڤێکی ناسیۆنالیستتیە لەبەرانبەر کوردستانی فڵان وڵاتی وەک عێراق و ئێران بەکار دەهێنرێت، ئەگینا خەڵکە ئاساییەکە هەر کوردستانی عێراق و ئێران و.. بەکاردەهێنن. 
     لە ئاستی تۆڕی ئەنتەرنێتیش کوردستانی فڵان وڵات زیاتر ناسراوە.. لەدەرەوەیش کە دەڵێت کوردم دەڵێن هی کام وڵاتی؟
هەر کاتێک ئەو زەوییەی کە تا ئێستا بەشێوەی جۆراوجۆر خاکەکەی دەستنیشان کراوە، بوو بە وڵات، ئەوە دەربڕینی باشوور و ڕۆژهەڵاتی کوردستان ڕاست دەبێت و لە شوێنی خۆیدا دەبێت.
     ئینجا خۆ کارێکی زۆر خراپ نییە چەند کوردستان هەبێت وەک لە ئەرزی واقیعدا هەیە، هاوکات خۆلادانە لە کێشەی یەکتر و دوور کەوتنەوە لە فەوزا کە ئێستا لای ژمارەیەکی دیاریکراو لە خەڵک هەیە و بە دەستی ئەنقەست لە ژێر ناو و بڕوبیانووی جۆراوجۆردا دروستیان کردووە.

چوارشەممە ٢٠١٢.٢.١٥ ئایا ئاینزای سونە و شیعە تاوانبار نیین؟

 حوسنی موبارەک بووەتە هۆی بەهێزکردنی ئیسلامییەکان. لەوانەیە ڕاست بکات، بەڵام جەمال عەبدولناسری زیاتر بەوە تاوانبارترە..
یەکێتی و پارتی و کۆماری ئیسلامی ئێران یش دەورییان لە بەهێزکردنی تەوژمی ئیسلامی سیاسی هەیە؟!
     لە مەسەلەی سەرهەڵدانی بەهێز و گوڕ و تینی ئیسلامییەکاندا عەرەبەکانی وڵاتە جۆراوجۆرەکانە بەڵام لە ناوەڕاستی حەفتاکانی سەدەی ڕابردووە، بوون بە دوان کە ناسیۆنالیزمی ئێرانییە و خرۆشانی خومەینی و خەڵکی ئێران بوو.
     دەکرێت ئەوەی زیاتر کاریگەری لەسەر هەرێمی کوردستان دانا ئێرانە فارسەکان بوون. پارتەکانی هەرێمی کوردستانیش نەیان دەتوانی بەری پێبگرن. ئیتر دوای ئەوە ململانێ کەوتە نێوان تەوژمی شیعە و سوونە، هەموو بەشێوەی خۆی لەهەوڵی بە ئیسلامی کردنی دەوروبەریان بوون.

     جا لەنێوان ئەو دوو تەوژمەدا مرۆڤم دەوێت خۆی بگرێت؟ پارتە کوردییەکان بوون بە سینەما بەدەستیانەوە، نەیاندەتوانی نەڵێن نا، خۆشیان لە شەڕ و پێکدادان بوون لەگەڵ دوژمنی سەرەکی، بۆیە هۆکاری زاتی لەم نێوەدا کەمترین ڕۆڵ دەبینێت.

چوارشەممە ٢٠١٢.٢.١٥ حیزبەکەی ئۆجەلان کوردەکانی ڕۆژئاوا!!!

 پیاوەکانی ئۆجەلان و م.بارزانی و مام جەلال هەر لە ئێستاوە کە هێشتا کوردەکانی ڕۆژئاوا ئازاد نەبوون خەریکی ئەوەن شەری ناوخۆیان بکەن بە کوڵکەوە تا دوژمنی سەرەکییان پێخۆشتر بێت، هاوکات مەسعود و ئۆجەلان و مام وەک براگەورەیان بمێننەوە!!! دەوری خۆیان لە دۆخی ئێستای سووریا وەک پێویست نەگێڕن!!
-----------
تێکستی ڕاپۆرتە هەواڵەکە لە ماڵپەڕی سبەی دا


دووشەممە ٢٠١٢.٢.١٣ پەیامێک ڕۆژان ڕۆژی لە دوایە

 وەک لەم بەسەرتەرەدا دیارە، تا دوێنێ ژنان بە تەحریزی ژمارەیەک مەلا و خەڵکانی تووندڕەوی ئیسلامی و هزری عەشایەری کۆنەپەرست و دواکەوتوو، لە ناو بازار و شوێنە گشتییەکاندا تێزابیان بە قاچوقولی ڕووتی ژنان و کچاندا دەکرد و دەپرژاند، تەنها لەبەر ئەوەی جلوبەرگی مەدەنییان لەبەر دەکرد.   
     عەقلییەتی عەشایەریش ئەلقەیەکی تەواوکەری ئەو سەرکوت و فشارەیە چەند لایەنەیە کە لەسەر ژنان هەیە...

ڕۆژان ڕۆژی لەدوایە، ئەنجامی کاری توندڕەوی هەر توندڕەوی بەدوای خۆیدا دەهێنێت. وەک لەم هەواڵەدا دەبینین هاوکێشەکە هەڵگەڕاوەتەوە و مەلایەک بەر هەڵمەتی تێزاب پیاکردن بۆتەوە!

     هەردوو کارەکە پەلاماری ژنان و ئەم مەلایە قێزەوەنە و قابیلی دەستخۆشی نییە. پەنابردن بۆ کاری وا کۆمەڵگا بەرەو ئاژاوەی زیاتر دەبات..نا بۆ تووندوتیژی..بەڵێ بۆ عەقل و هزری مەدەنی مرۆڤدۆستانە..
--------------------
تێکستی هەواڵەکە لە ماڵپەڕی ڕۆژنامەی ئاوێنە دا

شەممە ٢٠١٢.٢.١١ لەسەر زاری خۆیانەوە

 مەلا بەختیار، ماوەیەکە لێرە و لەوێ لەسەر مەسەلە جۆراوجۆرەکانی ناوخۆی هەرێم و دەرەوە ڕای خۆی دەردەبڕێت. ئیتر لەوەدا بەداوی چییەوە مەسەلەیەکی دییە، تەنها ئەوەندە هەیە لە ناو دێرەکانیدا دەکرێت وەک کەسێکی دەسەڵاتخواز و لە سەر زاری خۆیەوە ترس و نیگەرانی و کەموکوڕییەکانیان ببینین.
     لەم بەدواداچوونەی بۆ ئەنجامی هەڵبژاردنی پەرلەمانی لە میرنشینی کوێت، دانی بەوەدا ناوە کە حکومەتە مزدەوەجەکەیان لەلایەن خەڵکییەوە متمانەی نییە، بۆیە پێشبینی شکستی خۆیان (یەکێتی+پارتی) لە هەڵبژاردنی داهاتووی پارێزگاکان دەکات.
------------  

تێکستی بابەتەکە لە ماڵپەڕی خەندان دا

شەممە ٢٠١٢.٢.١١ دوور ڕاونیین ڕاکردنە لە واقیع!!
 جێی سەرسووڕمانە زیاد لە پێویست کۆمۆنیستە ڕادیکالەکان گرنگی بە میسر دەدەن کە حەوت فرسەخ لە هەرێمی کوردستان و عێراقەوە دوورە، سووریا دراوسێیە و گۆمی خوێنی تیا هەڵساوە، ئیهماڵیان کردووە! ئایا مرۆڤ بەردەمی خۆی نەیبنێت دەتوانێت جوانتر دوور ببینێت؟؟؟!!!
پێم وایە پیاوە گەورەکانی مرۆڤایەتی وەک مارکس و ئنگلس و کەمێکیش لینین ئەوە خووەی لای ژمارەیەک نەک کۆمۆنیستەکان بەڵکوو خەڵکی تریش سەوز کردووە. بە پێچەوانەوە وا باشترە بیری ئەوانە بەکار بهێنرێت بۆ جوانتر کردنی ناوچەی جوگرافی خۆمان، هەمیشە ئاگامان لە خۆمان بێت و دوور ڕوانیین نەماکوژێت، خۆمان بیر بێت.
گرنگی دان بەسووریایش هەر لەو دیدەوەیە. بە بڕوای من میسر دەمێکە ئەو جێگایەی کە لە سەدەی ڕابردوو هەیبوو، لە دەستی داوە، سەنتەری سیاسی و بڕیارەکان لە دنیای عەرەبدا دابەش بووە، میسر سەردەمی زێڕینی بەسەرچووە. هاوکات ناکرێت فەرامۆش بکرێت. دەڵێم گرنگی بە شوێنێک بدرێت لە هەر گۆرانکارییەک ڕاستەوخۆ کاریگەری لەسەر ناوچەکەی خۆمان دروست دەکات و دادەنێت.

هەینی ٢٠١٢.٢.١٠ پێشکەشە بە بەرنامەی (بەبوێری) کەناڵی NRT
 کافر گاور فەرمەسۆن و ... بۆ ئەو جۆرە مرۆڤانە بەکاردەهێنرێت کە لەسەر ئایینێکی ترن بە پێی بنەماکانی مافی مرۆڤ بێت ئەوە تەوهین و ئیهانەت و بێڕێزیکردنە کەواتە دەکرێت بە دەربڕینێکی ڕاسستی دابنرێت. ئەوانەی ئەم دەربڕینانە بەکاردەهێنن خەڵکانی توندڕەون، جێی داخە زۆر جار ئەم دەربڕینە تووندانە خەڵکی ئاسای ستەملێکراو و بێبەشیش بەکاریدەهێنن!
     باشە ئەی ئەم دەربڕینە ناشیرینانە ئەگەر بۆ کریستیانێک و جوولەکەیەک بەکاربهێنرێت کە پێغەمبەریان جیایە و خوایان یەکە. یان زۆر جار لەنێوان ئاینزاکانی یەک ئایینی وەک شیعی و سوونی بەکاردەهێنرێت. ئەی بۆ ئاتائیست (ملحد)ەکان چی کە ئەسڵەن بڕوایان بە هیچ جۆرە ئایینێک نییە؟


پێنجشەممە ٢٠١٢.٢.٩ سەرشۆڕی ئافەرینی ناوێت؟
 نا بەڕێزینە، نازانم بە چ مافێک مۆری ئیسلام بوون دەدەن لە کۆمەڵگای کوردستانی باشوور؟ ئەی ئایینەکانی تری وەک ئێزیدی و کاکەیی و کریستیان و جوولەکە و ... هاوڵاتی نیین؟ یان هەموو ئەو کەسانەی کە ئەسڵەن بڕوایان بە هیچ ئایینێکی ئاسمانیی نییە چی، هاوڵاتی نیین؟!
     جا با لایەنگرانی پارتە ئیسلامییەکان بهاتنایە جارێکی تر کەناڵەکەیان بسووتانایە؟ زۆر سەربەرزانە تر دەبوو وەک لەوەی کەوتنە ژێر فشاریان و ملتان دا!!! ئەو کەناڵە نوێنەری هەموو کۆمەڵگا لە ناوەوە و دەرەوەی کوردستانی باشوور و ڕۆژهەڵات ناکات، جێی داخە، کۆمەڵگا بەرەو داخرانی زیاتر دەبێتەوە و دۆزەخەکە نێلە نێڵی بەتینتر دەبێت، هەرگیز ئەو جۆرە ملدانە قابیلی دەستخۆشبوون نییە.

     کۆمەڵگا لە چەند لایەنەوە لە ژێر مەنگەنەدایە و بەداخەوە هێزی کراوە کەمایەتییە، بۆیە ئەوان تا بێت گونیان بەسەر ئەو بەشەی کۆمەڵگا زیاتر شۆر دەکەنەوە. دەبێت شێلگیر تر وەڵامبدرێنەوە، ئەگینا بەتەواوی بیروڕای کراوە قوت دەدەن. نابێت بهێڵرێت. ئەو بەرنامەیە (بەبوێری) بەخشکەیی زۆر شتی لەبارەی ئایینەوە دەووت، بەڵام وەک زۆر کاری جوانی تر زوو شەهیدیان کرد.
-----------
ڕوونکردنەوەی کەناڵی ئێن ئاڕ تی لەبارەی ڕاگرتنی بەرنامەی بەبوێری  


چوارشەممە ٢٠١٢.٢.٨ حیزبەکەی ئۆجەلان هەموو کورد دەکەن بە قوربانی خۆیان!

 حیزبەکەی ئۆجەلان هەر ئەم ئاوازەیان کەم بوو، ئەمەشیان وت! لەسەر زاری جەمیل بایک لە چاوپێکەوتنێکدا باس لە پاراستنی یەکپارچەیی عێراق دەکات!
     لە کێشەی سووریا و کوردەکانیدا هەموو دەزانیین هەڵوێستی حیزبەکەی ئۆجەلان لەداخ تورکیا بە دژی هەموو ناڕەزایەتی وەستاوەتەوە بێگومان کوردەکانیش. دەزانن کوردی هەرێم بەتایبەتی حیزبەکەی بارزانی هاوسنوورە لەگەڵ کوردەکانی ڕۆژئاوا، هەر گۆرانکارییەک ڕوو بدات لەو وڵاتە بە قازانجی هەرێم و ئەوە.
     لە ڕاستیدا چاویشیان دەردەهات بەڵام ئەو کۆنگرەیەی کە بۆ کوردەکانی ڕۆژئاوا ئەنجام درا گەر بۆ هەر مەبەستێکی ئاشکرا و شاراوە بوو بێت، هەنگاوێکی باش بوو، دەبوایە زووتر بکرایە. بۆیە غیرەتیان دایە خۆیان چوونکە مەرگی ئەسەد نزیکتر بۆتەوە. بە هۆی ئەم هەنگاوە بوو گەر و گێچەڵەی حیزبەکەی ئۆجەلان سەریهەڵدا!
     ئەوان هەوڵ دەدەن هەموو کوردی پارچەکانی تر بکەن بە قوربانی خۆیان!! ئەگەر نەشیان توانی ئەوا کێشەیان بەهۆی دوکانە بێبازاڕەکانیانەوە بۆ دروست بکەن! بەڵام گرنگ ئەوەیە ئەو سیاسەتەیان بۆ ناچێتە سەر و دەستیان ئاشکرایە، دەمێکە وتوومە، عەقلییەتی کەمالیزم لە نێو حیزبە ئۆپۆزسیۆنەکانی ئەو وڵاتە بە تایبەتی حیزبەکەی ئۆجەلان زۆر بە ئاشکرا دیارە. من هیچ جیاوازی لە نێوان حیزبەکەی بارزانی و ئۆجەلان و .... دا ناکەم.
------------
بۆزانیاری لەسەر هەواڵەکە تکایە سەردانی ماڵەڕی خەندان بکە



یەکشەممە ٢٠١٢.٢.٥ کەمال میراودەلی و تێکەڵکردنی کارتەکان!!
 ئەم نامەیەی کەسایەتی ناسراو کەمال میراودەلی کە وەک هاندانێک و پشتیوانییەک بۆ خەڵکی باڵەکایەتی و چۆمانی نووسیوە، لەم ڕۆژانەدا بەهۆی کوشتنی گەنجێکەوە، ناڕەزایەتی جەماوەری دروست بووە. کارێکی گونجا و پۆزەتیفانەیە، دەربڕینی و دەستەواژەی توندی لە خۆ گرتووە. بەڵام لە چەند خاڵدا کارتەکانی تێکەڵ کردووە، لە نرخی پەیامەکەی کەمکردۆتەوە بە موشەخەسی لەسەر ڕووداوەکە پێیدانەگرووە! بۆ نموونە هاتووە سەرەکۆنەی ئۆپۆزسیۆن بە تایبەتی بزووتنەوەی گۆڕان دەکات!    بۆیە ئەمەیشی کردووە لە خەیاڵی خۆیدا بزووتنەوەی گۆڕان بە جۆرێک لە جۆرەکان لەو ئاستەدا نابینێت کە وەڵامدەرەوەی دەنگی ناڕەزایەتی خەڵک بێت. گوایە کەموکوڕی و تەرکیبەی وەک ئۆپۆزسیۆنێکی ئازا تەواو نییە!
     لەلایەکی ترەوە ناوی گرتووخانەی ئیمراڵی و عەبدوڵا ئۆجەلانی سەرۆکی پارتی کرێکارانی کوردستانی باکوور بێ موناسەبە هێناوەتە ناوناوانەوە!! 
     لەمەشدا وەک لە چەند نووسینی تریدا خۆی وەک سەرۆکی شەرعی هەرێمی کوردستان ناوزەد دەکات!! ئەوەی بیر چووە کە ئەو ڕێژەیەی دەنگەی کە وەختی خۆی هێناویەتی موخالفینی پارتی+یەکێتی بەتایبەتی بزووتنەوەی گۆڕان و ئەوانی ترە، لە ڕقی مەسعود بارزانی دەنگیان پێدا. ئەگینا وەک کاندیدەکانی تردا لەبەردەم دەنگی زۆری بەدەستهاتووی مەسعود بارزانیدا شەرمەزار دەبوو! هەرچۆنێک بێت و بەدەر لەم تێکەڵکردنە نامەکە هەڵوێستێکی ئازاو جوامێرانەیە.
-------------
تەواوی نامەکە لە ماڵپەڕی ڕۆژنامەی ئاوێنەدا


یەکشەممە ٢٠١٢.٢.٥ وەزیرێکی حیزبەکەی بارزانی شەکر دەشکێنێت!
 دادوه‌ر ره‌ئوف ره‌شید، وه‌زیری‌ دادی‌ حكومه‌تی‌ هه‌رێم بەپێی نووسراوێکی فەرمی دەڵێت: ئه‌وانه‌ی‌ زانیاری‌ ده‌به‌نه‌ ده‌ره‌وه‌ نه‌خۆشی‌ ده‌رونیان هه‌یە!
     ئەم جەنابە گەر خۆی شێت نەبێت، لە ژێر هەر بیانوویەکدا بێت ناکرێت لە ئاستی وەزیر دەربڕینی وا نابەجێ بکات.
بەڵام ئەم سووک سەیرکردنی خەڵکییە مێژوویەکی لە ناو حیزب (پارتەکەی مەسعود بارزانی)ەکەی جەنابی وەزیردا هەیە. هەموو لە بیرمانە کە سەرۆ قادر و فازیل میرانی چییان وتووە...!!!
     لە وڵاتە ئەورووپییەکاندا، گەیاندنی و زانیاری بردنە دەرەوە بە یاسا ڕێکخراوە و ..هەموو شتەکان لە فڵان وەزارەت بە ڕوونی دیار دەکرێت و گەر کەسێک بیەوێت بەئاسانی دەستی دەگاتێ و داوای بکات دەیدەنێ، ئیتر چ پێویست دەکات بە دزییەوە زانیاری بەرێتە دەرێ؟
     بەڵام لەبەر ئەوەی لە هەرێمی کوردستان هەر ماڵێک و فەرمانگەیەکی بچووک و گەورە بگریت پڕ پڕە لە نهێنی و شتی شاراوە. بۆیە دەرکردنی نهێنییەکان بە جۆرێک لە جۆرەکان دەبێتە هۆی ئاشکرا کردنی ناشیرینی و گەندەڵییەکان، کەواتە ئەو کارە بێزار ی و ناڕەزایەتی لێدەکەوێتەوە. لەبەر ئەوەی کەس ئاستی بەهای خۆی نازانێت چییە و چیی نییە، سەیر دەکەیت تەنانەت لە ئاستی وەزیریرێکی زل و زەبەلاحدا قسە و داخویانی نابەجێ دەوەشێتەوە و دەکرێت!
-----------
تێکستی هەواڵ لە ماڵپەڕی ڕۆژنامەی هاوڵاتیدا

شەممە ٢٠١٢.٢.٤ فەیسبووک بە زمانی کوردی؟؟! 
 بەداخەوە، تا ئێستا وێڕای چەند هەڵمەتی کۆکردنەوەی واژوو هاوکات ڕاگەیاندن نەتوانراوە زمانی شیرینی کوردی و بەو ڕێنووسەی هەرێمی کوردستان و کوردستانی ڕۆژهەڵات پێی دەنووسن زیاد و فەرزبکرێت بەسەر ئەم کومپانیایە. یاران دەبێت هۆی چی بێت؟ بە ڕاستی شەرم لە خۆمان دەکەم کە بە ڤیرسیۆنی عەرەبی و فارسی و زمانەکانی تر لە فەیسبووکدا بەشدارین، عەمرمان نەمێنێت.

     ئەو هەوڵانە کە لە فەیسبووک دەدرا هەموو هاشوهوش دەرچوو. ئەگینا چوار پێنج تەکنیکاری بوارەکەی گەرەکە. فیسبووکیش ناتوانێت رەفزی بکات، گەر داوایەکی وا پێشکەش بکرێت.
     لەمیژوەوە ژمارەیەک تەکنیکاری ئەورووپانشین گۆگلەی کوردیان داناوە، ئەی ئێستا بۆ لە هەرێمی کوردستانەوە خەریکی هەوڵێکی وا نابن کە نە کێشەی پارە هەیە نە کێشەی تەکنیکار؟
-----------
تکایە بڕوانە ماڵپەڕی سبەی


هەینی ٢٠١٢.٢.٣ هەڵوێستی مەردانەی نووسەرێک
 پاوڵ ئاوستر- Paul Benjamin Auster ١٩٤٧ نووسەر و شاعیری ئەمەریکی بە هەڵوێستی مەردانەی سەرۆکوەزیرانی تورکیایی دەهری کردووە.
     ئەو ئامادە نەبووە بانگهێشت بۆ سەردانی تورکیا قبووڵ بکات، تەنها لەسەر ئەوەی ڕۆژنامەنووسێکی زۆر لە زیندانەکانیدایە، ڕاپۆرتی پەیامنێرانی بێسنووریش ئەوەی پشتڕاستکردۆتەوە و پلەی لە لیستی ساڵی پار ٢٠١١ دا بۆ ١٤٧ دابەزیوە.
     ڕەجەب تەیب ئۆردۆگان ١٩٥٤ لەبەردەم فراکسۆنی پارتەکەیدا، بە گاڵتەجاڕییەوە، دەڵێت: وەیش تکایە وەرە! زۆر پێویستمان پێتە!! بەڵام دواتر فشارەکەی قبووڵە، بۆیە دەڵێت: دەبێت لە کێشەی ئەو ڕۆژنامەنووسانە بکۆڵرێتەوە کە لە زینداندان..
---------------
بەکەمێک دەسکارییەوە هەمان هەواڵ لە  ماڵپەڕی سبەی


هەینی ٢٠١٢.٢.٣ بەدواداچوون
 پێدەچێت ئایینی کریستیان (مەسیحی) وەک ئایینی ئیسلام هی عەرەبەکان بێت و لە دوورگەی عەرەبییەوە هاتبێت. دەزانن بۆ لە کەناڵی کوردستدا، لە بەرنامەی سۆما کە ئامانج کەمال چالاک ئەم ئێوارەیە ٢٠١٢٢.٢.٣ پێشکەشی کرد. کەسێک وەک نوێنەری ئایینی کریستانیان بانگهێشت کرابوو، بە عەرەبی قسەی دەکرد و بیروڕاکانی دەردەبڕی و وەریاندەگێڕا بۆ کوردی!! 
     ئەوە چ مەهزەلەیەکە ڕوو دەدات؟!! ئایا بەمەبەست ئەوە دەکرێت؟ بیانەوێت بڵێن ئایینی ئیسلام هی کوردە نەک ئایینی کریستیان!! لە کاتێکدا گەر بەزۆر ئیسلام سەپێنرا بێت، بەسەر خەڵکی نا عەرەبی، خۆ کریستیان بە تەبشیر بووە و هاتۆتە کوردستانی باشوورەوە.
-------------
تکایە بڕوانە لاپەڕەی ئەنتەرنێتی بەرنامەکە


هەینی ٢٠١٢.٢.٣ 
خێڵ و بنەماڵە هەرێمی کوردستانی لووشداوە!!!

 نووسەر هوشنك بروكا بە زمانی عەرەبی وتارێکی گرنگی بڵاوکردۆتەوە شایەنی ئەوەیە هەموو بیخوێننەوە، لێرەدا، چەند نموونە لە وتارەکەیم بە دارشتنەوەی خۆم وەرگێڕاوە:
     .... تاوانی ئەوە دەداتە پاڵ مەسعود بارزانی کە زۆنی خۆی لە هەرێمی کوردستان کردووە بە بارزانستان بۆ خێلەکەی خۆی بەڵام لە بناغەدا تەنها بنەماڵەکەیەتی.. شەرعیەتی خوێن و بنەماڵە بەسەر شەرعییەتی یاسا و دەڵەتدا زاڵکردووە!ا پارتیبوون بۆتە ئایین و سەرۆک بە خوا! بەم شێوەیە پرۆژەی دەوڵەت بۆتە پرۆژەی بنەماڵە! هەروەها بە پێشمەرگەکەی سەردەمی شاخی نازانێت وەک خۆی بانگەشەی بۆ دەکات.. نووسەر جیاوازی ناکات لەنێوان حوکمی بارزانی و ئەو حکومەتانەی کە لە ڕۆژهەڵاتی ناوەڕاستدا بەهۆی ڕاپەڕینەوە ڕوخێنران...
-----------------
تێکستی وتارەکە بە زمانی عەرەبی



پێنجشەممە ٢٠١٢.٢.٢ بەرپرسێکی بارزانستان شەکری خوارد 
 نه‌وزاد هادی، پارێزگاری هه‌ولێر، به‌ڵێنی ئه‌وه‌ی‌ داوه‌ له‌ ماوه‌ی دە ڕۆژدا بكوژه‌كه‌ له‌ سێداره‌ بده‌ن .. ئه‌گه‌ر له‌و ماوه‌یه‌دا له‌ سێداره‌ نه‌درێت، ئه‌وا منیش دێمه‌ ریزی خۆپیشانده‌رانه‌وە.
     ئەم کاربەدەستە زەلیلەی حیزبەکەی مەسعود بارزانی، چۆن ڕێگا بەخۆی دەدات شەکرێکی وا بشکێنێت.. خۆ کە دەم دەکەنەوە بۆ چاوبەست دەڵێن یاسا سەوەرە، هەر دەست بەجێش نوقلی تاڵ دەرخواردی خۆیان دەدەن! چۆن دەبێت لە ژێر هەر بیانوویەکدا کەسێک لەسێدارە بدرێت.. جا بۆ یەکسەر نایکوژن.. تڕە خۆش یاسا و دادگا !!!!؟؟؟؟
     لەوانەیە لە پشت ئەو ناڕەزایەتییانەی خەڵکی ناوچەکە، بۆ هۆکاری تر بگەڕێتەوە، ئەم (کوشتنی گەنجێک) ڕووداوەیش فرسەتێکی باش بوو بێت بۆ دەربڕینی.
     نابێت ئەوەیش لەبیر بکەین ئەو ناوچەیە و سەرجەم زۆنی حیزبەکەی بارزانی بەتەواوی بۆتە عەشیرەتخانە، کێ دەڵێت ناچێتە خانەی شەری فڵان عەشیرەت لەگەڵ ئەوی تردا، بۆ بەدەستهێنانی ئیمتیازاتی زیاتر هەموویش دەزانیین شوێنەکە ناوچەیەکی سنوورییە و پارەو پولی زۆرە و هەستیارە. کەواتە هەموو جووڵانەوەیەکی قابیل بەوە نییە پشتیوانی لێبکرێت. جووڵانەوەیەک قابیل پشتیوانییە کە کۆمەڵگاکە جوانتر بکات نەک فڵان عەشیترە بگۆڕین بەوی تر.. ئیتر نازانرێت بەرەو کوێ دەچێت...
----------------
تێکستی هەواڵ  لە ماڵپەڕی سبەیدا


پێنجشەممە ٢٠١٢.٢.٢ کوێخای ئایین! 
 لەبەرانبەر نووسەرێکی سەر بە تەوژمی ئیسلامی کە دەڵێت:

     ئاسانترین شت لە ناو كورد بۆ ئەوەی ناوبانگێك پەیدا بكەی لە ماوەیەكی كەمدا... بریتییە لە قسە كردن لە سەر بابەتی ئاینی و مێژووی ئیسلام و بەناوكەوتن بەبێ‌ ئەوەی عەرەبیەكی پاراو بزانی!
ئەمە وەڵامم بوو:
     بۆ ئەو تەوژمە سیاسییە ئیسلامیانە فریشتەن؟ بەڕاستەوخۆ و ناڕاستەخۆ فشار و سانسۆریان خستۆتە سەر تاکەکانی کۆمەڵگا، و خۆیان کردووە بە کوێخای ئایین لە خەڵک!! ئەوانە کە تۆ ناویان دەنێنت خۆدەرخەر نوێنەرانی موخالیفی توێژێکی گرنگی ناو کۆمەڵگا دەکەن.