خەمی ڕۆژانە، کانوونی دووهەم ٢٠١٢

AbasShiwan-عەباس شوان


دووشەممە ٢٠١٢.١.٣٠ فلیمێکی پێویست
 دوو کوردی کوردستانی باکوور دوو برای یەک خێزان و بنەماڵە. دانەیەکیان سەرباز ئەوی تریان پێشمەرگەی چیا. کە ڕووبەڕووی یەکتر دەبنەوە و یەکتر دەکوژن. یەکێکیان خەسلەتی شەهیدی پێدەڵێن ئەوی تریان تیرۆریست. بە لۆجیکی ئۆپۆزسیۆنی کوردەکانیش ئەو دوو برایە یەکێکیان شەهید ئەوی تریان خائین و جاش.
     فلیمەکە بە پلەی یەکەم باس لە دۆخی خەڵکی کوردی کوردستانی باکوور دەکات کە بەهۆی جەنگێکی نابەرابەر و داسەپاو ژیانیان لە خەڵکی ناوچەکە تاڵ کردووە. جۆرە گوڵێک هەیە بە تیشک و ڕووناکی هەتاوی دەمرێت؟؟؟؟ مناڵ مناڵ دەخاتە غەسالەی جلشتنەوە، تا بەحساب پاک بێتەوە و بیشۆن کەچی بە دەیکوژن!.

     ئەمە لە فلیمی گۆرانیبێژی بەناوبانگی کوردستانی باکوور مەسعود قرمزگوڵ ١٩٦٩ بە ناوی ڕۆژم بینی بەرهەمی ساڵی ٢٠٠٩، زۆر بە جوانی دەبینرێت.


یەکشەممە ٢٠١٢.١.٢٢ دیموکراتی لە هەرێمی کوردستاندا شەلە و پای شکاوە!!

 دیموکراتی لە پرۆسەی دەنگدان کە خاڵێکی بنەرەتی خۆیەتی گەورەترە.. چوونکە لە دەسەڵاتدارانی هەرێمی کوردستان بینیومانە زۆر جار بە ڕووماندا دەیدەنەوە و شەرعیەتی خۆیان بەسەرماندا دەدەن کە گوایە لە ڕێی سندووقەکانی دەنگدانەوە هاتوون، بەزۆر خۆیان نەسەپاندووە، بەڵام لە پراتیک و ئەرزی واقعدا شتێکی تر دەگوزەرێت و کۆمەڵگاکە پڕە لە نادیموکراتی و نابەرابەری لەبەرانبەر هیچ نا، تەنها دژوەستانەوە بە گرووپی ئایینی ئێزیدی و کاکەیی و کریستیانەکان و شیعەئاینزاکان، و گرووپی نەتەوەیی تورکمان بگریت بەسە بۆ نادیموکراتبوونی ئەو دیموکراتییە سەقەت و کەموکوڕەی یەکێتی+پارتی بانگەشەی بۆ دەکەن. کەواتە چارە چییە بۆ دەربازبوون لەم ئاستەنگە و هێنانەوە تایمی خودی دیموکراتی؟


شەممە ٢٠١٢.١.٢١ خۆ کۆنترۆڵکردن 
 ئەم نووسەرە (حەمەسەعید حەسەن) لەبارەی ئەوەی کە مرۆڤ لە هەفتەدا تەنها ڕۆژانی پشوو، لە ئەورووپا شەممە و یەکشەمان و لە وڵاتە ئیسلامییەکان ڕۆژانی هەینی بۆ خواردنەوەی مادە ئەلکهولییەکان دانراوە نیشانەی دەرکەوتنی ئەلکهولی بوونە. بەڵام ئەوەی لەبیر چووە، کە بۆ زۆرێک لە مرۆڤەکان نیشانەی کۆنترۆڵکردنی خۆ دەگەیەنێت، بەوەی کاتی کار و ژیانی جدی و کاتی تەفریحی دوو شتی جیاوازن.. ئەوەیش بیرچووە ئەو کەسانەی کە بەردەوام دەخۆنەوە و نیشانەکانیان پێوە دیارە و کەوتوونەتە سەرشەقام و باخچەکان، تووند گرتوویانە و جۆرێکە لە تووندڕەوی و لە دەست دەرچوون..
------------
تەواوی وتاری نووسەر
:عه‌ره‌قخۆره‌ به‌ڕێزه‌کان 


شەممە ٢٠١٢.١.٢١
 مشتی ئاسنیین!
 نووسەر و ڕووناکبیرێکی عەرەب لەبارەی نوری مالکییەوە دەڵێت: سەدام حسین مشتی ئاسنیین هەبوو، بەڵام مشتی مالکی ئاوریشمینی ئاینزایی دیکتاتۆرییە، هەندێ جار ئاوریشم لە ئاسن بەهێزترە.
     پێدەچێت مالکی ئەم خووەی لە فارسەکانەوە وەرگرتبێت کە بەناوبانگن بە لەبزشیرینی، هاوکات بن بڕی.. جا خۆ کورد خراپی نەووتووە کە دەڵێ مار بەزمانی شیرین لە کون دێتە دەر... کەواتە لەنێوان مشتی ئاسین و ئاوریشمی کامیان باشترە؟ 

یەکشەممە ٢٠١٢.١.١٥ خوێندنەوەی ئایندەیەکی نادیار

 هاوڵاتی ڕۆژهەڵات بەهەرێمی کوردستانیشەوە، لە پرۆسەی هەڵبژاردندا، چ هزرێک تەحەکوم و کۆنترۆڵی دەکات بۆ دەستنیشانکردنی کەسێک لە کاندیدەکانی هەر هەر هەڵباژاردنێک بێت؟ ئایین یان سیاسەت؟ بێگومان بەشێکی زۆریان ئایینی، چوونکە سیاسەت بەرهەمی مۆدێرنەیە، کە سەرچاوەکەی وەک زانست ئەورووپایە، میدیای لۆکاڵی زەبەلاح بەپشتیوانی ڕاستەخۆ و شاراوەی حکومەتانی عەرەبی و ئیسلامی و گرووپی جۆراوجۆری تر بەردەوام دەهۆڵی ناشیرین کردنیان بۆ لێداوە. 
     ئەم مەترسییەی کە زیاتر پارتەکانی فەرمانڕەوا (یەکێتی+پارتی) خەریکی لە قاودانین، دوای ئەوەی لە چەند وڵاتی ئەفەریقی وعەرەبی و داوی گۆڕانکاری لە دەسەڵاتدا، تەوژمە ئیسلامییەکان لە پرۆسەی هەڵبژاردندا براوەی یەکەم دەرچوو! لە هەرێمی کوردستانیش بەرەو هەڵبژاردنی پارێزگاکان دەبینەوە، پێدەچێت ئەو تەوژمە ئاینیانە بەسوود وەرگرتن لە ئەزموونە دەرەکییەکان، لەوەی ئێستا کە هەیانە زیاتر دەنگ و کورسی بەدەست بهێنن. 
     بەتایبەتی لە دوای پەیدابوونی بزووتنەوەیەکی لیبرال پەرلەمانی وەک گۆڕانەوە، کە بووە هۆی هەستانەوە و پەیداکردنی جورئەتی زیاتر بۆیان، هاوکات خۆبینینەوە لەبەرەی خەڵکدا، وای کردووە جەماوەریان فرە تر بێت. کێ دەڵێ پێشبینییەکان وا دەردەچن؟

یەکشەممە ٢٠١٢.١.١٥ بەدواداچوون بۆ ٢ هەواڵی هاوشێوە
 ئەو هەنگاوە (گۆڕینی ناوی زەحمەتکێشان بۆ ئایندە) دەبوایە زووتر و کاتی لێکترازانەکە بنرایە نەک ئێستا. هەرچۆن بێت پاش چەند ساڵ هاتنە سەر ئاراستەیەکی درووست. بەڵام قسە لەوەیە ئایا ئەم گرووپە بچووکانە چ دەتوانن لە ڕەوشی سیاسی و هاوکێشەکانی هەرێمی کوردستان بگۆڕن و قورساییان هەبێت..
     گرنگ ئەوەیە وەک هێزی بچووک نەکەونە داوی فێڵ و فەرەجەکانی پارتە فەرمانڕەواکان (یەکێتی+پارتی) و لە ڕووداوە گەرمەکاندا دژ بە دەنگە ناڕازییەکانی کۆمەڵگا نەوەستنەوە، هەمیشە بەرگریکار بن لە خەڵکی بەشخوار و زوڵم لێکراو و ...
تێکستی هەواڵەکە لە ماڵپەڕی سبەیەوە وەرگیراوە.
 ئا ئەم جۆرە گرووپانە (بزووتنەوەی دیموکراتخوازانی کوردستان) کە هەڵوەشانەوەی خۆیان ڕادەگەیەنن، وەک گوێدرێژی ناو جۆگا وان، ئاوی ئاموون و توونی بابا بچن. لە قەیرانەکانی وەک ڕووداوەکانی شووبات و دەڤەری بادینان دەرکەوت ئەم دوکانۆچە بێبازاڕ و کلکە شاراوەی فڵان و فیسار حیزبی دەسەڵاتدارن، بۆ ڕوو میکیاجکردن لە دژی ئۆپۆزسیۆن و خەڵکی ناڕازی بەکاردەهێنرێن..
     ئەمە بەو مانایە نییە لە نێویاندا تاکوتەرا خەڵکی باش نەبێت، بەڵام لە ماهییەتی ئەوە ناگۆڕیت کە ئەم جۆرە گرووپانە چۆن دروست بوون و بە قورمیشی کێ کار دەکەن؟
تێکستی هەواڵەکە لە ماڵپەڕی سبەیەوە وەرگیراوە.

چوارشەممە ٢٠١٢.١.١١  کۆمۆنیستی کرێکاری فەرهەنگی پێوانەی گینز!
 ویستم تەواوی وتارەکە (بارانێکی بێ هه‌ور و هێرشێک بۆ سه‌ر هه‌ردوو حزب!) بخوێنمەوە، بەڵام وەک راپۆرتی وشکوبرنگی ناوخۆیی حیزبێک بینم و تاقەتم چوو!!! هەتا کەی عەقڵی خۆیان دەدەنە دەست ئەوانە؟ ئەوانە دەستیان دەگرن تا هێزیان بگوشن و بمرێنن، نەتوانن لەنێو خەڵکیدا بجووڵین و هەر خەریکی خۆیان بن و خەریکی شەرە دەنووک بن! 
     لە ئینشقاقی یەکەمەوە ١٩٩١+ ١٩٩٢ کە هەموو بیرمانە مێژوویەکی کۆن نییە، لە گەرمەی ڕووداوی ڕاپەڕینی کوردستانی باشوور بوو، کە ڕابەرایەتییەکەی مەنسوور حیکمەتی بێ حیکمەت بوو، تا ئێستا وازیان لێناهێنێت و سێبەری بەسەرتانەوەیە! تا دەگات بەم ئینشقاقەی (کۆتایی ساڵی ٢٠١١) کە لە ڕووداوی گەرمی ناوچەکە و وڵاتانی عەرەبی دەوروبەر..
     ئەگەر وێڵیان نەکەن و تەرکیز نەکەنە سەر کوردستان باشوور هەتا هەتایە لەپەراوێزدا دەمێننەوە و لاتەریکی زیاتر دەبێت و کەس حسابیان بۆ ناکات.

     بزووتنەوە گەورە و گچکەکان هەمیشە قابیل بە لێکترازانە، بەڵام ئەوەی بە حساب چەپی ڕادیکاڵن ژمارەی پێوانەیی بەدەستەوە داوە دەبێت بچێتە فەرهەنگی جیهانی گینزەوە. رەخنەکە ئەوەیە ئەو فارسانە تا کەی تەلاق نادەن؟ بۆ ئەوەندە چاوبەرەژێریانن؟ بۆ ئەوەندە خۆ بێ شەخسییەت کردووە و دەزانن؟ کۆمۆنیستی کرێکاری کوردستانی باشوور دوورونزیک ناسراون، ئەگەر لەوان ژیروداناتر نەبن کەمتر نیین. بێگومان لەوان چاوکراوەترن.
     بەهۆی هەلومەرجی دیکتاتۆری ئیسلامی ئێرانەوە ئەرزیان نییە ڕاستەخۆ کاری تیا بکەن، کۆمۆنیستی .. بە زیندوویی لەناو جەماوەری کوردستاندان و فەزایەکی ئاوەڵا هەیە بۆ جووڵەی ئازادانەیان. جێی داخە ئەوانە ئیستغلالیان کردوون! ئیتر نازانم بەخواستی خۆیانە یان بزنسە، بەڵام گەر بزنسیش بێت کەمترین مشتەری لەدەورە، سەرئەنجام ئیفلاسی و داخستنی لەدوایە!!
----------
     نووسەری وتار سامان کەریم، لە فەیسبووکەوە بە چات نیگەرانی خۆی بۆ پەرەگرافی یەکەمی ئەو نووسینەی سەرەوە دەربڕی:... ئه‌گه‌ر نه‌قدت هه‌یه‌ زۆر خۆشحالم بینوسه‌، .... و پێم خۆش نییه‌ بینووسی.. خراپییه‌که‌ی ئه‌وه‌یه‌ که‌ مانا نادات به‌ده‌سته‌وه‌.. جگه‌ له‌ گالته‌ کردن نه‌بیت ئه‌وه‌ش له‌ تۆ نایه‌ت..



دووشەممە ٢٠١٢.١.٩ کریستینا کۆیڤۆنێن، شمشێری هەڵکێشا!!!؟
 لە دواهەمین وتاریدا بە ناونیشانی (Etnopornoa ئێتنۆپۆرنۆا) بۆ دووهەم جار بەڵام وردتر لەسەر ڕۆمانی لەیلای نووسەری فینلاندی (١٩٥٩ یاری تێرڤۆ)ی نووسیوە.
لە ڕۆژی ٢٠١١.١٢.١٥ لەسەر وتاری یەکەمی بەم شێوەیە، وێڕای کورتە باسێک لەسەری، نووسەر خراوەتە ژێر پرسیارەوە:
کریستینا کۆیڤونێن، بۆ بەرگری لە هەموو شتێکی کورد دەکات؟!!!
     هەفتەی ڕابردوو، لە ماڵپەڕی رۆژنامەی رۆژانەی ئێتێلا سوۆمێن سانۆماتی شاری لاهتی، خاتوو کریستینا کۆیڤونێن ١٩٥٥، بۆ شاری وان کە بەر لە ماوەیەک بوومەلەزەیەکی بەهێز لێیدا و بووە هۆی کوشتن و برینداربوون و ماڵوێرانییەکی زۆر. ئەو خانمە لەم وتارەیدا بەناونیشانی: (شارە دڵخوازەکەی تورکیام) باس لەوە دەکات کە ماوەیەک لەوێ بووە، شارەکە بە خواردنی خۆش و بەتام و پشیلەی چاو دوورەنگی بەناوبانگە.
     هەروەها باس لە گەنجانی شارکە دەکات کە ئارەزووی خوێندن ژیانێکی شارستانیان هەیە و دەکەن، بە پێچەوانەوە و بە پلارەوە رەدی ئەو نووسەرە فینلاندییە ( یاری تێرڤۆ) دەداتەوە کە لەم ماوەیەدا ڕۆمانێکی بە ناوی لەیلاوە دەرکردووە، گوایە بە خراپ باسی پەیوەندییە کۆمەڵایەتییە دواکەوتووەکانی کوردی ئەو پارچەیە دەکات.

بەرگی یەکەمی ڕۆمان، نووسەرەکەی و رەخنەگرانی
     شایەنی باسە ئەمە دووهەم کەسە لەبەرانبەر ڕۆمانووس وەستاونەتەوە و بەرگری لە لایەنی ڕەشی پەیوەندییە کۆمەڵایەتییەکانی کۆمەڵگای کوردی لە کوردستانی باکوور دەکەن!!
     ئەو کەسەیش (حوسێن موحەمەد ١٩٨٠)ی پارێزەرە، کە بەرەگەز کوردی هەرێمی کوردستان، باژێڕی زاخۆیە.
       کریستینا، لەم وتارە نوێیەدا سەرەتا وتەی مامۆستایەکی هێناوەتەوە، کە وتوویەتی: باشترین کتێبێکە لەسەر کورد خوێندبێتمەوە. ددستپێدەکات.
     ئیتر کریستینا دادەبەزێتە سەر نووسەر لە نرخی کار و هەوڵی کەمدەکاتەوە، ئەو لە رۆمانەکەیدا باس لە کورد بە گشتی وەک  میللەتێکی دواکەوتووی دەروون نەخۆش کە حەزیان بە تووندوتیژی و شێتێتییە، و وێنه‌یه‌کی ساده‌کراو و خراپ له‌ تێکڕای کلتووری کوردی و مرۆڤی کورد به‌ ده‌سته‌وه‌ ده‌دا..
     رەخنەگر ئەمە دەگەڕێنێتەوە بۆ ئەوەی گوایە لە دوورەوە و بێ ئەوەی تێکەڵی کۆمەڵگای کوردی بوو بێت، زانیاری هەڵەی وەرگرتووە و هەڵەیان لەسەر بڵاودەکاتەوە و نووسیوە. بەمەیش نەک بیانووی داوەتە دەست نەیارە تورکەکان بەتایبەتی  تووندڕەوەکان کە هەمیشە لە هەوڵی سوکتر کردنی کوردا بوون و دەبن.
     هاوکات دیدێکی ڕەش و ناشیرین لە لای خوێنەری فینلاندیش دروست دەکات. بەمەرجێک لە وڵاتی نووسەردا هەر کەسێک سیفەتی خراپ و دواکەوتوو بداتە پاڵ گرووپی نەتەوەیی، بە یاسا قەدەغە کراوە و لادان لێی ڕووبەڕووی جەزا دەکرێتەوە.
     کریستینا، ئەوەی بەسەردا تێپەڕیوە، کە ئەو کتێبە رۆمانێکی ئەدەبییە، بەجۆریک لە جۆرەکان پڕ پڕە لە خەیاڵ.. مەبەست لە بە لۆجیککردنی کارێکی ئەدەبی و خەیاڵی لە پای چییە؟ داوەری و هەڵسەنگاندنەکانی لەسەر چ ڕێبازێکی ئاکادیمییە؟ ئایا تێنەگەیشتنە لە پەیامی ئەدەب وەک ژانەرێکی جیاواز؟ یان وەک ئەوەی کە ئەم ڕۆمانەی لێبووە بە کتێبێکی لێکۆڵینەوە و میژوویی؟؟!! یان شەڕفرۆشتنیکە و هیچی تر، یان وێڵە بەدوای شتێکی تر؟ ئەوە کریستینا خۆی بەرپرسە. ئەوەندە دەزانرێت کە نووسەری ڕۆمان زمانی فرە تیژە، لەوانەیە کاردانەوەی تووندی لێ بوەشێتەوە. بەمەرجێک باگراوەندی یاری تێرڤۆ ڕەش و ناسرین نییە و ئەنتی بێگانە و گرووپە نەتەوەیەکان نییە و نەبووە. ئەگەر وا بوایە دەکرا شایەتمان بەدیار پەیڤی رەخنەگراندا دەهێنا!
     گریمان ئەوەی بەرگرییەی کریستینا لە شوێی خۆیدایە، بەڵام ئایا ئەوە سەیرکردنێکی هەمەلایەنەی کۆمەڵگای کوردییە؟ نا بێگومان، چوونکە هەردوو دۆخەکە لەنێو کورددا بوونی هەیە. لە ژێر هەر بیانوویەکدا بێت پێویست ناکات بەرگری تەنها لە لایەنی ڕەشی یان جوانی هەر گرووپێکی نەتەوەییە بکرێت.
     کورتەی ڕۆمانەکە باس لە بەسەرهاتی تاڵی کچێکی کوردی کوردستانی باکوور دەکات کە بەهۆی لەدەستدانی پەردەی کچێنییەوە ڕووبەڕووی تووندوتیژی خێزانی دەبێتەوە و لە ترسی کوشتن ناچار دەبێت لە ماڵ ڕابکات، سەرئەنجام خۆی لە شوێن و جادەی لەشفرۆشان دەبینێتەوە. بەگشتیش تووندوتیژی لە وڵاتی فینلاند کە دەرهەق بە ڕەگەزی مێ دەکرێت.
     ئەم رۆمانی لەیلایە لە کۆتایی مانگی ٩ی ساڵی ڕابردووە کەوتۆتە بازاڕەوە، تا ئێستا لە کەناڵەکانی ڕاگەیاندن ریکلامی بۆ دەکرێت. دەنگوسەدایەکی زۆری لە نێو خەڵکیدا داوەتەوە، زۆرترین خوێنەری هەیە. خوێنەری دەستتەنگ لە کتێبخانە گشتییەکاندا بەلایەنی کەمەوە دەبێت ٢ مانگ چاوەڕوان بکات تا سەرەی خوێندنەوەی بەردەکەوێت.
تەواوی وتارەکەی کریستینا بە زمانی فینلاندی لە ماڵپەڕی ڕۆژنامەی ئێتێلا سوۆمێن سانۆمات دایە.
تەواوی وتارەکەی حوسێن بە زمانی فینلاندی لە ماڵپەڕی ئوسی سوۆمی دایە. کە لە ٢٠١١.١٠.٥ دا بڵاوبۆتەوە. 
تەواوی وتارەکەی کریستینا بە زمانی فینلاندی لە ماڵپەڕی ڤۆیما دەبینرێت.
----------
هەمان وتار لە ماڵپەڕی سبەی دا.



شەممە ٢٠١٢.١.٧ بەدواداچوونی ٣ هەواڵ
 فازڵ میرانی و هێتلەر!
     فازڵ میرانی، لەم ماوەیەدا دوو شەکری شکاندووە لە شانوشەوکەتی ئەو نایەتەوە، چوونکە هەموو مێژوو و کاروکردەوەی خۆی و حیزبەکەی دەناسین کە چەند بەغیرەتن، ئەگەر مرۆڤی بەغیرەت بوونایە لە ترسی یەکێتی نیشتمانی ( ٣١ ی ئابی ١٩٩٦) بەعسیان نەدەهێنایەوە!؟  ئیتر تێناگەین ئەم هاشوهوشە لە پای چی؟! دەمێک دەڵیت ٣٠ هەزار فیدائیمان هەیە، دەمێکیش زەم بەسەر قوربەسەرێکی وەک ئەرسەلان بایزدا دەکات، بە ئیهانەت و سووکایەتی بازاڕیانە و فەرهەنگی عەشایەرییەوە بە خۆی و حیزبەکەی دەڵێت: حکومەت کردن هی پیاوە ( شامی‌ شه‌ریف به‌ پیاو دروستده‌كرێت) مانای وایە ئێوە ژنن. 
     ئەم فسفسپاڵەوانە پێ دەچێت لاسایی ئەو سادییەی (هێتلەر ١٨٨٩-١٩٤٥) سەدەی ڕابردوو بکاتەوە، با بزانیین وتوویەتی چی:
     خەڵک یان جەماوەر وەک ژن وایە لایەنگری هێزە نواندنە، لەگەڵ براوە و بەهێزدایە، کەواتە دەسەڵاتێکی تۆکمە و بەهێزی گەرەکە، لەگەڵ ڕکەبەرەکەیدا سازش ناکات و ملکەچپێکەری لاوازە و دواتر سەرپان کردنەوەی..
-------------
بۆ تەواوی هەواڵەکە سەردانی ئەم بەستەرەی ماڵپەڕی ڕۆژنامەی هاوڵاتی بکە

عەرشی لە تۆز و لم!
 
     لە عەرشی پاشای کەلاوەی (وەک حەمەسەعید حەسەن دەڵێت) زۆنی بارزانی و ٣٠ هەزار فیدائییەکەیان ئەمە ڕوویداوە. ئەم خەرقە گرنگە دەلیلی ئەوەیە هەر فیکەیاکیان لێ بکێشرێت وەک حکومەتە فشۆڵەکەی سەدام حسێن  زیڕە دەکەن و دەیقوچێنن و کونەمشکیان لێ دەبێت بە قەیسەری دەبنە تۆز و با بەئاسماندا دەچن.
     ڕۆژی شەممە ٢٠١٢.١.٧ له‌ گرتوخانه‌ی‌ چاكسازی‌ زڕكا (ساڵی‌ ٢٠٠٨ دروستكراوه) کە ده‌كه‌وێته‌ باكوری‌ خۆرئاوایی‌ شاری‌ دهۆك‌. ١١ تۆمه‌تبار هه‌ڵاتوون زۆربه‌یان بڕیاری‌ له‌سێداره‌دانیان هەیە. دوای‌ هه‌ڵكه‌ندی‌ چاڵێك به‌ قوڵایی‌ ٨٠ مه‌تر له‌ناو به‌ندیخانه‌كه‌ توانیویانه‌وه‌ رابكه‌ن.
----------------
بۆ تەواوی هەواڵەکە سەردانی ئەم بەستەرەی ماڵپەڕی ڕۆژنامەی هاوڵاتی بکە

کێ مامۆستای یەکێتی+پارتییە؟
     جێی پێکەنینە، کەسێکی عەرەبی سەر بە ئاینزای سوونی کۆنە بەعسی (ساڵح موتڵه‌گ) کە گڵۆڵەیان کەوتۆتە لێژی، دەرسی پارتی و یەکێتی دادەن و قورمیشیان دەکەن لە کاتێکدا خۆشیان چاوەڕوانی بومەلەرزەی سیاسین و زۆریان نەماوە مل بشکێنن، ئاخر گونجاوە داوا لە مردوو بکرێت لە گۆڕ بێتە دەرەوە:
     سه‌ركردایه‌تی‌ كورد توندتربێت له‌وه‌ی‌ به‌زاڵم بڵێت زاڵم و به‌دیكتاتۆر بڵێت دیكتاتۆر، به‌وانه‌ش بڵێت كه‌ تاكڕه‌وانه‌ ده‌سه‌ڵاتداری‌ ده‌كه‌ن، پێیان بڵێت یان ده‌بێت بگۆڕێن یان ده‌تان گۆڕین..
---------------
بۆ تەواوی هەواڵەکە سەردانی ئەم بەستەرەی ماڵپەڕی کەناڵی تەلەفیزیۆنی ئێن ئاڕ تی بکە.


هەینی ٢٠١٢.١.٦ چیرۆکێکی تاڵ (دایلۆگ)
 هێندەی هەیە بەزۆری گوێ بیستی ناکۆکی نێوان بووک و خەسوو دەبین، چیرۆک و حیکایەت و سەرگوزشتەکانیان نەبڕاوەیە!! بەڵام چۆنە لە کایەکەدا داشێک بگۆڕین دانەیەکی تر لە بری دابنێنن؟ داشی دووهەم بە نەگۆڕی بهێڵینەوە؟ جا تۆ بڵێی چاری یاریزانە نوێکە بکات؟ لەیارییەکە دەری بکات؟ جا کێ دەڵێت سیناریۆکە وا دەردەچێت؟ لەوانەیە داشە نوێکە کش لە جێگیرە و هەمیشەییەکە باکات؟ بیکاتەوە نێو گاگەل..هاهاهاهاهاهاها
- تۆ چۆن و بە چ شێوەیەک من دەبینی؟
- مێردی کچەکەم، مانای زاوامی.
- بەڵام خۆ لەسەر خواستی تۆ من و کچەکەت نەبووینەتە ژن و مێرد. چوونکە ئێمە گەر ئێوە ڕازبوونایە یان نا، خۆمان یەکلایی کردبووە. کەواتە بەو شێوەیە نییە، کەواتە من زاوایەکی نۆرماڵ نیم، تا چاوبەرەژێرت بم.
- بەڵام هەر بەزاوات دەزانم و ئەرکی سەرشانتە و منەتنی نییە، نابێت لە قسەم دەرچیت!
- نا ئەگەر ڕێزت دەگەرم و هاوکاریت دەکەم نە لەبەر خاتری کچەکەتە، نە لەبەر خاتری ناونیشانی زاوابوونە تەنها لەبەر ئەوەی تۆ مرۆڤێکی بەتەمەنی و پێویستیت بە چاودێری زیاتر هەیە وەک لە مرۆڤێکی ئاسایی، ئەگینا هیچی تر، ئەتوانم وێڵت بکەم و بۆ هەر داوایەکت بیانوویەک بێنمەوە، خۆ بدزمەوە.
     زاوایەکی تر دێتە سەر هێڵ، وەک جادووباز پەیدا دەبێت، بێ روخسەت وەرگرتن، دەکەوێتە قسە کردن:
- نا بۆ من لە خلەم یان لە ژنی دووهەمم؟ مەمنوون نییم، من و ژنەکەم تەواوکەری یەکترین، هەوڵ ئەدەین تەواوکەری یەکتر بین. گەر باسی کۆن بکرێت ئەوە شتیکی ترە، لەسەرەتاوە بۆ نەیاندەزانی کە ١٥ ساڵ لە کچەکە گەورەترم، بەڵام کچەکە بێزووی بە چوونە دەرەوە دەکرد، لەبەر خۆشی خۆی نەک کەسوکار بەڵکوو دەسگیرانەکەیشی فەرامۆش کرد.
     لەو لاشەوە لە قەیدوبەند و قەهری کەسوکار و کۆمەڵگا بەهەر نرخێک بوو دەیویست ڕزگاری بێت، بۆیە ئەو چانسەی منی کە وەک یانسیبی لۆتۆ وابوو بۆی، ژیر بوو داخوازییەکەمی رەتنەکردەوە، ئێوەیش لەبەر خاتری ئەوەی بڵێن ئەوە چەندهەمین کەسمان لەدەرەوەیە و خۆتانی پێوە بابدەن و فش بکەنەوە. جار جاریش دیاری و بڕە پارە بە ئاشکرا و نهینی بە ناوچەوانەوەیە. 


هەینی ٢٠١٢.١.٦ دادگای سەربەخۆ یان ....؟؟!!
 ئەوەی کە بی بی سی بەکوردی چاوپێکەوتنی کردووە، جێی خۆشحاڵییە. بەڵام لە کێشەی ئەو کابرایە (تارق هاشمی)دا و دادگایی کردن و نەکردنی لە هەرێم یان دەرەوەی هەرێم، م. بارزانی ڕاست ناکات باس لە سەربەخۆیی دادگاکانی هەرێمی کوردستان دەکات! نازانم چۆن لە ڕووی دێت خاڵێکی وا دەوروژێنێت؟! لە کاتێکدا کێسی سەردەشت عوسمان و کێسی خۆپیشاندانەکانی مانگی شوباتی ساڵی ڕابردوو، هەروەها زۆری تر بە ناڕۆشنی ماوەتەوە و تاوانباران خودی ئەو خۆی بەرگرییان لێدەکات و شاردوونییەتییەوە و ئامادە نیین بیاندەنە دەست دادگا! 
     بەشێکی بەرچاو لە خەڵکی هەرێم بەگومانە لە خودی حاکم و دادگاکان، چوونکە ئەوانە هەموو خەڵکانی ژێر کۆنترۆڵی ئەو دوو حیزبە فەرمانڕەوایەن، مووچە خۆری و ئەلقەلەگوێی ئەوانن. بەدەگمەن خەڵکانی پیشەیی دەبینرێت تیایاندا. ئیتر کام سەربەخۆیی و کام  ژیانی سیاسی و کۆمەڵایەتی؟ کەشێکی ناتەندروستی وایان خوڵقاندووە بە دەیەها ساڵ نایەتەوە سەر سکەی ڕاستی خۆی!
     م. بارزانی و ئەوانی تر.. بۆیە بەرگری لەو کەسە دەکەن، لەمەوبەریش داڵدەی خەڵکانی تاوانباری تریان داوە و دواتر دەربازیان کردوونەتە دەرەوەی وڵات! زەمینە خۆشکردنە بۆ ئەوەی گەر دوو ڕۆژی تر زەمینلەرزەی سیاسی تەختوبەختیان هەڵتەکاند، ڕابکەنە ناوچەی ژێر کۆنترۆڵی ئاینزای سوونە یان شیعە و بیان پارێزن و هەقی پەناهەندەیی وەربگرن. ئەم دادڵدەدانە ئێستا شینە بۆدواڕۆژی خۆیان، نەک شتێکی تر..
ئەگەر م. بارزانی ئەمەی مەبەست بێت: (.. لێگەڕێ با ئەمەت بۆ دووپات بکەمەوە؛ دەزگای دادوەریی کوردستان سەربەخۆیە، هیچ پێوەندییەکی بە دەزگای دادوەریی عێراقی فێدراڵەوە نیە
     دەربڕینی وا، ئەوە یەکەم جار و دواهەمین جاریش نییە و نابێت کە جۆرێک لە زەمکردنی تێدایە!! ئەمەیش لەو دەربڕینە کۆنەیان دەچێت کە تا ماوەیەک لەمەوبەر دەیانووت: ئەزموونی دیموکراسی هەرێم بگوێزرێتەوە بۆ ناوچەکانی دی عێراقی عەرەبی ئاینزای سوونە و شیعە..
     گریمان م بارزانی ڕاست دەکات کە دەڵێت دادگاکانی هەرێم لەوانی ئەوان جیاواز و  سەربەخۆن؟ مەگەر یاساو ڕێساکانی هەروەک یەک نیین؟! ئەی ئەوە نییە تا ئێستا کار بە یاسای سزادانی عێراقی کۆن دەکەن؟ نا بەڕاستی بەهەردوو سەرەکە و هەردوو بارەکە مایەیە گاڵتەجاڕیین...
-----------------
تکایە بڕواننە دەقی چاوپێکەوتنەکە لە کەناڵی بی بی سی فارسی.

پێنجشەممە ٢٠١٢.١.٥ ترسێکی دانسقە..! 

 کێ هەیە لە فڵاش و تیشکی کامێرا ڕابکات و نەیەوێت وێنەی بگرن و بیدوێنن و هاڤپەیڤینی لەگەڵدا بکەن. لە وڵاتە دواکەوتوەکانی وەک ڕۆژهەڵاتی ناوەڕاست و ئەوانی تر، کۆن ئێستا نا خەڵک زۆر بوون، لەبەردەمی ئەو ئامێرانەدا زمانیان تەتەلەی کردووە و هیچیان بۆ نەوتراوە لەبیردەچووە یان وتوویانە بە هەزار هەڵەوە، وەک لەسەر ئاگر بوو بێتن، خواخوایان بووە خێرا و بەهەر نرخێک بووە، ڕزگاریان بێت لەو ئیزرائیلەی لە پڕ وەک بەڵای ناگەهان لە شەقامێکدا لێیان پەیدا دەبێت. 

     بە پێچەوانەشەوە توێژاڵگەڵێک هەن، نەک خواخوایانە و بێزووی پێوە دەکەن بەڵکوو هەست بکەن کامێرا و ڕاگەیاندکاران لە فڵان شوێنن خێرا بە سەرمەقولات خۆیانی تێفڕێ دەدەن و جاری وا هەیە بەرتیل و ڤیتامین واویش بەکاردەهێنن تا بێن بۆ ڵایان و زوومی کامێرایان تێ بکەن، ئەوانیش هەژدەهەژدە قسە بەملاو بەولادا فڕ بدەن.
     لە وەساتی ئەدەبی و هونەری و سیاسی و کۆمەڵایەتی کەسێک شک نابردرێت، یان بەوە ناسرابێت کە خۆی لەو جۆرە کارانە بدزێتەوە، حەزی بە چاوپێکەوتن و دەرکەووتن نەبێت. لە مێژووی مرۆڤایەتیدا لەم جۆرە مرۆڤە خۆدوورگرانە کەمن. 
     بەڵام لە مێژووی فەرەنسادا ڕۆماننووس و تئیوریسیۆنی ئەدەبی موریس بلانچۆت (Maurice Blanchot ١٩٠٧ - ٢٠٠٣) نموونەی بەرجەستە و دانسقە، ئەو کەسایەتییە ٩٥ ساڵ ژیاوە، تەنها چاوپێکەوتنێکی کردووە، ئەویش بڵاونەکرایەوە. تەنهایش دوو وێنە یەکێکیان لە مناڵی ئەویتریان لە پیرێتیدا گرتوویەتی. هەمیشە خۆی دزیوەتەوە، لە ڕاگەیانکاران ڕایکردووە. جارێک لە مارکێتێکدا دەکەوێتە تەڵەوی کامێراوە، وا ڕادەکات کە دواتر وێنەکە دەردەچێت نازانرێت ئەوە یان ئەو نییە تەنها تارماییەکە و بەس.




ليست هناك تعليقات:

إرسال تعليق