گۆڤاری ئەدەبی کرێکاری چی بوو؟


عەباس شوانAbas Shiwan

ئەوەی لێرەدا دەبینرێت مێژووی چەند نامەیە باس لە بەرنامە و سیاسەتی بەڕێوەبردنی گۆڤاری ناوبراو دەکات. هەرچەند باس لە هەموو ژمارەکان ناکات بەڵام بە پێویستم زانی بیخەمە ڕوو

نامە


به‌ڕێز کاک وریا نازری

پاش سڵاوێکی گه‌رم و گه‌ش

وه‌ک ئاگاداری به‌ره‌به‌ره‌ خه‌ڵکی کورد له‌دیوی لای ئێوه‌وه‌ به‌ره‌وباوان ده‌گه‌ڕێنه‌وه‌، ئێمه‌یش به‌ر له‌چه‌ند ڕۆژێ ده‌بێ گه‌ڕاوینه‌ته‌وه‌، وا ژیان خه‌ریکه‌ ئاسایی ده‌بێته‌وه‌، ژیاوینه‌ته‌وه‌، له‌هه‌وڵی ئه‌وه‌داین ده‌ست به‌چالاکی بکه‌ینه‌وه‌.

ئێستا له‌م نامه‌یه‌دا باس له‌و گه‌شته‌ مه‌رگباره‌ ناکه‌م نادوێم بۆت. له‌وانه‌یه‌ که‌م تازۆر شتێکیان بۆ گێڕابیته‌وه‌، که‌ گه‌لێ پێویسته‌ بزانرێ بنووسرێته‌وه‌. من هه‌ر ئه‌مشه‌و ده‌ستم به‌نووسینی کردووه‌، هه‌وڵیش ئه‌ده‌م به‌زووترین کات ته‌واوی بکه‌م. مه‌مێژووی به‌شه‌ریدا کۆچ و کۆجباری وا نه‌بۆته‌وه‌، به‌جارێ میلله‌تێ ڕابکات! من رۆمانی (رهایی گورسنگی) جۆرج ئه‌مادۆ و (خوشه‌های خشم)ی جۆن شتاینبگم خوێندۆته‌وه‌ که‌ باس له‌کۆچ و کۆچبه‌ری خه‌ڵکی ده‌کا. ئه‌وانه‌ و له‌وانه‌یه‌ ئه‌سه‌ری ئه‌ده‌بی تر هه‌بێ، ناگه‌نه‌ قوله‌پیی ئه‌و گه‌شته‌ مه‌رگباره‌ی ئێمه‌.

ئێمه‌ خانه‌واده‌که‌مان گه‌یشتینه‌ شارستانی بانه‌، ماوه‌ی حه‌وتویه‌ک له‌وێ ماینه‌وه‌، خه‌ریک بو دوورمانخه‌نه‌وه‌، به‌ڵام نه‌چووین گه‌ڕاینه‌وه‌. له‌وێ چه‌ند ژماره‌ی گۆڤاری سروه‌م بینی و خوێنده‌وه‌. هه‌روه‌ها له‌کتێبفرۆسییه‌کاندا چه‌ند ڕۆمانی جیهانیم بینی کرابوون به‌کوردی، به‌ڵام به‌هۆی بی پاره‌یی نه‌متوانی بیانکڕم، له‌گه‌ڵ خۆ بیانهینمه‌وه‌.

به‌هه‌رحال ئه‌وه‌ی ڕۆی ڕۆی گرنگ له‌مه‌ودوایه‌، له‌بواری ئه‌ده‌بدا شتێ به‌شت بکه‌ین. هیوادارم توانیبێتتان ژماره‌یه‌کی تری پێشه‌نگتان ده‌رکردبێ، چاومان به‌بینینی زاخاو بدری. چالاک و به‌ده‌ستوبردبن. تازه‌به‌تازه‌ چیرۆکیکم نووسییه‌، ئه‌گه‌ر بکری بۆتی ڕه‌وانه‌ ده‌که‌م، به‌ڵام یه‌کترمان بدیایه‌ زۆر چاکتر ده‌بوو، به‌رهه‌مه‌ ئه‌ده‌بییه‌کانی تریشت ده‌بینی، ئه‌وکات نه‌مانکرد ماڵی ئێمه‌ت پیشان بده‌م، ئێستایس نه‌چووه‌ بچێ، گه‌ر پێت باشه‌ په‌یوه‌ندی به‌هێز بێ ده‌توانیین یه‌کتر ببینین، چۆنت پی باشه‌ واده‌که‌ین، چاوه‌ڕوانی وه‌ڵامم.

له‌ڕۆژنامه‌ی عێراق ژماره‌ 4664 و 4665 ڕۆژانی 8و9ی ئایاری 1990 کابرایه‌ک به‌ناوی عه‌تا فایه‌ق نووسینیکی دابه‌زاندووه‌ به‌ناونیشانی(ره‌خنه‌ی ئه‌ده‌بی و ره‌خنه‌ی سیاسی) بێجگه‌ له‌وه‌ی گاڵته‌ به‌ئه‌ده‌بی کرێکاری ده‌کا، مارکسیزمیش به‌یۆتۆبا داده‌نێ، زۆر شتی ناجۆری تری ده‌ربڕیوه‌. منیش هه‌وڵده‌ده‌م وه‌ڵامی بده‌مه‌وه‌. هێرشی وا بیده‌نگه‌ لیکردنی به‌باش نازانم.
ئیتر به‌هیوای دیدار 9ی 5ی 1990

نامەی 2

له‌وه‌ته‌ی له‌ئێران گه‌ڕاوینیته‌وه‌، به‌هۆی بێ ڕادیۆییه‌وه‌ به‌داخه‌وه‌ گوێم له‌ئیزتگه‌که‌تان نه‌بووه‌، له‌وه‌ ده‌چێ له‌مه‌ودوایش گوێم لێی نه‌بێ! چوونکه‌ هه‌تا ئێستا چه‌ند هه‌وڵم داوه‌ ڕادیۆیه‌ک به‌هه‌رچ نرخێ بی په‌یدا بکه‌م، مایه‌ پووچ ده‌رچووم!

گوێگرێکی به‌رده‌وامی ئیزتگه‌که‌مان ( ده‌نگی شۆڕشی ئێران) گوێی له‌په‌خشکردنی چیرۆکه‌کان ده‌بێ، نه‌یکردۆته‌ نامه‌ردی، له‌سه‌ر نه‌وار تۆماری کردبوو، پێم باش بوو، ده‌ستتان خۆش بێ، ڕێکوپێک ئاماده‌کرابوون.

ده‌رباره‌ی گۆڤاری پێشه‌نگ ژماره‌یه‌کی نوێی لێده‌رچووه‌. له‌مه‌کته‌به‌که‌مدا چه‌ند ژماره‌ی گۆڤاره‌که‌ هه‌یه‌ و چه‌ندیشی نییه‌، نوقسانه‌. خۆزگه‌ ئه‌و ژمارانه‌ی نیمه‌ بۆتان ده‌ناردم، ژماره‌کانیش ئه‌مانه‌ن: ( 1،2،4،5) ژماره‌ نوێکه‌یشی له‌گه‌ڵدا بی زۆر چاکه‌.

به‌مه‌به‌ستی ده‌وڵه‌مه‌ندکردن و ده‌ستگرۆیی کانوون، له‌مه‌به‌داو هه‌رچی شتێکی ئه‌ده‌بی که‌ بۆن و به‌رامه‌ی چینایه‌تی پێوه‌ بێت، به‌رچاوبکه‌وێت، بۆتان ڕه‌وانه‌ ده‌که‌م.

ده‌ست و دیاری ئه‌مجاره‌ ئه‌مانه‌ی خواره‌وه‌یه‌: 1) کلارا. 2) له‌به‌ندینخانه‌دا. 3) نیشته‌جێبوون قه‌ده‌غه‌یه‌. 4)حه‌ماڵ.

ئه‌مانه‌ بۆ نمایشنامه‌ی ڕادوێ به‌سووده‌. له‌سه‌داسه‌د له‌گه‌ڵ ناوه‌رۆکی ئه‌م چیرۆکانه‌دا نیم، سه‌رنجی خۆتم پێبڵێ. سه‌رکه‌وتوبی 23ی 5ی 1991

نامەی 3

ژماره‌کانی پێشه‌نگ سه‌ر له‌کزییه‌ و باش ده‌فرۆشرێ. له‌هه‌موو جۆره‌ مرۆڤێ ده‌یکڕێ، به‌تایبه‌تی گه‌نجان و لاوان له‌ژن و پیاو. زۆر له‌وانه‌ هه‌واڵی ژماره‌ کۆنه‌کان ده‌پرسن، منیش ئه‌وه‌یان پێده‌ڵێم؛ بۆتان په‌یدا ده‌که‌م. به‌ڵام هه‌ر قسه‌یه‌، جا تکایه‌ به‌هه‌ر جۆرێ بێ له‌کون و که‌له‌به‌ره‌کانی ئۆردوگادا بووه‌، هه‌ندێ په‌یدا بکه‌، بۆمی ڕه‌وانه‌ بکه‌. هه‌روه‌ها وه‌ک به‌کاک خالیدم وت؛ ڕۆژی چوارشه‌ممه‌ داوارارییه‌کی فره‌ زۆر له‌سه‌ر دیوانه‌که‌ی ئه‌حمه‌دی شاملۆ هه‌یه‌، چه‌ند هه‌یه‌ لێره‌ ده‌فرۆشرێ، خۆ گه‌ر بکرێ دیوانه‌کانی تری وه‌ک ئه‌وه‌ی کاک ڕێبوار، محه‌مه‌دی مسری، شته‌کانی تر دایه‌ جۆنز هه‌یه‌ بۆمی کۆبکه‌نه‌وه‌ ڕه‌وانه‌یکه‌ن. ده‌رباره‌ی نه‌وار و زه‌بته‌کییش نازانم ده‌ڵێن چی؟

ئه‌وا ئه‌مجاره‌یش دوو چیرۆکت بۆ ڕه‌وانه‌ ده‌که‌م. گه‌ر سوودی هه‌بوو بۆ ڕادیۆ یان لایه‌نێکی تر، ئه‌وا چاکه‌ و قسه‌ی خۆتی له‌سه‌ر بکه‌. به‌ڵام ئه‌گه‌ر نه‌کرا، به‌نامه‌ حه‌ز ده‌که‌م وه‌ڵامم بده‌یته‌وه‌.

بۆ په‌یوه‌ندی به‌هێزتر و قه‌یدوبه‌ند نه‌بێ، ئه‌گه‌ر کاری خانوو هه‌بوو له‌ئۆردوگا، ئه‌وا دایبنین بۆمان و ئاگادارمانکه‌نه‌وه‌.

ئه‌گه‌ر ویستم سه‌ردانتان بکه‌م، قه‌یدوبه‌ند هه‌یه‌؟ ئه‌کرێ هه‌فته‌ی جارێ، سه‌ر له‌ماڵه‌وه‌ بده‌ی. هاوڕێمان کاک حه‌مه‌فه‌تاح و هاوڕێ هومایۆن له‌گه‌ڵ خۆتا بهینی، سه‌ردانێکمان بکه‌ن. کاک هومایۆن مه‌دالیایه‌کی پێدام، هی کرێکارانی ئه‌ڵه‌مانیای ڕۆژئاوا بوو، که‌ داخوازی 35 سه‌عات کاره‌. تۆ بڵێی هی که‌ هه‌بێ؟ گه‌ر کۆبوونه‌وه‌ی کانوون ره‌خسا، ده‌کرێ به‌شداری تێدابکه‌م؟ 4ی 6ی 1991

نامەی 4

برام: ئه‌و دیارییه‌ی بۆت ڕه‌وانه‌ کردبووم، زۆر به‌نرخه‌ یارمه‌تییه‌کی فره‌ گه‌وره‌یه‌، به‌ڕاستی قه‌رزاربارت کردم، سوپاست ده‌که‌م.

برام: وه‌ک بڕیاربوو سه‌ردانێکمان بکه‌ن، که‌چی دیار نه‌بوون، ناهاتن؟! حه‌وتووی پێشوو به‌هۆی مزاهه‌ره‌ له‌دژی حکومه‌ت وه‌زع نائارام بوو، به‌ڵآم خۆ ئێستا ئاسایی بۆته‌وه‌. حه‌ز ده‌که‌م بێن، گه‌ر هاتن وابه‌باش ده‌زانم شه‌و له‌لامان بمێننه‌وه‌ بۆ ئه‌وه‌ی بتوانیین به‌ئاره‌زووی دڵ قسه‌ بکه‌ین.

برام: دیاری هه‌ژارانه‌م سێ چیرۆکه‌، بێگومان سوودی لێده‌بینن. ئه‌وه‌ی بۆ ڕادیۆ ده‌گونجێ با بۆ ئه‌وێ بێت. هه‌روه‌ها ده‌شکرێ له‌گۆڤاره‌که‌دا بڵاوبکرێته‌وه‌، ته‌نیا ئاماژه‌ بۆ سه‌رچاوه‌که‌ی بکرێ.

پرۆژه‌ی ئاینده‌ ئه‌و چیرۆکانه‌ له‌گه‌ڵ چیرۆکه‌کانی پێشه‌نگ کۆبکرێته‌وه‌ له‌شێوه‌ی کۆمه‌ڵه‌ چیرۆکی کورتی وه‌رگێڕاو بڵاوبکرێته‌وه‌. به‌هیوای دیدار 9ی 6ی 1991

نامەی 5

هاوڕی گیان/ له‌م ماوه‌یه‌دا ژماره‌ 26ی بڵاوکراوه‌ی ئه‌نته‌رناسیونالم به‌هۆی براده‌ریکه‌وه‌ به‌ده‌ست گه‌یشت، له‌وێدا و له‌گۆشه‌ی چالاکییه‌کاندا چاوم به‌ناوت که‌وت. هه‌ر له‌و ژماره‌یه‌دا ئه‌درێسی حیزب له‌ئنگلستان نووسرابوو. ئه‌خیره‌ن دۆزیمیته‌وه‌، یه‌کسه‌ر بیرم بۆ ئه‌م نامه‌ییه‌ ئێستا چوو. ده‌بی زۆر لیم ببووری که‌ تائێستا به‌سه‌رم نه‌کردویته‌وه‌.

له‌دۆسێی نامه‌کاندا 9 نامه‌ی تۆم دۆزییه‌وه‌، ده‌ستم به‌خوێندنه‌وه‌یان کرد. له‌و نامانه‌دا زۆر ئیحساسی جوانی تێدا بوو. له‌نامه‌ی رۆژی 1992.2.25دا پێشبینی ئه‌وه‌ت بۆ کردووم که‌ له‌وانه‌یه‌ ڕۆژێ بێت ڕێم بکه‌وێته‌ تورکیاوه‌. پێشبینییه‌که‌ت دوای 5ساڵ هاته‌دی. له‌1997.7.18دا ڕام نه‌کردایه‌ته‌ نێو خاکی تورکیاوه‌ له‌لاکۆڵانێکی سله‌یمانیدا ساردیان ده‌کردمه‌وه‌.

ئێستا وا بۆ ساڵێک ده‌چێ له‌کوردستان دوورکه‌وتومه‌ته‌وه‌، لیره‌ قه‌تیس ماوم. ژیانی ئێره‌ ته‌فاوتێکی ئه‌وتۆی له‌گه‌ڵ لای خۆمان نییه‌. به‌ته‌واوی بێزار و بێتاقه‌ت بووم. ڕووی نوێنه‌رانی سه‌ده‌ڕه‌شه‌کانی چه‌رخی ناوه‌ڕاست به‌تایبه‌تی بزووتنه‌وه‌ی ناموباره‌کی ئیسلامی ڕه‌ش بێت، ئه‌گینا ئیشم بێره‌ چی بوو! هه‌شت مانگه‌ له‌نیوان ڕه‌فز و قبولی سه‌فاره‌تی فڵان و فیسار وڵاتدا تۆپتۆپێنم به‌شه‌ش سه‌رخێزانه‌وه‌ پیده‌کرێ! پێده‌چێ وڵاتی فینلاند دواهه‌مین له‌نگه‌رم بێت، ئه‌ویش له‌وانه‌یه‌ 4 تا 5 مانگی تر بخایه‌نێ.

ژیانی ئه‌م ماوه‌یه‌ بێجگه‌ له‌چه‌ند مانگێکی هه‌مووی به‌فه‌راغ به‌سه‌رم بردووه‌. شه‌رایتی کارکردن نه‌ک بۆ په‌ناهه‌نده‌ و ئێمه‌مانانی ته‌مه‌ڵی په‌روه‌رده‌ی ده‌ستی سیسته‌می سه‌رمایه‌داری ده‌وڵه‌تی وه‌ک حکومه‌تی به‌عس که‌ ئه‌لگویه‌کی موشه‌وه‌هی ده‌وڵه‌تی شوره‌وی بوو، به‌ڵکو بۆ خودی تورکان سه‌خته‌. به‌هۆی نزمی ئاستی چینایه‌تییه‌وه‌ هه‌موو ژیانیان هه‌ڵپه‌کردنه‌ بۆ کارکردن!

په‌ناهه‌نده‌کانی ده‌وروبه‌رم به‌خاوه‌ن شه‌هاده‌کانیشه‌وه‌ خه‌ڵکانی ئاسایین. به‌پله‌ی یه‌که‌م هه‌لومه‌رجی سه‌ختی ئابووری کوردستان ڕاوی ناون! ئامانجی ئه‌وه‌ڵ و ئه‌خیریان به‌وانه‌یشی لافوگه‌زافی چه‌پ و ڕادیکاڵ و کریکاریبوون و سیاسه‌ت لێده‌ده‌ن کاسبی کردن و پاره‌کۆکردنه‌وه‌یه‌! که‌سانی شکست خواردوو و بیئاسۆ که‌ له‌ئه‌نجامی سراع و کێشمه‌کێشه‌وه‌ ناهاتبێتنه‌ ده‌ره‌وه‌، چاوه‌ڕوانی کاری دروستی وه‌ک خه‌بات و تێکۆشان و قازانج گه‌یاندن به‌چینی کرێکاریان لێناکرێ!

هاوڕێی به‌ڕێز/ جاری ئه‌مه‌ کورته‌یه‌کی حالوئه‌وزاعم بوو. ئه‌گه‌ر قبولی ده‌مه‌زه‌ردکردنه‌وه‌ی ره‌فاقه‌تکردنم ده‌که‌ی، خۆشحاڵ ده‌بم. له‌نامه‌ کۆنه‌کاندا زۆر تامه‌زرۆی هه‌واڵ و چاره‌نووسی گۆڤارت به‌لاوه‌ گرنگ پیشانداوه‌. خۆشبه‌ختانه‌ پێتڕاده‌گه‌یه‌نم تا هاتنم 33 هه‌مین ژماره‌م له‌ئازاری 1996دا به‌چاپ گه‌یاندووه‌. ئه‌مه‌ وێڕای 6 ژماره‌ی( حوزه‌یرانی 1995 تا کانوونی یه‌که‌می 1996) پاشکۆ سیاسییه‌که‌ی و چه‌نده‌ها نامیلکه‌. له‌داهاتوودا هه‌مویت بۆ ڕه‌وانه‌ ده‌که‌م.

ئه‌وه‌ی ماوه‌ له‌م نامه‌ هه‌ڵبزرکاوه‌ی ئێستا پێتی بڵێم ئه‌وه‌یه‌؛ ناونیشان و ته‌له‌فوونی خۆت و هاوڕی عه‌لی کیتابیم بۆ بنووسی. له‌وه‌زعی خۆت ئاگادارم بکه‌یته‌وه‌. به‌ر له‌مقابه‌له‌ی هه‌یئه‌تی فینلاند ده‌مه‌وێ ئه‌گه‌ر دۆست و براده‌رت له‌وێ هه‌یه‌، کۆمه‌ک و رێنماییم بکه‌ن یان بکری ناونیشان و ته‌له‌فوونیانم بۆ بنووسی تا په‌یوه‌ندیان پێوه‌ بکه‌م.

به‌گه‌یشتنی نامه‌ ده‌توانی بۆ ئه‌م ژماره‌ جێب ته‌له‌وونه‌ .........که‌ هی براده‌رێکه‌ به‌ناوی به‌هجه‌ت، داوام بکه‌ پاش چه‌ند ده‌قه‌یه‌ک ده‌گه‌مه‌ لات. مناڵه‌کانم گه‌وره‌بوون کاڵێ ئێستا 15 ساڵه‌، به‌باڵا به‌قه‌ده‌ر خۆم ده‌بێت. سێ کوڕه‌که‌ی ترم له‌خه‌م ڕه‌خساون. ڕێز و خۆشه‌ویستی زۆریان بۆتان هه‌یه‌. زۆرجار باسی تۆ و عه‌لی کیتابی ده‌که‌ن. هه‌روه‌ها نوخشه‌ ڕێز و خۆشه‌ویستی بۆت هه‌یه‌. له‌کۆتاییدا سه‌ربه‌رز و له‌ش ساغ بیت. 1998.7.6 ئه‌فیون - تورکیا

نامەی 6

هاوڕێم/ ده‌ستم له‌و نامه‌یه‌ شۆردبوو که‌ به‌هۆی ئه‌درێسی حیزبه‌وه‌ بۆمناردبووی، ناهه‌قم مه‌گره‌ وه‌ڵامه‌که‌ت به‌دره‌نگ له‌ڕۆژی 1998.8.20دا به‌ده‌ستم گه‌یشت. ئینسانه‌ شه‌ریفه‌کان بکه‌ونه‌ هه‌ر شوێنیکی دنیاوه‌ پارێزگاری له‌سیفه‌تی خۆیان ده‌که‌ن. له‌و قه‌ناعه‌ته‌دام نموونه‌ی وه‌ک ئێوه‌ ئه‌گه‌ر خۆی له‌ئه‌سڵدا و مه‌عده‌نی پاک نه‌بێ هه‌رگیز فیکر و سیاسه‌ت شه‌ریف و پاکی ناکات. بۆ خۆی وه‌ڵامدانه‌وه‌که‌ت باشترین به‌ڵگه‌یه‌. هێنده‌ی قبولبوونم له‌ڕێکخراوی یو ئێن شادمانی کردم.

ئه‌وه‌ی په‌یوه‌ندی به‌مه‌سه‌له‌ی فینلاند و هاوڕێی ناوبراو هه‌یه‌، چی داواکردبوو به‌نامه‌ و فاکس که‌ به‌داخه‌وه‌ یان ژماره‌که‌ هه‌ڵه‌یه‌ یان کۆنه‌، جێبه‌جێم کرد، بۆم نارد، ئه‌گه‌ر فریام بکه‌وێ باشه‌. چوونکه‌ مقابه‌له‌مان له‌گه‌ڵ هه‌یئه‌تی فینله‌ندی له‌ڕۆژی 1998.9.7 دایه‌.

له‌مه‌ودوا مادام به‌یه‌کتر شادوشوکر بووینه‌وه‌، گۆڕینه‌وه‌ی بیروڕا ئاسان ده‌بێ، خۆ ئه‌گه‌ر بگه‌مه‌ شوێنی خۆم ئاسانتر ده‌بێ. سه‌ره‌تا ئاره‌زوو ده‌که‌م به‌وردی له‌هۆی هاتنه‌ ده‌ره‌وه‌م ئاگادار بیت، ئینجا نۆره‌ی بابه‌ته‌کانی تر دێت.

له‌باره‌ی ئه‌و مادده‌ نه‌گریسه‌وه‌ شتێکت وتبوو. هاوڕێم من ده‌ستنیشانی فڵان مه‌بله‌غ ناکه‌م، ئه‌وه‌ نه‌بی هێنده‌ی پێت هه‌ڵده‌سووڕێ بینێره‌. بێگومان تا زۆر بێت باشتره‌. له‌گه‌ڵ ئه‌م نامه‌یه‌دا فۆتۆکۆپی حساب بانقی ده‌نێرم. شه‌وی 8.20 له‌دوای گه‌یشتنی نامه‌که‌ ته‌له‌فوونم بۆ کردی، تکایه‌ تایمی له‌ماڵ بوونتم بۆ ده‌ستنیشان بکه‌.

به‌چ ڕێگایه‌ک به‌رده‌وام ده‌توانی بڵاوکراوه‌ی همبستگی، ئیسکرا، انترناسیونالم به‌ده‌ست بگات؟

سڵاو و خۆشه‌ویستیم بگه‌یه‌نه‌ به‌و هاوڕێیانه‌ی ده‌مانناسن، بێجگه‌ له‌هاوڕێ سه‌عید ئه‌وانی ترم بیرچۆته‌وه‌.

نوخشه‌ و کاڵێ و کازیوه‌ و کاردۆ و کۆژین ئه‌حواڵتان ده‌پرسن، هیوای له‌شساغیتان بۆ ده‌که‌ن، وێنه‌یه‌کیان بۆ ناردی. سڵاوی دووباره‌ چاوه‌ڕێی قسه‌ خۆشه‌کانتین. 1998.8.22 ئه‌فیون /تورکیا
---------------------------
هاوڕێم/ به‌هۆی ئه‌و هاوکارییه‌ی ئێوه‌وه‌، تاڕاده‌یه‌کی باش مقابه‌له‌کردنمان له‌گه‌ڵ هه‌یئه‌تی فینلاند سه‌رکه‌وتوو بوو، له‌و بڕوایه‌دام قبوولمان ده‌که‌ن، ئه‌م ده‌وره‌ ناخۆشه‌ کۆتایی پێدێت.

له‌باره‌ی حساب بانقییه‌که‌وه‌، چووین پرسیارمان کرد، وتیان؛ له‌شاری له‌نده‌ن لقمان هه‌یه‌، خۆشت لێره‌ بوویت و له‌وانه‌یه‌ ئاگادار بیت. ئیش بانقه‌سی، یه‌کێکه‌ له‌بانقه‌ مه‌شهووره‌کانی تورکیا، له‌زووربه‌ی پایته‌خته‌کانی دنیا ته‌نانه‌ت شاره‌ بچووکه‌کانیش لقیان هه‌یه‌ و کردۆته‌وه‌. ئه‌وا ئه‌مجاره‌ فۆتۆکۆپی حساب بانقییه‌که‌ت به‌ته‌واوی بۆ ده‌نێرم، له‌گه‌ڵ ئه‌درێسی شاری ئه‌فیوندا. ئه‌گه‌ر نه‌تتوانی ئه‌و کاره‌ جێبه‌جێ بکه‌ی، پۆستی ئێکس پرێس هه‌یه‌، زه‌مانه‌تی گه‌یشتنی شتومه‌کی و پاره‌ ده‌کات، قابیل فه‌وتاندن نییه‌. ئیتر خۆشت سه‌رپشک به‌.

جاری پێشوو له‌هۆی ڕاکردنم نووسراوێکم بۆ ناردی، له‌سه‌ر په‌یمانی خۆم، ئه‌مجاره‌ به‌شێ له‌بیره‌وه‌رییه‌کانی ناو زیندانت بۆ ڕه‌وانه‌ ده‌که‌م. له‌سه‌ر سه‌رجه‌م ئه‌و شتانه‌ هه‌ر تێبینییه‌کت هه‌بوو، پیم خۆشه‌ بۆمی بنووسی.

هاوڕێ/ نوخشه‌ ده‌ڵێ: به‌دۆزینه‌وه‌ی کاک وریا واده‌زانم باوکم زیندووبۆته‌وه‌. دیاره‌ باوکی حکومه‌تی به‌عس بێسه‌روشوینی کرد! کاڵێ و کازیوه‌ و کاردۆ هێشتا ئه‌و رۆژه‌یان له‌بیرماوه‌ که‌ هاتنه‌ ماڵمان بۆ خواحافیزی یه‌کجاره‌کی، له‌گه‌ڵ ده‌ستتاندا هه‌ندێ جانتاوکه‌لوپه‌لی خۆتان هینابوو بۆمان، که‌ تاهاتنمان بۆ تورکیا مابوومان. تانامه‌یه‌کی تر به‌دوعا 1998.9.12 ئه‌فیون تورکیا

نامەی 7
مێژووی گۆڤاری ئه‌ده‌بی کرێکاری

له‌گه‌ڵ ئه‌م نامه‌یه‌دا ده‌ستده‌که‌م به‌ناردنی ئه‌و ژمارانه‌ی گۆڤاری ئه‌ده‌بی کریکاری، که‌ تائێستا نه‌تبینیووه‌. دیاره‌ ئاره‌زووم ده‌کرد هه‌موو ژماره‌کانت به‌یه‌کجار بۆ بنێرم، ئه‌ویش له‌کێشی گیرفانی مندا نییه‌، بۆیه‌ هه‌وڵ ئه‌ده‌م هه‌ر پاره‌م لێ زیاد بیت دانه‌یه‌ک یان دووانت بۆ ده‌نێرم. ده‌بێ له‌قسورم ببووری.

ژماره‌ 9ی ئابی 1992:

+ به‌رگی ڕه‌نگاوڕه‌نگ نییه‌، ڕه‌ش و سپی، په‌ڕه‌ی ئاسایی بوو. له‌باره‌ی وێنه‌ی به‌رگه‌وه‌ ده‌بێ بووترێ: له‌به‌ر ئه‌وه‌ی ئه‌و کتێبه‌ی مارکس سه‌رمایه‌-که‌پیتاڵ چاپی مۆسکۆ شووره‌وی کۆن بوو. وێنه‌ی کتێبه‌که‌ له‌و دیده‌وه‌ هه‌ڵقوڵاوه‌ گوایه‌ ئه‌مه‌ریکا مۆنۆپۆڵی و سه‌رمایه‌دارییه‌، کرێکار له‌به‌رانبه‌ر ئه‌ودا ڕاوه‌ستاوه‌ته‌وه‌، بۆیه‌ هونه‌رمه‌ند هاتووه‌ ڕه‌مز شه‌بقه‌یه‌کی ئه‌مه‌ریکی کردۆته‌ سه‌ر ئه‌و پیاوه‌ی ده‌ستی به‌سه‌ر کارخانه‌کاندا گرتووه‌! بۆ ده‌ربازبوون له‌و دیده‌ ته‌حریفییه‌ هاتم شه‌بقه‌که‌م لابرد.

+کتێبه‌که‌ی بلیخانۆف به‌زمانی فارسی (هنر و زندگی اجتماعی) ئه‌گه‌ر بیرت مابێ وه‌ختی خۆی به‌ر له‌ڕۆیشتنت بۆ تورکیا، ئۆرژیناڵه‌که‌یم له‌تۆ وه‌رگرت دانه‌یه‌کم لێ فۆتۆکۆپی کرد. هه‌روه‌ک ده‌بینی به‌باشترین موته‌رجم وه‌رگێڕراوه‌ته‌ سه‌ر زمانی کوردی، به‌زنجیره‌ بڵاومکردۆته‌وه‌، ل 2 .

+ که‌ هه‌ڵبژاردن ڕوویدا (پ د ک) تۆزیک له‌ (پی یو که‌ی) زیاتر ده‌نگی هێنا بوو. له‌سه‌ر ئه‌وه‌ (پی یو که‌ی) گه‌ر و گێچه‌ڵی ده‌کرد! هێنده‌ی نه‌مابوو گه‌رماوگه‌رم لافاوی خوێن هه‌ڵبسێت! سه‌رئه‌نجام کێشه‌که‌ به‌ پێکهێنانی حکومه‌تێکی هاوبه‌ش فیفتی فیفتی کۆتایی هات. ئه‌و کاریکاتێره‌ گوزارشت له‌و حاله‌ته‌ ده‌کات، ل 26 .

ژماره‌ 10ی ئه‌یلوولی 1992

+ به‌رگی ڕه‌نگاوڕه‌نگ نییه‌، ڕه‌ش و سپی، په‌ڕه‌ی ئاسایی بوو. وێنه‌ی به‌رگ به‌بۆنه‌ی دامه‌زراندنی ده‌زگای ئاسایشه‌وه‌یه‌. وێنه‌ی پشت به‌رگیش ته‌واوکه‌ری وێنه‌ی ئاماژه‌بۆکراوه‌. ڕووداوێکی وا نه‌ده‌کرا وه‌ک گرووپ و حیزبه‌ سیاسییه‌کان وتارێ یان به‌یاننامه‌یه‌ک له‌دژی ده‌رکرێ، بۆیه‌ ناڕه‌زایه‌تی گۆڤار به‌و شێوه‌یه‌ ده‌ربڕا.

+ بڵاوکردنه‌وه‌ی کتێبه‌که‌ی بلیخانۆف و ئه‌و کورته‌ بابه‌تانه‌ی که‌ گوزارشت له‌نه‌زه‌راتی لینین ده‌کات که‌ له‌باره‌ی ئه‌ده‌ب و هونه‌ره‌وه‌ ده‌ریبڕیوون، بۆ خۆی له‌زمنی سیاسه‌تی به‌هێزکردنی لایه‌نی تیوریکی نووسه‌رانی کرێکار و سه‌ر به‌کرێکارانه‌وه‌ هه‌ڵقوڵابوو. له‌هه‌مانکاتدا ڕه‌تکردنه‌وه‌ی نه‌زه‌راتی ته‌حریفی و گه‌ڕانه‌وه‌ بۆ سه‌رچاوه‌ی ئه‌سڵی فیکر و ڕابه‌رانی، ل1 .

+ مۆفه‌قی براده‌رمان، ژنی هێنا بوو. له‌گه‌ڵ ڕێکخراوه‌ی مناڵپاریزی کوردستان کاریده‌کرد. سه‌رپه‌رشتی تیپێکی مناڵانی ده‌کرد. مامۆستایشه‌ له‌په‌یمانگای هونه‌ره‌ جوانه‌کان. به‌ته‌واوی خۆی له‌بواری شانۆی مناڵاندا خه‌ریک کردووه‌. مانگی ڕابردوو به‌هۆی ئیزاعه‌ی یه‌کێتییه‌وه‌ که‌ لێره‌ ده‌بیسترێ زانیم به‌رهه‌مێکی نوێی مناڵانی پێشکه‌ش کردووه‌، ل7 .

+ ئێمه‌ کێین؟ هه‌وڵێکی تره‌ بۆ بڵاوکردنه‌وه‌ی نووسینی که‌سانی کرێکار و ده‌ستگرتن به‌باڵیانه‌وه‌، ئێ به‌ڵکوو له‌داهاتوودا ببن به‌شتێک. جا ئه‌و سیاسه‌ته‌ تا چه‌ند دروست بوو یان جێیگرت، مه‌سه‌له‌یه‌که‌ له‌داهاتوودا قسه‌ی له‌سه‌رده‌که‌م، ل 9 .

+ که‌س نه‌یده‌وێرا بڵێ برسیمه‌ کارم نییه‌ فڵان و فیساری ترم نییه‌. ده‌سه‌ڵاتداران داخوازییه‌کانی جه‌ماوه‌ری خه‌لکیان به‌وه‌ کپ ده‌کرده‌وه‌؛ به‌س نییه‌ ده‌ستی به‌عسمان لێدووره‌ و ئازادین! ئه‌و کاریکاتیره‌ گوزارشت له‌و حاله‌ته‌ ده‌کات، ل 13 .

برام کاک وریا/ ... که‌ له‌ته‌فووندا هه‌واڵی وه‌زعت لێم پرسی، خۆ ناڵێم مردووم و فریام بکه‌وه‌، وتم باشین. له‌ته‌له‌فوونێکی تردا پێتووتم: چاوه‌ڕوانی نامه‌ و .... به‌. له‌ته‌له‌فوونێکی تردا هۆی ته‌ئخیربوونی نامه‌که‌م لێپرسیت، وتت: سه‌رم زۆر شلۆق بووه‌، خۆم جوابت لێده‌گیرمه‌وه‌. له‌و په‌یامه‌ تێگه‌یشتم.

به‌هه‌رحال پێده‌چێ سه‌فه‌رکردنمان نزیک بووبێته‌وه‌. ژماره‌ی زۆری خێزان خراپی زۆرتره‌ وه‌ک له‌چاکه‌ی، ئه‌مه‌ له‌من ڕوویداوه‌، خراپتر ئه‌وه‌یه‌ که‌سیێکی وه‌ک من نه‌خۆشی ده‌ستبڵاویم هه‌یه‌. ئه‌مه‌یش له‌و فه‌لسه‌فه‌یه‌وه‌ هاتووه‌؛ مارکسی بوون و ره‌زیلی و چروکی کوجا مه‌رحه‌با. بۆیه‌ هه‌میشه‌ گیرفان به‌تاڵبووم، پێناچێ ئه‌و فیعله‌م هه‌تاهه‌تایه‌ بۆ ته‌رک بکرێ!

بۆ ڕایکردنی کاروبار په‌نام بردۆته‌ به‌ر قه‌رز. جا بۆ ئه‌وه‌ی له‌م سه‌فه‌ره‌ماندا خۆم و ماڵ و مناڵم به‌جلوبه‌رگی شایسته‌وه‌ بین، پێویستمان به‌پاره‌ ده‌بێ تا ئه‌و گرفته‌ی پێ چاره‌سه‌ر بکه‌ین. دیاره‌ له‌حاله‌تی وادا په‌ناده‌برێته‌ به‌ر ئه‌و دۆست و هاوڕێ و براده‌رانه‌ی که‌ لێیان ڕاده‌بینرێ، جه‌نابت یه‌کێکی له‌وانه‌. ئه‌گه‌ر ده‌کرێ و لێت زیاده‌ به‌گوێره‌ی توانا به‌فریامان بکه‌وه‌، بڕی پاره‌مان بۆ ڕيوانه‌ بکه‌ به‌مه‌رجی قه‌رز قه‌رز جارێکی تر قه‌رز. گه‌ر ئه‌و مه‌رجه‌ی تیا نه‌بێ قبوڵم نییه‌، تا ده‌گه‌ینه‌ شوێنی خۆمان، ئه‌وکات ده‌یخه‌مه‌ سه‌رچاوم بۆت ڕه‌وانه‌ ده‌که‌مه‌وه‌، ئه‌مه‌ ته‌نها پێشنیارێکه‌ و به‌س...

+ ئه‌رێ ره‌حمانی حسه‌ینزاده چ مه‌عده‌ن و بابه‌تێکه‌؟ تائێستا به‌ناونیشانی (حککع) و حیزبی خۆتان چه‌ند نامه‌م بۆ ناردووه‌. به‌باش و خراپ وه‌ڵامی نییه‌؟! تۆ بڵێی نامه‌کانی درابێته‌ ده‌ست؟ تکایه‌ به‌وردی له‌و باره‌یه‌وه‌ پرسیار بکه‌. خۆ گه‌ر بتوانی ئه‌درێسی یان ژماره‌ ته‌له‌فوونیم بۆ په‌یدا بکه‌ی، تا ڕاسته‌وخۆ قسه‌ی له‌گه‌ڵدا بکه‌م، کارێکی باش ده‌که‌ی. به‌سڵاوی دووباره‌
پێنجشه‌ممه‌ 1998.10.29 ئه‌فیون / تورکیا

نامەی 8

ژماره‌ 11ی تشرینی یه‌که‌م 1992

+ به‌رگی ڕه‌نگاوڕه‌نگ نییه‌، ڕه‌ش و سپی و په‌ڕه‌ی ئاسایی بوو. وێنه‌ی به‌رگی ژماره‌ عاده‌ته‌ن سوود له‌گۆڤاره‌کانی چه‌پی ئێرانی وه‌رگیراوه‌.

+ لاپه‌ره‌ 1 و 5 هه‌ر مانگه‌ به‌شێوه‌ی جۆراوجۆر په‌یره‌وی سیاسه‌تی زیندووکردنه‌وه‌ و پێناسینی بۆنه‌ کرێکاری یان مردن و له‌دایکبوونی فڵان و فیسار ڕابه‌ری سیاسی ئه‌ده‌بی هونه‌ری بزووتنه‌وه‌ی کۆنی کۆمۆنیستی و کریکاری جیهانیمان کردۆته‌وه‌.

+ لاپه‌ڕه‌ 4 و لاپه‌ڕه‌ 28ی ژماره‌ 12، به‌دابه‌زاندنی وێنه‌ی فۆتۆگرافی و پرسیاره‌کان هه‌وڵمانداوه‌ په‌یوه‌ندی گۆڤار له‌گه‌ڵ جه‌ماوه‌ری خوێنه‌ر به‌هێز بکه‌ین.

+ لاپه‌ڕه‌ 11 و لاپه‌ره‌ی دواین پشت به‌رگ، ئه‌وه‌ له‌و سیاسه‌ته‌وه‌ هه‌ڵقوڵاوه‌ که‌ ده‌کری به‌قازانجی بزووتنه‌وه‌که‌مان سوود له‌نووسه‌رانی به‌توانای ده‌ره‌وه‌ی خۆمان وه‌ربگیرێ - مه‌به‌ستم عه‌لی کیتابی نییه‌ - بابه‌ته‌کان خۆم هه‌ڵمده‌بژارد و ده‌دۆزییه‌وه‌. ده‌مدا به‌و که‌سانه‌ی وه‌ریبگێرن، که‌ته‌واویان ده‌کرد خۆم یان به‌خه‌ڵکی شاره‌زاترم ده‌دا تاپێیدا بچنه‌وه‌.

+ کاریکاتێری لاپه‌ڕه‌ 24 سوود وه‌رگرتن له‌هونه‌ری جیهانی به‌ڵام به‌ده‌سکارییه‌وه‌.

ژماره‌ 12 تشرینی دووه‌م 1992

+ به‌رگی ڕه‌نگاوڕه‌نگ نییه‌، ڕه‌ش و سپی و په‌ڕه‌ی ئاسایی بوو.

+ لاپه‌ره‌ 19 و 22 هاروه‌ها لاپه‌ڕه‌ 1 ژماره‌ 11، هه‌ر وشه‌یه‌ک له‌لایه‌ن هه‌رکه‌سێکه‌وه‌ باخاتر و قازانجی کرێکار نووسرابێ، به‌موڵکی چینه‌که‌مان داده‌نرێ، بۆیه‌ گۆشه‌ی له‌ئه‌رشیفه‌وه‌ بۆ ده‌مه‌زه‌ردکردنه‌وه‌ و گه‌ڕانه‌وه‌ بۆ ئه‌ده‌بیاتی چینایه‌تی نووسه‌رانی کورد بوو.

+ هه‌ندێ ڕووداو له‌ئاستی سله‌یمانی و هه‌ولێردا ده‌خولقا، نه‌ده‌کرا بێده‌نگه‌ی لێبکرێ، هه‌روه‌ها به‌مه‌به‌ستی شوهره‌ت په‌یداکردنی هه‌رچی زیاتری گۆڤار، ده‌بوایه‌ گه‌رماوگه‌رم به‌ر له‌بڵاوبونه‌وه‌ی گۆڤار وه‌ڵام یان ڕه‌ئێ یان ناڕه‌زایه‌تی پیشاندانێک ده‌رببڕێ. بۆیه‌ باشترین وه‌سیله‌ ده‌ست بردن بوو بۆ ڕاگه‌یاندن و به‌یاننامه‌ بڵاوکردنه‌وه‌. هه‌رچه‌نده‌ له‌باری مالی و سیاسییه‌وه‌ به‌گران له‌سه‌رمان ده‌که‌وت. ئه‌وه‌ی له‌لاپه‌ڕه‌ 26دا ده‌بینرێ کارێکی له‌و بابه‌ته‌یه‌، دووباره‌ وه‌ک به‌ڵگه‌نامه‌ دابه‌زێنراوه‌ته‌وه‌.

+ لاپه‌ره‌ 27، به‌ڕێکه‌وت عومه‌ری خه‌تات یاری به‌ده‌مانچه‌ کردبوو، گولـله‌یه‌کی له‌ده‌ست ده‌رده‌چێ به‌ر نه‌وزاد ده‌که‌وێ. عومه‌ر گه‌ر به‌هه‌ڵه‌دا نه‌چووبم سه‌ر به‌گرووپی یه‌کێتی خه‌بات و نه‌وزادیش سه‌ر به‌گرووپی ڕه‌وتی کۆمۆنیست بوون. کێشه‌ی توندی سیاسی له‌نێوانیاندا نه‌بوو، تاڕاده‌یه‌کیش له‌کاری هونه‌ریدا هاوکار و ته‌واوکه‌ری یه‌کتر بوون. هه‌روه‌ک له‌وتاری به‌شداربونی کۆڕی ماته‌مینی گۆڤار وتوومه‌: جێی ئه‌سه‌ف بوو که‌سێکی دڵسۆز له‌خۆرایی له‌ده‌ستچێ.

+ پشت به‌رگ، وه‌رگێڕانه‌که‌ی مسلح(ڕێبوار)ی ئه‌نته‌رناسیونال، له‌به‌ر ئه‌وه‌ی له‌نێو چه‌پی تازه‌ی شاری سله‌یمانیدا به‌نێوبانگ و زاڵ بوو، جۆرێک له‌هجه‌ و قالبی کوردی ئێرانی به‌سه‌ردا زاڵ بوو، تۆزێک گران دێته‌ سه‌رزاران. هه‌رچه‌نده‌ له‌مه‌وبه‌ر چه‌ند نووسه‌ری به‌نێوبانگی سه‌ر به‌چه‌پی ته‌قلیدی تر وه‌ریانگێڕا بووه‌ سه‌ر زمانی کوردی. بۆیه‌ هاتم به‌بۆنه‌ی مردنی ئۆژینه‌وه‌ دووباره‌ سرووده‌که‌م به‌وه‌رگێران دایه‌وه‌.

هاوڕێم/ لێت ناشارمه‌وه‌ ده‌ستم له‌وه‌عده‌که‌ت شۆردبوو، به‌س پیده‌چێ به‌نده‌ به‌سه‌هودا چووبم. ئه‌مرۆ چومه‌ بانک و پاره‌که‌م وه‌رگرت. پۆسته‌چییه‌که‌مان به‌ده‌، ئه‌و بانکه‌ عاده‌تییه‌تی پول بۆ هه‌ر خاوه‌ن حسابێکی بێت ده‌ستبه‌جێ نامه‌ی به‌دوادا ده‌نێرێ.

به‌ڕاستی گه‌شاینه‌وه‌، هه‌ندی کون و که‌له‌به‌رمان پیگرت. گه‌لی گه‌لێ سوپاس.

برام، ئه‌وا له‌گه‌ڵ ئه‌م نامه‌یه‌دا ژماره‌ 11 و 12ی گۆڤاری ئه‌ده‌بی کرێکاریت بۆ ڕه‌وانه‌ ده‌که‌م. به‌داخه‌وه‌ تاهاتنم بۆ ئێره‌ ئۆرژیناڵه‌کانی گۆڤار مابوون. ئه‌وه‌ی له‌گه‌ڵ خۆمدا هیناومه‌ فۆتۆکۆپییه‌. دیاره‌ له‌به‌ر بێده‌رامه‌تی له‌لای فۆتۆکۆپی هه‌رزان و خراپ ڕامکێشاوه‌. که‌واته‌ ته‌بیعی ده‌بێ هه‌ندێ لاپه‌ڕه‌ی خراپ چاپ بێت. یان به‌خاتری زۆر جێکردنه‌وه‌ و زۆر بابه‌ت ناچار بچووکمان ده‌کرده‌وه‌. نه‌ک خۆم به‌ڵکوو خوێنه‌رانیش لێی ناڕازی بوون. هه‌ر به‌و هۆیه‌وه‌ سه‌یرده‌که‌ی گه‌وره‌یشم کردووه‌، عه‌یبه‌که‌ی پێوه‌ دیاره‌.

ئه‌گه‌ر ئاره‌زوو بکه‌ی تێبینییه‌کانت کۆ بکه‌یته‌وه‌ که‌ ژماره‌کانم هه‌موو بۆ ناردی، ئه‌وسا له‌نامه‌یه‌کدا بۆمی ڕه‌وانه‌ بکه‌یت.

ته‌له‌فوون و ئه‌درێسی ڕێبوار(موسلح)ت له‌لا بێت، سوپاست ده‌که‌م بۆمی بنێری. به‌سڵاو و ڕێزی دووباره‌ دووشه‌ممه‌ 1998.11.9 ئه‌فیون / تورکیا

نامەی 9

ژماره‌ 13ی کانوونی یه‌که‌م 1992 :

+ عاده‌ته‌ن به‌رگ ڕه‌نگاوڕه‌نگ نییه‌، ڕه‌ش و سپی، په‌ڕه‌ی ئاسایی بوو. ئه‌م ژماره‌یه‌ له‌چاو ژماره‌کانی پێشووتردا ته‌میز چاپ بووه‌.

+ زیادکردنی وشه‌ی (هونه‌ر) بۆ ناوی گۆڤار، هه‌ڵه‌یه‌ک بوو کرا، پاسان ڕاستکرایه‌وه‌، ل 1 .

+ پرسیاری گۆڤار، هه‌روه‌ک ده‌بینی هه‌وڵه‌که‌ سه‌ریگرت و هاتن به‌ده‌نگییه‌وه‌، له‌هه‌ر ژماره‌یه‌کدا وه‌ڵامێک بڵاوکراوه‌ته‌وه‌. له‌هامانکاتدا ئه‌رزیابی گۆڤاریشه‌. به‌داخه‌وه‌ ته‌نها له‌جه‌ماوه‌ری نوخبه‌ی نووسه‌ر و لایه‌نگرانی ئه‌ده‌بی چینایه‌تیدا قه‌تیس ما، ل
+ کۆسار، خه‌ڵکی هه‌ڵه‌بجه‌ بوو، له‌ڕیزی ئه‌و که‌سانه‌دا بوو که‌ مه‌به‌ستم بوو لیمان نزیک بیت ده‌نگ و ڕه‌نگی له‌گۆڤاردا هه‌بێ. شاعیریکی خۆرسک و شه‌عبی بوو، له‌نێو خه‌ڵکی ناوچه‌که‌دا خۆشه‌ویست و ناسراو بوو، ل6 .

+ له‌نێو ده‌ریای کتیب و گۆڤارانی کۆن و نویدا، عه‌وداڵی نووسین و ئه‌ده‌بیاتی کرێکاری محه‌لی و جیهانی بووم. چاوێکم کردبوو به‌سه‌د چاو بۆ دۆزینه‌وه‌ی دووڕوگه‌وهه‌ران نه‌ک هه‌ر خۆم به‌ڵکوو هاوڕێ و دۆستانی ده‌ره‌وه‌ و ناوه‌وه‌م بۆ ئه‌و کاره‌ ته‌شقیق ده‌کرد. ئه‌و بابه‌تانه‌ی له‌سه‌ر سینه‌مایه‌، وێرای ئه‌وه‌ی له‌ڕیزی هه‌وڵی ئاماژه‌بۆکراودایه‌. له‌هه‌مانکاتدا بۆ یه‌که‌م جاریشه‌ له‌ده‌رگای سینه‌ما ده‌درێ، ل 7 .

+ به‌ر له‌ڕۆیشتی ڕێبوار (موسلح) نازانم ئاگادار بووی ئۆرژیناڵی دیوانیکی شیعری خۆی ته‌سلیم کردم، که‌ سه‌رچاوه‌که‌ی ڕووداوه‌ دڵته‌زێنه‌کانی کوردستانی ئێراق بوو؟ ڕێبوار، به‌حسابی خۆی به‌خاتری مه‌سه‌له‌ی ئه‌منی و نه‌خوڵقاندنی گرفت بۆ کۆمه‌ڵه‌، بێ مقابیل ڕێکه‌وتین، به‌دوای ڕۆیشتنی به‌ناوی خواستراوه‌وه‌ بۆی بڵاوبکه‌مه‌وه‌.

ئه‌وه‌بوو دیوانی ناوبراو به‌که‌م تیراژی ئه‌نجام درا، هه‌ر بۆیه‌که‌ پاش ماوه‌یه‌ک به‌پێویستمزانی هه‌رچه‌نده‌ خیلاف وه‌عد بوو، دووباره‌ پارچه‌پارچه‌ هه‌ندێ له‌و شیعرانه‌م له‌گۆڤاردا دابه‌زانده‌وه‌، ئه‌م به‌رهه‌مه‌ و چه‌نده‌های تری نووسه‌رانی کوردستانی ئێران سیاسه‌تێکی پێویست بوو بۆ گۆڤار، ل

+ چیرۆکه‌که‌ی خۆت، وابزانم له‌نامه‌یه‌کدا وتبووت؛ ئه‌گه‌ر پێشه‌نگ له‌بڵاوکردنه‌وه‌ دوای ده‌خات یان به‌هۆی خیلافی سیاسییه‌وه‌ ( ببووره‌ له‌و وشه‌یه‌دا قه‌له‌مه‌که‌ مه‌ره‌که‌بی تیانه‌ما و سه‌عات 12ی شه‌ویشه‌) هه‌ر بڵاویناکه‌نه‌وه‌، لییانوه‌ربگره‌وه‌. حسه‌ین شه‌به‌ق چیرۆکه‌که‌ت و دانه‌یه‌کی خۆمی به‌چاپکراوی دامه‌وه‌. پێده‌چێ مقابه‌له‌که‌ت سه‌ریتیاچووبێ، چوونکه‌ نه‌له‌ژماره‌ی نوێدا تیایا بوو نه‌دایانه‌وه‌، تاوه‌ک ئه‌مه‌ی ئێستا ڕووناکی ببینێ! ل11 .

+ هه‌روه‌ک ده‌بینی له‌به‌رگی پشته‌وه‌ی گۆڤاردا کاریکی نوێ ئه‌نجام دراوه‌. ئه‌ویش بڵاوکردنه‌وه‌ی ڕۆژژمێری تایبه‌ت به‌بزووتنه‌وه‌ی ئه‌ده‌بی و هونه‌ری و سیاسی چینی کریکاره‌.

ژماره‌ 14ی کانوونی دووه‌م 1993 :

+ عاده‌ته‌ن به‌رگ ڕه‌نگاوڕه‌نگ نییه‌، ڕه‌ش و سپی، په‌ڕه‌ی ئاسایی بوو. ئامانج له‌ده‌رکردنی گۆڤار، دروستکردن و گه‌شه‌ و ئینسجام پێدانی نووسه‌ر و هونه‌رمه‌ندان، بزووتنه‌وه‌ی ئه‌ده‌ب وهونه‌ری تازه‌ سه‌رهه‌ڵداوی چینایه‌تی بوو له‌کوردستاندا. بڵاوکردنه‌وه‌ و سوود وه‌رگرتن له‌هونه‌ر و ئه‌ده‌بی نووسه‌ر و هونه‌رمه‌ندانی جیهانی بۆ خۆی ئاودانی هه‌مان دره‌خت بوو.

خۆ نابێ ته‌نها جیهانی بێت، خۆشمان هیچ! جا پڕکردنه‌وه‌ی ئه‌و که‌له‌به‌ره‌ هه‌وڵمداوه‌ ده‌نگه‌ خۆماڵییه‌کانیش سه‌روسیمایان نمایش بکرێ. بۆیه‌ ده‌بینی به‌رگی ئه‌مجاره‌ به‌رهه‌می هونه‌رمه‌ندێکی جوانه‌مه‌رگه‌ به‌ده‌سکارییه‌وه‌ دوو وشه‌ی کۆمۆنیزمی کرێکاریم بۆ زیاد کردووه‌.

+ هه‌وڵمدا بۆ نزیک کردنه‌وه‌ی ئه‌و نووسه‌ر و هونه‌رمه‌ندانه‌ی که‌ ده‌نگ و ڕه‌نگیان له‌مه‌یدانی ئه‌ده‌ب و هونه‌ردا له‌کۆنه‌وه‌ هه‌یه‌، دوورونزیک دڵیان بۆ چینی کریکار و بزووتنه‌وه‌ی چه‌پ لێده‌دا، که‌میک سه‌رکه‌وتنم به‌ده‌ست هیناوه‌. له‌م ژماره‌یه‌دا شیعرێکی مارف ناسراو له‌ژماره‌یه‌کی تردا شیعرێکی قادر سه‌عید سه‌رچناری. له‌م ژماره‌یه‌شدا فوئادی مه‌جید میسریم هێناوه‌ته‌ دوان، وه‌ڵامی پرسیاره‌کانی داوه‌ته‌وه‌.

+ هه‌روه‌ک چۆن گۆڤار بووه‌ مه‌یدانی جریتبازی نووسه‌رانی کوردستانی ئێران، هه‌روه‌ها مه‌یدانی نووسه‌رانی تازه‌لاوی شاره‌کانی هه‌ولێر که‌رکوک و جارجاره‌ش ده‌ره‌وه‌ی وڵات. له‌م ژماره‌یه‌دا دوو بابه‌تی نووسه‌رانی هه‌ولیر و که‌رکوک هه‌روه‌ها کاریکاتیرێ له‌ڕانییه‌م دابه‌زاندووه‌، ل21 .

+ وه‌ک سونه‌تی کۆنی بزووتنه‌وه‌ی چه‌پ هه‌وڵمانداوه‌ به‌شێوه‌ی جۆراوجۆر به‌گوێره‌ی توانا ڕێز له‌بۆنه‌ پڕشکۆ کرێکاری و یادی ڕابه‌رانی ئه‌سڵی جینی کریکار بگرین. له‌م ژماره‌یه‌دا دۆسێیه‌کمان - مه‌له‌ف ل13 تا 19 بۆ یادی مه‌رگی لینین کردۆته‌وه‌. ئه‌مه‌ وێرای به‌شداری فیعلیمان له‌ئه‌نجامدان و به‌سه‌رکه‌وتن گه‌یاندنی مه‌راسیمی هه‌مان یاد. کردنه‌وه‌ی پێشه‌نگا و دابه‌شکردنی دیاری که‌ ئه‌ویس مه‌دالیایه‌ک بوو، نزیکه‌ی 200 دانه‌یه‌ک ده‌بوو. چوارشه‌ممه‌ 1998.11.16 ئه‌فیون/ تورکیا

نامەی 10

له‌م نامه‌یه‌وه‌ ده‌ست ده‌که‌مه‌وه‌ به‌ناردنی ژماره‌کانی تری گۆڤاری ئه‌ده‌بی کریکاری. بۆ خۆت ده‌زانی هۆی ڕاوه‌ستانه‌که‌ ده‌گه‌ڕێته‌وه‌ بۆ سه‌فه‌رکردنمان، شاره‌زانه‌بوون له‌شوینی نیشته‌جێی نوێ. خه‌مت نه‌بێ تازه‌به‌تازه‌ چاوم ده‌پشکوتێ، بێبه‌شت ناکه‌م. له‌نامه‌ی پێشوودا بۆ هه‌ندی خاڵ داوای مشاوه‌ره‌م لێت کردبوو؟

ژماره‌ 15ی شوباتی 1993 :

+ عاده‌ته‌ن به‌رگ ڕه‌نگاوڕه‌نگ نییه‌، ڕه‌ش و سپی، په‌ڕه‌ی ئاسایی بوو.

+ وینه‌ی به‌رگ بلانتۆیه‌، وابزانم له‌گۆڤاری جمعه‌ ی ئه‌حمه‌دی شاملۆ وه‌رگیراوه‌. بۆ ئه‌و هه‌نگاوه‌ به‌کارهینراوه‌ که‌ حکومه‌تی مه‌رحومی هه‌ریمی کوردستان ناویانه‌، بۆ پێکهینانی له‌شکری حکومه‌ت. مه‌به‌ستیش ئه‌وه‌یه‌ بڵێین ڕووداوه‌کان ڕه‌نگدانه‌وه‌ی هه‌یه‌. هه‌ر له‌م ژماره‌یه‌دا حزوری هونه‌ری شێوه‌کار گه‌لێ زۆره‌، ل 24،19،16،6،0 .

شایه‌نی باسه‌ هه‌ندێ که‌س و نووسه‌ر و هونه‌رمه‌ندی نزیک به‌گۆڤار، ئیتر به‌هه‌ر بیانوویه‌که‌وه‌ بوو بێ، موخاله‌فه‌تی خۆیان له‌سه‌ر دابه‌زاندنی وێنه‌که‌ ده‌ربڕی. به‌توند و تیژ و موباشر دایانده‌نا، گوایه‌ ده‌بێته‌ هۆی داخستنی گۆڤار.

+ ڕاکێشانی نووسه‌رانی ناسراو و به‌ناوبانگ درێژه‌ی هه‌یه‌. وه‌ک ده‌بینرێ حه‌مه‌سه‌عید حه‌سه‌ن و عوسمان سه‌یدا و ئازاد تۆفیق نووسه‌رانی ده‌ره‌وه‌ی بزووتنه‌وه‌که‌مان حزوریان هه‌یه‌.

+ بڵاوکردنه‌وه‌ی نموونه‌ و په‌ره‌گرافی بچووک له‌بیروڕای نووسه‌رانی جیهانی و خۆوڵاتی که‌ ڕۆژێ له‌ڕۆژان به‌هه‌موو نوقسانییه‌کیانه‌وه‌، له‌باره‌ی شکڵ و شێوه‌ی بزووتنه‌وه‌ی ئه‌ده‌بی کریکارییه‌وه‌ ده‌ریان بڕیوه‌. هه‌ر وه‌ک چۆن کتیبه‌ تیوری و نه‌زه‌راته‌ په‌رته‌وازه‌کانی ڕابه‌رانی ئه‌سڵی چینی کریکار مارکس ئنگلس لینین به‌پێویست زانراوه‌. بۆیه‌ له‌م ژماره‌یه‌دا په‌ره‌گرافی نه‌زه‌راتی فوئادی مه‌جید میسری ل12 شۆلۆخۆف ل22 دابه‌زێنراوه‌. مه‌به‌ستیش له‌هه‌مو ئه‌و لالیکردنه‌وه‌ و په‌یجووریکردنانه‌ ئه‌وه‌ بووه‌ بووترێ؛ بابه‌ خه‌ڵکینه‌ بزووتنه‌وه‌که‌ی ئێمه‌ به‌شه‌ق یان وه‌ک قرچک هه‌ڵمان نه‌تۆقاندووه‌، که‌مێک ڕیشه‌داره‌.

+ بڵاوبوونه‌وه‌ی شیعری وه‌سیه‌تی کریکار ل17 که‌ له‌ڕاستیدا به‌شیعر ناژمێررێ. دووباره‌ گۆڤاری به‌ره‌وڕووی ره‌خنه‌ی دۆست و لایه‌نگران کرده‌وه‌. به‌ڵام هه‌روه‌ک وتراوه‌ ئێمه‌ به‌پێچه‌وانه‌ی سه‌رجه‌م گرووپ و حیزب و ده‌سته‌ شیوعی و کۆمۆنیستی و کریکارییه‌کانه‌وه‌ که‌ ورده‌بۆرژوا و کوڕوکاڵی ناڕازی کۆنترۆڵیان کردووه‌. ده‌مانویست کرێکارانی به‌حه‌ق و حه‌قیقی له‌و تربیونه‌وه‌ ده‌نگ و حزووریان هه‌بێ. دووشه‌ممه‌ 1999.3.29 لاهتی/فینلاند

نامەی 11

ژماره‌ 16ی ئازاری 1993:

+ له‌م ژماره‌یه‌وه‌ گۆرانکاری پۆزه‌تیف له‌بواری ده‌رهێنانی هونه‌ری و خاوێنی لاپه‌ڕه‌کان ده‌رده‌که‌وێ، هه‌ر بۆیه‌که‌ وه‌ک ژماره‌کانی پێشوو گه‌وره‌م نه‌کردووه‌، له‌به‌ر ئه‌وه‌ی گۆڤار وه‌ختی خۆی ئۆرژیناڵه‌که‌ی له‌سه‌ر په‌ڕه‌ی ئێرانی مونتاجکرابوو، له‌چاو په‌ڕه‌ی ئه‌ی فۆڕ که‌مێک گه‌وره‌تر بوو، ناچار لێره‌ فینلاند له‌9% بچووکم کردۆته‌وه‌.

+ هونه‌ری شێوه‌کار له‌وێنه‌ی به‌رگ(ئێرانی نییه‌) لاپه‌ڕه‌ 12 و 14 و 21 له‌بڵاوکراوه‌ی چه‌پی ئێرانی وه‌رگیراون، حزوری هه‌یه‌.

+ وێنه‌ی فۆتۆگرافی لاپه‌ڕه‌ سفر گۆشه‌یه‌کی بچووکی ڕاپه‌ڕینی 1991 به‌رجه‌سته‌ ده‌کات، به‌یادی ئه‌و بۆنه‌یه‌وه‌ دابه‌زێنراوه‌. به‌ره‌وڕووی ره‌خنه‌ی چه‌ند که‌سی سه‌ر به‌چه‌پی تازه‌، موته‌ئه‌سیر به‌نه‌زه‌راتی باڵی کۆمۆنیزمی کریکاری چه‌پی ئێرانییه‌وه‌ بووینه‌وه‌! گوایه‌ وشه‌ی ڕاپه‌ڕین دروست نییه‌، ئه‌و بزووتنه‌وه‌یه‌یش گه‌ش نه‌بووه‌، ئه‌وه‌ نه‌زه‌ری کۆنه‌په‌رستانه‌یه‌، جۆرێکه‌ له‌خه‌ڵکگه‌رایی، به‌حسابی ئه‌وان ئه‌سڵ حکومه‌تی کارگه‌ری بووه‌!

+ ره‌خنه‌ له‌وه‌ده‌گیرا گۆڤار به‌ته‌نها من ده‌یبه‌م به‌ڕێوه‌. بۆ وه‌ڵام به‌وه‌ هاتم وه‌ک هه‌نگاوێکی نوێ که‌ بۆ خۆی چاوبه‌ست بوو! ناوی ئه‌و که‌سانه‌ی به‌رهه‌میان به‌به‌رده‌وامی له‌گۆڤاردا بڵاوده‌کرده‌وه‌، وه‌ک ده‌سته‌ی نووسه‌ران دانا. هه‌ندێکیان حه‌زیان به‌کاری ژێربرژێر بوو یان به‌بیانووی هه‌مه‌جۆر ناڕازی بوون! جا ئه‌و هه‌نگاوه‌ تا چه‌ند دروست بوو؟ ئه‌وه‌ له‌داهاتوودا ده‌رده‌که‌وێ.

له‌ڕاستیدا ئه‌وان به‌هۆی مه‌شغه‌ڵه‌تی تایبه‌تی نه‌ده‌په‌رژانه‌ سه‌روکاری گۆڤار، ته‌نهایش بڵاوکردنه‌وه‌ی به‌رهه‌مه‌کانیان مه‌به‌ست بوو! بۆ ده‌عمی ماددی و دارایی هیچیان له‌خۆنیشان نه‌ده‌دا، حازرخۆری به‌رسێبه‌ر بوون! ئه‌مه‌ وێرای ئه‌وه‌ی ئه‌و که‌سانه‌ تازه‌لاو و که‌مئه‌زموون و ناهونه‌رمه‌ندبوونیان پێوه‌ دیار بوو. هه‌مووش له‌کتێبه‌وه‌ دیفاعیان له‌کرێکار ده‌کرد، به‌ماهییه‌ت ورده‌بۆرژوا بوون. بابه‌تی ئه‌وه‌ نه‌بوون به‌رهه‌می خه‌ڵکیان بخرێته‌به‌رده‌ست بۆ هه‌ڵسه‌نگاندن له‌بواری هونه‌رییه‌وه‌ و....

+ لاپه‌ڕه‌ 1 و 25 بۆ به‌سه‌رکردنه‌وه‌ی تێکۆشه‌رانی بزووتنه‌وه‌ی چه‌پ که‌ نه‌ک له‌لایه‌ن بڵاوکراوه‌ زۆروزه‌به‌نده‌کانی بۆرژوازی به‌ڵکوو له‌لای باڵی چه‌پیش فه‌رامۆشکرابوون. ئه‌مه‌یش لاسایی کردنه‌وه‌ی کوێرانه‌ی گۆڤاری پێشه‌نگ بوو. له‌ڕاستیدا له‌به‌رنه‌بوون و که‌می بابه‌ته‌وه‌ سه‌رچاوه‌ی گرتبوو. گرنگ ده‌رچوونی گۆڤار و پڕکردنه‌وه‌ی لاپه‌ڕه‌کانی بوو، له‌سه‌ر حسابی ئه‌ده‌ب و هونه‌ر! هاوکاتیش خۆشه‌ویستکردنی گۆڤار و په‌یداکردنی جه‌ماوه‌ر بوو.

+ لاپه‌ڕه‌ 5 ئه‌و بابه‌ته‌ ره‌خنه‌ییه‌ی خۆت وابزانم ناونیشانه‌که‌ی من بۆم دانابوو.

+ لاپه‌ڕه‌ 19 بڵاوکردنه‌وه‌ی شیعریکی مارکسی گه‌نج له‌بازنه‌ی ئه‌و هانگاوه‌ نوێیانه‌دا بوو که‌ گۆڤار ده‌یویست و هه‌وڵی ده‌دا داستپێشکه‌ری تیا بنوێنی. هه‌رچه‌نده‌ نه‌ده‌کرا له‌خانه‌ی ئه‌ده‌بی کرێکاری دابنرێ. وه‌رگێڕه‌که‌ی له‌نێو وه‌سه‌تی ئه‌ده‌بیدا به‌شانازییه‌وه‌ وتبووی؛ یه‌که‌م که‌سم شیعری مارکس بۆ کوردی وه‌رده‌گێڕم. به‌بێ ئه‌وه‌ی ئیشاره‌ به‌وه‌ بدات ئه‌وه‌ ئازایه‌تی خۆی نه‌بووه‌، ئیختیار و هه‌ڵبژاردنه‌که‌ له‌لایه‌ن ئێمه‌وه‌ بووه‌، ئه‌و ته‌نها میکانیکێتی وه‌رگێڕانه‌که‌ی پێبڕاوه‌!

ژماره‌ 17ی نیسانی 1993 :

+حزوری هونه‌ری شێوه‌کار درێژه‌ی هه‌یه‌، وێنه‌ی به‌رگ و لاپه‌ڕه‌ 12 و 16 و 20 به‌رهه‌می هونه‌رمه‌ندانی خۆماڵی بون. ئه‌مه‌ وێڕای لاپه‌ڕه‌ 7 و 9 له‌چه‌پی ئێرانییه‌وه‌ خوازرا بوو. گۆڤار به‌وێنه‌ی حیزب و گرووپی سیاسی ته‌سه‌رفی ده‌کرد بۆیه‌ ئارمی بۆ خۆی دروستکرد، هه‌روه‌ک له‌به‌رگه‌که‌یدا ده‌بینرێت.

+ ئه‌م ژماره‌یه‌ عادییه‌ و له‌هامانکاتیشدا تایبه‌تی بوو. له‌بواری ده‌رهێنانی هونه‌رییه‌وه‌ گۆڕانکاری به‌رچاوی به‌خۆوه‌ بینیوه‌. وه‌ک دانانی مانشێتی بابه‌ت، پڕکردنه‌وه‌ی بۆساییه‌کان. ئه‌م ژماره‌یه‌ قسه‌ ناهێنێ، دوو رۆژ به‌ر له‌یه‌کی ئایار خرایه‌ بازاره‌وه‌.

ژماره‌ 18ی ئایاری 1993 :

+ به‌سه‌ربه‌خۆ هونه‌ری شێوه‌کار به‌ته‌نها له‌وێنه‌ی به‌رگ و لاپه‌ڕه‌ 24دا وجودی هه‌یه‌. به‌ڵام به‌شێوه‌ی هێڵکاری بۆ پڕکردنه‌وه‌ و جه‌مالییه‌ت پێدانی په‌ڕه‌ و شیعره‌کان زیاد له‌پێویست خۆی نواندووه‌. به‌گشتی ئه‌م ژماره‌یه‌ش پاک ڕاکێسراوه‌، له‌بواری ده‌رهێنانی هونه‌رییه‌وه‌ که‌مێک خۆماندوو کردنی پێوه‌ دیاره‌.

+ هۆی گۆرانکاریش له‌ده‌سته‌ی نووسه‌راندا به‌پێی ئه‌و قیاسه‌ بووه‌ که‌ تا چه‌ند ئه‌فراده‌کان هه‌ڵده‌سووڕێن به‌ته‌نگ گۆڤاره‌وه‌ بوون، بۆیه‌ ژماره‌یه‌کیان وه‌ک هاوکار ناویان هاتووه‌.

+ لاپه‌ڕه‌ 12 به‌رهه‌می که‌سیکی کرێکاره‌.

+ لاپه‌ڕه‌ 13 به‌رهه‌می نووسه‌ری ناسراو فوئاد مه‌جید میسرییه‌، له‌به‌ر هه‌ندێ ئیعتبار نه‌یده‌ویست به‌ئاشکرا له‌گۆڤارێکدا ناوی بێت که‌ نزیکه‌ به‌بزووتنه‌وه‌ی چه‌پی تازه‌وه‌.

+ لاپه‌ره‌ 19 هه‌نگاوێکی نوێتر بوو، دیاره‌ بیرمان له‌وه‌کردبووه‌ به‌شێکی گۆڤار به‌زمانی عه‌ره‌بی بێت. به‌ڵام له‌به‌ر ئه‌وه‌ی گۆڤار ئامانجی سه‌ره‌کی به‌هێزکردن و له‌سه‌ر پیدانانی بزووتنه‌وه‌ی ئه‌ده‌بی کریکاری به‌زمانی کوردی و له‌بۆته‌قه‌یه‌کی جوگرافی دیاریکراو هه‌ڵده‌سووڕ و بزووتنه‌وه‌که‌ نۆژه‌ن بوو، تا ڕاده‌یه‌ک له‌نرخی نه‌بوواندا بوو. بۆیه‌ پشت گوێ خرا.

+ لاپه‌ڕه‌ 22 و 23 و 24 هه‌نگاوێکی نوێ بۆ هه‌ڵخراندنی جه‌ماوه‌ر و وه‌سه‌تی ئه‌ده‌بی و هونه‌ری شاری سله‌یمانی بوو، له‌دژی کاریکی تیرۆریستی ده‌رهه‌ق به‌ڕۆشنبیری ئه‌نجام درابوو. بووه‌ مه‌تره‌ح بوونی هه‌رچی زیاتری گۆڤار له‌ئاستی به‌رفراواندا. ئه‌و هه‌نگاوه‌ هینده‌ دروست بوو، له‌بڵاوکراوه‌ی حیزبه‌کاندا ڕه‌نگی دایه‌وه‌. نه‌ک ئیشاره‌تی پیدرا، به‌ڵکوو هه‌ته‌نامه‌ی ڕێگای کوردستان - شیوعییه‌کان ده‌قه‌که‌یان بڵاوکرده‌وه‌.

شایه‌نی وه‌بیرهێنانه‌وه‌یه‌ هه‌ر ژماره‌یه‌کی نوێ ده‌ربچوایه‌ له‌ 1 تا 3 دانه‌مان بۆ حیزب وگروپه‌ گه‌وره‌ و بچووکه‌کان و بڵاوکراوه‌کانیان ده‌نارد و ئه‌وانیش به‌ده‌وری خۆیان له‌کۆشه‌یه‌کی بچووکی بڵاوکراوه‌کانیاندا به‌وێنه‌ی به‌رگی ژماره‌وه‌ ئاماژه‌یان به‌ده‌رچوون و که‌وتنه‌ بازاڕی گۆڤار ده‌کرد.

به‌ڵام، له‌گه‌ڵ ئه‌وه‌ی زۆر زیاتر له‌وه‌ی ده‌ماننارد بۆ حیزبه‌ بۆرژوازییه‌کان، بۆ رێکخراوه‌ چه‌پییه‌کانی له‌مه‌ڕخۆمان ده‌نارد، بێجگه‌ له‌گرووپی سه‌رنجی کرێکار ئه‌وانی تر ده‌رچوون و که‌وتنه‌بازاڕی گۆڤاریان فه‌رامۆش ده‌کرد، ته‌نانه‌ت به‌دێڕێکیش ئاماژه‌یان پێنه‌ده‌دا! بۆیه‌ هه‌میشه‌ داشمان به‌سه‌ریاندا سوار بوو.

+ لاپه‌ڕي 25 و 26 و 27 و 28 و 29 ده‌ستپێکردن و سه‌ره‌تای عه‌له‌نی کردنه‌وه‌ی شه‌ر و کێشه‌ی نێوان گۆڤار که‌ خۆی به‌قوتبێ ده‌زانی به‌رخوردی ناسیاسی و ناشیانه‌ی گرووپه‌ چه‌پ و ئه‌فراده‌کانیان بوو، له‌وه‌ زیاتر قابیلی شاردنه‌وه‌ نه‌بوو. دیاره‌ له‌وه‌به‌ریش له‌ژماره‌کانی پێشوودا سه‌ره‌مقه‌سی بچووک له‌شێوه‌ی گله‌ییدا به‌ره‌وڕووی ئه‌و گرووپانه‌ کردبووه‌. دووشه‌ممه‌ 1999.4.12

ليست هناك تعليقات:

إرسال تعليق