چیرۆکی گەورە بۆ گەورەساڵان


زۆجیکە مەدالیایە
٢٠١٥.٣.١٩
خوێندکارێکی کولیژی کشتوکاڵ لەبەردەرگای خەستەخانەی گەورەی شاردا ویستی سەردانی هاوڕێیەکی بکات کە نەشتەرگەری بۆ کرابوو، وەک خوێندکاری کولێژی پزیشکی پێناسەکەی پیشان دا، وای مەزەندە کرد کە دەرگاوانەکە زۆج و نەزانە، سەری سوورما کاتێک وتی: فەرموو بڕۆرە ژوورەوە، بەڵام کە هاتیتە دەرەوە سەیرێکی ئەو درەختەمان بۆ بکە بزانە بۆ وشک بووە...

ڕابە دۆشکە!
٢٠١٥.٣.١٤

مناڵی هەردوو لا لە یەک خوێندنگای سەرەتایی بوون، لە کۆبوونەوەیەکی دایکوباوکاندا، مامۆستاکە وتی مناڵەکانتان دەبێت پاکوتەمز بن، ژنێک وتی: وایە لایەنی کەم هەفتەی جارێک بیانشۆین.. ڕابە دۆشکە کە دروسێی ژنە قسەکەرە بوو، خۆی پێنەگیرا هەڵیدایە وتی: بۆ تۆین هەموو هەفتەیەک حەمام دابخەین... کە کۆبوونەوەکەیش تەواو بوو، لەبەردەگا ڕابە دۆشە بەتەنیشتیدا تێپەڕی توانجێکی تری گرتە دراوسێکەیان: ئەوە بۆ شووت کردووە بەو پیاوە پیرە؟

کۆپییە فینلاندییەکەم ٢٠١٥.٢.١٣ کەسێک لەسەدا سەد لە تۆ دەچێت، تەنها ئەو سمێڵی نییە، ئەگینا ڕۆیشتن باڵا دەستخستنە گیرفانی پاڵتۆکەتەوە، سیما چاو و بڕۆ و لووت، سێوێکن کراوون بە دوو کەرتەوە، تۆ ئەستێرەی سیوەیلیت و نابیرێت، هەموو جارێک کە دەیبینم دەستی سڵاوی بۆ بەرز دەکەمەوە بە فینلاندی پێی دەڵێم تێرڤێ(چۆنی) کاک ئازاد.
خەوی سریالی ٢٠١٥.٢.١٣ کەسێک خەوی پێمەوە دیبوو، خەریکی زەوی کرین بووم لەسەربان..
دەیزانم
٢٠١٥.٢.١١
له هةينييةوه دةستى پیکردووه، ئةم بةيانييه چوومه خةستةخانةى گةرةك هيچیان بؤ نةكردم بةتووريةيى هاتمةدةر.. خؤت داپؤشه و پال بكةوه و ئيسراحةت بكه و ئاو زؤر بخؤرةوه.. حةبى ئازار بخؤ.. ١ تا ٢ هةفته دةخةيةنيت.. وةيانزانى ئةوانه نازانم... 
پێشمەرگەی قاوەخۆر! ٢٠١٤.٨.٥ لە قاوەخانەیەک بەيەكگةيشتن، لە ئامێرەكەوه خوڕەى هاتنەخوارەوە قاوه بۆ ناو کوپە سپییەکان هات، ئەويان لێدا یەکدوو هەنگاو دوورکەوتەوە، ئەوی تریان سەيرى لێهات هاوڕێکەی نەشەكر نەكرێم و نەشير و نەهەنگوين و نه .... بەکارنەهێنا و نەكرده کوپە قاوە تۆخ و خەست و خۆڵ و تاڵ و سادەكەیەوه، ويستى زمانی پرسيار هەڵبهێنێتەوە، ئەو لێی هاتە وەڵام، تێگەيشت بۆیە وتى: لەقاوە خواردنەوەدا لە پێشمەرگه دەچم. لەوان زۆر ڕاديكالترم..
چێرۆکێکی زۆر کورت ٢٠١٤.٧.٢٦ كاتێک سەرەم هات و چوومە لاى تكتبرەكە كە خانمێكى بەتەمەنی پانوپۆڕ بوو، لەو چرکەساتانەدا دیار بوو لە سەروسيمامی ڕوانیوە و ورد بۆتەوە بۆیە پرسی: تەمەنت لەسەرو پەنجاوەیە؟ لەدڵی خۆمدا وتم وا تەواو دەبێت، وەڵامم دایەوە بەڵێ. وتى: دەكەواته شموولى داشكان دەكەيت. یەکدوو جووڵەی بە پەنجەکانی سەر کیبۆردەکە کرد، وتی ١٣€ و ٦٠ سێنت دەکات. تومەس ئەمە حسابى خانەنشينى بؤ كردم.
چیرۆکێکی کورت کورت ٢٠١٤.٧.٢ ئەوە لە حەفتاکانی سەدەی ڕابردوودا چاوی بە دنیا هەڵهێنا بوو، پیاوێکی بەخۆی و گۆشتن، لەقەبی قەڵەویان بەسەردا دابڕی بوو، لەسەر ئامێری فەرشی ڕاکردن(تردمیل)ەکە وردە لۆقەی دەکرد، ئارەقی شینومۆری دەردا بوو، لە ٢ی شەویشەوە دوای پارشێو نانی نەخوارد بوو. دەبێت ١١ی شەو ڕۆژو بیشکێنێت. لەوەش نەدەچوو بە خەیاڵیدا بێت.. سەیر بوو هەر لە داعشە کۆماندۆ ڕادیکاڵەکان دەچوو کە لە یەکدوو وڵاتی ڕۆژهەڵاتی ناوەڕاست مرۆڤ کوشتن و ئاوخواردنەوەیان لا یەکە، لێرە چی دەکات؟

بەهیوای ڕۆژێکی وا نیم، بەڵام بەتەمای وەفایەکی وام
٢٠١٤.٥.١٧

پیاوێکی تەمەن ٨٠ ساڵ هەموو بەیانییەک دەچووە خانەی پیران بۆ نانخواردنی بەیانی لەگەڵ ژنەکەی کە ماوەی ٥ ساڵ دەبوو بەهۆی نەخۆشییەوە تووشی بیریکۆڵ ببوو، کەسی نەدەناسیەوە. لێیان پرسی ژنەکەت هەراسان نابێت گەر بەیانییەک دوابکەویت؟
- : نا، ئەو من ناناسێتەوە.
بەسەرسووڕمانەوە، لێیان پرسییەوە: ئەی بۆ وا دەکەیت؟! لە کاتێکدا ئەو نازانێت تۆ کێی؟
زەردەخەنەیەکی بۆ کرد: ڕاستە بەڵام من ئەو دەناسم.
------
بەدەستکارییەوە لە زمانی عەرەبی وەرمگێڕاوە، ناونیشانەکە هی خۆمە.

کۆتایی نابەجێ!
چیرۆکی زۆر کورت
٢٠١٤.١.٢٩

تایەی ئۆتۆمبێلی بەرپرسێک، کاتێ بە تیژی بەسەر شەقامی خۆڵ و قیر و زیخ دەڕۆیشت پۆزی لێدەدا، تەنانەت گلۆپی ترافیکەکانیش لێی دەترسان، بەڵام پاش ماوەیەک، دوای گۆڕینی بە دانەیەکی نوێ لە کەلاوەیەک خۆی بینییەوە. لەداخ و قەهر تۆڵەی بەوە کردەوە کە خۆی بەخشییە دەستی ژمارەیەک خۆپیشاندەری برسی تا بیسووتێنن.
---------
گۆڕینی بە دەستکارییەوە، بەرهەمی نووسەری عەرەبی عێراقی: ئینمار ڕەحمەڵا (لەدایکبووی شاری سەماوە ١٩٧٨)

سێ کورتە چیرۆک
٢٠٠٩
یەکەم : بۆ ماڵەکەی گەڕا، نەیدۆزییەوە ، چوونکە شار جلەکانی گۆڕیبوو، لەبەر ئەوەی باران تەڕی کردبوو.
دووهەم : ناوی لەپاین جێگەی نووستنەکەیدا دانا... بەبێ پێناس زۆر دەنووست .
سێیەم : بەبرسێتی دەخەوت، بەڵام لەخەونیدا زۆری دەخوارد.
-------
ئەمە ٣ چیرۆکی زۆر کورتی کەسێکی عەرەبە (سعيف علي) لەیەکێک لەبلۆگەکاندا بەرچاوم کەوت و وەرمگێڕان.

1) بێکڵاو !
کورته‌چیرۆکێکی ڕاست

زۆربه‌ی به‌یانیان مناڵه‌کان نانوچا ڕووته‌که‌ ده‌خۆن، به‌ره‌ و قوتابخانه‌ ده‌بنه‌وه‌، وه‌ک عاده‌ته‌ ده‌بێ سه‌رو دیناریان پێبدری بۆ ئه‌وه‌ی وه‌ک مناڵی تر له‌وێ خه‌رجی بکه‌ن. ئه‌وه‌ هه‌فته‌یه‌که‌ ئه‌و بره‌ پاره‌یه‌ نییه‌. زۆر جار ئێواره‌ که‌ ده‌گه‌ڕێمه‌وه‌ یه‌که‌م پرسیار هه‌واڵی بوون ونه‌بوونی دیناره‌که‌ ده‌پرسن. زۆربه‌ی کات له‌ سێ تا پێنج دینار زیاترم پێنییه‌. دایکی مناڵان بۆ چوونه‌ دائیره‌ به‌لایه‌نی که‌مه‌وه‌ بۆ هاتووچۆ (پاس) دوو دیناری ده‌وێت، ئه‌وه‌ ده‌بێت هه‌بێت. که‌واته‌ بۆ چونه‌ بازاڕ له‌بناری گۆیژه‌وه‌ که‌ ماوه‌که‌ی ده‌ تا بیستوپێنج ده‌قه‌یه‌ ده‌بی به‌پێ بیکوتم، ئه‌وه‌ی باشه‌ به‌ره‌وخوار خۆم خل ده‌که‌مه‌وه‌ گه‌ر به‌ره‌و ژوور بوایه‌ به‌ هیلاک ده‌چووم. ئه‌گه‌ر په‌له‌م بێت و یه‌ک دوو دینار شکبه‌رم، ده‌بێ به‌پاس بڕۆم بۆ ئه‌وه‌ی نه‌کا که‌سێکی ناسیاوی گه‌ره‌ک بێت به‌سه‌رما دوو وێسته‌ ده‌ڕمه‌ خواره‌وه‌، که‌ سه‌ریش ده‌که‌وم، له‌هه‌ر ڕاوه‌ستانی ویستگه‌یه‌کدا خۆم مه‌شغول به‌ کتێب، ڕۆژنامه‌، سه‌یرکردنی ده‌ره‌وه‌، سه‌رداخستن ده‌که‌م. ئه‌م فێڵه‌ زۆر جار له‌گه‌ڕانه‌وه‌یشدا دووباره‌ ده‌که‌مه‌وه‌. خۆ گه‌ر پاره‌ شک به‌رم سه‌ربه‌رزانه‌ گوێی پیناده‌م، جاری وا هه‌بووه‌ وێری شه‌ش که‌سم کردووه‌.

له‌ پاسی له‌عنه‌تیدا تووشی هه‌ڵوێستی موحریجی وا بووم، مردنم به‌ ئاوات خواردووه‌، ده‌ڵێی چی ماسیم و ته‌ڕنابم. ئه‌م پرۆسه‌یه‌ ڕۆژ و دوو ڕۆژ نییه‌، بۆ چه‌ند ساڵه‌ دووباره‌ و هه‌زارباره‌ ده‌بێته‌وه‌، که‌ ده‌رمه‌ ده‌ره‌وه‌ پیم ده‌ڵێن نیوه‌ڕۆ فڵان و فیسار شت بۆ خواردن بهێنه‌وه‌، گه‌ر نه‌بوو نان بهینه‌. ئه‌وه‌ قسه‌ی ڕووته‌، نه‌ک ناتوانم به‌ڵکو ناگه‌ڕێمه‌وه‌ چوونکه‌ له‌ ڕۆژنامه‌فرۆشی هیچم نه‌فرۆشتووه‌ و په‌یدا نه‌کردووه‌، ته‌نانه‌ت له‌ناچاریدا ده‌چمه‌ چایخانه‌ی نووسه‌ر و هونه‌رمه‌ندان(شه‌عب) نانوچایه‌ک ده‌خۆم. چایچییه‌کان هێنده‌ ئه‌و پرۆسه‌یه‌یان لێبینیووم ، گه‌ڵێ جار پاره‌م لێناسه‌نن، به‌سوعبه‌تیکی ڕاسته‌وه‌ ده‌ڵێن:

داماو دوای کڵاوی بابردوو که‌وتووی، بۆ کێی ده‌که‌ی، کێ پێیده‌زانێ؟
- برا ئه‌سڵه‌ن کڵاوم نییه‌، گه‌ر خۆ به‌هه‌ڵه‌دا نه‌به‌ن ئه‌وه‌ باشده‌زانن.

مه‌به‌ستی ئه‌وان له‌کڵاوه‌که‌ مارکسی و کریکاری بوونکه‌مه‌، هه‌ست ده‌که‌م له‌و سوعبه‌ته‌دا ڕێز له‌ خۆراگری و قه‌ناعه‌ت بوونم ده‌گرن، زۆر جار به‌قه‌رز چایان لاده‌خۆم، دواده‌که‌وێت داوای ناکه‌ن و گوێی پیناده‌ن، هه‌ر پاره‌م بێته‌ده‌ست به‌زیاده‌وه‌ قه‌رزه‌کان ده‌ده‌مه‌وه‌. نیوه‌ڕۆ مناڵه‌کان چاوه‌ڕوان ده‌که‌ن باوکیان نانیان بۆ بهێنیته‌وه‌، ناچار به‌برسێتی به‌ره‌و قوتابخانه‌ ده‌چن.

سه‌رمسووڕ ده‌مێنێ، چۆن ئیداره ده‌که‌ن؟ ئه‌بێ چیم پێبڵێن؟ له‌وبڕوایه‌دام بیانوێرایه‌ تفبارانیان ده‌کردم، یان گه‌وره‌ بوونایه‌ و له‌خۆیان ڕاببینایه‌ ده‌ڕۆیشتن. فیعله‌ن ئه‌مانه‌ دایک و باوک نیین، ئه‌و مه‌سئولیاته‌ به‌باشی ناگرنه‌ ئه‌ستۆ، ئیتر بۆ ببن به‌تایبه‌تی من. زۆر جار یاخی ده‌بن، جا نه‌هه‌قیانه‌؟ نه‌خێر، بێفه‌ری وه‌ک من نه‌بۆته‌وه‌.

که‌ ده‌ڵێن سیسته‌می سه‌رمایه‌داری خێزان لێکهه‌ڵده‌وه‌شێنێ، ئائه‌مه‌یه‌. ئه‌گه‌ر حیز و دز و فاسید ده‌رنه‌چن زۆرباشه‌. جا چووزانم خۆ به‌کلکیانه‌وه‌ نیم. هینده‌ هه‌یه‌ له‌ده‌رسوده‌وریاندا تا ئێستا باشیان هێناوهو زیره‌کن، ئه‌نجامی تاقیکردنه‌وه‌کانیان 80 و 90 و 100 پله‌ن. هه‌موو ساڵێک به‌یه‌که‌م و دووهه‌م ده‌رده‌چن. گریمان ئه‌و بۆچوونه‌ هه‌ڵه‌یه‌، به‌ڵام له‌م فه‌وزای کۆمه‌ڵگایه‌دا به‌جۆرێکی تر فاسید ده‌بن.

کێ ده‌ڵێ یه‌کی له‌م حیزبه‌ خوێڕیانه‌ له‌خشته‌یان نه‌به‌ن؟ ئه‌وه‌ی جێی مه‌ترسییه‌ ئیسلامییه‌کانه‌، به‌هه‌زار جۆر و ڕێگا مناڵان له‌خشته‌ ده‌بن! جا یه‌کێکیان ئیسلامی ده‌رچێ، ده‌بێ مه‌وقیفم چی بێ؟ غه‌یری شه‌رمه‌زاری هیچی تر نییه‌.

بۆ ده‌ربازبوون له‌م ته‌ڵه‌یه‌، به‌خاتری ئه‌وان بیرم له‌چوونه‌ ده‌ره‌وه‌ کردۆته‌وه‌. هه‌رچه‌ندم هیناوبرد هه‌موو ماڵه‌که‌یش بفرۆشم، پاره‌ی په‌ساپۆرتیکی تیا نابێت، ئه‌وه‌یش بۆ خۆی موغامه‌ره‌یه‌که‌. قوره‌که‌ بۆ که‌سێکی وه‌ک من خه‌تره‌ چوونکه‌ نه‌برا و خوشکی دڵسۆز و ده‌وڵه‌مه‌ندم هه‌یه‌، تا یارمه‌تیم بده‌ن، ڕزگارم بێت، پێناچێ هه‌رگیز ڕزگارم ببێت، ئێره‌ گۆڕمه‌. هه‌موو جارێ به‌توانجه‌وه‌ پێم ده‌ڵێت:

سه‌گ له‌قه‌سابخانه‌ نه‌مرێ عومری به‌زائیع ده‌چێ.
واده‌زانێ چوونه‌ده‌ره‌وه‌ هه‌روا ئاسانه‌، سه‌ره‌کۆنه‌م ده‌کات:
هه‌رچی هاوڕێت هه‌یه‌ به‌سیاسه‌ت ده‌وڵه‌مه‌ند بوون....هه‌موو عاله‌م چوونه‌ ده‌ره‌وه‌ هه‌ر تۆ نه‌بێ و....
-------------------
ئه‌م به‌سه‌رهاته‌ نازانم که‌ی نووسراوه‌، هێنده‌ هه‌یه‌ هی ساڵانی یه‌که‌می دوای ڕاپه‌ڕینه‌. ٥ی١ی٢٠٠٥

٢) پرسیار
کردبووی به‌پیشه‌، ده‌بوایه‌ ڕۆژانه‌ نیوه‌ڕوان له‌سات و کاتی دیاریکراودا، خۆی فێنک بکردایه‌ته‌وه‌، بۆ سه‌عاتێک له‌نێو ئاودا مه‌له‌ بکات. به‌کاوه‌خۆ یه‌که‌یه‌که‌ جله‌کانی له‌به‌رخۆی داکه‌ند، ئه‌وه‌ی مایه‌وه‌ مایۆیه‌کی ڕه‌نگ شین بوو. ڕووه‌ و حه‌وزه‌ پڕ له‌ئاوه‌که‌ بووه‌. که‌ له‌ڕاڕه‌وه‌که‌دا به‌هه‌واڵه‌ میوانه‌که‌ی گه‌یشت. میوان ڕووتییه‌که‌ی خانه‌خوێکه‌ی به‌لاوه‌ ئاسایی بوو، ئه‌وه‌ی شاز و نائاسایی هاته‌ به‌رچاو، تووشی سه‌رسووڕمان و واقووڕمانی کرد. سه‌ر پێستی لاشه‌ی نه‌خشێنراوی جه‌نابی خانه‌خوێ بوو. له‌دڵی خۆیدا وتی: ئه‌مه‌ بۆ وا خۆی به‌په‌نگ کردووه‌؟ هێیبز به‌بی حالت بێ!؟
قۆلی چه‌پ و ڕاست، له‌پش و پێش. لاق و ڕانی چه‌پ و ڕاست، له‌پاش و پێش. سه‌ر ورگ و سنگ له‌گه‌ڵ پشت و سه‌رشان. ئه‌گه‌ر مایۆکه‌ی له‌به‌ر نه‌بووایه‌، بێگومان سه‌ری زه‌که‌ر، هه‌ردوو گووپی سمتیشی (MADE IN USA) لێ نووسراوه‌، ده‌بینرێ و ده‌خوێنریته‌وه‌!

خانه‌خوێ زانی میوانه‌که‌ی به‌جۆریکی نائاسایی سه‌یری ده‌کات، وتی: ئه‌بله‌ق بوونی ناوێ، شوێنیکم نییه‌ ئه‌مه‌ریکایی نه‌بێ. ئایاری ١٩٩٤

٣) هه‌رزانفرۆش!
عه‌زیز نه‌سین – توركیا
به‌یانییه‌ك خاوه‌نكار له‌ ئۆفیسی كارگه‌ دانیشتبوو، قاوه‌ی فڕ ده‌كرد، بێته‌قولباب كه‌سێكی سه‌روسیما غه‌مبار خۆ به‌ ژووردا ده‌كات:
- هاتووم كارێكم پێبسپێریت.
+ چ كارێك ده‌زانی؟
- ( به‌راد )ی ده‌زانم.
+ پێویستمان به‌ ( خه‌رات )ێك هه‌یه‌.
- پێنج ساڵ خه‌راتیم كردووه‌، بڕوانامه‌شم هه‌یه‌.
+ به‌ڵام ئه‌وه‌ی ئێستا زۆر پێویستمانه‌ قاڵبدروستكه‌ره‌.
- جا ئه‌وه‌ چییه‌ ، به‌شه‌رت قاڵبت بۆ دروست ده‌كه‌م.
+ له‌گه‌ڵ دارتاشیدا چۆنی؟
- ترست نه‌بێت، چوار ساڵ دارتاشیم كردووه‌.
+ ( وابێت داوای كرێی زۆر ده‌كات..) ...له‌ ڕاســتــــــــیـــــدا
پێویستمان به‌ كرێكار نییه‌.
- ...هه‌رچییه‌ك بفه‌رمووی ئاماده‌م.
+ باشه‌ قایلم، به‌ڵام ده‌بێ ئه‌وه‌ بزانی پاره‌ی زیاده‌ نییه‌، چوونكه‌ بۆ خۆت زیادی و نامه‌وێ بێكار بیت.
- سوپاس، زۆرم ناوێت، هه‌رچی ده‌ده‌ی به‌زیاد بێت.
+ ڕۆژانه‌ وه‌ستایه‌ك پێنج دیناری هه‌یه‌، به‌ڵام دوو دینار به‌ تۆ ده‌ده‌ین.
- ڕازیم.
+ شتێكی تر، گله‌یی نه‌كه‌یت و بڵێی سه‌عاتی كار زۆره‌.
- خوای ده‌كرد بیستوچوار سه‌عات ده‌بوو.
+ ئه‌وه‌یش بزانه‌، شوێنی كاره‌كه‌ ته‌نگوتاریكه‌.
- هه‌رچۆنێك بێت قایلم.
+ دوای مانگێك كاركردن پاره‌ وه‌رده‌گری، كه‌ زانیمان شاره‌زابووی، ئه‌وسا ڕۆژانه‌كه‌ت پێده‌ده‌ین.
- چۆن ده‌ڵێی با وا بێت.
+ له‌سه‌دا بیستیش له‌ كرێكه‌ت بۆ ئامێره‌كان ده‌شكێنرێت.
- جا قه‌یدی چییه‌!
+ دواشت ده‌بێ، كه‌فاله‌تێكی چه‌ند هه‌زار دیناریشمان بده‌یتێ وه‌ك ته‌ئمینات.
- به‌سه‌رچاو، خانوویه‌كم بۆ به‌جێماوه‌ ده‌یخه‌مه‌ ره‌هنه‌وه‌.
+ كه‌واته‌ بڕۆره‌ سه‌ركار...
به‌ چه‌ند چركه‌ دوای ڕۆیشتنی كابرای كرێكار، دوو پۆلیسی لۆزه‌نه‌ر خۆ ده‌كه‌ن به‌ ژووردا.
- كه‌سێك خۆی كردووه‌ بێره‌دا، له‌ شێتخانه‌ هه‌ڵهاتووه‌، كوا كوێوه‌ چوو..؟
--------------
وەرگێڕانی له‌زمانی عه‌رەبی به‌دەسكارییه‌وە

٤) هه‌موو دنیا خه‌ریكه..!
سه‌لاح زەنگه‌نه-عێراقی عەرەبی
دایكم به‌گونك بڕین و خۆشكردنی ته‌نووره‌وه‌ خه‌ریكه‌. هۆوه‌، باوكم به‌هه‌ڵكێشانی تاڵه‌ مووه‌ سپییه‌كانی ڕیشه‌ پره‌كه‌یه‌وه‌ و به‌ (بـــا)دانی خه‌مه‌كانییه‌وه‌ خه‌ریكه‌. به‌ڵام، داده‌م به‌میكیاج كردن و ڕێككردنی قژییه‌وه‌ خه‌ریكه‌. برا بچوكه‌كه‌شم به‌یاریكردن به‌ (له‌عاب)ه‌كانییه‌وه‌.
ته‌نیا خۆم نه‌بێت، كه‌ به‌ته‌له‌فوونه‌وه‌ خه‌ریكم، كه‌چی بۆم وه‌رناگیرێت!!
جاده‌ به‌ئوتومبێله‌وه‌.، ئوتومبێل به‌خه‌ڵكه‌وه‌ خه‌ریكه‌. خه‌ڵك خه‌ریكن به‌.. ..! سه‌رتاش به‌سه‌رتاشینه‌وه‌، بۆیاخچی به‌پێڵاو بۆیاخكردنه‌وه‌، به‌قاڵ به‌سه‌وزه‌ و میوه‌وه‌، قه‌ساب به‌گۆشته‌وه‌، هه‌لاج به‌لۆكه‌وه‌.
ته‌نیا خۆم نه‌بێت، كه‌ به‌ته‌له‌فوونه‌وه‌ خه‌ریكم، كه‌چی بۆم وه‌رناگیرێت!!
زه‌وی به‌سووڕانه‌وه‌ به‌ده‌وری ڕۆژدا خه‌ریكه‌، ڕۆژ به‌گه‌رمی به‌خشین به‌ئه‌ستێرانی ئاسمانه‌وه‌ خه‌ریكه‌، مانگ به‌دڵدارانه‌وه‌ خه‌ریكه‌، ده‌ریا به‌شێتێتی خۆیه‌وه‌، دره‌خت به‌چۆله‌كانه‌وه‌، چۆله‌كه‌ به‌دڵدارییه‌وه‌ خه‌ریكه‌.
ته‌نیا خۆم نه‌بێت، كه‌ به‌ته‌له‌فوونه‌وه‌ خه‌ریكم، كه‌چی.. ..!
زرنگ .. زرنگ .. .. جڕڕڕڕڕ.. .. جڕڕڕڕڕڕڕ .. .. جــ …ڕڕ .. ڕڕڕڕ..
- هه‌له‌وو!
- هه‌له‌وو! ئێوه‌ به‌چییه‌وه‌ خه‌ریكن!
- ئێستا وه‌ك به‌شێك له‌ چینی كرێكاری جیهانی له‌ كوردستان، تازه‌به‌تازه‌ سه‌رگه‌رمی خۆڕێكخستن وپێكهێنانی (پارتی)ن.
- جا به‌نیازی چیین؟
- به‌دیهێنانی ئازادی، یه‌كسانی، حكومه‌تی كرێكاری.
- كه‌واته‌، ژماره‌كه‌تانم بده‌رێ، تا زوو زوو ته‌له‌فوونتان بۆ بكه‌م.
---------------
وەرگێران له‌زمانی عه‌رەبی به‌دەسكارییه‌وە و بۆ زیادكردنی

٥) فیرار...!؟
كه‌ ڕۆژانه‌ له‌خه‌و ڕاده‌بم، وه‌ك هه‌ر كه‌سێكی تر نه‌خۆ ده‌كێشمه‌وه‌، نه‌بای باڵ ده‌ده‌م، نه‌چاو هه‌ڵده‌گڵۆفم، نه‌خاولی ده‌ده‌م به‌سه‌ر شان ومل ، ده‌چم بۆ ده‌موچاو شۆردنی به‌ر به‌لوعه‌، نه‌ده‌چم بۆ ده‌ست به‌ئاو گه‌یاندن له‌ WC ، نه‌ ….، ئه‌مانه‌ و هی تر كه‌ هه‌ر مرۆڤێك یه‌كه‌م كارێكن، به‌یانیان پێی هه‌ڵده‌ستن، هیچی ناكه‌م.
جا بۆ بیكه‌م؟ ئه‌وانه‌ كار و كرده‌وه‌ی لاوه‌كی و ناپێویستن، به‌عه‌ره‌بی كه‌مالیاتن و ته‌ركم كردوون. بۆ بیانكه‌م ؟ كاری به‌به‌هاتر و گرنگتر هه‌ن، سه‌رده‌قی ڕۆژی پێبشكێنرێت.
ئه‌ی چۆن، ئه‌گه‌ر یه‌كێ بیه‌وێ وریا خۆی بۆ خه‌ڵكی بسه‌لمێنێ و بیه‌وێ له‌ چوورتم و گێچه‌ڵ و به‌ڵای ناگه‌هان به‌دوور بێت، با چاو له‌من بكات، ده‌بێ هه‌موو به‌یانییه‌ك له‌گه‌ڵ بوومه‌لێڵ و تاریك و ڕوون، گه‌ر زووتریش بێت، ئه‌وا باشتر، له‌خه‌و ڕابێت.
تۆ ڕاوه‌سته‌، خۆ شپرزه‌ كردنی بۆ چییه‌؟ خه‌ریكی سه‌ر دنیا له‌گه‌ڵ خۆتا له‌ ئێمه‌یش ده‌هێنیته‌وه‌یه‌ك !! له‌ كونی ده‌رزییه‌وه‌ مه‌ڕوانه‌ دنیایه‌كی زه‌به‌لاح ! ناشێ جه‌نابت كرێكاری كۆنكریت كه‌ ده‌ڵێی مغاویرن، بیت؟
ئه‌گه‌ر تۆ ئه‌وه‌ بیت؟ من و كه‌سانی تر هه‌مان پیشه‌مان نییه‌، یان له‌وانه‌یه‌ كرێكارێكی له‌و بابه‌ته‌ی تۆ نه‌بین. ئیتر بۆچی هانی به‌یانی زوو هه‌ڵسانمان ده‌ده‌ی؟
دوای ئه‌وه‌، دوای ئه‌وه‌ به‌كارهێنانی وشه‌ی چورتم و به‌ڵای ناگاهان و.. ، مرۆێ له‌ وشه‌گه‌لێكی وا دڵ پیس ده‌كات، بیستنی خۆش نییه‌. پێ ده‌چێت كه‌سێكی سه‌ربه‌كۆبه‌ن و پاشه‌ڵ پیس و گێچه‌ڵاوی یان كابرایه‌كی دوژمندار بیت! ئه‌گینا بۆچی ئه‌و خه‌وه‌ خۆشه‌ی به‌یانی له‌كیس خۆ ده‌ده‌ی؟ له‌ خه‌وی به‌یانیان خۆشتر هه‌یه‌؟
به‌ڵام، گه‌ر شتێكیش له‌خۆتا شك ده‌به‌ی؟ وریایی و پارێز ڕه‌وایه‌، بیانووت به‌ده‌سته‌وه‌یه‌، ده‌بێت له‌هه‌وڵی چاره‌یه‌كی بنج بڕدا بیت، ئه‌گینا هه‌ر ڕۆژێ بێت به‌ته‌له‌وه‌ ده‌بی، فلیمت ده‌سوتێ، ئێمه‌یش ئه‌و كات ئه‌وه‌مان له‌سه‌ر ده‌بێت بڵێین:
كراسم دڕا چم پێ نه‌بڕا.
ڕمڵ لێ مه‌ده‌، ئه‌و قسانه‌ت كه‌م تا زۆر دروستن، له‌جێی خۆیدایه‌ به‌ڵام، ئه‌و گوللانه‌، ئه‌و تیرانه‌، ئه‌و به‌ردانه‌ی كه‌ ته‌قاندت به‌داخه‌وه‌ نیشانه‌كه‌ ناپێكێ، سه‌ریان كرد و به‌حاڵ ڕووشاندی.
به‌هه‌ر حاڵ كه‌ به‌یانیان خه‌و له‌خۆ حه‌رام ده‌كه‌م و له‌خۆ ده‌زڕێنم، ئه‌وه‌ نه‌بێ بۆ هه‌واوهه‌وه‌س و له‌ هه‌وانته‌ بێت، ته‌نها بۆ یه‌ك شت و بۆ یه‌ك مه‌به‌سته‌، ده‌زانی ئه‌و شته‌ چییه‌؟
پێش دركاندنی، ئێستا ده‌زانم چی له‌ مێشكتا ده‌سووڕێ، گاڵته‌ت به‌و قسانه‌ دێت، گرنگ نییه‌، هه‌رچی ده‌ڵێی بیڵێ هه‌قم به‌سه‌رته‌وه‌ نییه‌، گه‌ردنت ئازاد بێت، له‌ پیاوه‌تی خۆته‌.
ئه‌و شته‌ی وا شپرزه‌ی كردووم خۆمه‌، ته‌نی خۆمه‌. ئه‌زانی خۆم مانای چی؟ یه‌عنی ژیان و زینده‌گیم، ژیانی ماڵ و مناڵوه‌كانم، زینده‌گی خزم و كه‌س و كار، ژیانی دۆست و ناسیاو. له‌ پێناو زیندوومانه‌وه‌ هه‌رچی توانا هه‌بێ خه‌رجی ده‌كه‌م.
كه‌واته‌، پێم ناڵێی خه‌وی بێ مانا چییه‌ و چ مانایه‌كی هه‌یه‌؟ كامیان له‌ تای ته‌رازوو، قورس و لاسه‌نگ ده‌بێ؟ ژیان گه‌ر ناخۆشیش بێت له‌گه‌ڵ مه‌رگدا به‌راورد ناكرێت، بۆ خۆشت ده‌زانی خه‌وی به‌یانیان جۆرێكه‌ له‌ مردن؟ حاشا له‌ ڕووت كه‌ر به‌ كه‌رێتی خۆی ده‌زانێ كامیان قورس و به‌به‌هایه‌ و كامیان هه‌ڵده‌بژێریت؟ باوكی باوكم وه‌هایش نا، كه‌مێ ره‌حم !
چیم بیر بوو.. چی..چی؟ هه‌ر له‌ناو نوێنه‌كان ده‌رده‌فرتێمه‌ ده‌ره‌وه‌، به‌ره‌و په‌نجه‌ره‌ ده‌چم، كه‌ ده‌ڕوانێ به‌سه‌ر حه‌وشه‌ بچكۆله‌ و سه‌رجاده‌كه‌دا، ماڵه‌كه‌مان له‌ شوێنێكی به‌رز هه‌ڵكه‌وتووه‌..له‌مه‌یشدا له‌وانه‌یه‌ توانجم لێ بده‌ی، بڵێی:
ئه‌ها... !
دڵت ختوره‌ نه‌كات، ده‌وڵه‌مه‌ند نیم، له‌ خانووی چه‌ند نهۆمیشدا نیم و كرێچیم، كرێكارێكی ده‌ركراو و بێكارم.. تۆ واز بێنه‌ با بۆتی ته‌واو بكه‌م، به‌م شته‌ لاوه‌كیانه‌وه‌ خه‌ریكم مه‌كه‌.. له‌ كوێدا بووم.. ئا؛
خانووه‌كه‌ ده‌ڕوانێ به‌سه‌ر جاده‌ شه‌ستییه‌ بازنه‌ییه‌كه‌ی ده‌وره‌ی شار، زۆر به‌ ئاسانی ئه‌م سه‌ر و ئه‌و سه‌ری ده‌بینرێت. به‌ڵام، به‌سه‌یركردنێك و تێڕوانینێك دڵم ئاو ناخواته‌وه‌، ناچار ده‌بم بچمه‌ حه‌وشه‌كه‌، له‌ حه‌ساره‌كه‌وه‌ مل درێژ ده‌كه‌م، به‌ملاو ئه‌ولادا به‌دیقه‌ته‌وه‌ جاده‌كه‌ به‌چاو داده‌بێژم.
كه‌ بۆم ده‌رده‌كه‌وێت كه‌ش سازگار و ئارامه‌ و مێشووله‌ی نییه‌، گه‌ره‌ك و جاده‌كه‌ به‌چه‌ته‌وڵه‌ جل به‌ڵه‌كبه‌ڵه‌كه‌كانی حكومه‌ت داگیر نه‌كراوه‌ و نه‌ته‌نراوه‌. ئه‌و كات داده‌سه‌كنێم و ئاسایی ده‌بمه‌وه‌.
ئینجا وه‌ك پێكی عاره‌ق جامولكه‌یه‌ك ئاو به‌خۆشی ئه‌وانه‌ی وه‌ك خۆم له‌ترسی حكومه‌ت خه‌ویان لێزڕاوه‌ و حه‌رام بووه‌، هه‌ڵده‌ده‌م. بۆ ئه‌وه‌ی هه‌رچی خڵته‌ و خه‌وێڵی شه‌وی ڕابردوو هه‌یه‌ ڕایماڵێت؛
ئه‌م ژه‌مه‌یش تێرمان خوارد، خوا.. بۆ جارێكی تر

٦) گوڵ چاندن بڤه‌یه ..؟!
له‌تایمی چوونه‌ سه‌رئاو كردن، به‌په‌نجه‌ی دۆشاومژه‌ی ده‌سته‌ ڕاست، یه‌ك دوو جار ژندمه‌ هاوزیندانه‌ نووستووه‌كه‌م.
به‌خه‌به‌ر هات، له‌شوێنی خۆی چوار مشقی دانیشت، به‌هه‌ردوو پشتی ده‌ستی كه‌وته‌ هه‌ڵگڵۆفتنی چاو و برۆ ره‌شه‌كانی.
ده‌مێكه‌ نووستووی، وه‌ختی ده‌ست به‌ئاو گه‌یاندنه‌.
هه‌ڵنه‌سایه‌ سه‌رپێ و بڕوات، له‌سه‌رخۆ به‌مهره‌وه‌ ڕووی ده‌می تێكردم، وتی:
- لێت تێكدام، خه‌وم ده‌بینی؛ پێكه‌وه‌ بووین، هه‌روه‌ك به‌عسی دوابڕاو گه‌ڕابێته‌وه‌ وابوو. مه‌فره‌زه‌ی سارباز و ئاسایش و جه‌یشی شه‌عبی به‌هه‌موو شوێنێكدا بڵاوببوونه‌وه‌، به‌رببوونه‌ گیانی خه‌ڵكی. داوای پێناسیان ده‌كرد، پیر و گه‌نجیان ده‌گرت.
زۆر سه‌یر بوو، تارمایی ئاسا نه‌یان ده‌بینین، به‌به‌رده‌میاندا ره‌تده‌بووین لێیان نه‌ده‌پرسین. به‌سه‌ر شۆسته‌ی شه‌قامه‌ گشتییه‌كاندا ده‌ڕۆیشتین، تۆ دائه‌نه‌ویته‌وه‌ له‌ نێو چاڵه‌ هه‌ڵكه‌ندراوه‌كانی كه‌نار شۆسته‌كان گوڵ ئا.. گوڵت ده‌ڕواند.
تۆزێ ڕامام، هیچم بۆ نه‌مایه‌وه‌، ئه‌وه‌ نه‌بێت بڵێم:
- وایه‌، حكومه‌ت هه‌رگیز له‌گه‌ڵ چاندنی گوڵێكدا نه‌بووه‌، خه‌ڵكی سه‌ربه‌خۆیانه‌ بیچێنێت !!
- بۆ خۆشت باش ده‌زانی له‌سه‌ر چاندنی گوڵی ڕاستی خزێندراومه‌ته‌ ئێره‌كانێ!

7) ئه‌وسا و ئێستا !
له‌ دائیره‌ تووشم به‌ تووشی چه‌نه‌بازێكه‌وه‌ بووه‌؛ كابرای هاوڕوو و به‌رپرسم وه‌خت و ساتی بۆ نییه‌، له‌ كاتی ئه‌وراق خستنه‌ نێو دۆسییه‌ جۆراوجۆر و هه‌مه‌ره‌نگه‌كان، له‌ كاتی دانیشتن، له‌ كاتی.. .. داده‌می چیكه‌نه‌ئاسا هه‌ژده‌هه‌ژده‌ قسه‌ فڕێده‌دا.
به‌ شتێكیشه‌وه‌ ئیتر ئه‌و بابه‌ته‌ گه‌ر زۆر بێبایه‌خیش بێت گرتی، هه‌تا له‌ بنوبێخ ده‌رینه‌هێنێ وازی لێناهێنێت، هه‌مه‌لایه‌نه‌ به‌ر حه‌مله‌ی ده‌دا. وه‌ك هێلكه‌ی پاككراو ده‌یخاته‌ به‌رده‌ست و ده‌ڵێ:
- فه‌رموو بیخۆ.
ئه‌م هه‌تیوه‌ چیرۆكنووس بوایه‌ نرخی ته‌واو نه‌ده‌بوو.
خوویه‌كی قۆڕ و ناجایزی هه‌یه‌، كه‌ قسه‌ی دامه‌زراند دیكتاتۆر به‌ قوله‌ پێی ناگات، حه‌پولكی كه‌س نادات، ناهێڵێ فزه‌ له‌ده‌م بێته‌ ده‌ره‌وه‌، پرسیار ده‌كات، پرسیارم بۆ ده‌كات، پرسیاریان بۆ ده‌كات، هه‌ر خۆشی وه‌ڵام به‌ هه‌موو ده‌داته‌وه‌.
داری وا هه‌یه‌، ده‌مه‌وێت یاخی ببم و رچه‌ بشكێنم، له‌ نێوان دێڕێك و دێڕێكدا یا هه‌نایه‌ هه‌ڵكێشانێك، كۆكه‌یه‌ك، پژمینێكدا ته‌نها بۆ خوێی چچێشت، به‌ڵێ، به‌ڵێ، یان ئا.. ئا..و سه‌رله‌قاندنێك و ئم.. ئمێكی بۆ بكه‌م، كه‌چی ناهێڵێت... په‌كوو چ به‌ڵایه‌كه‌!
به‌ڵام، وه‌ڵڵاهی مرۆێ ڕاستیش بڵێت، وه‌كی ده‌ڵێن با قسه‌یه‌كیش بۆ دزان بكه‌ین، زۆر جار قسه‌وباسه‌كانی هێنده‌ ڕاستگۆیانه‌ و به‌تام وله‌زه‌ته‌وه‌ ده‌گێڕایه‌وه‌، نه‌ك هه‌ر خۆم، به‌ڵكوو ده‌هێنێ كه‌سانی تریش بیبیستن:
(.. .. له‌زه‌مانی حكومه‌تی ( عه‌ره‌بان ) دا وه‌زعم شوكر زۆر باش بوو، له‌ماڵدا هیچم كه‌م نه‌بوو؛ یه‌خچاڵ، دووانم هه‌بوو یه‌كێ مه‌زن یه‌كێ بچووك، بێجگه‌ له‌ مجمیده‌. ده‌روودراوسێ گیانێكیان به‌ئێمه‌ بوو، بابه‌تی زستانه‌ی وه‌ك ته‌ماته‌ باینجان بامییه‌ و.. یان بۆ ده‌هێنا و ده‌خسته‌ ناوی.
دوو دانه‌ ته‌له‌فیزیۆنی شاشه‌ ١٧ ، ١٦ یه‌كێ ره‌نگی و یه‌كێ ره‌شوسپی. ڕادیۆی ناشناڵی ٥ مه‌وج، له‌گه‌ڵ ڕادیۆ ته‌سجیلی ستریۆی مكه‌به‌ره‌ گه‌وره‌. له‌و گه‌ره‌كه‌دا یه‌كه‌م ماڵ بووین كه‌ ساڵۆنی نوێنمان هه‌بوو بێت. ئای، ده‌ستی شكاوم چ ماڵوحاڵێكم هه‌بوو.
له‌پاره‌ ده‌پرسی؟ ئه‌وه‌نده‌ هه‌زاری نووستووم له‌ماڵدا و چه‌ند هه‌زارێكیش له‌ملاو له‌ولا له‌ ئیشی گه‌وره‌ و گچكه‌دا بوو. به‌فشه‌ نه‌بێت، به‌نده‌ یه‌كه‌م كه‌س بوو فڵان مۆدێلی سه‌یاره‌ی هێنایه‌ سله‌یمانییه‌وه‌، ئه‌و سه‌یارانه‌ی له‌ ڕێزمدا بوون له‌ژماره‌ نایه‌ن.
خانووه‌كه‌م بۆ ناڵێیت؟ ڕێبواری نه‌شاره‌زا به‌ كۆڵاندا بڕۆشتایه‌، هه‌تا دوور ده‌كه‌وته‌وه‌ سه‌یری دیكۆر و نه‌خش و نیگاره‌كانی ده‌كرد.
له‌گه‌ڵ ئێوارانم لێداده‌هات، له‌نێو چینه‌نی حه‌وشه‌دا، مێز هه‌مه‌ره‌نگ به‌ مه‌شرووبات و مه‌زه‌ و مریشك و.. .. ده‌ڕازێنرایه‌وه‌، تا دره‌نگ وه‌خت به‌سه‌یركردنی ته‌له‌فیزۆنه‌وه‌ داده‌نیشتم، ده‌مخوارد و ده‌مخوارده‌وه‌، مه‌ست و بێئاگا، شام به‌سه‌پان ڕانه‌ده‌گرت.
ئای، له‌و ڕۆژانه‌دا دۆست و ئه‌حباب، خزم و كه‌س وكار له‌ده‌ورم زۆر بوون! خوانه‌كا مناڵێكم په‌نجه‌یه‌كی گه‌رم بووایه‌، چه‌ند دكتۆریان بۆ ماڵه‌وه‌ ده‌هێنایه‌ سه‌یری. هی وایان تیا بوو له‌برا براتر، له‌خوشك خوشكتر بوون بۆم.
هێنده‌ سه‌ردان و هاتووچۆ و میوان و میوانداری گه‌رم و گوور بوو، هه‌ر مه‌پرسه‌! زۆرجار بێزاریان ده‌كردم، ناچار خۆم ده‌دزییه‌وه‌.. ..
ئێی هێی، نازانم چیت بۆ وه‌گێڕم، گه‌ر به‌وردی ئه‌و سه‌رده‌مه‌ت بۆ باس بكه‌م وه‌ك حیكایه‌تی مێشی لێدێت یان له‌ حیكایه‌تی ڕۆسته‌م و زۆراب درێژتر ده‌بێت.
له‌دوای ڕاپه‌ڕین، وردتر له‌ كۆره‌وه‌كه‌دا گڵۆڵه‌م كه‌وته‌ لێژی، بارم لاسه‌نگ بوو، قڵپ بوومه‌وه‌. كه‌ هاتینه‌وه‌ چیمان بینی؛ سه‌یر ده‌كه‌ین ماڵ جوان و به‌ته‌میز گسكی لێدراوه‌. ئه‌و كات مانای ڕاسته‌قینه‌ی ڕڕڕاپه‌ڕڕڕینم بۆ ده‌ركه‌وت!
ئه‌وه‌ی ڕقت لێیه‌تی ، بڵێ یاخوا به‌ده‌ردی من چێت. ئیتر له‌و كاته‌وه‌ تا بێت سووكانم له‌ده‌ست ده‌بێته‌وه‌ و به‌قووڕدا ده‌چم، هه‌رچی ده‌كه‌م خۆم بۆ ناگیرێته‌وه‌.. .. جا به‌چی؟ سه‌رچاوه‌ی بژێویم مه‌عاشه‌ تره‌یه‌، خۆت باش ده‌زانی به‌شی هیچ ناكات.
ئه‌وه‌ی كوشتومی ئه‌وانه‌ی تا دوێنێ هه‌له‌كه‌ سه‌مایان بوو به‌ده‌ورما، بڕوا ده‌كه‌ی كه‌ له‌بازار ده‌یانبینم، هه‌ر چاو عافڵ ده‌كه‌م به‌بێ سڵاو لێكردن به‌لامدا فرته‌ی بۆ ده‌كه‌ن.. ..
وازم لێبهێنه‌ و وه‌ره‌ بمكوژه‌، ئه‌م دنیایه‌ چه‌ند دڵره‌ق و بێوه‌فایه‌. ئاخر ناهه‌قمه‌ نه‌فره‌ت وجنێو ‌به داروبه‌رد و هه‌موو شتێك ئه‌ده‌م. خۆزگه‌ به‌پار ده‌خوازم؟
وه‌زع و به‌سه‌رهاتم ئاوابوو، ئه‌ی توخوا پێم ناڵێیت تۆ چۆن بووی؟ .. ..)
وای ده‌زانی، داده‌نیشم كاتژمێرێك بۆ ده‌ڕێسم، ژیانی خۆم له‌یه‌ك دێڕدا پێووت:
- به‌نده‌، ئه‌وسا و ئێستا هه‌ر نه‌بوو بووم!!

٨) پارە ...!
به‌یانییه‌ و له‌ خه‌و هه‌ڵساوه‌، سیپاڵه‌كانی له‌به‌ركردووه‌.. لێفه‌كه‌ی پیا ده‌ده‌یته‌وه‌: ( ئاه‌، چی ده‌بوو، هه‌میشه‌ له‌ئامێزیدا بوومایه‌!؟)
بۆ دواجار ئاوڕی لێده‌ده‌یته‌وه‌. پاش كه‌مێكی دیكه‌ ده‌گه‌یته‌ جێ! زۆر دوور نییه‌ هه‌موو یه‌ك دوو هه‌نگاوێكه‌. دنیا تاریك و ڕوونه‌، تاك و ته‌را خه‌ڵكی به‌ده‌ره‌وه‌ن. كزه‌ بابه‌ك باوه‌شت پیاده‌كات: ئاهێكت پیا دێته‌وه‌ و خۆشییه‌كی شاراوه‌ ده‌ست له‌ملانت ده‌بێت، ئازاری ماسولكه‌كان ده‌ڕه‌ونه‌وه‌.
ئێستا، له‌چایخانه‌كه‌دایێ، قۆرێ و پیاڵه‌ و وه‌جاعِ و ته‌پله‌كه‌ باریكه‌ دارینه‌كان به‌ شێنه‌یی دێن به‌ده‌سته‌وه‌..كرێكارێكی به‌دله‌شین، پیره‌ پیاوێ، ئه‌فه‌ندییه‌ك خۆیان ده‌كه‌ن به‌ چاخانه‌كه‌دا و چایی هێشتا پێنه‌گه‌یشتووه‌.
كه‌ له‌ده‌وروپشتت وردده‌بیته‌وه‌، بروسكه‌ئاسا چه‌ند خاتیره‌یه‌ك به‌مێشكتدا گوزه‌ر ده‌كه‌ن؛
ئه‌م شوێنه‌جۆگه‌ئاسا بێ ئۆقره‌یه‌، هه‌رده‌م له‌نوێ بوونه‌وه‌دایه‌، جێنزه‌رگه‌ی هه‌مووانیشه‌.. ..
قۆرییه‌چاكه‌ به‌سه‌ر ده‌كه‌یته‌وه‌، زۆری نه‌ماوه‌.. به‌ چه‌ند په‌مپێك په‌ره‌مێزی ژێر سه‌ماوه‌ری ئاوه‌كه‌ جۆش ده‌ده‌یت.. به‌ ئسفنجێك ڕووی ته‌پله‌كه‌كان ده‌سڕیت.
ئێستا نا تۆزێكی تر، نقه‌نق وه‌ستات به‌مه‌نجه‌ڵێك ماستی خۆماڵی گه‌وره‌وه‌ ده‌گاته‌ جێ؛
بۆ چركه‌ ساتێك پێشهاتێك ده‌یفڕێنێ بۆ شوێنێكی دی.. .. پاش دوكان داخستن ملی ڕێگا ده‌گرم، ماڵه‌وه‌ خۆت بگره‌ هاتمه‌وه‌.. هه‌ر له‌ ده‌رگاوه‌ ده‌رده‌كه‌وم ئامه‌ گیان به‌ره‌وپیرم دێت، به‌زه‌رده‌خه‌نه‌وه‌:
- به‌م زووانه‌ ده‌بم به‌دایك.
ته‌نها ئه‌وه‌م به‌سه‌، له‌خۆشی و شادیدا باوه‌شی پیاده‌كه‌م و ته‌ند ده‌ینوسێنم به‌خۆمه‌وه‌.. ماچێكی قووڵ به‌گۆنای ده‌به‌خشم، ئه‌وكات هه‌رچی ماندوویه‌تی ڕۆژ هه‌یه‌ له‌له‌شم ده‌رده‌چێت
- ئاه‌، ژیان چه‌ند خۆشه‌ویستی.. ..)
- ئه‌و ماسته‌م لێبگره‌.
وه‌ستات هه‌ناسه‌ی سواربووه‌، به‌ره‌وپیری ده‌چیت و مه‌نجه‌له‌ ماسته‌ پێنج شه‌ش كیلۆییه‌كه‌ی لیوه‌رده‌گریت، ئه‌پرسێت:
-خۆ شته‌كان ئاماده‌یه‌؟
- هه‌موو شت به‌دڵی تۆیه‌، تۆزێك ده‌بیێ چاكه‌م پاڵاوتووه‌.
وه‌ستا، ده‌چێت به‌لای كردنه‌وه‌ی مه‌نجه‌ڵه‌ ماسته‌كه‌وه‌، تویش ده‌ست به‌هه‌ڵسووڕان ده‌كه‌یێ؛ چایه‌ك بۆ ئه‌و، چایه‌كی تر، چا و ماستێك بۆ ئه‌م، چاوئاوێك بۆ ئه‌وبه‌ر،.. .. ئا،ئاوه‌ها خه‌ریكی ده‌كه‌ویته‌ هه‌وای خۆته‌وه‌، له‌ده‌ره‌وه‌یش دنیا به‌رگی ڕووناكی پۆشیوه‌.
- چایه‌كم بده‌رێ، با به‌م سه‌رتوێژه‌وه‌ بیخۆم.
چایه‌ك تێده‌كه‌یت و له‌سه‌ر ته‌پله‌كی به‌رده‌می داده‌نێیت و ده‌ته‌وێت بۆ به‌رده‌م وه‌جاغ‌ بگه‌رێیته‌وه‌ ؛
- كوڕم ئه‌مه‌وێت یه‌ك دوو قسه‌ بكه‌ین.
- .. .. .. .. .. ..!
كه‌ له‌ته‌نیشتیه‌وه‌ داده‌نیشیت، به‌ میهره‌وه‌ ده‌ست له‌سه‌ر شانت داده‌نێی:
- كوڕی خۆم خوا ده‌ست به‌باڵاته‌وه‌ بگرێت، زۆر لێت ڕازیم، پێم ناخۆشه‌ له‌ده‌ستم ده‌رچی. هه‌ر تۆی فریای ئێره‌ ده‌كه‌ویت، به‌بێ تۆ چایخانه‌كه‌ هه‌ڵسوڕانی گرانه‌.. .. پیاوی چاكبه‌ له‌كه‌لی شه‌یتان وه‌ره‌ خوار، چی ده‌بێت له‌هه‌شت كاتژمێر كار بكه‌ی.
- ( .. بڕوات، نازانم چیبكه‌م؟ مشته‌رییه‌كانم نیوه‌ ده‌ته‌كێنه‌وه‌، بیشی كه‌م به‌ دوو شاگرد، ده‌ریناهێنێت ! .. ..)
- ( ..باش هه‌ڵمده‌، هه‌تا ملم ده‌شكێنیت..)
وه‌ستا گیان، دووباره‌ی ده‌كه‌مه‌وه‌، له‌ سبای ساڵحانه‌وه‌ تا نیوه‌شه‌و مه‌عقوول نییه‌. خۆ به‌رد نیم منیش وه‌ك ئه‌و عاله‌مه‌ پێوبستم به‌ پشوو هه‌یه‌..
پاره‌ هه‌موو شتێك نییه‌، خۆ دنیا هه‌ر چایخانه‌ و ماڵه‌وه‌ نییه‌. ئه‌مه‌ گه‌ڕانێكه‌، سینه‌مایه‌كه‌، بینینی یه‌ك دوو براده‌ر و ناسیاوێكه‌، چوون بۆ سه‌رچنارێكه‌.. ..
یه‌ك دوو ڕۆژی تر مۆڵه‌تت هه‌یه‌، باش بیری لێبكه‌ره‌وه‌، خۆت ده‌یزانی من هیچم نییه‌ و زه‌ره‌ر ناكه‌م.

٩) ئه‌لته‌رناتیڤ
به‌دله‌یه‌كی ره‌نگ شین، له‌وانه‌ی به‌زۆری كرێكارانی دائیره‌ ده‌وڵه‌تییه‌كان به‌كاریده‌هێنن، له‌به‌ر دا بوو. به‌دله‌كه‌ تۆزاوی و پیس نه‌بوایه‌ یان به‌هۆی تیشكی خۆر و شتنی زۆر كاڵ نه‌بوایه‌ته‌وه‌، له‌وانه‌ بوو بووترێ؛ ئه‌م كابرایه‌ی وا له‌به‌رانبه‌رماندایه‌ و خه‌ریكی نان و ماست خواردنه‌، كرێكاری یه‌كێ له‌دائیره‌كانی ئه‌م نزیكانه‌یه‌.
جا كێ ده‌ڵێ وایه‌؟ ئه‌ی ئه‌وه‌ نه‌بوو، چه‌ند سات له‌مه‌وبه‌ر به‌ده‌م فڕكردنی چاییه‌كه‌وه‌، به‌كرێكاره‌كه‌ی هاوڕێی، وت:
- كابرای ئه‌فه‌نی پێكێ په‌یدا نه‌كات، هیچ به‌كۆنكریت مسه‌له‌حه‌كه‌ ناكرێت.
- جا حه‌ز ناكه‌یت، ئه‌بێ به‌ئیشی دوو ڕۆژ.
- قایلم، ڕاسته‌ كرێكاره‌ به‌ڵام، گومانم ماوه‌ و هه‌یه‌.. له‌وه‌ ئه‌چێ كرێكاری دائیره‌ بێ. بۆ ئه‌و گومانه‌ له‌جێی خۆیدا نه‌بێ؟
من ده‌ڵێم كرێكاری دائیره‌یه‌، به‌بێ خواستی خۆی مۆڵه‌تی پانزه‌ ڕۆژی ساڵانه‌ی پێدراوه‌، خۆ ناشكوری نه‌بێ هه‌موو شت بووه‌ به‌زۆر و هه‌ره‌شو و ..
یان كێ ده‌ڵێ له‌و كه‌سانه‌ نییه‌ به‌ناوی فییز و زیاده‌وه‌ له‌كار ده‌ركراوه‌؟
ئه‌ی بۆ شتێكی تر نه‌بێ و ناڵێی؛ ئه‌م كابرایه‌ له‌و كرێكارانه‌یه‌ به‌ خزمه‌تی پانزه‌ ساڵییه‌وه‌ به‌پاره‌یه‌كی فره‌ كه‌می په‌نجا دیناری خانه‌نشین كراوه‌، ده‌ركردنێكی به‌ئه‌ده‌بانه‌یه‌! وا ئێستا هاتووه‌ ملی به‌م جۆره‌ كرێكارییه‌داوه‌.
- به‌مه‌ی تۆ ده‌یڵێیت، كابرا كۆنه‌ كرێكاری دائیره‌ بووه‌ و ئێستا لێكه‌وتووه‌؟
- به‌ڵێ، به‌ڵێ دۆزیته‌وه‌ و پێكات، ئه‌گینا به‌ده‌گمه‌ن نه‌بێ كه‌ی كرێكاری بیناسازی به‌دله‌ی وا له‌به‌ر ده‌كه‌ن؟
وه‌ك باوه‌ و عاده‌تی كۆنه‌، زیاتر جلوبه‌رگی كوردی، ئیتر به‌پێی وه‌رز ده‌گۆڕێ، به‌هار و هاوینان به‌زۆری شه‌رواڵ و كراس، پایز و زستانانیش بلوس و قه‌مسه‌له‌ و چاكه‌ته‌ شره‌ له‌به‌رده‌كرێت.
- یاخوا شت نه‌كه‌وێته‌ سه‌رده‌مت، به‌بن و بێخ ده‌رینه‌هێنی وازناهێنیت! ده‌به‌سییه‌تی، به‌سه‌ره‌یش بێ سه‌ره‌مه‌.
- فه‌رموو، فه‌رموو...
- درێژدادڕی ناوێ، به‌چییه‌وه‌ خه‌ریكی؟ باسی چیم بۆ ده‌كه‌ی؟ به‌دله‌ شینه‌، به‌دله‌ سووره‌، یان هه‌رچ ره‌نگێكی تره‌. ئه‌ته‌وێ بیسه‌لمێنی سه‌ر به‌فڵانه‌ و فیساره‌ دائیره‌ بووه‌، یان نه‌بووه‌! ئه‌و بیانووانه‌ گرنگ و گرنگیش نیین.
- ئه‌وه‌ چییه‌، مه‌ته‌ڵم لێداده‌هێنی یان به‌ ره‌مز قسه‌ ده‌كه‌ی؟
- هیچیان نییه‌، بزانه‌ چی ده‌ڵێم؛ ئه‌وه‌ی لێم ڕۆشنه‌ وه‌ك ڕۆژی ڕووناك، ئێستا ئه‌م كابرایه‌ كرێكاره‌ كرێكار، به‌ره‌چه‌ڵه‌كیشش كرێكاره‌، نه‌ك خۆی ، كوری كوره‌كه‌شی كرێكار ده‌رده‌چێت.
- ئه‌م داوه‌ری و فتوایانه‌ چیین، تۆ چووزانی، ناشێ بیناسیێ؟!
- ئه‌گه‌ر بهێڵیت بۆتی ڕوون ده‌كه‌مه‌وه‌، هه‌رچه‌نده‌ به‌ده‌رده‌كه‌ی تۆ ده‌چم، درێژه‌ی پێ ده‌ده‌م.
- یه‌ڵڵا گوێی مه‌ده‌رێ، نان و پیازێكمان پێكه‌وه‌ خواردووه‌. مانگه‌شه‌و سه‌ر له‌ئێواره‌ دیاره‌. باش سه‌یری بكه‌، سه‌ریری ڕوو سه‌روسیمای بكه‌، چی ده‌بینی؟ ئه‌كرێت ته‌مه‌نی به‌چه‌ند ساڵ بقه‌بڵێنرێت؟
تۆ بڵێ سی ساڵ، من ده‌ڵێم كه‌متریش، ئه‌گه‌ر بڕوا ناكه‌ی، داوای پێناسه‌كه‌ی ڵێده‌كه‌ین.
- نه‌ بابه‌، پێویست ناكات.
-جا گه‌نجێكی وا گوناح نییه‌، مووی سه‌روڕیش و سمێڵی ماشوبرنج بوو بێت؟ سیمای پیریه‌تی هه‌ر له‌ئێستاوه‌ لێده‌ركه‌وێت؟
له‌وانه‌یه‌ بڵێی مه‌رج نییه‌. ئێ باشه‌، بۆ دیقه‌ت ناده‌یته‌ چاوه‌ به‌قوڵاچووه‌كانی؟ سپێنه‌ی چاوی مه‌یله‌و زه‌رده‌ گۆشتی زیاده‌، وه‌ك تانه‌یه‌ك وایه‌ تێكه‌ڵ به‌ره‌شایی چاوی بووه‌، زۆری نه‌ماوه‌ بگاته‌ بیلبیله‌كانی!
كوره‌ ئه‌مانه‌یش قه‌یناكات، ئه‌ی ده‌موچاوی قوپا و سووتاو و هه‌ڵقرچاوی به‌رخۆر؟ ره‌شداگه‌راوییه‌كه‌ی بۆ ناڵێێ، ده‌ڵێی (عه‌ره‌ب) انه‌ !
- با به‌س بێت، درێژدادڕی ناوێت، وا بڕوات لقوپۆپی لێده‌بێته‌وه‌. شتی گرنگتر له‌ئارادا هه‌یه‌ په‌یمان پێنه‌بردووه‌، خۆ له‌قه‌ره‌ نه‌دراوه‌.
- كه‌واته‌، ئه‌م قسانه‌ی تا ئێستا پوچ و بێبایه‌خ و چه‌نه‌بازی بوون؟
- نا نه‌خێر، زۆر به‌رزن، به‌س، ئێمه‌ پرسیاری ئه‌وه‌مان نه‌كردووه‌، ئه‌م كرێكاره‌ چۆن له‌م دنیایه‌ گه‌یشتووه‌؟ چۆن بیر ده‌كاته‌وه‌؟ دنیایه‌كی چۆنی گه‌ره‌كه‌؟
- خۆزگه‌ بمتوانیایه‌ بچوومایه‌ته‌ دڵ و ده‌روونییه‌وه‌، هه‌ست و نه‌ستیم بزانیایه‌؟
- جا بۆ خۆت ماندوو ده‌كه‌ی؟ قسه‌كانی ماوه‌یه‌ك له‌مه‌وبه‌ری ، كه‌ له‌گه‌ڵ هاوڕێ كرێكاره‌كه‌یدا ده‌یكرد، هه‌رچه‌نده‌ پچڕ پچڕ بوو، باش گوێم لێ نه‌بوو بیر ده‌هێنمه‌وه‌:
(... .. بۆ ئه‌وان هه‌بوو بن.. به‌سه‌رمانا بڕانن.. هه‌رچی په‌تپه‌تی دنیایه‌ پێمانی بكه‌ن.. ..) هه‌ناسه‌یه‌كی قوڵی هه‌ڵكێشا، به‌وپه‌ری ڕق و بێزارییه‌وه‌، درێژه‌ی به‌ قسان دا:
(.. .. ئاخ، ئه‌ترسم بمرم و ئه‌و ئاواتمه‌م نه‌یه‌ته‌ دی) هاوڕێكه‌ی لێی پرسی:
- ئاواتی چی؟
- ئاواتمه‌، یه‌كه‌ یه‌كه‌ی ئه‌و ده‌وڵه‌مه‌ندانه‌، وه‌ك چۆن بیست ساڵه‌ هه‌ژاری ده‌چێژم، بیست ساڵ هه‌ژار بكردایه‌.. ..)
ئه‌و ده‌م له‌به‌ر عه‌یبه‌ نه‌بووایه‌، ده‌چووم ناوچه‌وانیم ماچ ده‌كرد، پێم ده‌ووت:
- هه‌ی ئافه‌رین، به‌ڕاستی سه‌رناسی، ده‌زانیت كێ دوژمنته‌.
- ئه‌ی بۆ نا؟ جوانه‌ زۆر ۆر جوانه‌، هه‌قی خۆیه‌تی له‌وه‌ زیاتر و زیاتریش بڵێت، گه‌ر كوێره‌وه‌ری و مه‌ینه‌تی تا سه‌ر ئێسك و پروسك ڕۆنه‌چوو بێت، قسه‌ی وا ده‌كات ؟ به‌ڵام.. ..
- ئۆهووو! به‌ڵامێكت دایه‌وه‌ به‌ته‌نگه‌یدا.. تۆ قه‌ت ئاقل نابیت!
- بزانه‌ ئه‌ڵێم چی.. خراپم وت، شتێكم وت دژی ئه‌و بوو، ده‌مم سوێر بكه‌، هه‌زار شه‌قم تێهه‌ڵده‌، هاوڕێیه‌تیم مه‌كه‌.. به‌كوردی و كورتی، ده‌پرسم:
- ئایا هه‌موو چوون یه‌ك و یه‌كسان نه‌بین چاكتر نییه‌؟؟
ئایاری ١٩٩١

١٠) بێكار !
له‌بازاری ساردوسڕ و بێبره‌وی كار - مه‌یدانی كرێكارانی بیناسازی - وه‌ك ئه‌و سه‌ده‌ها مرۆێه‌ بێكارانه‌ی تر، ڕاوه‌ستاو، ئاماده‌ و چاوه‌ڕوانی وه‌ستایه‌ك ئیتر هه‌ر وه‌ستایه‌ك - وه‌ستای به‌رد و بلۆك، وه‌ستای گه‌چكاری، وه‌ستای له‌بغ- بێت، ناسیاو بێت باشتر، یان هه‌ر كه‌سێكی كڕیاری دیكه‌ بێت، ده‌كرد، تا خۆ پیشان بده‌م، ئێ به‌ڵكوو ئه‌و كاڵا دانسقه‌ هه‌رزانبه‌هایه‌ی هه‌یه‌، بیفرۆشم و بێكار نه‌مێنمه‌وه‌.
له‌مه‌راق ئه‌وه‌دا بووم، ئه‌گه‌ر هاتوو ئه‌م به‌یانییه‌ وه‌ستایه‌ك یان كه‌سێك په‌یدا نه‌بوو بمبا بۆ ئیش، چی بكه‌م؟
ئه‌وكات بێكار و ده‌ستبه‌تاڵ، ڕێویئاسا ده‌بێت لۆژه‌ لۆژ به‌ره‌و ماڵ ببمه‌وه‌! ئه‌مه‌یش ئه‌ستمه‌ و نابێت.
ڕۆژانێكی ره‌ش تێكه‌وتووین، له‌بازار ده‌ست ده‌ده‌یته‌ هه‌رچ شتێك وه‌ك مار پێته‌وه‌ ده‌دا! من ده‌ڵێم دووقات، تۆ بڵێ سێ چوار قات نرخی پێویستییه‌كانی ژیان به‌رز بوونه‌ته‌وه‌!
ته‌نیا كرێی ئێمه‌ نه‌بێت! ئه‌وه‌ بۆ دوو ساڵ ده‌چێت له‌شوێنی خۆیدا چه‌قیوه‌، بابه‌خوله‌یه‌تی و له‌سه‌ر پشتی كیسه‌له‌ شه‌ش و نیو حه‌وت دیناره‌!!؟؟
.. .. كێ ده‌ڵێت سبه‌ینێ باران نابارێت؟ خۆ كه‌ داشی كرد، وه‌ستان له‌مه‌زه‌بیدا نییه‌! دوو سێ ڕۆژ ده‌خایه‌نێت و ده‌مانخزێنێته‌ كونجی ماڵ! گووی بارانیش به‌سه‌رمان، سوودی هه‌بووایه‌ نه‌ده‌باری. پاروپێرار خه‌ڵكی ده‌ره‌وه‌ بۆ خه‌له‌وخه‌رمان پێویستیان به‌باران بوو، خێروخێراتیان ده‌كرد، كه‌چی هێنده‌ نه‌باری ، خوا بڵێ به‌هه‌ق!
جا تازه‌ باران بۆ كێ ببارێت؟ بۆ دیهات ما؟ جووتیار ما؟ كشتوكاڵ ما؟ هه‌موو پاكو دران، وه‌ك حه‌سه‌ن زیره‌ك ده‌ڵێت:
بایه‌قووش تیایدا كردووه‌ هێلانه‌!!
كرێكارێك كه‌ چه‌نده‌ها ڕۆژ له‌زۆر بینا به‌یه‌كه‌وه‌ كارمان كردووه‌، لێم نزیك بووه‌ و زۆر به‌گه‌رمی چاكوچۆنی له‌گه‌ڵدا كردم، چاكوچۆنییه‌كی وا كه‌سه‌رتاپا مه‌رایی و خۆبردنه‌ پێشه‌وه‌ی ده‌گه‌یاند.
ئێستا واده‌زانێت وه‌ك ڕۆژانی له‌مه‌وبه‌ر بۆ بردنی كرێكار هاتوومه‌ته‌ مه‌یدان. چۆنی بۆچووم هه‌روا ده‌رچوو، كاتێ پرسی:
- وه‌ستا ئازاد ده‌ڵێی به‌دوای كرێكاردا هاتووی؟
ته‌ریقبوونه‌وه‌، شه‌رمه‌زاری خۆم به‌زه‌رده‌خه‌یه‌ك شارده‌وه‌، ڕاستوره‌وان كردمه‌ ده‌ستییه‌وه‌:
- كاك بارام ده‌مێكه‌ بێئیشم، وه‌ستایی نییه‌. ئه‌مڕۆ وه‌ك تۆ بۆ كرێكاری هاتووم.
كاك بارامی ئاشنام ئه‌و هه‌له‌ی بۆ په‌یدا كردنی ڕۆژكارێك به‌ته‌ما بوو له‌ناوچه‌وانی منه‌وه‌ ده‌ستی بكه‌وێتو بۆش ده‌رچوو.بۆیه‌ له‌ژێر لێوه‌وه‌:
كه‌واته‌، هیچێكی وت و وه‌رسوورا، زۆر له‌سه‌رخۆ گه‌ڕایه‌وه‌ به‌رده‌م ده‌رابه‌كه‌.. ..
ئێستا له‌وانه‌یه‌ له‌دڵی خۆیدا گاڵته‌م پێبكات، بڵێت:
- پێف له‌م وه‌ستایه‌، كۆلكه‌، وێستاوه‌ نه‌ك وه‌ستا.. ..
كاك بارام گاڵته‌ی چیم پێده‌كه‌یت؟! ئه‌ی ئه‌وه‌ نییه‌، یه‌خه‌ت پێگرتووم تا بتبه‌م بۆ كار.. پێم ناڵێیت ئه‌م یه‌خه‌گرتنه‌ مانای چی؟ ئیش كزی نه‌بێت هیچی تر نییه‌.. ..
ڕووی زه‌مانه‌ ره‌ش بێت، ئه‌ڵێی چی، عه‌یبه‌ نییه‌، وه‌ستایی نا كرێكاری، گرنگ نه‌وه‌ستانه‌، خۆت باشده‌زانی ڕۆژ به‌ڕۆژ كار نه‌كه‌ین نییه‌ بخۆین.. ..
ئاخر كاكی خۆم بۆ تانه‌وته‌شه‌رم لێده‌ده‌ی؟ قابیله‌ حه‌ز به‌م وه‌زعه‌ بكه‌م؟ وا بڕوات خراپترمان به‌سه‌ر دێت، هێشتا له‌كوێمانه‌ به‌ڵام،..
به‌ده‌نگی به‌رز هاوارم لێكرد:
- كاك بارام، ئه‌گه‌ر ئیش هه‌بوو ئاگات لێمان بێت، ئاگامان لێت ده‌بێت.
بێئه‌وه‌ی سه‌یرم بكات له‌سه‌رخۆ، وه‌ڵامیدایه‌وه‌:
- خوا ده‌كا ده‌بێ، ئاسانه‌.. .. ؟١٩٨

١١) شوورا !
كابرایه‌كی بێكار و به‌رگ شڕۆڵه‌، وه‌ختێك به‌لای چێشتخانه‌یه‌كدا تێپه‌ری، بیرۆكه‌یه‌كی بۆ هات؛
ڕووی له‌مناڵی خاوه‌ن چێشتخانه‌ نا، كه‌ له‌و كاته‌دا به‌رێكه‌وت له‌سه‌ر ده‌غیله‌كه‌ بوو، وتی:
- زۆرم برسییه‌ تۆزێك چێشتم پێناده‌ی؟
- ناوێرم باوكم لێم ئه‌دات!
- ئه‌ی ده‌هێڵیێ ئه‌م نانه‌ بده‌مه‌ به‌ر هه‌ڵاوی مه‌نجه‌ڵه‌ چێشته‌كه‌؟
مناڵ له‌نێوان ئاگر و ئاودا تیامابوو.... به‌نابه‌دڵی سه‌ری ڕازی بوونی بۆ شل كرد.. كابرا نانی دابوو، نه‌دابووه‌ به‌ر هه‌ڵمی چێشته‌كه‌، هه‌روه‌ك موو هه‌ڵپروزكێنرێت، باوكی مناڵ سه‌روساختی به‌ده‌ركه‌وت، به‌و دێمه‌نه‌ ده‌هری بوو، چاوی په‌رییه‌ پشتی سه‌ر.. گورگ ئاسا په‌لاماری دا و مه‌چه‌كی كابرای گرت:
- گرتمی، هه‌ی دز، سواڵكه‌ر خواردینی..
ئیتر پیاهاته‌ خوار هه‌رچی قسه‌ی نه‌شیاو جنێوی پیس له‌فه‌رهه‌نگی مێشكیدا هه‌بوو، به‌سه‌ریدا هه‌ڵڕشت، كارێكی وای كرد نه‌بێته‌وه‌!
كابرای بێكار و برسی وا ساكا، په‌شۆكا بوو، ده‌می چووبووه‌ كلیله‌.. مناڵ ویستی ڕاستی مه‌سه‌له‌ له‌باوكی بگه‌یه‌نێت و بڵێت ئه‌و فه‌رته‌نه‌ و هه‌ڵڵایه‌ی بۆ چییه‌ و ئاوێك به‌ئاگردا بكات، به‌تۆپه‌ڵێ جنێوی مزر نه‌یهێشت و ده‌مكوتی كرد!
بۆ نه‌گبه‌تی و به‌ختی ره‌شی كابرا، ئه‌و ساتوكاته‌ گوزه‌ر چۆڵ و هۆڵ، كه‌سێك نه‌بوو بكه‌وێته‌ نێوان و قسه‌یه‌كی خێر یان ناوبژیان بكات!
خاوه‌ن چێشتخانه‌، كابرای په‌لكێش به‌ره‌و پۆلیس و مه‌غفه‌ر و حاكم.
- به‌ڵام، مه‌غفه‌ر و پۆلیس و حاكمی چی؟ كابرا ئه‌وه‌ تێكچووی، هۆش بێنه‌وه‌ به‌رخۆت، كه‌ی ئه‌و شتانه‌ ماون؟!
- بۆ..بۆ؟ بۆ چییان به‌سه‌ر هات؟ مه‌گه‌ر ئاسمان هه‌ڵیكێشان یان ده‌ریا لووشی دان، هــــااااااا؟!!
- ئێی، دۆشان به‌گونت له‌شوێنی بێ ئاودا. ئه‌وانه‌ ئاوی ئاموون و توونی بابا چوون.. بۆ هه‌یه‌ نه‌زانێت چی گوزه‌را؟ ئه‌ی ڕاپه‌رین، ڕاپه‌رینی جه‌ماوه‌ی خه‌ڵك كه‌ هه‌مووی چه‌ند ڕۆژێك ده‌بێت ڕوویداوه‌، هه‌موویانی پاكو نه‌دا؟
ئێستا له‌جیاتی گشت ئه‌و داموده‌زگا به‌دناوانه‌ شورا، شورا له‌هه‌موو گه‌ره‌كێكدا دروست بووه‌ و هه‌یه‌.. ئه‌وه‌ ئه‌وه‌ حوكم ده‌كات و لێپرسراوی یه‌كه‌می شاره‌.
- یه‌عنی، دادم به‌رمه‌ لای شورا؟؟! * *
له‌وێ، له‌شورا، هه‌ڵسووڕاوان ورد گوێیان له‌ شیكا‌یه‌تی خاوه‌ن چێشتخانه‌ گرت.. له‌ماوه‌ی كاركردنیاندا چه‌نده‌ها كێشه‌ و گرفت چاره‌ كردبوو، به‌ڵام تووشی شیكایه‌تێكی تراتیجدكۆمیدی وا نه‌ببوونه‌وه‌.
به‌مه‌به‌ستی دۆزینه‌وه‌ی ڕێگاچاره‌كی گونجاو، هه‌ڵسووڕاوان كۆبوونه‌وه‌یه‌كی به‌په‌له‌یان چیكرد.. ..
- بڵێی تای ته‌رازوو به‌لای كام لادا بشكێته‌وه‌؟
- بێگومان به‌لای كابرای خاوه‌ن چێشتخانه‌دا.
- ئه‌گه‌ر وابێت، ره‌حمه‌ت له‌كفن دز!
* *
هه‌ڵسووڕاوێك ڕووی ده‌می له‌كابرای خاوه‌ن هه‌ق كرد، وتی:
- ناكرێت له‌جیاتی ئه‌و هه‌قه‌كه‌ی بده‌ین؟
به‌نابه‌دڵییه‌وه‌، وتی:
- نه‌خێر، خۆ ئێوه‌ دز نیین! هه‌قم له‌لای ئه‌وه‌.
هه‌ڵسووڕاوێكی دی، له‌ كابرای بێكاری پرسی:
- تۆ، هه‌ر هیچ پاره‌یه‌كت پێ نییه‌؟
- یه‌ك دینای ئاسن!
له‌گیرفانی شه‌رواڵه‌كه‌یدا تاك دیناره‌كه‌ی ده‌رهێنا و دای به‌ هه‌ڵسووڕاوه‌ شوراییه‌كه‌. ئه‌ویش لێی وه‌رگرت، له‌جیاتی ئه‌وه‌ی بیدابه‌ ده‌ستی ، هه‌ڵیدایه‌ سه‌ر زه‌وییه‌ كاسییه‌كه‌، وتی:
- لێی خۆش ببه‌، وه‌ك ده‌بینی هه‌ر ئه‌وه‌ی پێیه‌.
مه‌تعه‌مێییه‌كه‌، له‌دڵی خۆیدا وتی:
- ( له‌ هێچ باشتره‌..) و نوشتایه‌وه‌ دیناره‌كه‌ هه‌ڵگرێته‌وه‌، هه‌ڵسوڕاوه‌ شوراییه‌كه‌ به‌په‌له‌ دیناره‌كه‌ی هه‌ڵگرته‌وه‌ و نه‌یهێشت بیبا، وتی:
- پاك له‌پاك، ئه‌وه‌ هه‌قه‌كه‌ی بوو.
- یه‌عنی چی؟ بۆ گالته‌ چی ئێوه‌م؟!
- نه‌خێر، ئه‌ی تۆ له‌بری هه‌ڵاوی چێشت، داوای پاره‌ ده‌كه‌یت، ئه‌ویش له‌بری پاره‌ زره‌كه‌یت پێئه‌دا.. ده‌بڕۆ به‌خێر چی..
خاوه‌ن چێشتخانه‌ ده‌هری بوو، هه‌ر ئه‌وه‌ نه‌بوو له‌داخا نه‌ته‌قێت، به‌ بۆڵه‌بۆڵ و خوته‌خوته‌وه‌ ملی ده‌رگای ده‌ره‌وه‌ی گرت:
- ملم بشكایه‌ نه‌هاتمایه‌، خوا هه‌زار عه‌داله‌تی وا ببڕێت.
كانوونی دوو ١٩٩٢

١٢) ترسنۆک
دوای کۆره‌وه‌که‌ دوو سه‌ربازی ده‌ره‌جه‌دار بووبوون به‌هاوڕێم، هاوڕێیه‌تییه‌که‌یش له‌وه‌وه‌ هات کاتێ له‌ئێران گه‌ڕاینه‌وه‌، ماڵمان له‌قه‌راغ شار سه‌ر شه‌ستمه‌ترییه‌که‌ بوو، ئه‌وانه‌ ده‌رگای ماڵه‌که‌یان شکاندبووین کردبوویان به‌باره‌گای خۆیان. دوایی گواستیانه‌وه‌ بۆ ده‌شتاییه‌که‌ی نزیکمان.

زۆرجار قسه‌وباسم له‌گه‌ڵدا داده‌مه‌زراندن، حه‌زیان به‌سیاسه‌ت نه‌بوو، گه‌ر ناچارم بکردنایه‌ به‌لای حکومه‌تدا دایان ده‌شکاند.
ڕۆژی هاتن و داوایان کرد به‌ جلوبه‌رگی مه‌ده‌نییه‌وه‌ بیان به‌م بۆ بازار لای دکتۆری ددان، پێده‌چوو یه‌کیکیان زۆر په‌رێشان بێ، ددانی کلۆر بوو.

دکتۆری ددان ئه‌وه‌ی پێووتن؛ که‌ کلۆربوونه‌که‌ ده‌ماری گرتووه‌، پڕکردنه‌وه‌ سوودی نابێ بۆیه‌ چاره‌ی نییه ئه‌بێت ده‌ربهینریت.
ئه‌فسه‌ر دیار بوو، پیره‌ددان زۆر ئازار دابوو ، هه‌ر که‌ڕازی بوونی پیشاندا دکتۆر خێرا ده‌رزی به‌نجی لێدا.

دوای ماوه‌یه‌ک به‌نجه‌که‌ خه‌ریک بوو ده‌موپلی سڕ ده‌کرد ، ده‌یکێشا به‌ ڕوومه‌تیا له‌منی ده‌پرسی: تۆ بڵێی ئازاری نه‌بێت؟ ئه‌وه‌ یه‌که‌م جارمه‌ ددانده‌کێشم. تا چووه‌ به‌رده‌ست دکتۆر چه‌ند جار دووباره‌ی کرده‌وه‌.منیش به‌زمانی بازاری خۆی ده‌مووت؛ هیچ نییه‌ مه‌ترسه‌، بشزانه‌ وا نابێت ؟

که‌به‌ته‌واوی ده‌موپلی سڕ بوو له‌سه‌ر کورسی ڕاکشا. ته‌واو تێکچوو بوو، وابزان له‌دڵی خۆیدا شایه‌تمانی ده‌هێنا و ئایه‌ته‌لکورسی ده‌خوێند، بێئه‌وه‌ی ده‌ریببڕێت
وتی: بێجگه‌ له‌ده‌رهێنان چاره‌ی تر نییه‌؟
دکتۆر وتی: کار له‌کار ترازاوه‌ مادام به‌نجماکردووی ده‌بێ ده‌ربهێنرێت.
-ده‌تخوا سووک ده‌ری بهێنه‌، ئاگات لێم بێت، بروا بکه‌ له‌هێرشکردنه‌سه‌رتان به‌شدار نه‌بووم!
-----------
ڕۆژ و مانگ و ساڵی ونه‌.

١٣) ڕێکه‌وت
بۆ سه‌ر کار ده‌چووم، هه‌تا سه‌رم نه‌ته‌قی به‌سه‌ریدا پێمنه‌زانی. هه‌روه‌ک دوانزه‌ ساڵ له‌مه‌وبه‌ر بۆ خه‌سته‌خانه‌ ده‌چوو، سه‌روسیمای زۆر نه‌گۆڕابوو، ته‌نها شتێ که‌ له‌وسای جیا ده‌کرده‌وه‌، قژه‌ ئۆکسجین کراوه‌که‌ی بوو. هه‌ر ئه‌مه‌یش وای لێکردم سه‌ره‌تا نه‌یناسمه‌وه‌. دیاره‌ سه‌ری سپی بووه‌ بۆیه‌ وایلێ کردووه‌، به‌ژنه‌ بیانییه‌کی نابووت ده‌چوو.

هێنده‌ به‌گه‌رم و گوڕی چاک و چۆنی و ته‌وقه‌ی له‌قه‌ڵدا کردم، پر بوو له‌خۆشه‌ویستی، خۆشه‌ویستییه‌کی قوڵ، مه‌گه‌ر دایک بۆ جگه‌رگۆشه‌که‌ی بێت. هه‌رئه‌وه‌ نه‌بوو قووتم نه‌دا. گه‌ر پێی عه‌یب نه‌بوایه‌ له‌و سه‌رجاده‌یه‌ باوه‌شی پیاده‌کردم، ده‌ینووساندم به‌خۆیه‌وه‌. سه‌رسوورماو و ساکاو بێزار له‌مجامه‌له‌ی درێژ. ده‌ستی به‌رنه‌ده‌دام، ده‌ستم به‌زۆر له‌ده‌ستی کرده‌وه‌، خواحافیزیم لێکرد. به‌ئاشکرا ئیهمالم کرد، ئاخر شتێکی گرنگ باس نه‌کرێ گوناحه‌ به‌چاکوچۆنییه‌وه‌ کات به‌فیرۆ بده‌ی!

له‌دڵه‌وه‌ پێمناخۆش بوو. که‌ لێکجیابووینه‌وه‌ به‌چاوی پشت سه‌ر تێمده‌ڕوانی؛ هه‌ر چه‌ند هه‌نگاو دوورده‌که‌وته‌وه‌ ئاوڕێکی ئه‌دایه‌وه‌. به‌دووری ١٠٠ مه‌تر، هه‌تا گه‌یشته‌ سه‌رسووچه‌که‌ چه‌ند جاری دی ئاوڕێ دایه‌وه‌. له‌گۆشه‌که‌ ڕاوه‌ستا چاوی هه‌ر به‌دواومه‌وه‌ بوو، تا له‌کۆڵانه‌که‌ ئاوابووم و ونبووم نه‌ڕۆیشت!
-------
ڕۆژ و مانگ و ساڵی ونه‌.

14) لادێی خواردینی..!

له‌خه‌سته‌خانه‌ی فریاگوزاری، هه‌ر تۆزێ دوای چونه‌ده‌ره‌وه‌ی سسته‌ره‌که‌، کابرایه‌کی خه‌سته‌ که‌لاقی به‌هۆی ته‌قینه‌وه‌ی مینه‌وه‌ له‌ده‌ستدابوو،که‌وته‌ جووڵه‌ له‌پێشدا به‌ڵای ڕاست ئینجا به‌لای چه‌پدا. ده‌ستی به‌بڵمه‌بڵم کرد، ماوه‌یه‌کی خایاند، وه‌ک وڕێنه‌ بکات، له‌زینده‌خه‌وندا بێت وابوو، هه‌تا ده‌هات وشه‌کانی ڕوونتر و ڕوونتر ده‌بووه‌ به‌ڵام پچڕپچڕ:

بڕۆنه‌وه‌ ...بڕۆنه‌وه‌... چیده‌که‌ن لێره‌! که‌ی ئێره‌ شوێنی ئێوه‌یه‌؟ حه‌یف نییه‌ ئێوه‌ی به‌رهه‌مهێن لێره‌ سپڵی لاورگانه‌ بژین؟! که‌ی ئێوه‌ و شار و شارستانیان وتووه؟ خوا ئێوه‌ی بۆ ئه‌و کێو و ده‌شتانه‌ دروست کردووه‌، بۆ ناڕۆنه‌وه‌؟ گه‌ر لێره‌ نه‌مێنن ڕێزتان له‌لامان زۆرتر ده‌بێت ، به‌رد له‌شوێنی خۆیدا سه‌نگینه‌. دووری و دۆستیان وتووه‌... باشه‌ بۆ ده‌بێ هه‌میشه‌ شه‌ره‌ده‌نوکمان بێت؟ من خه‌تای تۆ ده‌گرم و تۆیش به‌هه‌مان شێوه‌! له‌ڕاستیدا خه‌تا له‌هیچمانه‌وه‌ نییه‌. هه‌ردوولامان ڕاست ده‌که‌ین! به‌ڵام به‌گه‌ڕانه‌وه‌تان گرفتمان که‌م ده‌بێته‌وه ‌. له‌وانه‌یه‌ خانوومان به‌هه‌رزان ده‌ستده‌بکه‌وێت. عاره‌بانه‌کان که‌م ده‌بنه‌وه‌. کوڕه‌ کارمان ده‌ست ده‌که‌وێت، ئێستا ئێوه‌ هه‌موو شوێنێکتان داگیر کردوه‌! مناڵی چوار ساڵانه‌ تا پیروپه‌ککه‌وته‌تان خستۆته‌ گه‌ر و کار ده‌که‌ن، هه‌ر ده‌شکروزێنه‌وه‌ ده‌ڵێن نیمانه‌ و فه‌قیرین!

زۆر له‌سه‌رخۆ داخی دڵی خۆی هه‌ڵده‌ڕشت، پێده‌چوو ئه‌و قسانه‌ له‌دڵێکه‌وه‌ هه‌ڵقووڵێت که‌ پڕ بێت له‌بێزاری و ده‌ردیسه‌ری دنیا! تۆ بڵێی له‌باری ئاساییدا بتوانێ ئاوا ڕاستگۆیانه‌ بدوێت؟
- نا هه‌رگیز ئێستا وه‌ک ئه‌و سه‌رخۆش و به‌دمه‌ستانه‌ وایه‌، ڕاستگۆیانه‌ ده‌په‌یڤن و کۆ له‌مۆته‌که‌ی ترس ناکه‌نه‌وه‌. ئاهـ چه‌ند ئه‌و حاله‌ته‌ که‌م ته‌مه‌نه‌ پاکانه‌م پێخۆشه‌. خۆزگه‌ درێژه‌ی پێده‌دا و له‌نیوه‌یدا نه‌یده‌بڕییه‌وه‌، به‌نجه‌که‌ یان سه‌رخۆشییه‌که وا به‌زوویی به‌ری نه‌دایه‌...ئه‌ها چاوم نه‌فڕێ ده‌ستی به‌قسه‌کردنکرده‌وه‌:

به‌ڵێ..به‌ڵی ئه‌وه‌نده‌تان وت! له‌سه‌ر ڕادیۆ و ته‌له‌فیزۆن و ڕۆژنامه‌ ده‌گ لێتانده‌خوێندین ته‌نانه‌ت ته‌مسیلتان له‌سه‌رکردین! هه‌تا هه‌ڵتانخرانیین و ناچار له‌به‌ر عه‌یبه‌ بۆ ئه‌و شوێنه‌ ڕۆیشتینه‌وه‌ که‌ لای ئێوه‌ نیشانه‌ی پاکی و خۆشی و سازگارییه‌، لای ئێمه‌یش بێزارکه‌ر و مایه‌ی ڕه‌نج و عاره‌قڕشتنه‌،. خۆزگه‌ بۆ چه‌ند کاتژمێرێ ئێوه‌ی ده‌ست سپی هیچ له‌بارانه‌بوو ده‌هاتن و له‌بری ئێمه‌ لێره‌ ده‌ژیان، ئه‌وسا ده‌تانزانی تامی چی ده‌دات! کوڕه‌بابه‌ ده‌نگی ده‌هۆڵ له‌دوور خۆشه‌...!
---------
ڕۆژ و مانگ و ساڵی ونه‌.

١٥) شه‌کری کڵۆ
کوپێکی شووشه‌ به‌ده‌سته‌وه‌، ڕووه‌و ده‌رگای دراوسێی به‌رامبه‌ریان بووه‌وه‌. ده‌رگای لێکرایه‌وه‌. دیاره‌ بۆ داخوازییه‌ک بوو . ئه‌و دڵسۆزترین دراوسێیان بوو، هه‌رچییه‌کیان هه‌بووبێت له‌گه‌ڵیاندا دابه‌شی ده‌کرد، به‌یه‌ک ماڵ ده‌ژمێرران.

ئه‌ی چار ؟! ماڵی باجی ره‌عنا... به‌ده‌ستی به‌تاڵ گه‌ڕایه‌وه‌! پێیانوتبوو دیژله‌مه‌ به‌خورماوه‌ ده‌یخۆین! ماڵی باجی حه‌لاو... ئه‌ویش هیچ! چا ناخۆین ئیتر شه‌کرمان له‌کوێ بوو!؟ ماڵی مام قادریش هیچ! ته‌نها ماڵێک مابوو ئه‌ویش پێیان وت: به‌خوا ته‌نها به‌شی چای به‌یانیمان هه‌یه‌.. بچۆ بۆ ماڵی فڵان که‌س، بزانه‌ ئه‌وان ....
ناچار ڕووی له‌وێش کرد، پێیان وت: گه‌ر کڵۆت ده‌وێ هه‌مانه‌.
- ده‌ به‌قه‌ده‌ر ئه‌و کوپه‌مان به‌قه‌رز بده‌نێ.
که‌ شه‌کر گه‌یشت و نه‌گه‌یشت، دانیشتین بۆ چا خواردن، له‌ده‌رگا درا. سواڵکه‌ر بوو داوای شتی ده‌کرد!
-----------
ڕۆژ و مانگ و ساڵی ونه‌.

١٦) دایڵۆگ
- ده‌بێ هه‌مومان ئه‌و جله‌ له‌به‌ر بکه‌ین.
ته‌نه‌که‌ چه‌وه‌که‌ی سه‌ره‌ی خۆی به‌قوڕگی خه‌باته‌که‌دا کرد.
- ئه‌وه‌ خۆ به‌ده‌سته‌وه‌دانه‌!
- ئه‌گه‌ر له‌سه‌ر کار یان له‌ناو بازاڕ نه‌گیرێین، ئه‌وا له‌ماڵ دێنه‌ سه‌رت، یه‌خه‌ت پێده‌گرن. ئه‌ی ئه‌وه‌ نه‌بوو تۆزێ له‌مه‌وبه‌ر سێ جل قه‌رسیلییه‌که‌ ماڵ به‌ماڵ ده‌گه‌ڕان و ناویان ده‌نووسی. به‌ژنانیان ده‌ووت: با پیاوه‌کانتان سه‌ر له‌باره‌گای(حه‌تین)* بده‌ن!
- دنیای لێهاتۆته‌وه‌یه‌ک!

سێباره‌ ته‌نه‌که‌ چه‌وه‌که‌ی فڕاند، قڵپانده‌ قوڕگی خه‌باته‌که‌وه‌.
- با هه‌ر ناو بنووسێ، ناچم خۆ ده‌دزمه‌وه‌. به‌مناڵه‌کانت بڵێ؛ پیاومان نییه‌، عه‌سکه‌ره‌، معه‌وه‌قه‌، چه‌نده‌ها فڕوفێڵی تر هه‌یه‌ بۆ خۆ ده‌ربازکردن. یان مناڵه‌کان ئاگاداربکه‌ره‌وه‌، هه‌ر که‌ سه‌روساختیان ده‌رکه‌وت، خۆ ون بکه‌.
که‌ لای خه‌باته‌که‌ گه‌ڕایه‌وه‌:
- فایده‌ی نییه‌! که‌ره‌تێ دوو سێ، هه‌ر به‌ته‌ڵه‌وه‌ ده‌بین.
- ڕاسته‌، حه‌ل نییه‌. به‌ڵام ده‌کرێ به‌ره‌نگاربیته‌وه‌.
- به‌ره‌نگاربوونه‌وه‌ به‌ته‌نها ملشکاندنی له‌دوایه‌.
- ڕاسته‌، به‌ره‌نگاربوونه‌وه‌ به‌کۆمه‌ڵ و ده‌سته‌جه‌معی و قسه‌کردن به‌یه‌ک....

وه‌ک ئه‌وه‌ی قسه‌کان گه‌یشتبێته‌ باریکی مه‌ترسیدار، بۆیه‌ به‌پێکه‌نینه‌وه ‌، وتی:
- داری ١٩٧٥ به‌قنگمه‌وه‌یه‌.
تێگه‌یشتم مارانگه‌سته‌یه‌ و ده‌سڵه‌مێته‌وه‌، له‌گه‌ڵ ئه‌وه‌یشدا حه‌لی ئه‌وه‌ڵ و ئه‌خیر به‌ره‌نگاربوونه‌وه‌یه‌، له‌وبڕوایه‌دام رۆژێ دێته‌پێش شایه‌تمان به‌قسه‌کانمدا بهێنێ، ئه‌وکات مه‌رحه‌بایه‌کی ده‌که‌م.
---------
* حه‌تین ناوی یه‌کێ له‌باره‌گا (جه‌یشی شه‌عبی)ناوزراوه‌کانی حکومه‌تی عه‌ره‌به‌ به‌عسییه‌کان بوو.
ڕۆژ و مانگ و ساڵی ونه‌.

١٧) ڕادیۆ
که‌ مناڵ بووم، باوکم ده‌بینی؛ شه‌وانه‌ تا خه‌وی پیاده‌که‌وت میلی ڕادوێ گه‌وره‌ ڕه‌نگ قاوه‌ییه‌ چه‌ند مه‌وجییه‌که‌، که‌ به‌پاتری ئیشی ده‌کرد، باده‌دا و زه‌لاله‌تی بوو به‌ده‌ستییه‌وه‌، هه‌ر بایده‌دا. له‌سه‌ری هه‌موو سه‌عات و نیوسه‌عاتێک به‌تاسه‌وه‌ گوێی بۆ ڕادوێ عه‌ره‌بیزمانی ده‌نگی ئه‌مه‌ریکا و له‌نده‌ن(BBC) و ئیسرائیل ده‌گرت ، جارجاریش له‌ده‌ستی ده‌رده‌چوو ده‌یخسته‌ سه‌ر مۆسکۆ.
جا له‌وکاتانه‌دا چ قودره‌ت بوو من و دایکم بوێرین قسه‌ یان کارێکی وابکه‌ین ببێته‌ مایه‌ی لێتێکچوون و گوێ لێنه‌بوونی دێڕێک له‌هه‌واڵه‌کان! پڕی ده‌دایه‌ هه‌ر شتیکی نزیک لێوه‌ی؛ سه‌رین، ته‌پڵه‌کی جگه‌ره‌، پاکه‌ت و شاقارته‌ به‌تایبه‌تی به‌زۆری ده‌یگرته‌ من!

دایکم له‌و حاله‌ نائاساییه‌ قه‌ڵس ده‌بوو، ده‌یکرد به‌بۆڵه‌بۆڵ:
- خوابه‌زیادی خێری نه‌کات! ئه‌وه‌ باش بوایه‌ نه‌تده‌کرد!
زۆرجاریش خزم و که‌س و کار و ئاشنایان ده‌یاندا به‌گوێیدا:
- چییه‌ ناخۆشت کردووه‌! خۆ نان و ئاو نییه‌!
له‌وه‌ڵامدا زۆر به‌ساده‌یی ئه‌یووت:
- ئه‌ی چیبکه‌م؟

ئیتر ده‌چووه‌خۆ، ئه‌وه‌ی له‌دڵه‌وه‌ ده‌بوایه‌ بیڵێ، به‌ده‌م بۆی نه‌ده‌وترا؛ ( ئێ به‌ڵکوو باسێکی خۆشمان بکا، ئه‌ی ئه‌وه‌ نییه‌ ڕۆژانه‌ له‌و شاخ و داخانه‌ ته‌قوتۆق و کوشتوبڕ و فڕکانفرکانه‌، ئێره‌یان کردووه‌ به‌تاقیگای چه‌که‌کانیان، که‌چی که‌س له‌کوله‌که‌ی ته‌ڕدا باسی ناکا!)

له‌سه‌ر ڕێچکه‌ی باوکی ره‌حمه‌تیم به‌هه‌مان تاس و هه‌مان حه‌مام و هه‌مان خولیا زۆر جار له‌و خراپتریش، ئه‌گه‌ر ئه‌و ڕادوێکه‌ی له‌به‌ر گه‌وره‌یی بۆ نه‌ده‌جووڵا، من ئێستا که‌ ده‌چه‌مه‌ حه‌مام و ئاوده‌ستخانه‌ و ته‌نانه‌ت له‌کاتی پاڵکه‌وتنیشدا له‌گه‌ڵمایه‌، وه‌کوو ده‌ڵین؛ بستی به‌قه‌رز ناده‌م. ته‌نها له‌به‌ر یه‌کدوو دێڕ، کوڕه‌ دێڕێکیش بێت هه‌ر باشه‌، باس له‌نه‌هامه‌تی و کوێره‌وه‌ری خه‌ڵکی لای ئێمه‌ بکات. که‌چی هیچ! ئه‌بێ ئێره‌ ئه‌م هه‌موو فه‌زاحه‌ته‌ گه‌وره‌ و سامناکانه‌ی لێ ڕووده‌دات به‌لایانه‌وه‌ هیچ نه‌بێ؟ دوورگه‌یه‌کی که‌شف نه‌کراوه‌؟! یان ئه‌وه‌تا خۆمان عه‌قلمان پێناشکێ؟ له‌م باره‌یه‌وه‌ کارمان نه‌کردووه‌؟ سه‌یره‌! من بۆ خۆم له‌ئه‌وزاعی دنیا شاره‌زاترم وه‌ک له‌ئه‌وزاعی لای خۆمان! نه‌ک هه‌ر ئه‌وه‌ ده‌کرێ له‌سه‌ر ئه‌وان زۆر زانیاری بزانم و بڵێم و ته‌نانه‌ت وتاریشی له‌سه‌ر بنووسم که‌چی......
--------
ڕۆژ و مانگ و ساڵی ونه‌.
===========================================================
چیرۆکی زۆر کورت
٢٦ی نۆڤەمبەر ٢٠٠٩
فیل بەو زەبەلاحییەی لەمشک دەترسێت، دوور لەڕووی ژنان، عەیب نەبێت، دەڵێن ئەوانیش هەر لەمشک دەترسێن. کە لەهاوڕێکەم پرسی، زۆر نابێت ژنەکەی لێی جیابۆتەوە، فیل لەچی دەترسێت؟ لاشعوور وەڵامیدایەوە: لەژن!

بۆ کورد پیاوی تیایە؟!
٢٠١٣.٥.٢٠
چایخانەکە هەر ٣ بە ٤ مەترێک دووجا دەبوو، بە ئاسمانەوە تەلەفیزیۆنێکی تەنکی هەڵواسی بوو، لەسەر کەناڵی جزیرەی عەرەبی داینابوو، جاران کە دەهاتیتە ئەم شوێنانە لەگەڵ چاکە جامێک ئاوی ساردیان بۆ دەهێنایت، کەچی ئێستا دەبێت بیکڕیت. کەواتە چایچێتی ئێستا بەقازانجترە. زوو زوو سەری بەرز دەکردەوە، چاوێکی لە تەلەفیزیۆنەکە دەکرد. چاخۆرێک پرسی: بۆ نایخەیتە سەر کەناڵێکی کوردی؟
ــ : کوردییەکان هەموویان درۆ دەکەن!
ـــ : چۆن چۆن؟!
ــ : بۆ کورد بەشەری تیایە تا ڕاستی تێدا بێت!؟
ـــ : نا.. نا لە خۆت بڕوانە ئەوە نییە بەرەنجی شانی خۆت کار دەکەیت.

هەر خوا تەنها نییە!
٢٠١٣.٥.١٨
سەرى بەسەر كتێبەكەدا شۆر كردبووه، كه ئەو له ناكاو پەيدابوو، گەيشته ئاستى، وتى:
هاتووم تەنهايت بڕەوێنمەوه.
-: جا كێ دەڵێت تەنهام؟!
-: با هەر كە بێرەدا تێدەپەرم وەک خوا تەنها دەتبينم.
-: نا بەپێچەوانەوه تۆ ئێستا تەنهايت بۆ هێنام و تةنها نەبووم
کە ئەم چيرۆكەى بۆ ئەوێکی تر گێڕايەوه، ئەویش تێگەیشت، پرسی:
كەواته هەمان دۆخ دووبارە بووە و هاتنم بۆ لات تەنهايم بۆ هێنايت؟
بە شێوەيە لە شێوەكان تەريق بووه، بۆیە بە ئیحراجییەوە، وتى:
نانا!! له هەموو هەورێک باران نابارێت، قەرەباڵغیت هێنا.
هاکات لە دڵى خۆيدا وتى: تۆش خوێندنەوەت لێ تێكدام، خێرت نەنووسين.

سێکسی سیاسی!
٢٠١٣.٥.١٤
ژمارەیەک لەلایەنگرانی پارتەکان دایلۆگ و شەڕە دەمیان بوو، هەموو زەمیان لەسەر ئەوی دییان دەکرد، خەریکی گرەو و سوێند و تەلاق خواردنیان بوون لەسەر ئەوەی حیزبی خۆیان لە هەڵبژاردنی داهاتوودا دەیبەنەوە. یەکێک لە لایەنگرانی ئۆپۆزسیۆن زۆر قەڵس بوو بە قسەی ئەوی بەرانبەر و گەیشتە تینی، وتی: ئەگەر ئێوە بردتانەوە، شەر بێت بەشەرتی خوا گانێک بدەم بە مام جەلال.
ئەویش وتی: جا بۆ دەیدەی بەو بیدە بە من، ناویشم جەلالە...

تەعداى ئەدەبى
٢٠١٣.٥.١١
لةبةردةم گةراجى ماليك تويتا جووتيارييةكةى راگرتبوو، خاوةن مال بةتورةييةوه زةنگى بؤ ليدا كة هات نة داواى ليبووردنى كرد، بةزةمكردن و بيباكانةوه وتى: مامؤستام جا قةيچيكا، مالت هةيه باخيرت بؤ خةلكيش هةبيت.

كور بوون!
٢٠١٣.٥.٩
بو چاپاليو خؤى كرد بةماركيتيكدا، كاتى بة كچيكى فرؤشيارى وت نؤمالين و پيويستى بة شتيكى وايه، ديار بوو كچةكه له هاتنه ژوورةوةدا باش له سةروسيماى رواني بوو، بؤيه وشةى نؤمال له مرؤڤيكى بةتةمةنى وا نةشياو و مايةى سةرسوورمانى بوو، لىپرسى؛ تؤ و نؤمالى؟!!
كاتى زانى كريارةكه له دةرةوةى ولاتةوه هاتؤتةوة. پيدةچوو گالتةى بةعةقلى بيت، وةك بؤ خؤشى بدويت بةدةنگى بةرز وتى: گةر كور دةبووم، دةميك بوو له دةرةوة دةبووم.

ژنه داگيركەرەكان!؟
٢٠١٣.٥.٨
وتى خةوم پێوه بينى له دوورةوه بةبالاى بةرزةوه خؤى نيشاندام، بى ئةوةى قسةيةك بكات و بمدوێنێت.
ئةو دريژةى به قسةدا؛ سةير بوو، هةرگيز خةوم بةمردووه نزيكة پله يةكةكانى وةك خةسووم دايكم و برا شةهيدةكةم نةبينيووه! بؤ خةو بة شةوبؤى ژنة كؤچكردووةكةمةوه دةبينم!؟

تەنها ٥ هەزار!
٢٠١٣.٦.٤
یەکێک لە دەموچاوە ئاشناکانی شارەکە بوو، دیمەنی جلوبەرگەکەی نۆرماڵ نەبوو، سەرەتا چووە لای سێ گەنج دەستی بەرماڵیانە درێژ کرد، ئەوان زانیان چی دەوێت، ئەم لای خۆی بڕێکی دانابوو لەوە کەمتریان بۆ دەرهێنا، بۆیە وتی ٥ هەزار دوو سێ جار دووبارەی کردەوە، ئەوان بۆیان بووە پرسیار و زەردەخەنە. لەوان پەڕییەوە بۆ سێ گەنجی تر، هەمان داوای هەبوو، کە زانی چاوی لەملاولەولاوە لەسەرە و بۆتە مایەی پێکەنین و قاقالێدان، درێژەی بە کاسبییەکەی نەدا و وتی: خوا ڕزقتان بدات و بەزیاد بێت.

چیرۆکێکی سەخیف
٢٠١٣.٨.١٧
هاتنی هاوڕێکەی کتوپڕ و چاوەڕوان نەکراو بوو، بەڵام ناچار دەبێت پێشوازی لێ بکات، نزیکی دەدوانزە ساڵ لەمەوبەر لەیەکتر دابرا بوون، ئەم لەو سەر و ئەو لە ناوەڕاستی گۆی زەویدا، هەر چەندە یادگاری ناخۆشی لەگەڵ هاوڕێکەیدا زۆر بووە، کەچی لە دڵسافی خۆیەوە تامەزرۆی بینینی بوو، بەخۆی وت: لەوانەیە گۆڕا بێت و ئێستا مرۆڤێکی کراوە بێت، کلتووری ئەورووپی کاریگەری لەسەر دانا بێت.
بەڵام هەی هات، هەی هات سڵقئاسا ڕووت بوو، تەنانەت گوڵێکی لەگەڵ خۆیدا وەک دیاری نەهێنا بوو، یەکسەر زانی کە نەگۆڕاوە، شێر نەبوو، ڕێوییەکی لەر و گەروگول بەرەو ڕووی هاتووە.

مەسعەد تەلەفوون دەکوژێت
سێشەممە ٢٠١٣.١١.١٢
ئێوارەی ڕۆژی ٢٠١٣.١١.١٠ دوای ئاهەنگی ڕۆژی باوکان دەوروبەری کاتژمێر ٨ بەیاوەری هاوسەری چوون بۆ سەنتەری وەرزش، دەرگای چوونە ژوورەوەی سەرەکی بەهۆی پشووی هەفتەوە ١شەممە داخرابوو، ناچار لەگەڵ کوڕ و کچێکدا کە ئەوانیش لەو کاتەدا پەیدابوون، لە دەرگایەکی ترەوە ٦ قات تەپەتەپ بەقڵدرمە سەرکەوتن..
زیاتر لە کاتژمێرێک وەرزشیان کرد، ئۆتۆماتێک بە مەسعەد ویستیان بێنە خوارەوە، بەرەو ماڵ، دەرگا کرایەوە کە چوونە ئەودیوەوە کاتژمێر ٩،٤٥ بوو، دەستیان نا بە دووگمەی هاتنە خوارەوەدا، ئاکتیڤ نەبوو نەجووڵا، چەند جاری تر هەمان کاریان چەند بارە کردەوە، دوگمەکانی تر، سوودی نەبوو.
زەنگیان بۆ کارمەندێکی ناسیاویان کە لە سەنتەرەکە کار دەکات لێدا، وتی: بەتەلەفوون پەیوەند بەچاودێرەکانەوە دەکەم، لەم بەینەدا ناچاربوون دەست بە دوگمە و زەنگی فریاکەوتن بنێن، کە وەڵامیان دایەوە تێگەیەنران کە مەسعەدەکە جام بووە، یەکێکمان خەریکە تەنگەنەفەس دەبن، ژمارەی تەلەفوونی دەستییان وەرگرت.
یەکێکیان دەستی بەشەق هەڵدان لەدەرگا کرد تا بەڵکو ئەوانەی لەسەنتەرەکە ماونەتەوە لە دەرەوە دەست بنێن بە دوگمەدا و بکرێتەوە، بێسەمەر بوو، کە زەنگی تەلەفوون لێدرا، دەنگی ژنێک بوو، ئەوەی پێ ڕاگەیاندنن ئارام بن پاش ٢٥ خولەکی تر دەگەنە لاتان، ئیتر ترسی مەرگ و غایلەی ناخۆش تر کۆنترۆڵی هەردوو کیانی بەتەواوەتی کرد. بۆیە چەند جار دەرگایان بەر شەق دایەوە، هیچ وەڵامێک نەبوو.
پیاوەکە ویستی دووبارە تەلەفوون بۆ کارمەندە ناسیاوەکە بکاتەوە، دوگمەی سەوزی تەلەفوونە ئایفۆنەکە ئاکتیڤ نابێت، ئەوەندەی تر ترسی لەناوچوون بەرز بووە، نەک دوگمەی ڤایبەر بەڵکوو هیچ دووگمەیەکی تەلەفوونەکە ئاکتیڤ نەدەبوو، ئەوە ئەو کاتەیە کە لێی دەترسان و باڵە فڕەی مەرگ بەسەریانەوە دەسووڕایەوە.
دووبارە دەستیان نایەوە بە زەنگی فریاکەوتندا، لەو کاتەی کە وەڵامیان دانەوە، دووگمەی پارک و ژێرزەمین لەخۆیەوە ئاکتیڤ بوو، مەسعەد جووڵا و بە ئینفۆی فریاگوزاریان وت: ئۆخەی ئۆخەی ئەوە هاتن بەدەنگمانەوە، کە گەیشتنە خوارەوە و دەرگا کرایەوە، کابرایەک بەجلوبەرگی تایبەتی کارەوە جانتا بەدەستەوە دەرکەوت، هەر ئەوەن نەبوون سەری کابرای فریاگوزار هەڵنەکەنن بۆیە زۆر بە توڕییەوە پیاوەکە وتی: مانای چی نانووسن کە ئەم مەسعەدە کار ناکات، چوونکە کارمەندی سەنتەرەکە لە تەلەفوونەکەدا وتبووی؛ ماوەیەکە مەسعەدەکەمان باش کار ناکات و خراپ بووە زوو زوو جام دەبێت. کابرای فریاگوزار، لەوەڵامدا، وتی: لە کاتژمێر ١٠ ئۆتۆماتیک مەسعەدەکە دادەخرێت و لە جووڵە دەکەوێت.
کە لە ئاپارتمانەکە هاتنە دەرەوە هەستیان کرد سەرتاپای گیانیان لە ئارەق نیشتووە، ویستیان تەلەفوون بۆ ماڵ و کەسوکار بکەن، تەلەفوونەکە لە جیاتی ئەوان و لە ترسدا گیانی سپارد بوو، هەرچەند ئەملا کرد ئەولای پێکرا، لەحەوساڵان ڕاستببوەوە، کەواتە فاتیحا بۆ گیانی پاکی، تەمەنی کورتی بۆ ئەوان بەجێهێشت.

ليست هناك تعليقات:

إرسال تعليق