خەمی ڕۆژانە، کانوونی یەکەم ٢٠١١

AbasShiwan-عەباس شوان



پێنجشەممە ٢٠١١.١٢.٢٩ شۆڤێنییەت بەکوردی..!
 لە کوردستانی باکوور و لەنێو قوتابخانە سەرەتاییەکاندا، هەموو رۆژێک سەرەتای دەستپێکردنی وانەکان، سروودی نەتەوەی تورکی شۆڤێنی،  (بەختەوەرم کە تورکم). بە مناڵان دەڵێنەوە. مامۆستایەکی کورد کۆمێنتی لەو بارەیەوە ئەوەیە: ئێمە هەموو ڕۆژێک درۆ فێری مناڵان دەکەین، چوونکە ئەوانە تورک نیین کوردن.
     ئەمە جۆرێکە لەناڕەزایەتی، ئەلتەرناتیڤی ئەوەیە: گەر بەزمانی کوردی بخوێنن مانای دوورکەوتنەوەیە لە درۆ. بەڵام خوێندن بە کوردی لەو پارچەیە، گریمان گۆڕا و بوو بە کوردی. ئایا شۆڤێنییەتی تورکەکان نامێنێت؟ یان هەمان تاس و هەمان حەمام دەبێت، بەڵام ئەمجارەیان شۆڤێنییەت بە زمانی کوردی دەوترێتەوە و بڵاودەکرێتەوە! کە هیچ مەترسی لەوی پێشوو کەمتر نییە بەڵکوو ترسناک ترە!
     ئەزموونی کوردستانی باشوور لە سەردەمی داگیرکاری عەرەبەکان، ئەو بۆچوونە بەدرۆدەخاتەوە، خوێندن بەزمانی دایک هەبوو، بەڵام سیاسەت و ئەدەبیاتی شۆڤێنی لە ناو دووتوێی کتێبەکاندا پڕپڕ بوو! لە خوێندنگاوە پەڕیبووە بۆ ناو گۆرانی و مۆسیقا، هەموو بیرمانە ڕۆژانە سروودی (سەدام زێڕە)یان دەدا بە گوێی خەڵکیدا.
     کەواتە دەبێت وێڕای داواکردنی خوێندن بە زمانی دایک، داوای گۆڕینی هەموو ئەو پەرەگراف و دیدە شۆڤێنیانەی کە لە مەنهەجی خوێندندا هەیە. خوێندن بەکوردی قوڵکردنەوەی شۆڤێنییەت دەبێت، گەر ئەو پەرەگرافە شۆڤێنیانە لانەبرێت و نەگۆڕێت بۆ دەربڕینی مۆدێرن کە لەسەر بنەمای جاڕنامەی مافی مرۆڤ ڕۆنرابێت.


سێشەممە ٢٠١١.١٢.٢٧ ئارامی بۆ کریستیانەکان لە هەرێم نەما..!   

 ئەو ڕاپۆرتە زۆر دروست نییە، کریستیانەکان و ئەوانەی کە نائیسلامن هەمیشە نیشانە و ئامانج بوون. ئەو ڕۆژنامەنووسە جەنابی ئەوە نازانێت کە لە زاخۆ بەر لە ماوەیەک لەمەوبەر چی ڕوویدا، هەموو دوکانی ئەو غەیرە دینانەی کە خواردنەوە کحولییەکان دەفرۆشن سوتێنرا و تاڵان کرا. بۆیە ئەوە درۆیەکی گەورەیە کە بووترێت ڕۆژهەڵاتی ناوەڕاست بەتایبەتی هەرێمی کوردستان بۆ کریستیان ئارامە و شوینی حەوانەوەیە. زانیارییەکانی ناوخۆی وڵات وا دەڵێن لەدوای ڕووداوەکەی زاخۆوە کۆچ بەرەو هەندەرانی ئەو کریستیان و ئێزدی و .. زۆرتر بووە.
     جا واباشترە مەسعود بارزانی مەدالیاکەی کە لە ئیتاڵیا لەسەر ئەوەی داڵدەی کریستیانەکانی عێراقی عەرەبی داوە، یەکێک لە کەنیسەکان پێیان بەخشی، لێی بسەندنەوە.     گرێنتی نییە بەوەی ئەوە دووبارە نەبێتەوە. بەڵی ئەگەر ئەو کارە بە پیلان دابنرێت بە تیریک دوو نیشانە شکا. ئەمە دەمانبات بۆ قسەکردن لەوەی ڕووداوەکە بە دوکانی مەیفرۆشییەکان دەستی پێکرد.
     ئایا بەشێکی زۆری خەڵکی دەڤەرەکە و پارتە سیاسییەکان بەتایبەتی یەکگرتوو و پارتی لە خاڵی دژایەتی کردنی ئێزیدی و کریستان و کاکەیی و..هاو نەزەر و هاوبەش نیین؟  یەک دیدگا کۆیان دەکاتەوە ئەمان ئیسلام و ئەوان شتێکی تر. بۆیە لەم نێوەدا مەیفرۆشان کە غەیرە ئاینن زەرەریان کرد و لەداهاتووشدا زەرەر دەکەن. ئەمە لایەنیکی مەسەلەکەیە نەک هەموو.

------------  
بۆ بینینی گرتە ڤیدیۆیی ڕاپۆرتە هەواڵی کەناڵی تەلەفیزیۆنی بی بی سی فارسی بەناونیشانی (
اقلیم کردستان، مأمن مسیحیان عراق)  کلیکی ئێرە بکە.


سێشەممە ٢٠١١.١٢.٢٧ گۆڕینی دەستوور و یاساکان پێویستترە..!  
 ڕۆژنامەی تەرەفی تورکی دەڵێت: سەرەرای قسەی وەکیلێکی سەرۆکوەزیرانی تورکیا، کە پەیمانی دابوو ئەو کوردانەی کە بە تۆمەتی هاوکاریکردنی گرووپە یاخییە ڕادیکالەکان کە سەر بە ڕێکخراوە جەماوەرییەکان، گیراون، دەتوانن بەزمانی کوردی وەڵام بدەنەوە. 
     دادگا دەڵێت: با ئەو کاربەدەستە قسەی خۆی بکات، ئێمە گوێی پێنادەین، لەبەر ئەوەی خاڵێک لە یاسادا نییە باسی ئەوە بکات تاوانباران بە زمانی خۆیان لە دادگاکاندا بدوێن و وەڵام بدەنەوە.، تەنها زمانی تورکی فەرمییە. 
     کەواتە کوردانی ناوخۆی کوردستانی باکوور، بۆ نەهێشتنی ئەو بەربەستە یاساییانە دەبێت چی بکەن؟ ئەگەر لە هەموارکردنەوەی دەستووردا کارێک بۆ ئەو خاڵە نەکەن، ئازاد بوونی زیاتری زمانی کوردی کرمانجی دواتر دەکەوێت. واباشترە قسەی سەرزارەکی سیاسییەکان لە خشتەیان نەبات و دادێکیان نادات، وەک ئەو پەیمانانەیە وایە کە ئەمەریکییەکان دەیدەن و داویانە بە سیاسییە کوردەکانی کوردستانی باشوور، نووسراو نییە و دیکۆمێنت نەکراوە.

دووشەممە ٢٠١١.١٢.٢٦ عێراقی عەرەبی، هاوکێشەیەکی بێ یاسا..!   
چاودێرانی بێگانە پێیان وایە کە هەم سیاسییە ئاینزا سونی و هەم شیعییەکان، تا ئێستا دەستبەرداری ئامرازی تووندوتیژی نەبوون، بۆیە پێدەچێت ئەمیان یان ئەویان لە قۆناغێک لە قۆناغەکاندا کە کارە تووندوتیژییەکان وەک ئێستا بەرز دەبنەوە، یەکتر تاوانبار دەکەن، ڕاست و دروست بێت. ئەمەیش ناڕۆشنی و فەوزاو هەرجومەرجێک دەخولقێنێت، کە ناتوانرێت و ئاسان نابێت قسەی ستاندار لە بارەی دۆخ و هاوکێشەی سیاسی عێراقەوە بکرێت.

یەکشەممە ٢٠١١.١٢.٢٥ گەندەڵی لەسەرەوە ولەخوارەوە..!  
وەرە سەرت گوایە لە نوخبەی کۆمەڵگای کوردی نەئاوسێ! ئەم نەفەرە بەحساب ڕۆژنامەنووسە (کارزان کەریم)، جەنابی کارمەندی فرۆکەخانەیشە، خوا دەیزانی چی تریشە؟!. وەک گۆرانیبێژ هەردی سەلاح بەر لە چەند ساڵ لەمەوبەر دەرکەوت کە مووچەی پۆلیسی نهێنی ئاسایشیش وەدەگرێت! کاری ئۆپۆزسیۆن و میدیای ئازاد و سەربەخۆ ئەوەیە ئەو جۆرە گەندەڵیانەیش ئاشکرا بکات.
هەواڵەکە وەک لە ماڵپەڕی ڕۆژنامەی ئاوێنەدا هاتووە.
لەبەروێزی ئەم تێکستەی سەرەوەدا: بەڵێ دۆستێکی تر بەنامە هەمان بۆچوونی هەبوو وام وەڵام دایەوە:
     ئەوانە پیاوی پارتی و یەکێتین، زەلامیان هەیە لە چەندەها شوێن خۆیان نووسیوە و مووچە وەردەگرن. ئەوە گەندەڵییە.
ڕەگی گەندەڵی لە کوردستان لە ژێرەوە لەناو خەڵکەکەدا زۆر زۆرە، تۆ دیقەت بدە لەم ڕۆژانەدا کەناڵی ئێن ئار تی ڕاپۆرتێکی لەسەر گەندەڵی و واستە و واستەکاری لە سەر سەرەگرتنی لای دکتۆر بڵاوکردەوە!!
هەر ئەم گەندەڵییەشە وای کردووە وڵاتەکە پێشنەکەوێت. گەندەڵی لە خوارەوە و سەرەوە حەشر دەکات!
مام جەلال و مەسعود بارزانی شتیکیان بەسەر هات و کەوتنە تەنگانەوە بکەوینە شانامە هۆنینەوە بۆیان. بیرمان بچێت کە چییان بەخەڵک کردووە.
     خۆ ڕۆژنامەنووس بەتایبەتی ئەوانی بەسەربنەوە غەرقی ناو دەسەڵات بوون، چەندەها مووچە وەردەگرن، جاسووسی بەسەر خەڵکانی ترەوە دەکەن. تەقویییەتی مانەوەی دەسەڵات دەکەن! بەهەر شێوەیەک بێت دەسەڵات بەتایبەتی پارتی جوان دەکەن. 
مەبەستی لەوە نییە کە فڵان قابیلی پشتیوانییە یان نا، گرتنەکە بەو شێوەیە و هەڵوێست لەسەری، مەسەلەیەکی ترە.
بەڵکوو لەو خاڵەوە دەربڕینەکانم سەرچاوەیان گرتووە کە مەسەلەی گەندەلی میللی و شاراوەیە! هەر تاکێکی هەرێمی کوردستان دوور نیین لێی و بۆ ماشینەوەی موڵکی گشتی ئازان. 
     کە تەنگیشیان پیهەڵدەچنرێت ئەوا هەوڵ ئەدەن بیکەن بە مەسەلەیەکی سیاسی و گوایە هەوڵی ئاشکرا کردنی گەندەڵیان داوە..ئەوە کۆمیدیایە و گاڵتەجاڕییە. بەڵام بەکورتی و مسک خیتام، سەیری وەڵامی ئەم ڕۆژنامەنووسە بوێرە بکە، ئەو کات باشتر لەو جۆرە کەسانەی تێدەگەیت: 
.... ئەگەرنا، من ئەیانناسم ئەوانەی بەو جۆرە وەرئەگرن و ئەخۆن و ئەدزن.. چیڕۆکی ئەوان هەر زۆر گاڵتەجاڕییە و پیاو شەرم ئەکا هەر باسیان بکا..

هەینی ٢٠١١.١٢.٢٣  ئایا پەرلەمانی هەرێم قڕکردنی ئەرمەنەکان دەناسێنێت؟!  
  دوای ئەو بڕیارەی پەرلەمانی فەرەنسا کە لە بەرژەوەندی ئەرمەنەکان دەریان کرد، حکومەت و بەشی زۆری ڕۆژنامەکانی تورکیای بە خۆیەوە سەرقاڵ کردووە، فێیان لەخۆ هێناو دەستەواژەی سەیری وا بەکار دەهێنا، گەر یەکێک نەزانێت و نەیانناسێت دەڵێت چەند تورکەکان چەند میللەتێکی زووڵم لێکراو و گوناحن! هەر وەک کوردەکانی باکوور یان وەک پەناهەندەکانی ئەورووپا لەبەرانبەر دیاردەی ڕاسیزم، خۆ پیشان دەدەن!! بەمەیش درێژە بە کەرێتی و کەلەپووتی خۆیان دەدەن. بەوەی چۆن دانیان نا بە قڕکردنی ڕووداوی شاری دەرسیم، ئاوایش با دان بە قرکردنی ئەرمەنەکان بنێن. بەڵام پێدەچێت بەربەستی هزری ئایینی یەکێک لە خاڵەکان بێت وا بکات ئامادە نەبن دان بە جینۆسایدی ئەرمەنە کریستیانەکاندا بنێن! 
     ڕەجەب تەیب ئەردۆگان ١٩٥٤ جەهالەتی زیاتری خۆی لەم خاڵەیشدا نیشان دەداتەوە، لەسەر ئەو بڕیارەی پەرلەمانی فەرەنسا دێتە ئاستێکی زۆر نزم خەسلەتی ڕاسیزم و هەستی ئەنتی ئیسلام، جینۆسایدی عەرەبە جەزائیرییەکان دەداتە پاڵ فەرەنسییەکان! ڕوو دەکاتە سارکۆزی دەڵیت با باوکت بۆت بگێڕیتەوە و بڵی ئێوە چییان لە جەزائیر کردووە. بەمەرجێک زانیارییەکەی نادروستە، وەک فەرەنسییەکان وەڵامیان دانەوە. 
     نيكۆڵا ساركۆزییش ١٩٥٥ بە خوێن ساردییەوە ئاوا وەڵامی دەداتەوە: 
باشترە هەموو دەوڵەت و حکومەتێک بە ڕابردووی خۆیدا بچێتەوە و هەڵیبسەنگێنێت. وانەی کەس دانادەین، هەروەها وانەی کەسیش قبووڵ ناکەین. ڕێز لە دیدی هاوڕێیانی تورک دەگرین. تورکیا دەوڵەتیکی گەورە و حەزارییە، بەڵام پێویستە ئەوانیش ڕێز لە دیدمان بگرن.   
     ئۆرهان پاموک ١٩٥٢ نووسەری بەناوبانگی تورکی، خاوەن خەڵاتی نۆبڵ بۆ ئەدەبی ساڵی ٢٠٠٦، لە سەرەتای ساڵی ٢٠٠٧ دا دەبێتە یەکێکە لەو کەسانەی کە ڕووداوی کوشتنی بەکۆمەڵی ئەرمەنەکان (١٩١٥ بۆ ١٩١٧) کە لەلایەن تورکە حوسمانییەکانەوە ئەنجامدراوە، بە پرۆسەی جینۆساید قڕکردنی دەزانێت و دەناسێت. بەو هۆیەوە کەوتە بەر هەڕەشەی ناسیۆنالیستە تووندڕەوەکان ناچار تورکیای بەجێهێشت.
     ژمارەیەکی دی لە نووسەر و ڕۆژنامەنووسانی تورک ڕێچکەی نوسەری گەورەیان گرت و لە بەیاننامەیەکدا دانیان نا بەو  قڕکردنەکەدا. ئەگەر ئەدیب و نووسەران بە زەمیری ڕاستەقینەی میلللەت دابنرێت، ئەوا ئەوان ئازایەتی خۆیان پیشاندا و نواند میللەتی تورک ئەستۆی پاککردۆتەوە. بەڵام پارت و سیاسییە بەحساب ژیرەکانیان ئامادە نیین ئەو مەداڵیا پڕ بایەخە لە یەخەی خۆیان بدەن و دانی پیا بنێنن ئاو بکەن بە ئاگرەکەدا کە هەردەمەی لەگەڵ حکومەتێکدا تێک دەچن، و شەڕی دبلۆماسی لەسەر دەکەن!
     بەڵام ئایا بەڕاست کێشە مێژووییەکان کە زۆر زۆرن لەم گۆشە و ئەو گۆشەی دنیا ڕوویانداوە و ئەنجام دراوە، نموونەی وەک ئەنفاڵ لە کوردستانی باشوور، جوولەکەکان لە ئەڵمانیا، ئەرمەنەکان لە تورکیا و... هتد. کاری دەوڵەت و کەسایەتییە سیاسییەکانە، چارەسەری بکەن؟ یان ئەوە کاری میللەت و کەسایەتییە تایبەتمەندەکانی ئەو بوارە، بەتایبەتی مێژوونووسانە کە یەکلای بکەنەوە؟ ژمارەیەک پێیان وایە ئەو لووتژەنینانەی سیاسییەکان هەر عەیب و شوورەییە، لە نرخ و بەهای کارەساتەکان دەهێنێتە خوارێ و کەم دەکاتەوە. دەبێت میللەت خودبەخود خۆی ڕێگا نەدات و خۆی کۆنترۆڵ و سانسووری زاتی دروست بکات، فڵان و فیسار ڕێگا بەخۆیان نەدەن ئینکاری جینۆسایدەکان بکەن.
     وا پەرلەمانی ئیسرائیلیش هاتە بانی، پرۆژە بڕیارێکیان پێشنیار کردووە تا پرۆسەی قڕکردنی ئەرمەنەکان بە جینۆساید بناسرێت، بەو پێیە بێت ئەمان دەبنە ٢٥هەمین دەوڵەت کە دان بەو قڕ کردنەدا دەنێن. ئیتر تورکیا با هەر لەورگی خۆی بدا.
----------------
هەمان وتار لە ماڵپەڕی سبەی دا


هەینی ٢٠١١.١٢.٢٣ ڕۆشنبیران کام مێتاڵن...!
 بۆچوونێک هەیە، دەڵێت لە هەر یەکێکماندا بەتایبەتی ڕۆشنبیر و کەسایەتییەکانی نزیک لەو کایەیە، رەگێکی دیکتاتۆری و خێلەکی و بنەماڵەیی و .. تێدایە و هەیە.
     دەربرینی هاوشێوەی وا هەبووە و هەیە .. ئەوەی وتراوە گریمان لە ڕۆژهەڵاتدا بوونی هەیە، کە زیاتر کلتووری تووند و تیژی کۆنترۆڵی زۆر لە کایەکانی ژیان کردووە. ئەی بۆ کۆمەڵگا ڕۆژئاواییەکان ئەوانیش هەموویان نا، بۆ نموونە وڵاتانی ئەسکەندنافییە کە بە وڵاتی خۆشگوزەران دادەنرێن و ناسراون.. بەوەی کە ڕێژەی دیکتاتۆرییەت و خۆزاڵ کردن لەچاو وڵاتانی تر و کلتووری تردا کەمترە.  کە هەر لە قۆناغەکانی دایەنگا و باخچەی مناڵانەوە، بەگیانی لێبووردەیی و ئیعتمادکردن بە نەفس و خود و...، ڕادەهێنرێن، چی؟
     نموونەی وەک ئیتالیا و ئیسپانیا و یۆنان و ڕووسیایش هەیە. کەسێکی وەک دۆستۆفسکی لە وڵاتێکی وەک رووسیا ژیاوە دیکتاتۆرییەتی تا زاڵ بووە، نەفی کردنی بۆ سیبریا یەکێک لە حوکمە تووندەکان بووە. بۆیە زیاتر بە ئێستاشەوە نزیکە بە ڕۆژهەڵاتی ئیستبدادی.


چوارشەممە ٢٠١١.١٢.٢١
 دەبڕینە پیسەکان...!
 دیقەت بدەن: کوردی مەرد لە باکوری کوردستان، چەند ناونیشانێکی سەیرە! بەراست کوردی مەرد هەیە؟ مەرد بە چ مانایەک؟ لە چ دیدێکەوە؟ دەکرێت وا لێک بدرێتەوە کە تەنها لەوێ لەو پارچەیە کورد مەردە!! کوردەکانی پارچەکانی تر نامەرد و شتێکی تر بن؟!!!.. یان تەنها چەکدارەکانی پێ کە کە و ڕێکخراوەکانی ئەو پارتە و ئەو پەرلەمانتارانەی لەم گرتە ڤیدیۆییەدا دیارن مەرد بن و باقییەکەی وەک ئەم گۆڤاری شەقام دەڵێت نامەردن! کەواتە زووربەی کوردی کوردستانی باکوور ئەو سیفەتە ناشیرینە دەیان گرێتەوە، چوونکە سیاسی نیین!
     مەرد بوون تەنها لە سیاسەتدا نییە، مەردەکان لەکایەکانی تری ژیان زۆرن. بۆیە وا باشترە بۆ جارەکانی تر ئەو دەربڕین و وشانە کە ئیهانەتئامێزان بەکار نەهێنرێن.
دایلۆگ لەگەڵ هاووڵاتییەکدا:


     ژمارەیەک لە باشوور هەن وەک کۆنە شیوعییەکانیان لێهاتووە ، لە مۆسکۆ باران بباریایە ئەمان لە چلەی هاویندا لە کوردستان چەتریان هەڵدەدا! 
     دەڕبینی شاری سلەیمانی پایتەختی ڕۆشنبیرییە لە ئەنجامی ململانێ لە نێوان شارەکاندایە بۆیە ئەوەیش نادروستە. قسە لەسەر جۆری دەبڕینەکەیە. ئەگینا خەڵکی بەهەڵوێست و ئازا و پڵنگ و هەڵۆ و لەهەموو شوێنێکدا هەس.
     نا ئەسڵەن زۆر سەقەتە، ئەوە وەک کافر و باوەردار بە دەربڕینە ئاینییەکە وایە، دەکرا وشەیەکی تر بوایە کە حەساسییەت دروست نەکات. لایەنێکی تر ئەوەیە ژمارەیەک لە باشوورییەکان خۆیان ون کردووە، وا دەزانن باشووری و ڕۆژهەڵاتیەکان هیچ سەروەرییەکیان نییە غەیری ئەوانەی باکوور نەبێت! ئیتر ئەوانیانیان لێدەبێت بە قارەمان و مەرد و هەزار وەسفی تر!
-----------
لە لاپەڕەی فەیسبووکی گۆڤاری شەقام دا ئەو ناونیشانە بۆگرتەیەکی ڤیدیۆیی کە هی یەکدوو کەسایەتی کوردانی باکوورە، دانراوە. تکایە بۆ بینینی کلیکی ئێرە بکە. 


دووشەممە ٢٠١١.١٢.١٩
 پەرلەمانتارێکی ئازا و هەڵوێستێکی...!
 پەرلەمانتار عەبدوڵای مەلا نوری (فراکسیۆنی بزووتنەوەی گۆڕان) ڕۆژی شەممە ١١.١٢.١٧ لەلاپەڕەی فەیسبووکەکەیدا لەسەر داخوانییەکی فازیل میرانی کە وتبووی مغامەرە بە نێچیرەوان بارزانییەوە ناکەین بۆ بەدەستەوە گرتنی دووبارەی پۆستی سەرۆکوەزیرانی حکومەتی هەرێمی پارتی و یەکێتی.
     ئەو بەرپرسەی پارتی تەقەی لە یەکێتی و ئۆپۆزسیۆن کردووە، لە یەکێتی بەوەی کە سەردەمی حکومەتی (دکتۆر بەرهەم ساڵح) ئەوان پڕ کێشە و ناسەرکەوتوویان هەبووە.. ئۆپۆزسیۆنیش بەتەوژمی  لیبرالی وئیسلامییەوە، لە دۆخێکی ناجێگیردان، هاوکات پەیامی ئەوەیان پێدەدات، وەرن لەگەڵ ئێمە لە حکومەتدا بەشدار بن.
     پەرەمانتاری ناوبراو، لە وەڵام بە فازیل میرانی تێکستێکی نووسیوە بە ناونیشانی: پارتی مغامەرە بەخەڵکی کوردستانەوە دەکات، بەڵام بە نێچیرەڤانەوە ناکات. بەلای ناوبراوەوە باشترە کەسایەتییەکی بەهێزی وەک نێچیرەوان دابنرێت، ئەگیانا ئەوەی پارتی دەیکات گوایە بەلای بەڕێزییانەوە لە بەرژەوەندی باڵای خەڵکی کوردستان و برۆسەی چاکسازیدا نییە!! (..لە سەروى بەرژوەندیە باڵاکانى خەڵکى کوردستانەوەن بەڵام راستى ئەوەیە هیچ بوار و پرسێک لە چاکسازى گرنگتر نیە بۆ هەرێم... وا دیارە پارتى... موغامەرە بەخەڵکى کوردستانەوە دەکات...  عەبوڵای مەلا نووری /لاپەڕەی فەیسبووک)
     سەیرە پەرلەمانتارێک لە هۆڵی پەرلەمان بەدەنگی بەرز و لەبەرچاوی کامێراکان بە سەرۆکی پەرلەمان (کەمال کەرکووکی) کە هەموو دەزانیین لە خوین زەردەکانە، بڵێت: خۆت حیزبەکەت دیکتاتۆرن، ئەم قسە و دەربڕینانەی لەچی؟!! 
     دەکرێت پەیڤینەکانی فازل میرانی بەجۆرێکی تر لێبدرێتەوە، وەک وەڵامدانەوە یان نیشانەی ئەو فشارە بێت کە لەدوای ١٧ی شوبات دواتر ڕووداوەکانی دەڤەری باهدینان و هەوڵی هێزە ئۆپۆزسیۆنەکانەوە کرایە سەریان، بەتایبەتی پارتی. 
     لە ناڕەزایەتییەکاندا یەکێک لەو ڕەخنانەی کە لەو پارتە دەگیرا، ئەوە بوو چۆن دەبێت بنەماڵەیەکی دەستڕۆیشتوو وەک بارزانییەکان، هەموو پلەوپایە باڵاکانی (حکومەت سەرۆکی هەرێم مەسعود بارزانی + سەرۆکوەزیران نێچیرەوان بارزانی) لەوان بێت و داگیری بکەن؟؟  هەموو بیرمانە هەزارەها واژوو کۆکرایەوە بۆ دەست لەکارکێشانەوەی مەسعود بارزانی. 
     جا ئەو قسانەی فازڵ میرانی جۆرێکە لە بەگدانان و پاشەکشەکردن، بەبیانووی بێبنەمای ئەوەی گوایە مغامەرە بە نێچیرەوانەوە ناکەن، هاوکات ئەوە نازکردنە بەسەر خەڵک بەگشتی
      سەیرم لێدێت پەرلەمانێکی ئازا بە ناوی بەرژەوەندی خەڵکی کوردستان دەیەوێت هەیمەنەی ئەو بنەماڵەیە درێژەی هەبێت وهەر بمێنێت دووبارە نێچێروان بارزانی ببێتەوە بە سەرۆکوەزیرا!!؟؟ هاوکات ئەمە پەیامێک دەدات یان وا دەخوێنرێتەوە، بەڵی پارتی  حکومەتی پێشووی ئێوە باش بووە و حکومەتکردنیش هەر لەخۆتان دێت!!
     پەرلەمانتار عەبدوڵای مەلا نووری هەر لەم دایلۆگەدا دەزانێت ئەو دەربڕینانەی پێشووی هەڵە و نادرست بووە بۆیە دێت بۆ قەرەبووکردنەوە، پێچدەکاتەوە و ئەلتەرناتیڤی هەڵبژادنی پێشوەخت دەخاتە ڕوو: (.. ئه‌گه‌ر پارتی‌ شان نەخاته‌ ژێر به‌رپرسیارتی‌ وه‌رگرتنه‌وه‌ی‌ حكومه‌ت ئه‌وا ڕێگای‌ دروست ئه‌وه‌یه‌ ئاماده‌سازی‌ ته‌شریعی‌ و ته‌نفیزی‌ بكرێت بۆ ئه‌نجامدانی‌ هه‌ڵبژاردنێكی‌ نه‌زیهی‌ پێشوه‌خت.. ماڵپەڕی ڕۆژنامەی هاوڵاتی/ ڕۆژی ١١.١١.١٩)
--------------
هەمان بابەت لە ماڵپەڕی سبەی دا
ناونیشانی لاپەرەی فەیسبووکی پەرلەمانتار عەبوڵای مەلا نووری

یەکشەممە ٢٠١١.١٢.١٨ ئەو کاتەی خانمێک ئازایانە لەبەردەم کامێرا حیجابی ئیسلامی فڕێ دەدات
 بەداخەوە ئەم حاڵەتانە زۆر کەمن یان ئەوەتا تێشکی ڕاگەیاندن لەسەری نییە و لاوازە. لایەنگرانی ئیسلامی سیاسی بۆ خۆیان چالاکترن! بۆ نموونە یەکێک بە هەر هۆیەکەوە بێت دەبێت بە ئیسلام و لە ئاینەکەی خۆی هەڵدەگەڕێتەوە دەیکەن بە هەڵا بەمەیش فەرزی هەقانییەتی ئایینی خۆیان بەسەر ئایینەکانی تردا دەدەن!
     هەر ئەوان هەرگیز باسی ئەو ژمارە زۆرە لە خەڵکی بە ئایین ئیسلام ناکەن کە دەبن بە کریستیان یان ئاتائیست و.... پێدەچێت ئەم حاڵەتە ناوازەیە یەکێک بێت لە دەسکەوتی ڕاپەڕینەکانی بەناو بەهاری عەرەبییەوەیە..
پوختەی چاوپێکەوتنەکە:
     هێندەی زانراوە کەناڵەکە سەر بە گروپێکی ئایینی کریستیانەکانە بە زمانی عەرەبی پەخش دەکات. لە تابلۆی یەکەمیدا و لە قسەی خانمەکەیشدا دەردەکەوێت کە کریستیان بووە، بۆ ماوەی پێنج ساڵ بۆتە ئیسلام و چۆتە سەر ئەو ئایینە، لە دوای بەدەستهێنانی چەند بەڵگەنامە کە دەیانخاتە ڕوو و باش لە ئایینی ئیسلام گەیشتووە، دووبارە هاتۆتەوە سەر ئایینی یەکەمی، وەک دەڵێت بەهۆی قووڵبوونەوەی لەو ئایینە گەیشتۆتە قەناعەت کە حیجاب بۆ ژنان لەو ئایینەدا وەک زیندانێک وایە، بۆیە لە خۆی دەکاتەوە و ئەو بڕیارەی داوە.
     مانایەکی دی دەکرێت لەم چاوپێکەوتنەدا بەدەست بهێنرێت ئەوەیە: شەڕی نێوان ئایینەکان بەهۆی هەڵپەی ئیسلامەکانەوە بۆ کۆترۆڵکردن وا دەکات، باوەڕدارانی تری ئایینەکان بەتایبەتی کرییستیانەکان، وەڵامیان هەبێت و ململانێی تووند  دەست پێبکات و گەرمتر بێت. کوردانی ئەورووپانشین هەست بەو مەترسییە بە ڕوونی دەکەن.
     شتێک گرنگە پێویست باس بکرێت، مەسەلەی دەرکەوتنی پرچ و کەزییەی خانمانە لە نێو ئایینەکاندا، کابرای پێشکەشکار ئاماژەی پێدەدات کە لە ئایینی کریستیانەکاندا و لە دەقە پیرۆزەکانیاندا باس لە قەیدوبەندێک ناکرێت کە وەک لە ئایینی ئیسلامدا هەیە و ژن دەبێت سەری داپۆشێت و کەزییەی بەدەرەوە نەبێت. ئەمەیش دەمانگەڕێنێتەوە بۆ زانستی بەراوردکاری نێوان ئایینەکان، تا بزانیین کامیان لە کامیان کراوەترن و کامیان لاسایی ئەوی تری کردۆتەوە و کامیان... هتد.

شەممە ٢٠١١.١٢.١٧ هەژموونی فلان گەل و حیزب و دەربڕینەکان!
 ڕۆژی پێشمەرگەی کوردستانی ڕۆژهەڵات کە زیاتر هێندەی زانراوە هی حیزبی دیموکراتی ئەو پارچەیەیە. ئەو ڕۆژە لە هەموو ئەو خەباتکارانەی کە بەجۆرێک لە جۆرەکان بەشداریان کردووە و پێشمەرگە بوون پیرۆز و جێی شانازی و سەربەرزیە. بەڵام ژمارەیەک لە کەسایەتییە دەرکەوتووەکانیانی ئەو پارچەیە بەمەبەست یان بێ مەبەست دەنووسن: ڕۆژی پێشمەرگەی کوردستان! کێشەکە و کێماسییەکە لێرەدایە! ئایا باشتر نییە لە دەربڕینەکەدا وردتربن؟ ئایا مەبەست لە کام کوردستانە؟ یان مەبەست لە کام ڕۆژی پێشمەرگەی فڵان پارتییە؟ گەر لۆجیکیانە بڕوانیین چەند کوردستان هەیە و لەهەر یەکەیاندا چەند تەوژمی سیاسی هەیە، ناکرێ بەهۆی هەلومەرجی سەخت و داسەپاوەوە کە بەسەر هەر گەلێک لەو گەلانە سەپاوە، هەر پارتێک بێت و بۆنەیەک لە بۆنەکان بکاتە بۆنەی گشتی و نیشتمانی بێ ئەوەی رێکەوتی هەموو لایەنەکانی تر و خەڵکی لەسەر بێت.
     کەواتە ئەو گشتگیرییە وا لێکدەدرێتەوە و  دەخوێنرێتەوە کە ئەو پارتە یان ئەو گەلە دەیەوێت هەژموونی خۆی بەسەر پارت و گەڵانی تری کورد زاڵ بکات، کە بڕوا ناکەم کەسی کراوە قبووڵی دەربڕین و کارێکی وا بکەن. باشترین ڕێگایەک بۆ دەربازبوون لەو دۆخە لەبەرچاوگرتنی ئەزموونی سیاسی هەنووکەیی کوردستانی باشوورە، کە لە بەرانبەر زاڵی بنەماڵە و یەکدوو پارت خەڵکەکە وەگیان هاتوون
----------
ڕۆژی پێشمەرگە، 
ڕێکەوتی ١٧ی ١٢ی ١٩٤٥ بەرانبەر ٢٦ سەرماوز، بۆ ڕیزلێنان لەو ڕۆژەی کە لە کۆماری مهاباد بۆ یەکەمجار ئاڵای کوردستان هەڵکراوە و بەرزکراوەتەوە.


پێنجشەممە ٢٠١١.١٢.١٥ لێکترازان وەک وانەیە بۆ بەئاگاهاتنەوە!
 دەمێک بوو گوێمان لە جیابوونەوەی و لێکترازانە یەک لە دوای یەکەکانی ناو گرووپە چەپە خۆ بە ڕادیکاڵزانەکانی فارسەکان نەبوو، کە بەردەوام کڵاویان ناوەتە سەر بەشێک لە چەپەڕادیکاڵەکانی هەرێمی کوردستان، پرسیار ئەوەیە تا کەی چەپە ڕادیکاڵە کوردەکان عەقلی خۆیان بە خەسار دەدەن و دەدەنە دەست ئەوان!! بەمەرجێک ئەوانە ئاوارەی ئەورووپان، بەڵام ئەمان خۆیان خانەخوێن و خاوەن ماڵن و لەنێو جەماوەردا بە گۆشتوخوێنەوە کار دەکەن و هەڵدەسووڕێن.
     ئەگەر کۆن بەهۆی گەمارۆی سیاسی و ئابووری ناچار بوون ئیلهام لە فارسەکان وەربگرن، بیان کەن بە خوای خۆتان و هەر خەریکی ئەشهەدو بن و وەک پلیس قسەکانی ئەوان بە پراتیک بگەیەنن! ئێستا بەهۆی بەهاری بەناو عەرەبییەوە، هاوکێشەکە گۆڕاوە و دەرگا ئاوەڵاترە بۆ پەیوەندی نێونەتەوەیی لەگەڵ چەپەکانی ئەو دەوڵەتە عەرەبیانە. بەڵام ئەزموونی تاڵ لەگەڵ فارسەکاندا لەبیر نەچێت و بەرچاو بێت و نەبنە داشی دامەی ئەمانیش، بەڵکوو نەک یاریزان بەڵکوو ڕابەریەتی کردنیان لە پێناو بەرزی هەرێم کوردستان و کەسایەتی خۆتاندا.
--------------
ڕۆژی پێنجشەممە ٢٠١١.١٢.١٥ لە بەیاننامەیەکدا حزبی حکمەتیست کە پارتێکی چەپە بەشێک لە فارسە ئاوارەکانی ئەورووپایە، ٥ کەس لە ئەندامانی مەکتەبی سیاسیان جیابوونەوەی خۆیان ڕادەگەیەنن.

چوارشەممە ٢٠١١.١٢.١٤ دێوجامە!

 عارف قوربانی، لە وتارێکیدا بە ناونیشانی: لێ گەڕێین ئاگرەكە پەرەبسێنێ؟ ڕۆژی سێشەممە ٢٠١١.١٢.١٣ لە ماڵپەڕی (Aknews)دا بڵاوبۆتەوە. هاتووە بە جۆرێک لە جۆرەکان بۆ پارتی دەپاڕێتەوە، گوایە مەترسی دەرەکی هەیە، هاوکات ڕۆشنبیرانی لەم کێشەیەوە تێوەگلاندووە، بە ئاگرخۆشکەر تۆمەتبار و وەسفیان دەکات!
     ئەو مەترسییە دەرەکییەی لە وتارەکەدا ئاماژەی پێدراوە، هەمیشە هەیە و هەبووە، بەڵام فاکتەری ناخۆیی بۆ فەرامۆش کردووە؟ پاش ئەو هەموو ئیهانەتەی لەلایەن پارتییەوە بە بزووتنەوەی گۆران و یەکگرتوو کرا، و لە شەڕی ناوخۆشدا بە یەکێتی کردووە. هێشتا بێدەنگ بن؟! هەر لە کۆنەوە کورد یەکەم بووە لە تێکدانی ماڵی خۆی، لەم سەردەمەیشدا ڕوو بەدەرەوە باسیان لە تەبایی و لە ڕێکخستنی ناوخۆی ماڵی کورد کردووە و دەکەن، ئەما لە پراتیکدا شتێکی تریان پیادە کردووە! ئەو جووت حیزبە هەمیشە لە بۆسەدان بۆ لێدانی ڕکەبەرەکانیان ئیتر بەشێوەی سیاسی و ئابووری و ... یان تووندوتیژی بووبێت. 
     جا وا باشترە تەنها لەم کێشەیە (ڕووداوەکانی دەڤەری بادینان)دا، ئەو دیوجامە دەرەکییەی نووسەر قووتی کردۆتەوە، ئەبوایە بەپلەی یەکەم ڕووی دەمی لە پارتی ئینجا یەکێتی بێت، با بفەرموون تەنازول بکەن و لە برجە عاجییەکەیان بێنە خوارەوە، هەر ڕووداوێکی نەخوازراو ڕوو بدات کیانە سیاسییەکانی تر کەمترین بەرپرسیارێتییان بەر دەکەوێت. کەواتە ماڵێکی ئاوا وێران و لێکترازاو تووشی هەر ئاستەنگ و ئاشبەتاڵێکی تر ببێتەوە، غەیری پارتی و یەکێتی، لایەنی تر بەرپرس نییە.
عارف قوربانی زۆر سادە دڵانە دەنووسێت: 
     دەستكەوتەكانمان و ئەو ئومێد و چاوەڕوانییەی ئێرە و پارچەكانی تری كوردستان كە وەك خەونێك بەئێمەوەیان بەستووەتەوە...
     ماوەیەک حکومەتە یەک لەدوای یەکەکانی جووت حیزب باسیان لە بە پراتیکە کردن و گواستنەوەی ئەزموونی حکومداری خۆیان بۆ عێراقی عەرەبی شیعە و سوونە دەکرد، بگوێزنەوە، وەک نموونەیەکی باڵای دیموکراسی!
     سەرئەنجام دەرکەوت ئەوانیش تەنها لەوەدا لاسایی کوردیان کردەوە، کە هەر حیزبە، کۆنترۆڵی شارێک و ناوچەیەک بکات و بکوژوببڕ خۆیان بن! ئەم ئاوازە تازە و کۆنە کە گوایە بەم ناکۆکییانەی نێوان پارتی و یەکگرتوو ئەزموونی کورد لەم پارچەیە بەر لێدانی هەمەلایەنە دەکەوێت! خەونێک کە کوردەکانی پارچەکانی تر بێرەوە هەیانە لەناودەچێت!
     نووسەری وتار، ئەوە لە بیر چووە کە کای کۆنی دە پانزەساڵ لەمەوبەر دووبارە و بەبا دەکاتەوە، چوونکە ئەو کات کوردانی پارچەکانی تر زۆر پۆزەتیفانە دەیانڕوانییە ئەزموونی کوردستانی باشوور! لەو پێناوەشدا هەموو توانای خۆیان بەتایبەتی ڕۆژهەڵاتییەکان خستە گەر.
     ئەم جۆرە دەربڕینانە بەلای کوردانی پارچەکانی ترەوە، خودی ئەزموونەکە نەک بۆتە مایەی دڵ ساردی بەڵکوو قەشمەرجاری زۆریش. چوونکە لە ماوەی حوکمی کورددا، وێڕای بینینی هەزارەها کردەوەی ناشیرین کە لەگەڵ بنەماکانی مافی مرۆڤ و پێکەوە ژیانی مرۆڤی هاوچەرخ نایەتەوە، دەرهەق بە کوردانی هەرێم و پارچەکانی تر ئەنجامدراوە.. 
     ئاخر ئومێد بە کێ؟ بە پارتی و یەکێتی؟ ئەوانە ئومێدکوژ و شەوەزەنگن، ئەوانە وێستگەی چاوەڕوانییەکانیشیان بە تیێنتی تەقاندۆتەوە، ئومێد و چاوەڕوانی خۆکوژی و سەراب زیاتر هیچی تری لێ سەوز نابێت.
---------------
-: تەواوی وتارەکەی عارف قوربانی لێرەدایە
- : هەمان وتار لە ماڵپەڕی سبەی دا

سێشەممە ٢٠١١.١٢.١٣ 
مرۆڤی ئەو بوارە نییە
 مەسعود بارزانی، بەکارکردی لەمەو پێشی و تا ئێستایدا، پیاوی ئەو کار و ئەرکە (بەپشتیوانی یەكێتی ئەوروپا، بارزانی‌ لە نەورۆزی ٢٠١٢دا دەوڵەتی‌ كوردی‌ رادەگەیەنێت) نییە. خۆ گەر گریمان موعجزە ڕوویدا ئەوا پشتیوانی خەڵکی لەگەڵ نابێت وەک کۆماری مهاباد، بۆیە سەرئەنجام دەبێتە ماڵ وێرانی و ڕێسراوەکەی تا ئێستا دەبێتەوە خوری..
     کام ئەورووپا، خۆیان تا ئێستا نەیانتوانیووە بەسەر کێشەکانیاندا زاڵ بن و یەکێتی ڕاگەیاندراوی ئەورووپی وا خەریکە بەهۆی قەیرانی دارییوە لێکدەترازێت. یان ئەوەتا ئەم هەواڵەیش دەچێتە خانەی ئەو بێهیواییەی کە کورد لە بەرانبەر ئەمەریکا هەیەتی و دەیەوێت بەمە قەرەبووی بکاتەوە و پەیامیک بێت لە ڕێگای ڕاگەیاندنەوە بیدات بە گوێی ئەمەریکا.. مایەی بەزەیین ئەوانەی هەواڵی وا بڵاو دەکاتەوە و ئەوانەیشی نالۆجیکیانە بیر دەکەنەوە و زیاد لە قەبارەی خۆی ئەو مرۆڤە دەبینێت.
-------------------
تەواوی هەواڵەکە بەداخەوە لە ماڵپەڕی گۆڤاری لڤیندا بڵاوبۆتەوە!


یەکشەممە ٢٠١١.١٢.١١ 
خۆشی لە بێستانەکە دەلەوەڕێت!
 ئەم کابرایە (دکتۆر مه‌حمود عوسمان)، زۆر دەپەیڤێت جا کە مرۆڤ زۆر دوا باش دەڵێت و خراپیش. لە بارەی ئەمەریکاوە دەڵێت: (... من ئومێدم نییه‌ چونكه‌ هیچ متمانه‌یه‌كم به‌ ئه‌مه‌ریكا نییه‌، كورد هه‌ڵه‌ ده‌كات ئه‌گه‌ر پشت به‌ ئه‌مه‌ریكا ببه‌ستێت، هه‌روه‌ها زۆر هه‌ڵه‌ بووه‌ كه‌ تا ئێستا به‌ ته‌مای ئه‌مه‌ریكا بووه‌، چونكه‌ له‌ ناكۆكی نێوان هه‌رێمی كوردستان و به‌غدا به‌لای به‌غدا ده‌شكێته‌وه‌...) ئەم جەنابە نازانرێت کەی باسی ئەو خاڵە گەنەی تری ئەمەریکا دەکات کە لە دوای ساڵی ١٩٩١ ەوە کۆمەڵێک چەتە و سەرسەری و مشەخۆری ( پارتی و یەکێتی و ...) زیندوو کردەوە، تا دەسەڵات لە کوردستانی باشوور بگرنە دەست؟ بۆیە نایڵێت و نایدرکێنێت چوونکە ئەو هەلومەرجەی ئەمەریکا دروستی کردووە، خۆیشی لەبەری دەلەوەڕێت.
----------------
سەرچاوەی هەواڵ، ماڵپەڕی پەیامنێر

یەکشەممە ٢٠١١.١٢.١١
ڕۆژنامەنووسی کڕراو!
 ئەم ڕاپۆرتە کە بە زمانی عەرەبییە، بەدواداچوونێکە بۆ ڕووداوەکانی چەند ڕۆژی ڕابردووی دەڤەری بادینان، جێی سەرنجە. بەڵام کەموکوڕی ڕاپۆرتەکە ئەوەیە یەک لایەنەیە، وەک ئەوە وایە ئەو ڕۆژنامەنووسە دەمی چەورکرابێت یان غەشیم بێت، چوونکە تەنها ئەوانەی هێناوەتە دوان کە بە جۆرێک لە جۆرەکان بەکرێگیراوی پارتین. باس لە سەلەفییەکان دەکات کەچی کەسێکیان نەدۆزیوەتەوە تا قسەیان بۆ بکات! یان یەکگرتووی ئیسلامی کە لایەنێکی کێشەکەیە و بەر لێدانی تۆڵە کەوتووە، ئەوانیش دیار نیین!!!! بەحساب ئەم کەناڵە ئەڵەمانییە و ئیعتباری هەیە!!!
----------------
ڕاپۆرتی ناوبراو لە ماڵپەڕی بەشی عەرەبی ڕادیۆ ئەڵەمان

یەکشەممە ٢٠١١.١٢.١١ نموونەیەکی دانسقە! 
 خانم ئەمین، ژنێکی بەتەمەنی کوردی خەڵکی هەرێمی کوردستان- پارێزگای سلەیمانییە. ئەو وەک زۆر ژنی تر کە لە زیندانی وڵاتەکەی خۆی دەردەچێت و ڕزگاری دەبێت، هەڵومەرجی مرۆڤانەی بۆ دەرەخسێت و ژیانی دەگۆڕێت، ئیتر دەرووی لێدەکرێتەوە، بەهرە و تواناکانی بەدەر لە کاری ناوماڵ و بەخێوکردنی مناڵ و مێرد و کوڕ و کچەکانی دەگەشێتەوە و دەردەکەون. نموونەی ئەم جۆرە مرۆڤانە لە نێو ڕەوەندی کوردیدا زۆرن و بوونەتە مایەی شانازی بۆ خۆی و کەسوکار و کۆمەڵگا بە گشتی.
-------------
دەقی چاوپیکەوتنی خام ئەمین لە کەناڵی تەلەفیزیۆنی بی بی سی فارسی

دووشەممە ٢٠١١.١٢.٥ کوردی قسەزانی تێکستنەنووس!
 نووسەری فینلاندی کریستینا کۆیڤونێن (١٩٥٥ز) وەک کوردناسێک لە بەرنامەی دووتوێ ی کەناڵی تەلەفیزیۆنی کەی ئێن ئێن ڕۆژی شەممە٢٠١١.١٢.٣ دا، وتی: خەڵکی کورد زۆر باش دەتوانن قسە بکەن، بەڵام توانای نووسینیان نییە. 
تێبینییەکی سەرنجڕاکێشە! ئایا ئەو کەلەبەرە تەنها کوردەکان پێوەی دەناڵێنن یان زۆرر میللەت و گەلی تر؟ بێگومان کۆمەڵگا دواکەتووەکان کە خوێندن و خوێندەواری باش گەشەی تیا نەکردووە، خوێندنەوە و نووسین نەبۆتە کلتوور و خەمی ڕۆژانە، بەپێچەوانەی دیدی ئەو خانمەوە هەر ئەوە نییە لە نووسیندا کۆڵەوار بن بەڵکوو لە قسە کردنیشدا. 
     بۆیە دەکرێت بپرسین کام جۆر لە قسەکردن کە گوزارشت لە کایە هەمەڕەنگەکانی ژیان بکات، پێدەچێت کریستینا وەک لێکۆڵەرەوەیەک لە بوارێکی دیاریکراودا بەو ئەنجامە گەیشتبێت. ئەگینا گەر وردتری بکردایەتەوە بۆ نمونە لە بواری تەندروستی خودی مرۆڤەکانی پرسیاری بکردایە، بێگومان سەری دەتەقی بەسەری دۆخێکی تردا و ئەو قسەیەی قووتدەدایەوە گوایە کوردەکان قسەکەری باشن. 
     لە ناو ئەورووپی و تەنانەت کوردەکانی خۆشماندا دەربڕینێکی هاوشێوەی وا لە بەرانبەر گەلانی عەرەبیدا باوە و هەیە بەکارهێنراوە، کە هەر دەڵێێت لە بۆق دەچن، بۆڵەبۆڵ و قیڕەقیڕکەر و زۆربڵێ و چەنەبازی بێکردار تەمەڵ و تەوەزەلن، پێدەچێت ئەو خانمە هەمان خەسڵەتیش بۆ کورد بەڕەوا زانی بێت!
     ئێ خۆ ئەو دەربڕینەی نووسەر جۆرێک لە ڕاستی تێدایە، عەرەبەکان دراوسێ و هاوئایین و هاوسنوور و هاودەسەڵاتمانن، کەواتە بمانەوێت یان نەمانەوێت خووە باش و خراپەکانیان ئۆتۆماتیک دەپەڕێتەوە بۆمان!
     ئەو خەسڵەتە وای لە کورد کردووە فیعلەن تێکستنووسی باشی تیا هەڵنەکەوێت، گەر هەمان بوایە لایەنی کەم وەک تورک و عەرەب و .. جارێک لە جارەکان خەڵاتی نۆبڵی ئەدەبیمان دەبردەوە. 
     لەکاتێکدا هەلومەرج و کارەساتی گەورەی کورد بۆ نموونە کوردستانی باشوور ئەوەندە دەوڵەمەندە دەکرێت شاکاری ر زۆنایابی لێ بەرهەمبهێنرێت.
     هۆی نەبوونی تێکستنووسی باش ئایا بۆ کلتووری ئایینی یان چی دەگەڕێتەوە؟ بێگومان کلتووری ئایینی یەکێکە نەک هەموو، چوونکە دەبینین هەر لە مناڵییەوە خەڵک ڕادەهێنرێت بەوەی کە کتێب و نووسین و خەیاڵ جۆرێک لە جۆرەکانی درۆ و بوختان و کفر بێت! تەنها کتێبێک کە هەموو ڕاستییەکانی تێدایە و بە کۆتایی گەیشتووە و ئیتر نابێتەوە، قورئانی پیرۆزە. لە ترسی ئەوەی نەکا قورئان بێئەهەمیەت بکرێت و هەر کتێبێک دەربچێت دەبێتە مونافیسی ئەو، بەو هۆیەوە لە ئایین دوور دەکەونەوە! خەڵکیان تەوەلا کردووە لە کتێب و نووسین و خەیاڵ.
     بێ حیکمەت نییە کاتێک لەشکری ئیسلام بۆ غەزا ڕۆیشتوون و داویانە بەسەر هەر وڵاتێکدا بۆ نموونە میسر و ئێران، گەرماوەکانیان بۆ ماوەی شەش مانگ بە کتێب سووتاندن گەرم کردووە. کەواتە و ئیتر چۆن تێکست نووسێکی باشت تیا
هەڵدەکەوێت کە هەر لە سەرەتاوە و لە مناڵییەوە بە کتێب بترسێنرێت!!
--------------------------
پاشکۆ: ئەم دۆخە نەک کورد بەڵکوو سەرجەم ڕۆژهەڵاتی ناوەڕاست دەگرێتەوە. جا کورد لەو بوارەدا کە بڕوام وایە خێروبێری داگیرکەر و نەتەوەی سەردەست بێت بۆ مابێتەوە یان لێی وەرگرتبێت، هەموو هەوڵیان لەوەدا چڕ کردۆتەوە کە تێکستنووسمان نەبێت! لە مێژوودا گوایە ژمارەیەک زانان  و دانای کورد هەبوون، بەڵام ئەوانە خزمەتیان بەوان کردووە.. دیقەت بدەن ئەو دۆخە بە ئێستایشەوە درێژەی هەیە، هۆی چییە سیاسییە کوردەکان پەیوەندییەکانیان سەرزارەکی و شەفەهی بوون، ڕێکەوتننامەکانیان بە دیکۆمێنت نەکردووە؟
-: ههمان وتار لە ماڵپەڕی سبەیدا

 پێنجشەممە ٢٠١١.١٢.١ جۆرێک لە ڕەگەزپەرستی!
 برادەرێکی عەرەبی عێراقی ئەمەی نووسیبوو: ئیسلامییە سیاسییەکان پێیان وایە ژنی بێگانە (زەردەشتی و یەزیدی و کریستیان و جوولەکە و ... ) لە چاو ژنی خۆماڵی بهێنن باشترە و بیانکەن بە ئیسلام ئەجری چاکەی زۆرترە و چوونە بەهەشت حاسڵ کردنە... چەند نووکەتەیەکی بێتامە..
     جا لەوە بێتامتر، دیقەت بدەنە تێکستی ئەم برادەرە کوردە موسڵمانەی کوردستانی باشوورە، دەنووسێت: ١٣ ملیۆن هاوڵاتی بیانی له‌ ماوه‌ی ٣ ساڵ (٢٠٠٩-٢٠١١) دا له‌ ٦ وڵاتی ئه‌وروپا (فه‌رنسا ـ ئه‌ڵمانیا ـ سوید ـ دانیمارک ـ به‌ریتانیا ـ سویسرا) بونه‌ته‌ موسوڵمان. هاهاهاها جێی بەزەیین هاهاهاهاها..
     ئیسلامییەکان یان هەر پەیرەوانی هەر ئاینێکی تر بۆیە جێی بەزەیین، لە ئامارێکی وادا جۆرێک لە موباڵەغە و قەبەکردن هەیە. ئەم جۆرە قسە و دەربڕینانە زیاتر هێزە ئیسلامییە ڕادیکالەکان بڵاوی دەکەنەوە و لەقاوی دەدەن.. لە هزری دژایەتی فڵان دین بەرانبەر فڵانی تر کە بە چاوێکی سووک دەڕواننە یەکتر و دوژمنایەتی یەکتر دەکەن و پەیرەوانی یەکتر بە کافر دادەنێن! ئەگیان ئەلتەرناتیڤی لەوە باشتر هەیە، ئەویش ژیانی هاوبەش لە نێوان مرۆڤەکان بەبێ ئەوەی ئەمیان بەجۆرێکی نزم لەوی تر بڕوانێت.

لێکچوونێکی سەقەت یان چی؟
 (سێ رەنگەکە یان هیچ شتێک) مەبەست لە رەنگی ئاڵای فەرەنسایە.. یەکێک لە دروشمەکانی فەرەنسییەکان لە سەردەمی ناپلیۆن دا بوو. دورشمی کۆنی بزووتنەوەی ڕزگاریخوازی کوردستانی باشوور، (کوردستان یان نەمان) بوو. جۆرێک نزیکی لە نێوان هەردوو دروشمەکەدا هەیە، تۆ بڵێی ناسیۆنالستە باشوورییەکانی ئەوسا، ئیلهامیان لە فەرەنسییەکان وەرگرتبێت و لەوانیان خواستبێت؟ ئەی بۆ وەک ئەوان (فەرەنسییەکان) کوردی ئەو پارچەیە وێڕای گەورەترین قوربانی لە چاو مێژووی هەموو پارچەکانی تردا، دەوڵەتی سەربەخۆی خۆی نییە و پێک نەهێناوە؟ یان ئەوەتا وەک تەنها دروشمی بێ ناوەرۆک وەریان گرتووە و هیچی تر؟! جێی داخە..

پارادۆکسی تورکەکان
بەدواداچوونی هەواڵێک
 ڕۆژنامەی ستاری تورکی پێنجشەممە ٢٠١١.١٢.١ یەکێک لە مانشێتەکانی: ڕۆشنبیرانی کورد، پارتی ئاشتی و دیموکراتی نوێنەرایتیمان ناکەن. پێدەچێت تورکەکان بە ڕێچکەی وڵاتە دیکتاتۆرییە بێپەردەکانی عەرەبی وەک کۆنی سەدام و ... بڕوات، ئەگینا قسەی وا لە ڕێگەی ڕاگەیاندنەکانییەوە بڵاوناکاتەوە! سروشتییە پاش دەیەها ساڵ هەوڵیان داوە هەموو شتێکی نا تورکی بکەن بە تورکی کە هێشتا بۆیان نەکراوە، بەڵام لەبەر چەندەها هۆ و داسەپانی رەوشێکی نەخوازراو بەسەر تورکیا بەتایبەتی کوردستانی باکوور، ژمارەیەکی دیاریکراو لە دەوری ئەو حکومەتە و دامودەزگا فەرمی و نافەرمییەکانی کۆببنەوە. ئەوەیش مانای ئەوە ناگەیەنێت کە هێنانە قسەی ئەو نووسەرانە دەربڕی هەموو نوسەرانی تری کوردەکانی کوردستانی باکوور بێت. بە ئێستاشەوە لە کوردستانی باشوور بەوانەی نزیکن لە دەسەڵاتەوە ئیتر خۆماڵی یان بێگانە بێت، دەڵێن: جاش پێنووس(قەلەم) و سێبەر و سیخوڕ و بەکرێگیراو و...

خەمی ڕۆژانە، تشرینی دووهەم ٢٠١١

AbasShiwan-عەباس شوان
چوارشەممە ٢٠١١.١١.٣٠ خرۆشانە جەماوەرییەکان، فرە رەهەندی!
 ڕووداوەکانی باکووری کیشوەری ئەفەریقا و ڕۆژهەڵاتی ناوەڕاست، کە تا ئێستا بۆتە لابردنی ژمارەیەک لە دیکتاتۆرەکان، ناوی جۆراوجۆری لێنراوە، بەناوبانگترینیان بەهاری عەرەبییە، بەڵام لە تەنیشت ئەم ناوەوە ناوی تریش بەکار دەهێنرێت کە دەکرێت بووترێت ئەو ناوانەیش بە جۆرێک لە جۆرەکان گونجاون و لەلایەک لەلاکانەوە پڕ بە پێستی ڕووداوە گەورەکەیە.
لەوانە بەهاری ئیخوان موسلمین و بەهاری ڕۆژهەڵاتی ناوەڕاست، و بەهاری شۆڕشەکان و ...
ئەرێ بەڕاست گەلۆ ئەم هەموو لەقەبە چییە؟ و چی دەگەیەنێت و چی پێ دەڵێن؟ دەلیلی چییە کە هەریەکە لەگۆشە نیگایەکەوە لێی دەڕوانێت و دەیخوێنێتەوە و ناوی بۆ دادەتاشێت؟
هەموو ئەو ناوانە سەرچاوەکەی بۆ لێکدانەوە چین و توێژە سیاسی و ڕوونکابیرییەکان وەک چەپە ڕادیکاڵەکان و دەسەڵاتخوازانی وەک حیزبە فەرمانڕەواکانی هەرێمی کوردستان، و .... هەریەکەیان بیانووی خۆیان هەیە. ڕەشبینەکانیان دەڕواننە ئەنجامی یەکدوو دانە لەو خرۆشانە جەماوەریانە کە خەریکە بەرەو ئاراستەیەکی چاوەڕوان نەکرودا دەڕوات، گوایە خەڵک دەبێت کاڵەک بە ئەژنۆ بشکێنن، چوونکە خراپێکیان دەرپەڕاند لەو خراپتر جێی دەگرێتەوە!

هەینی ٢٠١١.١١.٢٥ گەورەیی لە چیدایە؟
 ڕۆژێک یاریزانی بەناوبانگی یاری گۆلفی ئەرجەنتینی (Roberto De Vicenzo ١٩٢٣) دوای وەرگرتنی چەکی پارەی یەکێک لە یارییە براوەکانی لەبەردەم زوومی کامێرای ڕاگەیاندنەکاندا، لە پارکی ئۆتۆمبێل تووشی خانمێک دەبێت، پیرۆزبایی لێدەکات، زۆر بە خەمبارییەوە ئەوە دەدا بە گوێیدا کە کورەکەی تووشی نەخۆشییەکی کوشندە بووە قابیل بەوەیە بمرێت، هیچ پارەش شک نابات بۆ چارەسەرکردنی.
یاریزان لەژێر کاریگەری قسەی ئەو خانمەدا چەکی پارەکە دەکاتە دەستییەوە، دەڵێت:
هیوای سەلامەتی چاکبوونەوە و خۆشی بۆ دەکەم.
هەفتەیەک دوای ئەو ڕووداوە دۆستێکی دەبینیت، پێی دەڵێت دەزانی ئەو خانمە فێڵی لێکردوویت، کەسێکی قۆڵبڕ بووە، ئەو شووی نەکردووە و ئیتر مناڵی لە کوێ بوو!؟
ئەویش دەڵێت: مەبەستت ئەوەیە هیچ مناڵێکی نەبووە کە ڕووبەڕووی مەرگ بووبێتەوە؟
-: بەڵی دەقیقەن وایە!
-: هاهاها کەواتە ئەمە باش و خۆشترین هەواڵی ئەم هەفتەیەم بوو.
-------------
بۆ ئامانەتی ئەدەبی، ئەم تێکستە وەرگێڕان و ئامادەکردنە لە زمانی فارسییەوە.

چوارشەممە ٢٠١١.١١.٢٢  فەوزا حەشر دەکات؟!
 گۆڤاری لڤین لەو ڕاپرسییەیدا پێدەچێت سەری لێتێکچوو بێت!!! لە خەیاڵی چەند دانەیەک لە بەڕێوەبەرانی وا دەزانن گەلانی کورد لە چوار پارچە یەکیان گرتووە و یەک حکومەتیان هەیە! بۆیە دەبینین ناوی کەسایەتی پارچەکانی تر بۆ خزاێنراوەتە ناوەوە؟؟!! ئایا گۆڤاری لڤین مەبەستی کەسایەتی کاریگەری کام لە کوردستانەکانە؟ دیارە لەبەر ئەوەی گۆڤارەکە لە کوردستانی باشووردا کار دەکات و دەردەچێت، بە پلەی یەکەم قسەی بۆ ئەو بەشە دیاریکراوەیە. لەوانەیە خەڵکانی پارچەکانی تر هەر بۆیان گرنگ نەبێت و بێئاگابن لە ڕاپرسییەکی وا و تێشنەگەن لە شێوەزار و ڕێنووسی کوردستانی باشوور. ئایا مەبەست لە وشەی کاریگەر چییە؟ ئاخر خواتان بێت لە چ بوارێکدا کاریگەری؟ سیاسەت کۆمەڵایەتی هونەری و ئەدەبی و ....؟؟!!!  وردبینی لەم ڕاپرسییەدا کەمە، چوونکە تەنها کەسایەتییە سیاسییەکان دیاریکراوە!!
خودایە ئەم هەموو فەوزایە چییە، بەربینی بە خەڵکی باشوور بە خوێندەوار و نەخوێندەوارەوە، گرتووە؟؟!!

چوارشەممە ٢٠١١.١١.٢٢  بۆ ڕیش چوو سمێڵی نایە بان؟!
 تۆزیک لەمەوبەر (ئێوارەی ڕۆژی دووشەممە ٢٠١١.١١.٢١) بەرنامەیەکی وتووێژ لە کەناڵی تەلەفیزیۆنی پەیامی کۆمەڵەی ئیسلامی کوردستانەوە بەناوی دیوی دووەم هەبوو. شۆرش ئه‌نور پێشکەشی دەکات، لەسەر ئیسلامییەکان. میوانەکان نووسەرێکی ئیسلامی و کابرایەکی سەر بە پارتێکی فەرمان ڕەوا بوون. لە درێژەی دایلۆگدا باس لە کەسێ کرا کە چەند ساڵ لەمەوبەر هێزێکی یەکێتی لە بازگەی تاسلوجە لێیاندا و بەو هۆیەوە گیانی لەدەستدا. بەرنامەکە بێکۆنترۆڵ و پڕ لەقیژە قیژ بوو. نووسەرە ئیسلامییەکە بەزمان و ئاوازی پارتی و یەکێتی هەوڵی دەدا وەک خانەخوێیەک گاڵتە بەوی بەرامبەری بکات و سووک وەک نەخوێندەوار و بێئاگایەک پیشانی بدات و تەنانەت وەک ئاسایش و پۆلیسی لێکۆلەرەوەی شوبهاند!! سەرئەنجام یەکێک لە مناڵەکانی کابرای ئیسلامی کە لە دایلۆگەکەدا ناوی هێنرا بوو، بەتەلەفوون هاتە سەر هێڵ و هەڕەشەی دادگاییکردنی لە کابرای سەر بە دەسەڵات کرد، گەر هاتوو داوای لێبووردن لە بنەماڵەکەی نەکات. بەڵام ئەو موسڕ بوو لەسەر قسەی خۆی و ملی نەدا. بەڵام نەیدەزانی بێئاگا لەوەی کە ئەو کەناڵە ئیسلامییە خستویانەتە ناو تەلەیەکەوە، کۆتاییەکە بە دادگا و داگاکاری دێت!!! چوو بۆ ڕیش سمێلیشی تێنا!!!!
خودی بەرنامەکە لە ماڵپەڕی یوتوبدا
ماڵپەڕی تەلەفیزیۆنی پەیام لاپەڕەی بەرنامەی ناوبراو

هەینی ٢٠١١.١١.١٨  پێ کە کە ئەنتی کوردی ڕۆژئاوا (سووریا)؟!
 پێ کە کە خۆی لە ژێر تۆمەتی پشتگیری کردن لە ڕژێمی سووریا دووردەخاتەوە و گوایە ئەوە بوختانی تورکیایە بۆ ئەوانی دەکەن. لەکاتێکدا ئەو تۆمەتبارکردنە زیاتر لەلایەن کوردانی سووریاوە بووە و دەکرێت. لە هاوکێشەیەکی جالجالۆکە ئاسای وەک کێشەی سووریا، زۆر واردە، کە مادام تورکیا بەئاشکرا دژی حکومەتی سووریا کار دەکات، ئۆپۆزسیۆنی کوردی باکوور لە دژی ئەو سیاسەتەی حکومەتی تورکیا پێچەوانە بوەستنەوە، ئەگەر هاتوو لە زەرەری هاوزمان و نەتەوەکەشیان بێت!! مێژووی ئەو پارتە و پەیوەندی لەمێژینەی وای کردووە لە قەیرانەکاندا حکومەتی سووریا تۆراوەکانی خۆی ئاشت بکاتەوە کە پێ کە کە یەکێکیانە.
لەلایەکی ترەوە ئەگەر ئەو تۆمەتبارکردنە دەورە خراپکارییەی ئەو هێزەی باکوور دەینوێنێت و لەشوێنی خۆیدا بێت؟ جێ پرۆتیستۆی گەورەیە.
هاوکات هەر بۆ بیرهێنانەوە بۆچوونێک هەیە، پێی وایە تەنانەت پژاک کە باڵی ڕۆژهەڵاتی کوردستانی ڕۆژهەڵاتی ئەو پارتەیە، بە دەسیسە و لە ژێر ڕێنمایی ئێران دروست کراوە، یەکێک لە هۆیەکان و دافیعەکان پشت ئەو قوتکردنەوەیە، هەرچی زیاتر بێنرخکردنی پارتەکانی وەک کۆمەڵە و حیزبی دیموکراتە. بۆیە بینیمان لەم دواییەدا و لەمەسەلەی تۆپبارانی سنووری هەرێمی کوردستان، پێکەکە نەیشاردەوە کە پژاکی کڕ کردووە. جا لەهەر گۆرانکارییەکی گرنگ لە داهاتوو ڕووبدات، ئەو لیبۆکە بەهای نامێنێت. نازانم ماڵپەڕی وکیلیکس چۆنە تا ئێستا دیکۆمێنتەکانی ئەو مەسەلەیە ئاشکرا نەکردووە؟ یان ئەوەتا وەختی نەهاتووە جارێ ئەمەریکا ئیشی پێیانە.

چوارشەممە ٢٠١١.١١.١٦ کەمی رەگەزی مێ بەتەنها لەناو بزووتنەوەی گۆڕان هەیە؟!
 حەمەغەفوور، لەم وتارەیدا پەی پێبردنێکی باش و گونجاو کردووە، بەڵام وروژاندنی ئەو خاڵە، مەوقعییەتی ژنانە لە ناو بزووتنەوەی گۆڕان دا، کەمیێک کۆنە، لە دەرەوە و ناوەوەی ئەو تەوژمە باسکراوە، بەڵام هەردەم تازە دەبێتەوە، چوونکە وەک خۆی ماوەتەوە و بووە بەخاڵێک لاواز بۆ بزووتنەوەکە! هەرچەندە هەوڵدراوە چارەسەر بکرێت. ئەو کێشەیە بەتەنها سەروچاوی بزووتنەوەی گۆڕان ناگرێتەوە، یان ڕاستگۆتر و هەمەلایەنەتر بڕوانین بزووتنەوەی چەپ کە بەڕێزی خاوەن وتار یەکێکە لە هەڵسووڕاوانی لەمێژینەی، بەهەموو باڵەکانییەوە تەنانەت ڕادیکالەکانیشی بۆ باس ناکرێت، ئەگەر لە بزووتنەوە سیاسییەکانی تر خراپتر نەبێت بێگومان چاکتر نیین، هەرچەندە لافوگەزای زۆری پێوە لێدەدەن و هەمیشە لەدایلۆگیاندا بەرامبەر ئەوانی تر قووتی دەکەنەوە. کەواتە هۆی ئەسڵی پەراوێزخرانی ژنان تەوژمە سیاسییەکانە یان پێکهاتەی دواکەوتوانە و باوکسالاریانەی ئەو کۆمەڵگایانە؟

دووشەممە ٢٠١١.١١.١٤ پارتە ئیسلامییەکان، کەی دەستبەرداری ئێران دەبن؟
 پارادۆکسی پارتە ئیسلامییەکانی کوردستانی باشوور ئەوەیە، لەسەر ئایینزایی سوونین کەچی هاوکار و یارویاوەری کۆماری ئیسلامی ئێرانن کە سەر بەئاینزای دژ و نەیارە!! ئایا سوونە کوردەکانی هەرێم نەرمتر یان کراوەترن؟ تا بەو شێوەیە هەڵسووکەت دەکەن، جیاوازی لە نێوان سوونی و شیعەبووندا ناکەن؟ ئەگەر وا بێت و  ئەوە سیاسەتیان بێت، جۆرێک لە شازی و دەگمەنی تا  ئاستێکی باش ژیرێتی دەدات بە حیزبە ئیسلامییە کوردەکان!
بەڵام نەزەرەکان بەرەو ئەوە دەچن کە زیاتر خۆژیان و بازرگانیکردن بێت وەک لەوەی شتێکی تر!! بە جۆرێکی تر کە لێکدانەوەیەکی کۆن و کلاسیکە دەووترێت ئێران هەرێمی کوردستان لەو لیستە ڕەشەیدایە، بۆیە هەرچەندە لە زۆر بار و ڕووەوە قازانجی زۆر دوای ڕاپەڕینی ١٩٩١ لەو قەوارەیە کردووە و دەکات، بەڵام هێشتا هەر بەڕەش و هەڕەشەی دەزانێت! بۆیە بەردەامە لە پشتیوانی کردنی ئەو تەوژمە ئیسلامیە سوونیانەی کورد! ئەمەیش لەو سیاسەتەوە سەرچاوە دەگرێت بۆ نەیارەکانی خۆی لە ئێستا و داهاتوودا هەردەم لەبۆسەدایە، ئامادەی هاوکاری کردنی شەیتانیشە، وەک دەبینرێت ئێران لەلایەن هێزە نێودەوڵەتییەکانەوە بەوە تاوانبار دەکرێت نەک یارمەتیدەری حیزبە سوونییە ئیسلامییەکانی هەرێم، بەڵکوو هاوکار و پشتیوانی تووندڕەوانی گرووپی ئەلقائیدەشە.

یەکشەممە ٢٠١١.١١.١٣ بەدواداچوونی هەواڵێک
 ئەو وەزیرە بەرەگەز کوردە (هوشیار زێباری- وەزیری دەرەوەی عێراق) نوێنەری عێراقی عەرەبی شیعە زیاترە وەک نوێنەری کورد!! هەرچی گیانی گۆڕانیش بێت لەو نەفەرەدا نییە، بۆیە هەڵوێستێکی وا چاوەڕوانکراو بوو. ئەگەر ئێران و عێراق لە پشتی سووریا نەبن؟ کێ دەبێت؟ دوو حکومەتی ئاینزای شیعە، هەر بۆیە ئەسەد و حکومەتەکەی تا ئێستا ماوەتەوە و بەرگری دەکەن.
بەڵام ئەو وتەبێژەی لیستی هاوپەیمانی کوردستانی ڕاستر یەکێتی و پارتی؛یە، لە هاوکێشەی سیاسی و بنەماڵەییدا کێ گوێی لێدەگرێت و بەیدەقێکی زۆر سووکی وایە کەس حسابی بۆ ناکات. چوونکە لە بنەماڵەی فەرمانڕەوای زۆنی زەردی وەک مەسعود بارزانی نییە، ئەما جەنابی وەزیری کەتنکەر چەندی تریش قۆریان ئەنجامبدات و بنوێنێت، هەر لەسەرەوەیە و لە شوێنی خۆیدا دەبێت. بۆیە ئەم داخوانییەی جەنابی وتەبێژ خۆڵکردنە چاو زیاتر هیچی تر نییە.
سەرچاوەی هەواڵ ماڵپەڕی ڕۆژنامەی هاوڵاتی

هەینی ٢٠١١.١١.١١ جەناب فەسادی ئەخلاقی پێش و پاش ئەمەریکا هەبووە!
 عەلى باپیر (ئەمیری کۆمەڵی ئیسلامی) ماستاوسارددەکاتەوە، لە ڕاگەیاندنی حکومی کۆماری ئیسلامییەوە ئاوا دەفەرمووێت: ئەمریکا لەهەر وڵاتێک بێت فەسادى ئەخلاقى بڵاودەکاتەوە!
سەیرە کابرایەکی بە ناو سیاسی وا قسەیەکی ساویلکانە وا دەکات!!! لەهەموو سەردەم و کاتێکدا ئەو فەسادەی گوایە خێروبێری ئەمەریکایە و لەگەڵ خۆیدا دەهێنێت بۆ ئەم وڵات و ئەو وڵات، گەر یەک تۆز ڕاستگۆبێت هەر هەبووە و دەمێنێت، بەڵام لە هەر سەردەمەی بە جۆرێک بووە، بەرز و نزم بۆتەوە و کەم و زیادی کردووە بۆ هەر لەم جۆرە سیاسیانە نەبوو دەیانووت سەدام حسین سەرچاوەی هەموو جۆرە فەسادێکە. ئیتر خۆ گەر ئەمەریکا نەبوایە، ئەم بۆ دەیتوانی ئەو عەیش و نۆشەی کە ئێستا هەیەتی، بیکات. هەموو دەزانیین کێ هێناویەتی؟ ئەمەریکا نەبوو؟ دەبوایە لە جیاتی دەربرینی وا مەدح و سەنای بکردایە. ئەگینا دەبوایە هەتا هەزار ساڵی تر نەک عەلی باپیر بەڵکوو هاوسنفەکانی وەک مەسعود بارزانی و جەلال تالەبانی گۆرانی ئالیلیان لەو کێوانە بووتایە. بەڵام ئەم ئاوازە پێدەچیت لاسیایی کردنەوەی سیاسییە شیعە نمەک بەحەرامەکانی خوارووی عێراقی عەرەبی بکاتەوە، کە هیچیان لەبەرچاو نییە!
سەرچاوەی هەواڵ، ماڵپەڕی گۆڤاری لڤین

پێنجشەممە ٢٠١١.١١.١٠ ڕۆژێکی شاز!!!
 +: دەزانن بەیانی چ ڕۆژێکە؟
-: جا ئەوە پرسیارە؟ هەینییە! ئەو ڕۆژەیش بۆ موسڵمانان پیرۆزە و ڕۆژی جومعە و جەماعەت و پشوو و نانخواردن خۆش و بەتام و سەردانی سەرقەبران و خۆشەویستانە.
+: نا ئەوانە هیچی نییە، بیرهێنانەوەی زۆر ئاسان دەبێت گەر یەک تۆز لێی وردبیتەوە، بۆ نموونە، لەو ڕۆژەدا ڕووداوێکی خۆش و ناخۆش و ترش و شیرینت بەسەر بێت، یان بەتەمابیت و بتەوێت بیکەیت، سڵمەکە و لێی مەپرگێنەرەوە. وەک دەزانن گەر دیقەت بدەنە ساڵنامە/کاڵێنتری تەلەفوونەکانتان بۆتاندەردەکەوێت و دەبینن ژمارە یەک زۆر دووبارە بۆتەوە، تەنها سفرێک و دوویەک بۆنتە درکی مەوزین، لە هەشت ژمارە شەشیان وەک یەکە، بەم شێوەیە:٢٠١١.١١.١١ بەهیواین سبەینێ خۆش بێت بۆ هەر یەکەتان..
لە ١٩١٨.١١.١١ کاتژمێر ١١ ی بەیانی ڕاوەستانی شەڕی جیهانی یەکەم واژوو کرا.
برجەکانی کە لە ١١ ی سپتەمبەری ٢٠٠١ لە وڵاتەیەکگرتووەکانی ئەمەریکا لێدرا، لە ژمارە ١١ دەچێت. گەشتی ئەو فرۆکەکەیشی کە خۆی کێشا بە بورجەکاندا، ژمارە ١١ بوو.

پێنجشەممە ٢٠١١.١١.١٠ کورتکردنەوەی دەستی هێزە چەکدارەکان
 بەهۆی ئەو بارە نائاساییەی لە هەرێم و عێراقی عەرەبی سونە و شیعە خوڵقاوە، پێشمەرگە و هێزە چەکدارەکان بەشی شێری بودجەی وڵاتیان هەڵلوشییوە و بەردەکەوێت! کەچی هێشتا داوای زیاتریان بۆ دەکرێت!!! ئایا ئەم داوایە نابێتە هۆی ئەوەی درێژە بدرێت بەو بارودۆخەی کە بەشێکی زۆری هاوڵاتیان لێی ناڕازین و بەنەفرەتی دەکەن. گەر وا بڕوات لە داهاتوودا تەشبیه نەبێت هەرێمی کوردستان دەبێتە وڵاتێکی وەک تورکیا کە سەرباز و جەندرمە تا هەنووکە گونی گوندار دەردەهێنن. کاری زۆری دەوێت تا لە شوێنی خۆیان دایاننیشێنرێتەوە. ئەم جۆرە داوایانە (مووچەیان کەمە) و ئەم بەراوردکردکارییە (لەچاو هێزە چەکدارەکانی عەرەبی سونە و شیعەی ناوەڕاست و خوارووی عێراقی عەرەبی) گەر هەقیش بێت، قابیلی پشتیوانییە نییە، چوونکە بەڕاست هێزی پێشمەرگە و لق و پۆپەکانی دەکرێت پێیان بووترێت هێزی نیشتمانی لە کاتێکدا هەموو دەزانیین دابەشی و کەرتبووی پارتە فەرمانڕەواکانە و ئەوانن کۆنترۆڵیان کردووە!! لەباری تەکنیکییەوە ئایا ئەو هێزانە دەکرێت سیفەتی پیشەیی بە سەریاندا بسەپێت؟ بێگومان نەخێر، زیاتر لە هێزێکی میلیشیایی زۆر دواکەوتوو دەچێت، بەشێکی زۆری هاوڵاتیان ئەو ڕاستییە دەزانیین، وەک سەردەمی کۆنی عەرەبە بەعسییەکان، دواکەوتووترین تۆژاڵی کۆمەڵگا دەچنە ئەو دەزگا هەستیارەوە! کۆمەڵگای مەدەنیش بەم شێوەیە و بەم تەرزە کە لایەک لەبەرانبەر لایەکی تردا بەهێز بکرێت تا بێت دواتر دەکەوێت، بۆیە باشتر وایە دەستی ئەوانە کورتتر بکرێتەوە نەک درێژتر بکرێت.

شەممە ٢٠١١.١١.٥ تێگەیشتن لە پەیامی هونەر
 وێنەیەکی ئەنەلۆگ نەک دیگیتاڵی جیڤارا ١٩٢٨- ١٩٦٧ (Che Guevara)، ئەو کەسەی پاش ئەو هەموو ساڵە، خۆشەویستی جەماوەرە! بە جۆرێکی تر پیشاندراوە .. هاهاهاها هەموو شتتێک دەبێت.. مادام ئەو کەسەی ئەو وێنەیەی بەو شێوەیە کێشاوە، کە وەک سروشتی ئۆرژیناڵکە نییە، کەواتە هونەر و داهێنانە، ئەگەر وا نەبێت مانای وایە ڕووت و وشک و برنگ لە خەیاڵ! بەوێنەی پۆرتۆریتی کەسێتی فۆتۆگرافی پێناس و پەساپۆرت دێتە بەرچاو و هیچی تر. جیایی و نهێنی ئەم وێنەیە لەوەدایە بینەر دەجووڵێنێت و دەیانهێنێتە قسە، هەر یەکە بەجۆرێک.. ئیتر تێگەیشتنەکان بۆ هونەر جیا و جیاواز جۆراوجۆرن، لەوانەیە ئەم وێنەیە و هاوشێوەی وا بەلای ژمارەیەک لە خەڵکەوە، ناحەز و ناشیرین، هاوکات بە تەوهین بۆ کەسایەتییەکان بێتە بەرچاو، بەڵام پێدەچێت ئەو بەرخوردە زیاتر سیاسی و ئایدۆلۆجی بێت نەک شتێکی تر..

هەینی ٢٠١١.١١.٤
ڕاگەیاندنی تورکی و کوردی باکوور
 ئەمڕۆ هەینی ٢٠١١.١١.٤ ڕۆژنامە تورکییەکانی ئەو وڵاتە وەک موعجزە ڕوویدا بێت و هەڵایەکیان ناوەتەوە! چەند دانەیان هەواڵێکیان بڵاوکردۆتەوە، گوایە لە پرسەی یەکێک لە شەهیدەکانی پێشمەرگەکانی ئۆپۆزسیۆنی کوردانی باکوور، ئاڵای تورکیا بینراوە و هەڵکراوە!! ئیبرازکردنی هەواڵێکی وا لێدانەوەی هەمە لایەنە هەڵدەگرێت. بەوەی لەو ڕاگەیاندنە دڕ و هارەیانەوە دەریدەخەن کە کوردەکانی باکوور چەند بە تووندی دژی ئاڵا و حکومەتی تورک و هەرچی شتێک پەیوەندی بەوانەوە هەیە نایخوازن. لەمەدا دەبێت کوردەکانی باکوور سوپاسی ئەو ڕاگەیاندنە بکەن. هاوکات لایەنێکی پۆزەتیفی بەشێک لەگەلی کورد پیشان دەدات. بەزەرەری تووک و حکومەتەکەیانە. بەڵام هەر ئەم لایەنە ئەوە دەردەخات کە گوایە حکومەت توانیویەتی پێدزکە بکاتە ناو کوردەکانەوە، یان ئەوەندە هەیمەنەی بەهێزە کە هەرچەندە خۆی دەیانکوژێت بەڵام دەستبەرداری ئاڵای تورک نەبوون، گوایە لەلای موخالفینیش پیرۆزە! ئەمەیش وەک سەردەمی سەدام حسین وایە پێشمەرگە و خەڵکانی ئۆپۆزسیۆنیان ڕەمی دەکرد و پارەی گوولەکانیان لە خاوەنی شەهیدەکە دەسەندەوە!

خەمی ڕۆژانە، تشرینی یەکەم ٢٠١١

AbasShiwan-عەباس شوان

شەممە ٢٠١١.١٠.٢٩ لە ئایینی ئیسلامدا بۆ پۆلاریزم بگەڕێن!
ئایا بەڕاست ئایینەکان بەتایبەتی ئایینی ئیسلام رەگ و لایەنی زۆری بۆلاریزمی (تەعەدودییە) تێدایە؟ یان دیکتاتۆری؟ گەر درۆ لەگەڵ خۆماندا نەکەین هەردووکیان بوونی هەیە. بەڵام کام لایەنی زۆرتر و زاڵترە؟ بۆ نموونە ئایا ئەم ئایەتە نیشانەی تەعەدودیەتە: «ولو شاء الله لجعلكم أمة واحدة» ؟ تایبەتمەندی و مەترسی ئایین ئیسڵام لەوەدایە، یەکێک دێت بەهەمان قورئان شەڕی تەعەدودیەت دەکات، نەک ئایەتێک بەڵکوو چەند نموونە دەهێنێتەوە کە دژی ئەو لایەنە جوانەیە کە پێویستە زیاتر دەربکەون تا دوور بخرێتەوە لە داخران و دابڕان. کەچی بەپێچەوانەوە گوێگری ئەم دەستەیە زۆرتریشن!!!

هەینی ٢٠١١.١٠.٢٨ هەڵوێستی کۆمۆنیستی و ناسیۆناالیستی یەکدەگرنەوە!
لەلایەکەوە ئەو ڕاگەیاندنەی یەک لایەنەی پارێزگای تکریت و خۆکردن بە هەرێم، زەرەری کوردە، لەلایەکی ترەوە قازنج. بەڵام ئەم هەڵوێستە دژەی پارتی کۆمۆنیستی کرێکاری بەجۆرێک لە جۆرەکان خزمەت بە تەمامییەتی زەوی عێراق دەکات. کە هەموو ناسیۆنالیستە کۆن و نوێکان وایان پێ باشە!!!! ئەمە چ تەناقوزێکە!! مادام هەر ناوچەیەک کە فڵان ئانزا یان فڵان نەتەوە تێیدا زووربەیە، حوکمی خۆیان بکەن باشترە وەک لەوەی مایەی نائارامی بەردەوام بن بۆ گشت و بۆ یەکتر. لە ڕاستیدا وڵاتێک بەشێوە ستاندارەکەی نەماوە کە ناوی عێراق بێت.. ئیتر ئەم عێراقچێتی و ئاسنی سارد کوتاننە لە پای چی؟؟؟!!! لێی گەڕێن با تەفروتوونا بێت..

تەواوی تێکستی بەیاننامەی حیزبی ناوبراو لێرەدایە

هەینی ٢٠١١.١٠.٢٨ لەمەسەلەی ژناندا پێغەمبەران قەباعەتبارن!
گەر باس لە مێژووی پەیامبەرەکان بکرێت، بەتایبەتی لە مەسەلەی ژندا هەر زۆر قەباعەتبارن. با ئەم جۆرە مەلایانە و یان ئەو بانگەوازخوازە ئیسلامیانە بروبیانوو نەهێننەوە بڵێن ئێ خۆ قەیچێکا هەر پەیامبەرەکەی ئێمە وای نەکردووە یان هەر کتێبەکەی ئێمە وای نەووتووە، ئەوانی تریش وەک ئێمە کردوویانە و وەک کتێبی ئێمە ڕێگایان بە فرە ژنیداوە... ئەو مێژووە چیلکەی تێوە نەدرێت چوونکە مێژوویەکی بۆگەنە بە دیدی مۆدێرنی ئێستا.

تکایە بۆ بینینی قسەوباسی ئەو کابرا ئایینییە کلیکی ئەم گرتە ڤیدیۆیە بکە

هەینی ٢٠١١.١٠.٢٨ کومپانیا تورکییەکان دوو جار غەشمان لێدەکەن!
نها قسەوباسی جۆراوجۆر لەبارەی ئەوەی لە شاری وانی کوردستانی باکوور ڕوویدا دەکرێت. لەوانەیش مەسەلەی غەشی کومپانیاکانی بیناسازی ئەو وڵاتەیە. ئەم غەشەیش هەموو هۆکان نییە بەڵکوو یەکێکە. ئێمە ئەم یەکە بگرین، وەک دەزانیین، هەر ئەو کومپانیا غەشاشانەیە کە لە وڵاتەکەماندا (هەرێمی کوردستان) خەریکی کارن و تا ئاستێک کۆنترۆڵی ئەو بوارەیان لەدەستدایە. جا ئەو خاوەن کومپانیا غەشاشانە خیانەت لە هاوڵاتی خۆیان لەبەر خاتری گیرفان و قازانجی خۆیان بکەن، ئەبێ لە وڵاتێکی دراوسێ کە بەجۆرێک لە جۆرەکان بە دوژمنی دەزانن گەر لەلای خۆیان جارێک ئەو کارە بکەن، بێگومان لە هەرێمدا دووجار غەش دەکەن، خوانەکردە گەر بوومەلەرزەیەکی بچووک ڕوو بدات بێگومان داری ئەو ئاپارتمانەنە بەسەر بەردییەوە نامێنت، وەک دەڵین بە فوویەک دەروخێن. کەواتە کاتی چاوخشاندنەوە بەکاری ئەو کومپانیا تورکیانە نەهاتووە؟ نەبێتە قسەکەی سەرۆکوەزیرانی تورکیا کە وتبووی چاو بە غەشی و کاری ئەو کومپانیانەدا دەخشێنینەوە، لێپرسینەوەی تووندیان لەگەڵدا دەکەین، ئەگەر هاتوو ببێتە هۆی دۆراندنم لە هەڵبژاردنەکاندا. ئیتر نازانم سیاسییەکانی هەرێم ئازایەتییەکی لەو شێوەیە لە خۆ نیشان دەدەن؟

هەینی ٢٠١١.١٠.٢٨ چیرۆکی زۆر کورت!
-: نۆێژ دەکەیت؟
-: دەمێکە نەمکردووە. چوونکە خاڵە کەریم  بەهانامەوە نەهاتووە، بۆیە وازم لێهێناوە. لەم وڵاتە مەلا و ئایەتووڵا و سیاسییە تاوانبارە جۆراوجۆرەکان کە فرە زۆرن، یەکسانن.
-: خەون دەبینی و هیواو ئاواتت هەیە؟ بیرت لە دواڕۆژت کردۆتەوە؟
-: نەخێر! ئەی تۆ؟
-: دواڕۆژ، ئەوەیە لەگەڵ کەسێکدا بژیم کە مردم، بێتە سەرگۆڕم و گوڵێک بەحوزنەوە دابنێت.

دووشەممە ٢٠١١.١٠.٢٤ کورد ژێردەست لاسایی نەتەوەی سەردەست دەکاتەوە!
بەشی زۆری قسەکانی ئەو بەرپرسە حیزبییە (نێچیرەوان: ئه‌گه‌ر ده‌تانه‌وێ كێشه‌كه‌ چاره‌سه‌ر بكه‌ن، نزيكترين ڕێگه‌ی چاره‌سه‌ری PKK و ئۆجالانه‌ و ده‌بێ له‌ گه‌ڵ ئه‌واندا ڕێك بكه‌ون و جگه‌ له‌مه‌ هيچ ڕێگه‌يه‌كی تر بۆ چاره‌سه‌ری سه‌ركه‌وتوو نابێت. ) بەرگریکردنە لە باڵی تووندڕەوی کوردانی باکوور کە موتەمەسیلە بە پێ کە کە و عەبدوڵا ئۆجەلان. ئەگەر سەرۆک شارەوانی و ئەندام پەرلەمانەکان بە باڵی سیاسی ناو ببەین و دەربڕینێکی گونجاو بێت، ئەوا کوردی باشوور دەبێت بە حکومەت و ئۆپۆزسیۆنەوە پشتیوانی ئەو باڵە فەرمییەی ناو خۆی وڵاتەکە بکەن، نەک لە هەوڵی لاوازکردنیدا بن!
دیقەت بدە چاودێر و سیاسییەکان بەگشتی لایەنگری پرۆسەی چاکسازی ئۆردۆگانن بەتایبەتی کرانەوەی بە ڕووی کورددا، بەڵام لایەنگری ئەو حیزبە تووندڕەو و لەشکر و جەنەڕاڵەکان نیین. ئەم هاوکێشەیەی نەتەوەی باڵادەستی تورک سەیر دەکەیت لە نێو نەتەوەی ژێردەستی کورد هەمان هاوکێشە ڕەنگیداوەتەوە. لە زۆر خاڵدا سیاسییەکانی کورد لەناوخۆ کارێک دەکەن، خێرا باڵە سەربازییەکە وەک لەشکری تورکیا ڕێسێکە دەکانەوە بەخوری یان گرێوگۆڵیان بۆ دروست دەکەن! بۆیە لە ململانێیەکی وادا وەک چۆن کوردی باشوور بەشێوەی جۆراوجۆر دژ جەنەڕاڵ و حیزبە تووندڕەوەکان نەیاری پیشان دەدەن، بەهەمان شێوە باشترە هەمان هەڵوێست لەبەرانبەر جەنەڕاڵە کوردەکان هەبێت، هەر لایەنگری و پشتیوانییەک لێیان، کفری سیاسی گەورەیە.

سەرچاوی هەواڵ: ماڵپەڕی پەیام نیوز

یەکشەممە ٢٠١١.١٠.٢٣ کوشتنی قەزافی و هەڵوێستی نابەجێ!
کوشتنی ئەو کابرا دیکتاتۆرە (موعەمەر قەزافی) بەو شێوەیە جوان نەبوو وەک چۆن هێنانی حوسنی موبارەک لەسەر نەقالەی خەستەخانە بۆ ناو هۆڵی دادگا، بەڵام لەم وردە هەڵوێستانەدا ڕووی ڕاستی فڵان فیسار مرۆڤی خۆ بەئۆپۆزسیۆنزان ئیتر چەپ یان ڕاست بێت دەردەکەوێت! کە دەمیان دەکەیتەوە دانی خێر بەکەسدا نانێن غەیری خۆیان نەبێت، شتێکی واش ڕوو دەدات دەکەونە پاڕانەوە, گوایە ڕووی مرۆڤدۆستییان دەردەخەن! دەکرێت بە شێوەیەکی تر ئەو ڕووداوە بخوێندرێتەوە کە ئەو کووشتنە پەیامێکە بۆ هەموو ئەوانەی بەجۆرێک لە جۆرەکان دەستیان بەدەسەڵاتەوە گرتووە، بە ئامان و زەمان لێی نابنەوە و لەبەرانبەریدا هیچ خزمەتگوزارییەکیش پێشکەش ناکەن و بەئاگر و ئاسن وەڵامی ئۆپۆزسیۆنی خۆیان دەدەنەوە..
ئەو کارە مانای وا نییە کە ڕاستوچەپ بەسەر هەوڵی ملیۆنەها مرۆڤی لیبی بۆ ئازادی و ڕزگاری بهێنن و ڕمڵ بۆ ئایندەیان لێبدەین بە ڕەش و ناشرین و دزێو بیان بینین. هەر لە ئێستاوە لەبەرچاومان بکەوێت، بە دیکتاتۆری هاوشێوەی قەزافیان دابنێن. پارانەوە بۆ دیکتاتۆرەکان لەپای چی؟ ژیان هەرگیز ڕاستە ڕێ نەبووە؟ هەمیشە کارە جوان و ناشیرنەکان نەقیزەکەی خۆی لەهەناویدا هەڵگرتووە. کەواتە با هیچ نەکرێت و ئەو دیکتاتۆرانە درێژە بە دەسەڵاتی خۆیان بدەن!!


چوارجشەممە ٢٠١١.١٠.١٩ کورد و مێژووی تاریکی ئیسلام!
بە بەرگرکردن لە مەلا بەختیار نەبێت، وەڵامدانەوەی ئەبوبەکر جێی پەسەند نییە، لەو سەردەمەدا کورد لەنێوان بەرداشێکی نەخوازراودا بووە، بەشێک بووە لە ئیمپراتۆرییەتی ساسانی کە داگیرکەری کوردستان بوون، ئەگەر لەشکری داگیرکەری عەرەبە دەشتەکییە ئیسلامییەکانیان گۆڕیبێتەوە بە ساسانییەکان، لەو مەبدەئەوە بووە کە دوژمنی دوژمنەکەم دۆستمە. هاوکات باجدەرێکیان گۆریوەتەوە بە باجدەرێکی دی. کەواتە هەردووکیان نەفرەتی بوون بەنیسبەت کوردەوە، نەک ئەویان خۆشەویست ئەویان فریشتە و هەڵپەی ئەوەیان کردبێت بە سەرمەقولات بەرەو لای ئەو ئاینە بڕۆن.
بەداخەوە لەو خاڵەدا ئه‌بوبه‌كر عه‌لی‌ (ئه‌ندامی‌ مه‌كته‌بی سیاسی یه‌كگرتووی‌ ئیسلامی‌‌ كوردستان) ئایدۆلۆجیای ئایینی ئیسلام بەرچاوی لێڵکردووە. ئەو، لە دەڵاقەی داگیرکەرە ئیسلامییەکانەوە بۆ مێژوو دەچێت!! بەشێک لە تەوژمی ئیسلامی سیاسی هەوڵ ئەدەن مێژووی ئیسلام بە ناشیرنییەکانیشیەوە لە خەڵک بە جوان پیشان بدەن!!

پێنجشەممە ٢٠١١.١٠.١٣ کوردبوون عەزابە عەزاب!
پ/ ئەگەر شانازی بە کوردبوونتەوە دەکەی، هۆکەی چییە؟
و/ وەڵامدانەوە قورسە،، کوردبوون لە زۆر خاڵدا مایەی سەرئێشە بووە، کێشەی درووستکەر بووە، خودایە نەدەکرا کورد نەبوومایە، یادگارەکانم هەر لە منداڵییەوە بۆ نموونە هونەر و مۆسیقا هێندەی عەرەبی و تورکی و فارسی بووە، نیو هێندە کوردی نەبووە، لە دەرەوەی زێدی لەدایکبوونش کە لەڕاستیدا دەرەوەی وڵاتیش نییە و نامۆ بووین، بێ پێناس وەک قەرەج واین، دەبێت بڵیم عێراقین وەک لەوەی کوردستانی خۆ بناسێنین.. بەڵام لەگەڵ ئەوەشدا ئەوە لەعنەت و نەفرەتی مێژووە بەدوامانەوە، هەرچی بکەین لێمان نابێتەوە، خۆ ناکرێت نەهی بونی بکەین بۆیە دەبێت بڵێن کوردین و بەکوردی دەژین و بەکوردی دەدەین وەڵامی قەبرمان.

کەسانێک هەن هەر زۆر شوڵی لێهەڵدەکێشن، بە زمانی کۆمۆنیستە ڕادیکاڵەکان دەپەیڤن دەفەرموون: ( بۆ دەبێ مرۆڤ شانازی بە نەتەکەیەوە بکات. لەکاتێکدا ئەو نەتەوەیە بۆ مرۆڤایەتی دارێکی نەخستۆتە سەر بەردێک) سادەترین وەڵام بۆ هێشتوویانە سەر دەربهێنێت تا بەرد بخاتەسەر بەرد؟ سەرەتای بێ شەخسیەتبوونی کورد دەگەڕێتەوە بۆ ئایدۆلۆجییەکی شموولی وەک ئایینی ئیسلام، بۆیە ئەو ئایینە و نموونەی هاوشێوەی ئەو، مایەی نەفرەتە... نا کورد وەک مرۆڤ و هەر گەل و میلەتێکی تر دەتوانێت بەهەوڵەکانی گەر دەرفەتی شایستەی بۆ برەخسێت مرۆڤایەتی جوانتر بکات. کەلی مرۆڤایەتی لەوەدا دەردەکەوێت کە گەلانی هاوشێوەی کورد نەهێلراوە بەهەر بیانوویەکەوە بێت، دەوری شایستەی خۆیان لە بوار و کایە جیاوازەکاندا ببینن.

دووشەممە ٢٠١١.١٠.١٠ نموونەی ناسیۆنالستێکی تێکشکاوی خۆ بە فریشتەزان!
ڕۆتردام. لەیلا زانا، وتی:جاری وایە بیر لەوە دەکەمەوە، ئەگەر دەرفەت بوایە لە نێوان دوو ڕێگادا یەکیان هەڵبژێرین، باشتر بوو داگیرکراو و زۆرلێکراوبین، یان داگیرکەر و زۆردار؟ من ڕازیم بەوەی خاکی کەسمان داگیر نەکرد، وڵاتی کەسمان نەسووتاند و، ژن و منداڵی خەڵکی دیکەمان قڕ نەکرد. مندالەکانمان سبەینێ، دەتوانن سەریان بەرز ڕابگرن و بڵێن دایک و باوکمان، ڕەگەزپەرست و داگیرکار نەبوون و خەباتکاری ئازادی بوون.

نا ئەو دەربڕینانەی لەیلا زانا بیانووی ناسیۆنالستێکی تێکشکاوە، ئەگیان کام ناسیۆنالیست کە بەهێز بووە، زەبری لە نەتەوەی ژێردەستی خۆی نەداوە؟ یان کام ناسیۆنالیست هەیە کە ڕقی لە دراوسێکەی نەبێت کە لە نەتەوە و ڕەگەزێکی ترە؟ لەرۆژهەڵاتدا ناسیۆنالستەکان زۆر دڕترن لە ناوچەکانی دی دنیا. هێشتا لە دەسەڵاتدا نین، هەڵسووکەوتی ناسۆنالیستێکی بەدەسەڵات گەیشتوو دەنوێنن!! هاوکات ئەو جۆرە لە پەیڤین گوزارشت لە دوو ڕووی و دەجەلێک دەکات کە لەبەرانبەر ئەورووپاییەکاندا دەیکەن و دەینوێنن.
ئەوەیان شتێکی ترە، لەیلا زانا قابیلە لەبەرانبەر ئەو جەماوەرەی کوردستانی باکووردا خۆی وا پیشان بدات، نا ئەوە ئەوانن دەنگی پێدەدەن و ئەوە نانی ئەوانە دەیخوات. ئەمەیش بۆ خۆی دووڕووییەکە. ئەوە زەمێکی بێتامە و سیاسەتێکی دەرەکییە و زۆر جێی بڕوا نییە، ناسیۆنالستەکانی ئێستا و بەر لەویش پەنای بۆ دەبەن و بردووە. قابیلە لەشوێنی گشتیدا داخویانی توندوتێژ دەرببڕێت؟ ناسیۆنالستە ژێردەستەکان هەمیشە وەک مەر خۆ پیشان دەدەن.

یەکشەممە ٢٠١١.١٠.٩ کەی دەگۆڕێت؟
-: ئایا ئەو هەرێمی کوردستان چەند ساڵی دەوێت تا وەک میسر و تونس و لیبیا و.. لەژێر چەکمەی یەکێتی+پارتی ڕزگاری بێت؟
-: پەیوەندی بە شێلگیری ئۆپۆزسیۆنەوە هەیە، گۆڕاوە و گۆڕانێک ڕوویداوە، بەڵام ئەوە نییە زۆر جێی دڵخۆشی بێت. ئەگەر ئۆپۆزسیۆنیش نەبێت ئەوان (یەکێتی+پارتی) بەهۆی ڕووداوەکانی دەورووبەر و ناوچەکەوە، لە ترسی کورسییەکانیان دەجووڵێن..ئیتر بابزانیین چۆن دەبێت و چۆن دەڕوات....

هەینی ٢٠١١.١٠.٧ شەهیدکردنی مشعه‌ل ته‌ممۆ!!
کوردەکانی ڕۆژئاوا خەریکەن بەدەردی کوردەکانی ڕۆژهەڵات دەچن و سەرکردە دیارەکانیان تیرۆر دەکرێت. دەسەڵاتی سووریای عەرەبی و ئێرانی فارسی هاوپەیمانن، پێدەچێت لە دژایەتی کردنی ئۆپۆزسیۆنی کورد هەمان ڕێچکە و هەمان تاکتیکیان گرتبێتە بەر!!!! بۆیە کوردانی رۆژئاوا ئەم دەگە نامەردانەیە دەبێت لەبەرچاو بگرن، نەهێڵن سەرکردەکانی تریان شەهید بکرێت.. جێی داخی گەورەیە...

هەینی ٢٠١١.١٠.٧
لاپەرەی دزێوی بنەماڵە ناودارەکانی کورد
بۆ داکۆکیکردن له‌ جووتیارانی عه‌ربه‌ت، شیوعییه‌کان له‌ سلێمانی خۆپیشاندان ده‌که‌ن! شێخ له‌تیفی شێخ مەحموودی حەفید ته‌قه‌یان لێ ده‌کات، نووسه‌رێکی ناوداری سلەیمانی کە ئێستا لەژیان ماوە، هەڵگری بڕوانایەکەی گەورەیە. داکۆکی له‌و هه‌ڵویسته‌ی شێخ ده‌کات، گوایە شێخ نیوه‌مه‌ست بووە! بۆ گاڵته‌ ته‌قه‌ی به‌ ئاسماندا کردووه‌. بەدەسکارییەوە لە وتاری نووسەرێکی دەرباری زۆنی زەردەوە وەرگیراوە.
ئەوەی کە بەپێچەوانەی گوایە شێخ لەتیف لایەنگری لە شوعییەکان کردووە شتێکی وام بیستووە کە موتەعاتف بووە، جا نازانم شێخ لەتیف یان شێخ کاوەی کوڕی بووە؟ چوونکە باش بیرم نییە، کەسە شیوعییەکان دەچونە ماڵیان. ئەم نووسەرەی کە من بابەتەیەکم لێوەرگرتووە، خۆی کۆنە تەحریفی بووە، ئێستا لەباوەشی بنەماڵەی بارزانیدایە، ئەوەیشی (د. عیزەدین مستەفا رەسووڵ) کە ئەو ڕووداوەی گێڕاوەتەوە، وەک ئاماژەم پێکردووە، نزیکبوون لەو جەماعەتە تەحریفییەوە، شەهادەکەی لە ڕووسیا بەدەستهێناوە، من بۆیە نووسیوومە نووسەری دەرباری زۆنی زەرد لەبەر ئەوەی گۆمانم لە قسەکانی هەیە، ئەو بەدەگمەن بەباشە باسی نووسەر و کەسایەتیەکانی سەنتەری سلەیمانی دەکات، خۆشی خەڵکی پارێزگای سلەیمانییە و شوهرەتی ناوچەیەکی وەک پاشگر هەڵگرتووە.
د.عێزەدین، کتێبێکی وەک بیرەوەری دەرکردووە، مێژوونووس نییە، زیاتر ئەهلی ئەدەبە و لێکۆڵینەوەی ئەدەبییە و ماوەیەکی زۆرە لە ڕۆژنامەی ئاسۆ ستوونێکی زمانەوانی هەیە.
مێژوونوسیش جۆری زۆرە، بەداخەوە، دکتۆر کەمال مەزهەر لەدوای ڕاپەڕینەوە و تێکەڵبوون و نزیکایەتی لەگەڵ حیزبە فەرمانڕەواکان، زۆر بەرباد بووە!! جێی بەزەییە. هەوڵ و کتێبە باشەکانی کۆنیشم لەبەرچاو کەوتووە..

سێشەممە ٢٠١١.١٠.٤ ئۆپۆزسیۆن بۆ کورسی حکم هەوڵ نەدا چی بکات؟!
ئۆپۆزیسیۆن بەدوای کورسیەوەیە بەتەنها و بەس، نەوەک بەرگری لە خەڵک.
دیدێکی لەم جۆرە ئاڵا هەڵگرانی لەناو کۆمەڵگادا زۆرە. خۆ لە ڕاستیدا بەشێکی لە شوێنی خۆیدایە، خەڵک بۆ ناڕەزایەتی دەکات تا ژیانی باش بێت ژیان باش بوون ئەو کورسییەیە یان یەکسانە بەو کورسییە، کە ئەو بەشە خۆ بەئۆپۆزسیۆنی ئۆپۆزسیۆنە دەڵێن ئۆپۆزسیۆن بەدوایەوەیەتی. دەربرینی ڕەشبینانەی وا دەمانگەیەنێتە چی؟ ئۆپۆزسیۆنی نها چەند تەوژم و ئاراستەیەکن لە کێبڕکێیەکی سەختان لەگەڵ لایەنی بەرانبەر (یەکێتی+پارتی) بۆ بێئەهەمییەت کردنی داواکانیان هەمیشە لەم جۆرە تۆمەتانە و ئاوازانەیان ئاڕاستە دەکات.

سێشەممە ٢٠١١.١٠.٤ بەتاڵکردنەوەی سحر!
نا نا ئەو ڕاپرسییە ئەنجامەکانی جێی گومانە، دەزانن بۆ چوونکە لە دێڕێکدا نووسراوە (كه‌ناڵی‌ NRT تێچووی دارایی ئه‌نجامدانه‌كه‌ی‌ له‌ ئه‌ستۆگرتوه‌) ئەمە بۆیە کەناڵەکە لەو ڕاپرسییەدا یەکەمی هێناوە. ئەم مەسرەف کردنە بۆ؟!! من بۆ خۆم یەکێکم لە بینەرانی کەناڵەکە، بەڵام هەست دەکەم خەلەلێک و فێڵێک لەو ڕاپرسییەدا هەیە.. ئیتر چۆن کراوە، پێویست بە ڕوونکردنەوە دەکات. مەترسی کارێکی وا لەوەدایە کە ئەم کەنالە ئیعتبارێکی باشی هەیە و ڕاستگۆیی و بێلایەنی پێوە دیارە و قایلی پشتیوانییە، نابێت لەبەر ئەوەی خۆی پارەی داوە و مەسرەفی کردووە ئەنجامەکانی بەلای خۆیدا دابشکێنرێت.
لە ناو ئەو ڕاپۆرتەکەدا کە ماڵپەڕی کەناڵی NRT خۆی بڵاویکردۆتەوە، یەک دێڕ وەرگیراوە، هەموو داوەرییەکە یەکسان دەکاتەوە بەسفر، سحری ئەو دەزگایەی کە هەڵساوە بە ئەنجامدانی ڕاپرسییەکە بەتاڵکردۆتەوە.
تێکستی ڕاپۆرتەکە لێرەدایە

دووشەممە ٢٠١١.١٠.٣ سروودی ئەیرەقیب وەک قورئان ناگۆڕدرێت!
ئەو داوایە زۆر ڕوون و ئاشکرایە، هێرش نییە، سروودی ئەیرەقیب وەک قورئانی موسڵمانانی لێهاتووە کەس جەرائەت ناکات بیگۆڕێت! خۆ زۆر باشە سرودێکی ناوچەیی بەتەنیشت ئەیرەقیبەوە دابنرێت. کەواتە پێویست دەکات نەک ئەوە بگۆڕدرێت، بەڵکوو ئاڵای هەر پارچەیەکی کوردستان جیاواز بێت. بەمەرجێک لەسەر بنەمای ئاڵا کۆنەکە هەستابێت. لە ڕاستیدا و لە ئاستی فەرمیدا وەک دەبینرێت ئەو ئاڵایەی ئێستا لە هەرێمی کوردستان هەڵکراوە، بۆتە موڵکی هەرێم و باشوور لە ئاستی دنیا دانپیانراوە، کەواتە ئەم داوایە زیاتر سەروچاوی کوردی پارچەکانی تر دەگرێتەوە. نابێت ئەوە فەرامۆش بکرێت سروودی ئەی رەقیب، تێکست و ئاوازەکەیشی هی خەڵکی باشوورە، مەعقول نییە دەستبەرداری بن. کەواتە لەمەشدا پارچەکانی دی دەبێت مشوری سروودێکی نوێ بۆ خۆیان بخۆن.
سەرچاوە: ماڵپەڕی ڕۆژنامەی ستاندار. یاداشتی ٢٢ پەرلەمانتار لەبارەی گۆڕینی سروودی ئەیرەقیبەوە

دووشەممە ٢٠١١.١٠.٣ وازهێنانی تاکتاکی پەرلەمانتار، بێسەمەرە!
تاک تاک دەست لە کارکێشانەوە سوودی نییە، کاردانەوە و جەنجاڵ دەخولقێنێت، بەڵام کاریگەری ئەوتۆی نابێت، ئەوە یەکێتی دووهەمین پەرلەمانتارییەتی لەدوای دادوەر ڕزگار وازدەهێنن. بۆ خۆی هەڵوێستی مەردانەیە، دەستبەرداربوونە لە کارێکی مووچە گەورە و درێژماوە. گەر فراکسیۆنێک یان بەکۆ فراکسیۆنەکانی ئۆپۆزسیۆن لە پەرلەمان بێنەدەر ئەوا فەرتەنە ڕوو دەدات، بەڵکوو لەوانەیە ببێتە هۆی کەوتنی حکومەت و هەڵوەشانەوەی پەرلەمان.
تێکستی هەواڵەکە لە ماڵپەڕی ڕۆژنامەی هاوڵاتیدا

دووشەممە ٢٠١١.١٠.٣ نهێنییەکانی سەردەمی سۆڤییەت!
ئەو کارەی ماڵپەڕی ویکلیکس کردی لە ئاشکراکردنی نهێنییەکانی دبلۆماسکاران وەک بۆمێک وابوو لە گۆمێکی لیخندا، بووە سەرباشقە تا خەڵکانی تر بەو ڕێچکەیەدا بڕۆن، وەک لەم لینکەدا دەبینرێت، ڕووسەکان ڕاپۆرتە نهێنییەکانی سەردەمی حوکمی بەناو حوکمی سۆسیالیستی لە سۆڤییەتی کۆندا هەڵدەدەنەوە، کە چی تیا گوزەراوە. مشتێک لەخەروارێک ئەوەیە: لەدوای جەنگی جیهانی دووهەمەوە، بۆ دروستکردنی هێڵێکی شەمەندەفەر، دیلەکانی جەنگیان بەکارهێناوە، لە ئەنجامدانی ئەو کارەدا نزیکی ١٥٠ هەزار دیل مردوون!!
سەرچاوە: ڕۆژنامەی ئیڵتا سانۆماتی فینلاندی

یەکشەممە ٢٠١١.١٠.٢
مالکی بەتەمایە هەمووی لووش بدات!
ئەو مالکییە کەری کوێیە؟؟!! کورد دارێکی بەدەستەوەیە هەردوو سەرەکەی پیسە، بەڵام ئەو نامەیەی مالکی ئەگەر ڕاست بێت(..بەرژەوەندی‌ عێراق بخرێتەسەرو بەرژەوەندییە شەخسی‌‌ و نەتەوەییەكانەوە..) قسەیەکی بێمانایە بەرژەوەندی عێراق بخرێتە سەر بەرژەوەندی نەتەوەیی.. !!! عێراق بە نەتەوەکانی عەرەب و کورد و تورکمانەوە عێراقە.. دیارە ئەو لەبەر ئەوەی نوێنەری حیزبێکی شیعییە زیاتر مەبەستی عێراقی شیعییە نەک شتێکی تر، بەو بیانووە دەیانەوێت هەموو لوش بدەن!!
تێکستی هەواڵەکە لە ماڵپەڕی ڕادیۆ نەوای کوردی

شەممە ٢٠١١.١٠.١
ڕاگەیاندنی ئۆپۆزسیۆنی ئاخر زەمان!
ئەم ماڵپەڕەی (کۆمەڵنیووز) ئەو ڕاپۆرتە وێنەییەی سەردانی مەسعود بارزانی بۆ نەمسا داناوە و بڵاوکردۆتەوە، ڕۆژنامەی خەبات و گۆڤاری گوڵان و کوردستان تیڤی نییە کە ڕاگەیاندنی حیزبەکەی ئەو بەناو سەرۆکی هەرێمەیە. ئەمە یەکێکە لەکەناڵەکانی ڕاگەیاندنی ئۆپۆزسیۆن بەناوی کۆمەڵەی ئیسلامییەوە.. زوو تەسلیم بوونەوە یان ئەوەتا پیاوانی پارتی لەنێو ڕاگەیاندنی کۆمەڵی ئیسلامیدا خۆیان حەشار و مەڵاسداوە!! هاهاهاهاها
ئایا ئەوە ئەرکی ئۆپۆزسیۆنە دەهۆڵی وا لێبدات بۆ موخالفینی؟! ناکرێت ڕاگەیاندنی ئۆپۆزسیۆن وەک رکەبەرەکەی کە لە دەسەڵاتدایە هەڵسووکەت بکات و وێنەیەکی تەبقلئەسڵی ئەو پیشانی خەڵکی بدات؟.. خۆدوورگرتن لەهەڵەی وا هەیبەت و ئیعتباری زیاتر دەدات نابێتە هۆی دروستکردنی گومان لە ڕاستگۆیی ئۆپۆزسیۆن.
هەڵەی لەم جۆرە نەک عەیب بەڵکوو بە قەولی موسڵمانان کفرە، بەتایبەتی بۆ ڕاگەیاندنی دەرەوەی حیزبە فەرمانڕەواکان بڵاوی بکەنەوە... لەجیاتی ئەوە دەبێت بەر رەخنەی بدەن یان گومان لەسەر ئەو کارانەی پیاوانی حکومەت دروست بکەن. لە فینلاند بۆ خوێی چێشت هەواڵێک لەسەر سەرۆککۆمار نادۆزیتەوە، مەگەر زۆر شاز بێت، ئەو جۆرە هەواڵانە تەنها لە ڕاگەیاندنی فەرمی حکومەتدا دەبینرێت...
لەوانەیە بڵێن بۆیە بڵاومان کردۆتەوە تا پیشانی بدەن، کە لە سەردانێکی تایبەتی دەچێت وەک لە سەردانی فەرمی، و ئەوە لایق بە سەرۆکەکان نییە. بەڵام ئەم بانووە وەک ئەوە سەردانەی وواشنتۆن نییە کە نێچیری برازای لەگەڵ خۆیدا بردبوو، کۆن و سواوە و ناگونجێت.. پێدەچێت ڕاگەیاندنی کۆمەڵەی ئیسلامی لێی تێکچوو بێت و وابزانێت ئەوان لەسەر حوکمن و وێنەی سەرۆکی حیزب و وڵاتەکەیان بڵاودەکەنەوە.. هاهاها
تکایە بفەرموون بۆ بینینی ڕاپۆرتە وێنەییەکە لەم لینکەدا
ئەم تێکستە لەماڵپەڕی کوردستان پۆست بڵاوبۆتەوە